Efesios 3:16 - Xochapa Mixteco

¹⁶ Xíkan ni i ya mani nuu ra ya ná taxi ra Tachi I̱í ra koo ya xiꞌin ndo, saa taxi ra ndee ndaꞌa ndo ya vaꞌa nduxuxa nima ndo xiꞌin tuꞌun ra, ta vaꞌa ikan Ndioxi saa xiꞌin ndo, chi ndee ya kúu mií ra ta chee ni ya ta ni köo ndíꞌi tu xaꞌa va ya.

Efesios 3:16 Mawu Ofanana

San Mateo 6:13

Täxi un ndikava nde ndaꞌa ya väꞌa, chindee un ndeꞌe nuu ya väꞌa. Chi yóꞌo̱ ku ra xáꞌnda chiñu, yóꞌo̱ ku ra kúu mií ndee ta ndiꞌi naꞌa xáa kaꞌnu yóꞌo̱ ndiꞌi saa kivi ya vaxi. Saa ná koo ya”. Soꞌva kachi ndo xiꞌin Ndioxi ―káchi Jesús xiꞌin na.

ROMANOS 2:29

Naꞌa na ndixa kúu judío ku naꞌa, na ndixa kándixa Ndioxi. Ta kúu mií na tuni Ndioxi ya ndixa ndaa kua kúu na, naꞌa na ndâku nima nuu ra. Chi mií Tachi I̱í Ndioxi kua ndi̱nama nima na yakan ndi̱kuiso vaꞌa ra na nuu mií ra. Ta süvi na ñuu ivi yóꞌó ku na ndíxaa saa, süvi mií na ku na ndíkuiso vaꞌa ñaꞌa, chi mií Ndioxi ku ra i̱kan saa xiꞌin na. Ndi̱kuiso vaꞌa ra na nuu ra.

ROMANOS 7:22

Ndinuꞌu ni va ini i kúsini i xíni i ley Ndioxi.

ROMANOS 9:23

I̱kan Ndioxi saa chi ku̱ni ra si̱naꞌa ra yoo ya ndee ni ndee kúu mií ra, ta kúndaꞌvi ni ini ra xíni ra yoo ndi̱kaxin ra niꞌi yo ya vaꞌa, ya luvi ni taxi ra ndaꞌa yo.

1 Corintios 16:13

Ñani yo xiꞌin kuꞌva yo, kuenta ni koo ndo, ta ndinuꞌu ni ini ndo kandixa ndo Tata yo Jesucristo. Kuu ïꞌvi ndo, ndaku koo nima ndo, ta tuun ni kundikun ndo Tata yo.

2 Corintios 12:9

Saa ndi̱kaꞌan ra xiꞌin i, káchi ra saa: “Vaꞌa ná kusini ni un, chi köo xíniñuꞌu un ya ñaa, ya kúꞌvi ni ini i xíni yóꞌo̱ kua xíniñuꞌu ni un, saa chi tá ndóꞌo un saa, ta saa kua ndúndee ka un xiꞌin ndee i ya ta̱xi i ndaꞌa un íyo xiꞌin un”, káchi ra xiꞌin i. Yakan vitin ta kúsini ni va i tá kúvita ni ini i, chi saa kua xíni i ya íyo ndee Tata yo Jesucristo xiꞌin i.

2 Corintios 4:16

Xaꞌa ya ñaa kua ni köo ndíkava ini nde ya xáa chiñu nde. Ya ndaa kua ikin kuñu nde ta iin iin kivi kuaꞌan ndíꞌi xaꞌa ya chi kúyata ya. Sundi ya vaꞌa nde, ta ndúu xa̱á ya iin iin kivi, ta saa ndúu ndee ka ini nde.

Efesios 1:18

saa ná ndikuná ra ya xínituni ndo ya kuchiñu ndo kundaa ini ndo xaꞌa ñaꞌa ya vaꞌa luvi ni, ya xa xa̱a vií ra taxi ra ndaꞌa naꞌa, na ka̱na ra kundikun ñaꞌa. Ta saa kua vaꞌa niꞌi ni ndo ya vaꞌa, ya ki̱ndoo ra taxi ra ndaꞌa ndóꞌo̱, na ñuu ra, na i̱í.

Efesios 1:7

Ta ya kuchiñu ra sikaku ra yoo kua cha̱ꞌvi Jesucristo xaꞌa kuachi yo xiꞌin nií ra nduta ndi̱xita nuu cruzin tá ndi̱xiꞌi ra. Saa ku̱u nuu ndi̱saña yo ki̱ndoo ndíka yo nuu ya väꞌa, ya xa̱ꞌnda chiñu nuu yo. Xaꞌa ya kaꞌnu ni ini Ndioxi kua i̱kan ra saa xiꞌin yo.

Efesios 2:7

I̱kan Ndioxi saa xiꞌin yo chi kúni ni ra ya kundaa ini yo xaꞌa ra kivi vaxi ya ndee ni vaꞌa ini ra xiꞌin yo, ta saa kúꞌvi ni ini ra xíni ra yoo tixin seꞌe ra Jesucristo.

Efesios 3:15

chi tixin mií ra kua níꞌi ndiꞌi yo ndóo ñuu ivi yóꞌó kivi yo ya ndaa, ta saa tu na ndoo nuu ndivi va.

