Efesios 2:10 - Xochapa Mixteco

¹⁰ Chi mií Ndioxi ku ra si̱kuaꞌa yoo. Tixin Jesucristo kua i̱kan ra saa xiꞌin yo ya ná ikan yo ya vaꞌa, ya xa chi̱tuni mií ra ikan ra xiꞌin yo. Ta saa kuchiñu yo xaa súvi yo ndiꞌi ya.

Efesios 2:10 Mawu Ofanana

San Mateo 5:16

Saa ndóꞌo̱, koo ndo tá kuꞌva kúni Ndioxi, ta saa kuchiñu ndiyeꞌe ndo tá kuꞌva ndíyeꞌe ñu̱ꞌu̱ xaꞌa ñaꞌa ya vaꞌa íkan ndo, ta saa kuni naꞌa ya íkan ndo ta kaꞌan vaꞌa na xaꞌa Iva yo Ndioxi ta xaa kaꞌnu na ra ―káchi Jesús xiꞌin na.

San Juan 3:21

Sundi na íkan ya ndaa ta kúyati na nuu ya yéꞌe̱ ya ná ndituvi ndiꞌi ya íkan na, chi íkan na tá kuꞌva kúni Ndioxi ―káchi Jesús.

Los Hechos 9:31

Sindiꞌi ikán ta köo ka na ndi̱xaa nduvaꞌa xiꞌin na ndíkun ichí Jesús, na ndóo Judea tin na ndóo Galilea xiꞌin na ndóo Samaria. Vaꞌa ni xi̱ndoo na. Káñuꞌu ni na Ndioxi. Ta mií Tachi I̱í Ndioxi chíndee na, ñaa ndúndee ka na kándixa na Jesús. Ta saa ndúkuaꞌa tu na ndíkundikun ichí va ra.

Los Hechos 9:36

Ta kivi ikán íyo iin yá kándixa Jesús ñuu Jope náni yá Tabita, ta tuꞌun griego kúni kachi ya Dorcas. Ta nina ya vaꞌa íkan yá, chíndee ni yá na ndaꞌvi.

ROMANOS 8:1

Vitin ná kundaa ini yo xaꞌa ya iin ndu̱u yo xiꞌin Jesucristo, ta köo ndíso ka yo kuachi ya tixuꞌvi yo nuu Ndioxi. Ni köo kúu ka yo naꞌa, na íkan ndisaa ya kúni mií ikin kuñu yo, ta ndixa ndíkun yo ichí nuu xáa súvi yo ya vaꞌa kúni Tachi I̱í Ndioxi.

ROMANOS 8:29

Ta tá täꞌan ka kuaꞌa ñuu ivi yóꞌó, ta xa xíni mií ra unku na ndi̱kaxin ra ya kundikun na ra. Xa saa chi̱tuni mií ra ya nduu na seꞌe ra tá kuꞌva káa Jesucristo Seꞌe ra. I̱kan ra saa ya ná nduu Jesucristo, ra núnu̱ú nuu ndiꞌi ñani ra xiꞌin kuꞌva ra.

1 Corintios 3:9

Chi ndeꞌe, ta iin káchi ítaꞌan nde xáa chiñu nde xiꞌin taꞌan nde nuu Ndioxi. Ta ndóꞌo̱ ku ndo íin tá íin ñuꞌú ya xáa chiñu Ndioxi xiꞌin, án tá íin veꞌe ya síkuaꞌa Ndioxi, saa íin ndo nuu ra.

2 Corintios 5:17

Saa chi ndiꞌi yo xa ndi̱kitaꞌan xiꞌin Cristo, ta ndu̱u yo na xa̱á i̱kan Ndioxi. Ndiꞌi kuꞌva ya väꞌa, ya yata ndi̱xiyo ini yo, ta xa ki̱ndoo ndiꞌi ya chí sata.

2 Corintios 5:5

Ta mií Ndioxi ku ra i̱kan saa xiꞌin yo, nda̱sa vaꞌa ra yoo ya kuchiñu ndinama ra yoo kivi vaxi, ta xiꞌna Tachi I̱í ra kua ta̱xi ra ndaꞌa yo, ya ndíkuiin ya xaꞌa tuꞌun ra ya ndi̱kaꞌan ra sixinu ra ya ki̱ndoo ra taxi ra ndaꞌa yo.

2 Corintios 9:8

Ta ndee ni ndee kúu mií Ndioxi ya kuchiñu chindee ra ndóꞌo̱, taxi ra kuaꞌa ni ya vaꞌa ndaꞌa ndo, ya ná koo ñaꞌa xíniñuꞌu ndo nuu ndo ndiꞌi saa ichí, ta nda ndoo ndoso ka ya nuu ndo ya kuchiñu ndo ikan ni ndo ndá ka ya vaꞌa ni xiꞌin naꞌa.

