Efesios 2:14 - Xochapa Mixteco

¹⁴ Saa ta̱xi ra ya koo vaꞌa ni ini yo xiꞌin taꞌan yo, ta si̱kitaꞌan ra ndeꞌe judío xiꞌin ndiꞌi ndóꞌo̱ köo kúu judío, iin ñuu nda̱sa ra uvi saa yo. Chi yachi ta ku̱ndasi ni nuu ndiꞌi yo xi̱ni taꞌan yo, ndee ni ndi̱taꞌvi taꞌan yo, nda tá káa iin nama chee ni saa ndi̱xiyo ya taꞌvi mií yo. Ta nda tuꞌva ki̱xi Cristo ndi̱xiꞌi ra xaꞌa yo, ta nda saa kua si̱kitaꞌan ra yoo nuu ñaꞌa ya ta̱ꞌvi taꞌan xiꞌin yo, xiꞌin ya ndee ni ku̱ndasi nuu yo xi̱ni taꞌan yo.

Efesios 2:14 Mawu Ofanana

San Lucas 1:79

Chi kixi ra sindiyeꞌe ra nuu na ndóo nuu naá, na köo xíni xaꞌa ra, chi na ikán tá íin na xa ndátun kuvi va saa íin na. 2 Saa sinaꞌa ra ichí nuu yo kuꞌun yo nuu luvi ni káa ―káchi ra Zacarías xiꞌin ya lee loꞌo seꞌe ra.

San Lucas 2:14

¡Ná kunuu ka ya toꞌo Ndioxi, ra íyo nuu ndivi! 2 Ta ná koo vaꞌa ni ini na ñuu ivi na íkan ra ya vaꞌa xiꞌin ―káchi na tatun ikán.

San Juan 10:16

Ta íyo ka inka ri ta süvi taꞌan ri ndóꞌni corra yóꞌó ku ri, ta xíniñuꞌu i kuꞌun i ndikuiso i ri kixi ri xiꞌin i. Chi ri ikán tá ná kana i ri ta kuni soꞌo ri tachi i, ta kixi ri xiꞌin i. Saa ndikitaꞌan ri kuñuꞌu ndiꞌi ri ini corra ta iin koo ndiꞌi ri, saa iin koo ra ndáa ri.

San Juan 11:52

Ta süvi xaꞌa ndisaa na judío kua kuvi ra, sundi ndi̱kaꞌan ra saa ya ná ndikitaꞌan ndiꞌi ni kúu na nduu seꞌe Ndioxi, na ndi̱xita yava ñuu ivi.

San Juan 16:33

Soꞌva káꞌan i xiꞌin ndo ya ná kündiꞌi ini ndo, ta tuun ni kundikun ndo yeꞌe saa koo vaꞌa ni ini ndo. Saa chi kixi ni tindoꞌo nuu ndo ñuu ivi yóꞌó, sundi kundaa ni ini ndo kuni ndo yeꞌe, saa chi yeꞌe ta xa ku̱chiñu i xa̱a kanaa i ñuu ivi yóꞌó ―káchi Jesús.

Los Hechos 10:28

Ñaa ndi̱kaꞌan ra xiꞌin na, káchi ra saa: ―Xíni mií ndo, ndeꞌe raza na judío ta küvi ndi̱kitaꞌan nde xiꞌin na án kuyati nde nuu na köo kúu judío, chi na yakua ku na nuu nde, káꞌán nde. Sundi Ndioxi ta si̱tuvi ra nuu i ndi̱kaꞌan ra xiꞌin i: küvi kaꞌan nde xiꞌin nda iin naꞌa ya yakua na.

Los Hechos 10:36

Ta ndi̱kaꞌan Ndioxi xiꞌin ndeꞌe judío, tá ti̱ꞌvi ra Tata yo Jesucristo ki̱xi ra ndi̱kaꞌan ndoso ra tuꞌun vaꞌa ya táxi koo vaꞌa ni ini yo, chi ra ikán ku ra xáꞌnda chiñu nuu ndiꞌi yo ―káchi ra Pedro xiꞌin na.

ROMANOS 5:1

Xaꞌa ya kándixa yo Tata yo Jesucristo, ta Ndioxi ndása ra mií yo ndúu yo naꞌa, na vaꞌa, na íin tá íin naꞌa na köo ka kuachi kúu mií nuu ra, chi Tata yo Jesucristo ku ra si̱kitaꞌan mani yoo xiꞌin Ndioxi, ndi̱kundoo vaꞌa yo xiꞌin ra.

Gálatas 3:28

Iin nuu ndu̱u ndiꞌi yo xiꞌin Jesucristo, iin káchi ndáa yaꞌvi ndiꞌi yo, án yo judío ku yo, án süvi yo judío ku yo, án yo sa̱ta naꞌa xáa chiñu nuu na ku yo, án süvi yo ndi̱sata na ku yo, án taa ku yo án ná ñaꞌa ku ná, ta iin káchi ndáa yaꞌvi ndiꞌi yo nuu Ndioxi.