Efesios 3:8

Vani köo ndáa yaꞌvi ni va i nuu ndiꞌi na ñani yo, na kúu ñuu Ndioxi, ta ta̱xi ra ichí ndaꞌa i ya kaꞌan ndoso i tuꞌun vaꞌa xaꞌa ra xiꞌin naꞌa, na köo kúu judío. Ta tuꞌun vaꞌa ni ikán, ta tá káa ya kuika ni saa káa ya, chi köo ndíꞌi xaꞌa ya.

Efesios 6:10

Ta ya si̱ndiꞌi i káꞌan i xiꞌin ndo kua, kundaa ni ini ndo kuni ndo ndee ya chee ni kúu mií Tata yo Jesucristo. Saa kuchiñu ndo ndundee ni ini ndo xiꞌin ndee ra.

Filipenses 4:13

Ta kúchiñu i xáꞌa ndee ini i xiꞌi ndiꞌi ni kúu va ya, chi Cristo ku ra táxi ndee ndaꞌa i yáꞌa i nuu iin iin ya.

Filipenses 4:19

Ta mií Iva i Ndioxi ku ra taxi ndiꞌi ñaꞌa ndaꞌa ndo ya xíniñuꞌu nuu ndo. Chi kuaꞌa ni ya kuika íyo nuu ra nuu ndivi, ta mií ra ku ra taxi ndiꞌi ñaꞌa ya kúmani nuu ndo ndaꞌa ndo, xaꞌa ya i̱kan Tata yo Jesucristo xaꞌa ndo.

Colosenses 1:11

Ta ná taxi ni ra ndee chee ni ya kúu mií ra ndaꞌa ndo ya ná kuchiñu ndo xaꞌa ndee ni ini ndo xiꞌin ndiꞌi ya uꞌvi ni vaxi nuu ndo.

Colosenses 1:27

Ta saa kua i̱kan Iva yo Ndioxi, saa chi ku̱ni ra ya ná kundaa ini na kúu kuenta mií ra xaꞌa ñaꞌa ya ndi̱xiyo sěꞌe xinaꞌa. Ta tuꞌun ra ya ndaa, ya chee ni, ya luvi ni, ta ya kuni soꞌo ndiꞌi ni kúu naꞌa kua. Ta ya káꞌan tuꞌun Iva yo xaꞌa ya ndixiyo sěꞌe yóꞌó kua: íyo Tata yo Jesucristo nima ndóꞌo̱ köo kúu judío vitin, ta kúndaa teꞌe ini ndo ya koo ndo xiꞌin ra nuu ndivi.

Colosenses 2:2

Saa ná taxi ni Ndioxi ndee ndaꞌa ndo ya xaꞌa ni ndo ndee xiꞌin taꞌan ndo xaꞌa ya kúꞌvi ni ini ndo xínitaꞌan ndo. Xaꞌa ya ñaa kua ndítuꞌun ni i xiꞌin ndo, ndíkani i nuu ndo chi kúꞌvi ni ini i xíni i ndóꞌo̱. Ta vaꞌa ná taxi ra ndukuika ni ndo xiꞌin ya ndíchi ni chi̱tuni Ndioxi ndi̱xiyo sěꞌe yachi, chi ya ndi̱xiyo sěꞌe ikán ku mií Tata yo Jesucristo.

2 Timoteo 4:17

Ni saa va i̱kan nda xiꞌin i, sundi mií Iva yo Ndioxi ku ra ndi̱xiyo xiꞌin i, ta̱xi ra ndee ndaꞌa i vaꞌa ndi̱kaꞌan ndoso i tuꞌun vaꞌa xaꞌa ra xiꞌin ndiꞌi naꞌa, na köo kúu judío, ta xi̱ni soꞌo na ya ndi̱kaꞌan i xaꞌa ra xiꞌin na. Ta mií ra ku ra si̱kaku yeꞌe ya ndi̱kaku i nuu naꞌa, na íin tá íin kiti ndikaꞌa, kiti kueꞌe ni.

HEBREOS 11:34

Xaꞌa ya xi̱ndaa ni ini na xi̱ni na Ndioxi yakan vaꞌa ku̱chiñu na nda̱ꞌva na ñu̱ꞌu̱ ya ndee ni xíxi, köo ndi̱xiꞌi na ini xitun nuu iꞌni ni. Ta sava na ndi̱kaku, köo ndi̱xiꞌi na kivi ku̱ni naꞌa kaꞌni ñaꞌa na xiꞌin i̱chi. Ta sava na ku̱u mií na ndee, ta̱xi Ndioxi ndaꞌa na kivi köo ka ndee ndi̱kuu mií na. Ndu̱u ndee ni na tá ndi̱xaꞌan na nuu kuachi, ta ku̱chiñu na si̱kunu na nda lapa nda inka ñuu nda ka̱nitaꞌan xiꞌin na.

1 Pedro 3:4

Ya ndee ni ndása vaꞌa ná nuu Ndioxi kua vaꞌa ni íyo nima ná, i̱í ni ini ná, kaꞌnu ni ini ná, köo kuachi ini ná, ya ikán kua ndáa yaꞌvi ni nuu Ndioxi, chi nda iin ichí ndïꞌi xaꞌa ya íkan ná saa.