Efesios 2:5 - Xochapa Mixteco

⁵ Tá íin yo xa ndi̱xiꞌi va ndi̱xiyo yo nuu Ndioxi xaꞌa kuachi yo ya väꞌa i̱kan yo nuu ra. Vani tá íin na ndíi saa ndi̱xiyo yo ta si̱taku ra yoo kivi ndi̱kitaꞌan yo xiꞌin Jesucristo. Ndi̱xaꞌvi ni Ndioxi xaꞌa ya vaꞌa ni ra xiꞌin yo, chi ni köo ñaꞌa ndi̱kan yo ta si̱kaku uun ra yoo.

Efesios 2:5 Mawu Ofanana

San Lucas 15:24

Chi ndi̱ko koo ra loꞌo seꞌe i yóꞌó. Tá káa ra ndi̱xiꞌi saa ndi̱xiyo ra sundi vitin ta ndi̱taku ra. Nda̱ñuꞌu ra ndi̱xaꞌan ra ta vitin nde̱ta ra”, káchi iva ra. Ñaa xa̱á kúsini ni na.

San Juan 5:21

Tá kuꞌva sítaku Iva ra Ndioxi na ndíi ta táxi ra kutaku na, ta saa íkan tu Seꞌe va ra, táxi ra kutaku na kúni mií ra.

San Juan 6:63

Saa ndi̱kaꞌan ka ra xiꞌin na, káchi ra saa: ―Iindaa Tachi Ndioxi ku ya kúu mií ndee táxi ya kutaku naꞌa, ta nda iin na ñuu ivi köo kúu mií ndee ya taxi na kutaku naꞌa. Ta ndiꞌi tuꞌun ya ndi̱kaꞌan i xiꞌin ndo, ku tuꞌun Tachi Ndioxi ta kúu mií ya ndee táxi ya táku ndo.

Los Hechos 15:11

Ta xa xíni yo süvi ya ikán kua ndi̱sikaku yoo, chi xaꞌa ya kándixa yo Tata yo Jesús va kua síkaku uun ra yoo ta saa síkaku tu ra na ikán va ―káchi ra Pedro xiꞌin na.

ROMANOS 16:20

Ta Iva yo Ndioxi, ra táxi íyo ya vaꞌa ini yo, kama ni sindiꞌi xaꞌa ra kiti nǎꞌa náni Satanás, kuaxin xaꞌa ra ri, saa chi̱nduꞌu ra ri tixin xaꞌa ndo. Ta ná chikaa ni Tata yo Jesucristo ya vaꞌa ndóꞌo̱.

ROMANOS 3:24

Sundi mií Ndioxi ku ra i̱kan ya vaꞌa xiꞌin yo, nda̱sa vaꞌa ra yoo, ndu̱u yo tá íin naꞌa, na köo ka kuachi ku mií nuu ra. Xaꞌa ya vaꞌa ni Ndioxi, yakan si̱niꞌi uun ra ya vaꞌa, ya chee ni yóꞌó nuu yo. Ta nda iin ñaꞌa köo ndíkan yo xaꞌa ya nda̱sa vaꞌa Ndioxi yoo. Iindaa Jesucristo ku ra cha̱ꞌvi xaꞌa yo chi ndi̱xiꞌi ra ndaꞌa cruzin.

ROMANOS 4:16

Xaꞌa ya kándixa yo Ndioxi kua taxi ra ya vaꞌa ndaꞌa yo. Ta saa ndiꞌi na seꞌe ñani sikua ra Abraham niꞌi na ya vaꞌa, ya ki̱ndoo Ndioxi taxi ra ndaꞌa na. Vaꞌa ni Ndioxi ta xaꞌa ya ikán kua si̱niꞌi ra ñaꞌa ya ndi̱kaꞌan ra siniꞌi ra na ivi, na kándixa ñaꞌa, tá kuꞌva ka̱ndixa ra Abraham Ndioxi, án na xíni ley ya ta̱a ra Moisés ku na, án süvi na xíni ley ku na. Sundi ndiꞌi naꞌa na ndinuꞌu ni kándixa Ndioxi, na ikán ku na ndu̱u tá íyo seꞌe ra Abraham. Saa chi ra Abraham ku iva ndiꞌi naꞌa, na kándixa ni Ndioxi.

ROMANOS 5:10

Chi yachi tá íin yo ka̱nitaꞌan xiꞌin Ndioxi saa ndi̱xiyo yo, xaꞌa ya köo ndi̱xaa súvi yo ya káꞌan ra xiꞌin yo. Vani saa i̱kan yo, ta saa ni si̱kitaꞌan mani ra yoo xiꞌin mií ra, xaꞌa ya ti̱ꞌvi ra Seꞌe ra Jesucristo ki̱xi ra ndi̱xiꞌi ra xaꞌa yo. Ta ndisaa ka ví vitin sikaku ra yoo, chi xa ndi̱kitaꞌan mani yo xiꞌin ra.