Efesios 2:15

Ta xaꞌa ya ndi̱xiꞌi ra nuu cruzin kua si̱ndiꞌi xaꞌa ra ley ya si̱ndikoo ra Moisés. Ni uvi ñuu ndi̱xiyo yo xiꞌin taꞌan yo, ta nda saa ku nuu nda̱sa ra yoo ndu̱u yo iin ñuu xa̱á xiꞌin ra vitin. Ikán ku nuu si̱kitaꞌan mani ra yoo xiꞌin taꞌan yo.

Efesios 2:17

Chi tá kivi ki̱xi ra ta ndi̱kaꞌan ndoso ra tuꞌun vaꞌa ya koo vaꞌa ni ini ndóꞌo̱ ndi̱xiyo xíka ni nuu ra, xiꞌin ndeꞌe ndi̱xiyo yati ni nuu ra.

Efesios 3:15

chi tixin mií ra kua níꞌi ndiꞌi yo ndóo ñuu ivi yóꞌó kivi yo ya ndaa, ta saa tu na ndoo nuu ndivi va.

Efesios 4:16

Ta mií ra ku ra síkitaꞌan ndiꞌi yo na kúu ñuu ra. Tá kuꞌva íyo tuchi síkitaꞌan ya iin iin ikin kuñu yo, kuꞌva saa íyo ra xiꞌin yo iin káchi ítaꞌan yo xiꞌin taꞌan yo. Ta xa íyo chiñu vaꞌa íkan iin iin yo, ta kuꞌva saa kua xáꞌnu vaꞌa yo saa xáꞌa ni yo ndee xiꞌin taꞌan yo xaꞌa ya kúꞌvi ni ini yo xíni taꞌan yo.

Colosenses 1:20

Ta tixin ya i̱kan ra nuu cruzin kua si̱kitaꞌan mani ra ndiꞌi ni kúu yo ñuu ivi yóꞌó xiꞌin mií ra tin ndiꞌi ñaꞌa ya si̱kuaꞌa ra xiꞌin ya íyo nuu ndivi tin ya íyo ñuu ivi yóꞌó. Ta tixin nií Jesucristo nduta ndi̱xita nuu cruzin tá ndi̱xiꞌi ra kua ta̱xi ra ichí ndaꞌa yo ndi̱kundoo vaꞌa yo xiꞌin Ndioxi.

Colosenses 2:20

Ta ndóꞌo̱, tá íin ndo ndi̱xiꞌi xiꞌin Tata yo Jesucristo saa íyo ndo, xaꞌa ya ñaa kua ndi̱saña ndo ndaꞌa tachi nduvaꞌa, ta köo xáꞌnda chiñu ka ya nuu ndo vitin. ¿Ta ndachu táxi tuku ndo ichí ya kaꞌnda chiñu ya nuu ndo?

Colosenses 3:11

Ta xaꞌa ya xa ndu̱u ndo na xa̱á vitin ta köo ndáa yaꞌvi ka ya án ndo judío ku ndo án süvi ndo judío ku ndo, án ndo kúu mií tuni Ndioxi ku ndo, án ndo köo tuni Ndioxi ku ndo, án ndo ka̱ꞌvi ni ku ndo án ndo köo ndi̱kaꞌvi ku ndo, án ndo ke̱e inka ñuu kani ni ku ndo, án ndo xáa chiñu xiꞌin ya nduxa ku ndo, án ndo íyo ndika ku ndo, nda iin ya yóꞌó köo ndáa yaꞌvi ni, ya ndee ni ndáa yaꞌvi kua íyo Cristo xiꞌin ndo vitin.

Colosenses 3:15

Ta taxi ndo ná koo ya vaꞌa táxi Cristo ndaꞌa ndo ya kaꞌnda chiñu ya nima ndo, chi mií Cristo ku ra ka̱na ndóꞌo̱ ya nduu ndo iin ikin kuñu xiꞌin ra, ta taxi ni ndo tixaꞌvi ndaꞌa Ndioxi ndiꞌi saa ichí.

HEBREOS 13:20

Ta mií Iva yo ku ra táxi koo vaꞌa ni ini yo, mií ra ku ra si̱taku Tata yo Jesucristo tañu na ndíi, ta mií ra ku ra ndáa ni ndóꞌo̱ tá kuꞌva íkan iin ra ndee ni vaꞌa ndáa levo sana ra, saa íkan ra xiꞌin ndo. Ta ki̱ndoo ra xiꞌin ndo ya ikan ra ya xa̱á xiꞌin ndo xaꞌa nií ra nduta ndi̱xita nuu cruzin. Ta nda iin ichí ndïsama ini ra xaꞌa ya ki̱ndoo ra xiꞌin ndo.

HEBREOS 7:2

Saa ta̱va ra Abraham iin iin ñaꞌa tañu ya uxi ki̱ndaa ra ndaꞌa nda rey ikán, ta ta̱xi ra ya ndaꞌa ra Melquisedec. Ta kivi ra Melquisedec kúni kachi ya: “rey ra ndaa ni ini”, ta kivi rey ra ke̱e ñuu Salem kúni kachi ya: “rey ra táxi ndóo vaꞌa ni naꞌa”.