Efesios 4:31 - Xochapa Mixteco

³¹ Ta vaꞌa ndindoso ini ndo xaꞌa ya väꞌa i̱kan naꞌa xiꞌin ndo. Ndiꞌi ya ndee ni kini sáa ini ndo, xiꞌin ya ndúkueꞌe ni ini ndo, xiꞌin ya ndee ni ndáꞌi ndo nuu taꞌan ndo, xiꞌin ya kánaꞌa ndo xaꞌa na taꞌan ndo tin ndiꞌi ka ya väꞌa ndíkani ini ndo.

Efesios 4:31 Mawu Ofanana

Los Hechos 21:30

Ñaa iin ndi̱katin ndiꞌi na ñuu Jerusalén, sáa ka vi na ñaa ti̱in na ra Pablo yeꞌe veꞌe ñuꞌu. Saa ta̱va na ra ñúu ndai na ra kuaꞌan ra. Tá ke̱ta soꞌva ra i̱kan na, ta ndi̱kun ndi̱kasi na yeꞌe veꞌe ñuꞌu.

ROMANOS 3:14

Nina tuꞌun väꞌa ya távi chiꞌña na naꞌa kua kána koo yuꞌu na, saa káꞌan kini ni na ya sáa ini na.

1 Corintios 14:20

Ñani yo, vaꞌa ndikani ini ndo tá kuꞌva ndíkani ini naꞌa, na xa xuxa ini, ta ndïkani ini ndo tá kuꞌva ndíkani ini na vali xaꞌa ñaꞌa ya káꞌan i xiꞌin ndo. Ndisaa nuu ya väꞌa ná koo naá ni ini ndo tá kuꞌva naá ni nuu na vali nuu ya väꞌa, saa ná koo ndo.

1 Corintios 5:8

Yakan kua xíniñuꞌu yo sindoo yo ndiꞌi ya väꞌa ikán yo, saa koo yo tá kuꞌva kúni mií Ndioxi, nduu yo tá íin naꞌa, na ndixa ni ndaa ini, na ndǎku ini. Tá ná ikan yo saa kua nduu yo tá íin naꞌa, na táva viko pascua nuu xíxi na xita vaꞌa ya köo uxan iya yata xiꞌin, chi uxan iya yata kua káa tá káa ndiꞌi nuu kuachi ya kini ni káa.

2 Corintios 12:20

Ta yeꞌe, ta ndíꞌi ni va ini i tá ná xaa i koto i ndóꞌo̱, chi sana ndïtaꞌan i ndóꞌo̱ tá kuꞌva ndíkani ini i nditaꞌan i ndóꞌo̱, án sana ndïtaꞌan tu ndóꞌo̱ va yeꞌe tá kuꞌva ndíkani ini ndo nditaꞌan ndo yeꞌe. Saa ndíꞌi ni ini i xiꞌin ndo chi sava ndo ta án sana kánitaꞌan va ndo, ta sava tu ndo án sana kûní tu ini ndo xíni taꞌan va ndo, ta sava tu ndo án sana sáa ini ndo xíni taꞌan va ndo, ta sava tu ndo án sana ta̱ꞌvi taꞌan va ndo, saa tu sava ndo án káꞌan kini ndo xiꞌin taꞌan va ndo, sava tu ndo án sana kánaꞌa ndo xaꞌa taꞌan va ndo, ta sava tu ndo án ndee ni kútai ini ndo nuu taꞌan va ndo, saa tu sava ndo án sana ndu̱u iku ni ini va ndo xiꞌin taꞌan ndo.

Gálatas 5:20

saa tu na káñuꞌu ni ndioxi ya siki, xiꞌin na xíka nuu na tási, saa tu na kúndasi nuu xíni taꞌan va na, xiꞌin na káni taꞌan xiꞌin taꞌan, saa tu na xáa kuiñu taꞌan, xiꞌin ya ndee ni sáa íni na xíni taꞌan na, xiꞌin ya íyo na kuachi xiꞌin taꞌan na, tin ya táva na kuachi xiꞌin taꞌan na, saa táꞌvi taꞌan na,

Efesios 4:22

Xaꞌa ya ñaa kua köo ka ndo tá kuꞌva ndi̱xiyo ndo yachi. Vaꞌa sindoo ndaꞌa ndo kuꞌva yata ya ndi̱xiyo ndo, chi ya ikán ta kúni ya sindaꞌvi ya ndóꞌo̱ ya xaa súvi ndo ya kúni mií ya.