ROMANOS 5:6

Kivi tá xi̱ndoꞌni yo ndaꞌa kuachi ta köo ndíkuchiñu yo saña yo mií yo ndaꞌa ya. Ni köo ndi̱kuchiñu yo sikaku yo mií yo, nda kivi tá chi̱tuni mií Ndioxi, saa kua ki̱xi Jesucristo ndi̱xiꞌi ra xaꞌa kuachi yo.

ROMANOS 5:8

Ta süvi saa ndi̱kan Ndioxi, chi si̱naꞌa ra mií ra ya kúꞌvi ni ini ra xíni ra yoo, vani ndee ni káa kuachi yo, ta xaꞌa ya kúꞌvi ni ini ra xíni ra yoo, yakan ti̱ꞌvi ra Jesucristo ki̱xi ra ndi̱xiꞌi ra xaꞌa yo, ni yo ivi kuachi ndi̱xiyo yo.

ROMANOS 8:2

Chi xaꞌa ya xa ndu̱u yo iin xiꞌin Cristo Jesús, yakan kúu mií yo ndee Tachi I̱í Ndioxi, ya táxi kutaku yo xiꞌin ra, saa sa̱ña ra yoo ndaꞌa ley ya síndikaꞌan ni ini yo kiꞌvi yo kuachi nuu Ndioxi ta kuvi yo.

2 Corintios 13:14

Ta saa ná niꞌi ni ndo ya vaꞌa nuu Tata yo Jesucristo xiꞌin ya kúꞌvi ni ini Iva yo Ndioxi xíni ra ndóꞌo̱. Saa ná koo Tachi I̱í Ndioxi xiꞌin ndiꞌi ndo ndiꞌi saa ichí. Saa ná koo.

Efesios 2:1

Ta ndóꞌo̱, tá yachi tá täꞌan kandixa ndo Jesucristo, ta tá íin naꞌa, na xa ndíi saa ndi̱xiyo ndo nuu Ndioxi xaꞌa kuachi ya väꞌa i̱kan ndo nuu ra.

Efesios 2:8

Xaꞌa ya vaꞌa ni Ndioxi xiꞌin ndo kua ta̱xi ra ndi̱kaku ndo. Ta köo ndi̱kuchiñu ndo sikaku ndo mií ndo, xaꞌa ya vaꞌa ni ra xiꞌin ndo kua si̱niꞌi ra ya vaꞌa nuu ndo, si̱kaku ra ndóꞌo̱ chi ndáa ni ini ndo xíni ñaꞌa ndo.

Efesios 5:14

Chi ndiꞌi ñaꞌa ya kána koo nuu ñu̱ꞌu̱ yéꞌe̱, ta iin ndútuvi teꞌe ndiꞌi va ya, íyo túvi ya yakan kua íyo tuꞌun, ya káꞌan soꞌva, káchi ya saa: “Ndikáxin ini yóꞌo̱ índuꞌu kíxi ni, vaꞌa ndikoo un tañu na ndíi, ta si̱ndiyeꞌe Cristo nuu un”, káchi tuꞌun Ndioxi.

Colosenses 2:13

Chi yachi tá íin ndóꞌo̱ ndíi saa ndi̱xiyo ndo xaꞌa kuachi ndo, ta ni tuni Ndioxi köo ndi̱xiyo ndóꞌo̱. Sundi vitin ta xa ta̱xi Ndioxi iin káchi táku ndo xiꞌin Tata yo Jesucristo, saa xa̱a kaꞌnu ini ra xaꞌa kuachi ndo.

Tito 2:11

Saa chi Ndioxi ta si̱naꞌa ra yoo ya ndee ni kúꞌvi ini ra xíni ra yoo, yakan ta̱xi ra ichí ndaꞌa yo ya ná kuchiñu kaku ndiꞌi ni kúu yo ñuu ivi yóꞌó.

Tito 3:5

Si̱kaku ra yoo, ta süvi xaꞌa ndá ka chiñu ya vaꞌa i̱kan yo kua i̱kan ra saa xiꞌin yo. Xaꞌa ya kúndaꞌvi ni ini ra xíni ra yoo kua i̱kan ra saa xiꞌin yo. Ta ndi̱kata ra yoo, saa nda̱sa xa̱á ra yoo ndu̱u yo na xa̱á nuu Tachi I̱í ra.

El Apocalipsis 22:21

Ta Jesucristo ra chee nuu yo ná ikan ra ya vaꞌa xiꞌin ndo. Saa ná koo.