Efesios 4:25

Xaꞌa ya ñaa kua ndïtuꞌun ka ndo tuꞌun vata. Vaꞌa ndi̱tuꞌun ndo nina ya ndaa xiꞌin taꞌan ndo, saa chi ndiꞌi yo kándixa ra, ta tá káa ikin kuñu mií ra saa íin ndiꞌi yo.

Efesios 4:26

Yakan tá xáa ndo sáa ini ndo xiꞌin taꞌan ndo, ta vaꞌa kama sindiko ndo ini ndo, ta säa ndo inii nduvi ndaa xiꞌin taꞌan ndo.

Colosenses 3:19

Saa tu ndóꞌo̱ taa, ndo íyo yá síꞌi, kuꞌvi ni ini ndo kuni ndo yá síꞌi ndo, ta xäa nduvaꞌa ndo xiꞌin yá.

Colosenses 3:8

Ta vitin sindoo ndo ndiꞌi ya sáa ni ini íyo nima ndo, xiꞌin ya ndee ni kueꞌe ndo, saa tu ya ndíkani väꞌa ini ndo xaꞌa naꞌa, án ya ndee ni kini ndáꞌi ndo, xiꞌin ndiꞌi tuꞌun kini ni kána koo yuꞌu ndo káꞌan ndo.

1 Timoteo 3:11

Tá kuꞌva íyo nda taa, saa xíniñuꞌu koo tu ná ñaꞌa va. Köo xíniñuꞌu ná kaꞌan vata ná xaꞌa naꞌa, ta xíniñuꞌu ná ndi̱xita ná mií ná nuu ya väꞌa, saa xíniñuꞌu ná vií xa súvi ná ndiꞌi ndá ka chiñu ya káꞌan ná, saa kua vaꞌa kandixa naꞌa ndiꞌi ya káꞌan ná xiꞌin na.

1 Timoteo 3:3

Ta ná kuu nda taa, nda köo kútoo kaka koꞌo ndixi, ni küvi sa̱á kama ni nda án kanitaꞌan nda xiꞌin naꞌa, xíniñuꞌu nda kaꞌnu ni koo ini nda, ná sïkuaꞌa nda kuachi xiꞌin naꞌa, saa ná kütoo ni nda xuꞌun.

1 Timoteo 5:13

Ta süvi ndisaa ya ñaa kua ikan ná, chi kuni xúxan ná ta xaá ná kaka ná tá veꞌe, tá veꞌe. Ta süvi ndisaa ya xúxan kuni ná, ìyo ni kutoo ná kaka ná ndituꞌun vata ná, ta xáa ná kiꞌvi ná xiꞌin naꞌa, kaꞌan ná ya íin ya köo.

2 Timoteo 2:23

Ta küni soꞌo un ndá ka tuꞌun kíꞌvi ya káꞌan kuachi naꞌa xaꞌa, ya köo ndáa yaꞌvi káni taꞌan na xaꞌa. Saa chi ya ñaa, ta ya síkani taꞌan naꞌa va kua.

2 Timoteo 3:3

Ni küꞌvi ini na kuni na naꞌa, ta ni küaꞌa na xaa kaꞌnu ini na xaꞌa na taꞌan na, yáꞌa ni vata koo na, ta ni küaꞌa na kaꞌnu na mií na nuu ya väꞌa, yáꞌa ni iku koo na, saa kundasi nuu na kuni na ya vaꞌa.

Tito 1:7

Saa chi nda kúu xi̱ní xiꞌin na veꞌe ñuꞌu, ta xíniñuꞌu nda ndǎku ni koo ini nda xaꞌa ya ndíso chiñu nda xiꞌin chiñu Ndioxi. Ná chïnuu vaꞌa ni nda tuꞌun nda, ná säa kama ni nda, ná käka nda koꞌo nda, saa ná täva nda kuachi xiꞌin naꞌa, ta ná ïkan nda ndá ka ñaꞌa väꞌa ya kuu mií nda xuꞌun.

Tito 2:3

Ta kuꞌva saa sinaꞌa tu un ná kuꞌva yo ná nána chee xikuaꞌa, vií ná koo ná, ná koo ná xiꞌin ya toꞌo nuu Ndioxi. Kaꞌan xiꞌin ná, ná käꞌan vata ná xaꞌa naꞌa, ni ná küu ná ñaꞌa ndee ni kútoo koꞌo ndixi, xíniñuꞌu ná sinaꞌa ná ya vaꞌa.

Santiago 1:19

Ñani yo xiꞌin kuꞌva yo, yeꞌe ta kúni i ndituꞌun i xiꞌin ndo ya ná kundaa ini ndo ya xíniñuꞌu ni ndo sikuaꞌá ndo kuni soꞌo ndo ya káꞌan inka naꞌa xiꞌin ndo, xiꞌna kuni soꞌo ndo ya káꞌan na xiꞌin ndo, saa ndi̱kuiin ndo yuꞌu na. Ta säa kama ni ndo.

Santiago 3:14

Ni ndíchi ni va tu ndo, sundi tá kǔní ni ini ndo xíni taꞌan ndo, án káni taꞌan ndo xiꞌin taꞌan ndo, ta chïnuu vaꞌa ndo tuꞌun ndo ni sïndaꞌvi taꞌan ndo, chi köo íkan ndo ya ndaa xiꞌin taꞌan ndo.

Santiago 4:11

Ñani yo xiꞌin kuꞌva yo, käꞌan väꞌa ndo xaꞌa ñani taꞌan ndo. Chi ndiꞌi ndóꞌo̱ íkan saa, ta tá íin ndo xáa nani kuachi xiꞌin taꞌan ndo, saa íin ndo, tá káꞌan väꞌa ndo xaꞌa ley saa xáa nani ndo ya káꞌan ya. Chi tá káꞌan väꞌa ndo xaꞌa ya ta köo xáa súvi ndo ya káꞌan ya, saa ndúu ndo tá íyo na xáa nani ya káꞌan va ya.

1 Pedro 2:1

Xaꞌa ya ñaa kua sindikoo ndo ya väꞌa íkan ndo, sïndaꞌvi taꞌan ka ndo, köo ka ndo na uvi ini, ta ni kûni ini ndo kuni taꞌan ndo, ni käꞌan vata ka ndo xaꞌa taꞌan ndo.

1 Juan 3:12

Ná ïkan yo tá i̱kan ra Caín xinaꞌa, xa̱a súvi ra ya kúni kiti nǎꞌa chi xa̱ꞌni ra ñani ra. Xaꞌa ya väꞌa íyo ini ra yakan i̱kan ra saa, ta ya i̱kan ñani ra ta ya vaꞌa i̱kan ra.

1 Juan 3:15

Ndiꞌi na kúndasi nuu xíni taꞌan ta tá íin na xáꞌni ndìì saa íin na. Ta ndóꞌo̱ xa xíni ndo ndiꞌi na xáꞌni ndìì ta küchiñu na kutaku na xiꞌin Ndioxi nda iin tiempo.

El Apocalipsis 12:10

Saa xi̱ni soꞌo i tachi na nuu ndivi, ndee ka vi ndi̱kaꞌan ya káchi ya saa: Vitin ti̱ndaa kivi ya sikaku Ndioxi naꞌa, na ndíkun sata ra. Saa ti̱ndaa tu kivi ya sinaꞌa ra, ya iin mituꞌun mií ra kúu mií ndee ya chee ni. Ta vitin xáa ra kaꞌnda chiñu ra nuu ndiꞌi ni kúu na ñuu ivi. Saa tu Jesucristo, ra ti̱ꞌvi Ndioxi sikaku naꞌa, ndi̱kiꞌin ra ichí, íyo ya ndaꞌa ra, ya kaꞌnda chiñu ra nuu ndiꞌi ni kúu na ñuu ivi. Saa chi kiti nǎꞌa, ta xa ta̱va na ri nuu ndivi. Chi ri ikán ku ri táxi ni kuachi xaꞌa nda ñani yo xiꞌin kuꞌva yo, na ndíkun Tata yo Jesucristo. Nduvi niuun táxi ri kuachi xaꞌa na nuu Ndioxi.