Gálatas 6:15

Saa chi tá tu xaa iin ndu̱u yo xiꞌin Cristo ta ni köo ndáa yaꞌvi ka ya kúu mií yo tuni Ndioxi án köo ya kúu mií yo. Iindaa ya ndee ni ndáa yaꞌvi kua nda̱sa xa̱á Ndioxi yoo ndu̱u yo naꞌa, na xa̱á.

Efesios 1:1

Yeꞌe Pablo, ra ndi̱kaxin mií Ndioxi xáa chiñu i nuu ra ku i táa tutu yóꞌó xaa ya nuu ndiꞌi ndóꞌo̱, ndóo ñuu Éfeso, chi na i̱í, na kúu ñuu Ndioxi ku ndo ta ndinuꞌu ni ini ndo kándixa ndo Jesucristo.

Efesios 1:4

Nda yachi ka tá täꞌan xikoo xaꞌa ñuu ivi vi kua ndi̱kaxin ra yoo tixin Jesucristo ya ná nduu yo naꞌa, na i̱í, na köo nda iin kuachi ku mií nuu ra.

Efesios 2:13

Ta vitin xaꞌa ya xa iin yuꞌu ndu̱u ndo xiꞌin Cristo yakan köo íyo xíka ka ndo nuu Ndioxi, chi Jesucristo ku ra ndi̱xiꞌi xaꞌa ndo yakan vaꞌa ku̱yati ndo nuu Ndioxi.

Efesios 2:15

Ta xaꞌa ya ndi̱xiꞌi ra nuu cruzin kua si̱ndiꞌi xaꞌa ra ley ya si̱ndikoo ra Moisés. Ni uvi ñuu ndi̱xiyo yo xiꞌin taꞌan yo, ta nda saa ku nuu nda̱sa ra yoo ndu̱u yo iin ñuu xa̱á xiꞌin ra vitin. Ikán ku nuu si̱kitaꞌan mani ra yoo xiꞌin taꞌan yo.

Efesios 2:2

Saa ndi̱xiyo ndo yachi, i̱kan ni ndo ya väꞌa xaꞌa ya xi̱ndikun ndo ichí taꞌan ya ndíkun na ñuu ivi yóꞌó, ta xa̱a súvi ndo ya ndi̱kaꞌan kiti nǎꞌa, kiti xáꞌnda chiñu nuu ndiꞌi tachi nduvaꞌa xiꞌin ndo, ta nda vitin ta xáꞌnda chiñu yaa va ri nuu naꞌa, na köo xíin kuni soꞌo ya káꞌan Ndioxi.

Efesios 2:6

Ta si̱taku Ndioxi yoo xiꞌin Jesucristo tañu na ndíi, ñaa ta̱xi ra ichí ndaꞌa yo ya ndi̱kundoo yati yo xiꞌin ra nuu íyo ra ndivi.

Efesios 4:1

Yeꞌe, Pablo, ndíkaa i veꞌe kàà xaꞌa ya xáa chiñu i nuu Tata yo Jesucristo, ta xíkan ni i ya mani nuu ndo ya ná koo ndo tá kuꞌva kúni mií ra, xaꞌa ya ñaa kua ka̱na ra ndóꞌo̱.

Efesios 4:24

Ta xaꞌa ya ndu̱u ndo naꞌa, na xa ndu̱xaa ini tá kuꞌva kúni mií Ndioxi, ta saa kua ndu̱u ndo tá íin naꞌa, na köo ka kuachi kúu mií nuu ra, ta ndu̱u ndo naꞌa, na i̱í xaꞌa ya ku̱ndaa ini ndo ya ndaa xaꞌa ra.

Filipenses 1:6

Ta yeꞌe, ta xa kúndaa teꞌe ini i xaꞌa ndo, chi Ndioxi ku ra xa̱á xáa chiñu xiꞌin nima ndo, ta saa xaa chiñu ka ra xiꞌin ndo ndakua ná xinu ndo nduu ndo tá kuꞌva kúni mií ra, nda kivi tá ná ndiko koo Tata yo Jesucristo ñuu ivi yóꞌó.

Filipenses 2:13

Saa chi Ndioxi ku ra chíkaa ya vaꞌa ini ndo ya kuni ndo ikan ndo ya vaꞌa, ta suvi ra chíndee ndóꞌo̱ ya xaa súvi ndo ya kúni mií ra.

Colosenses 1:10

Ta saa kua vaꞌa kuchiñu ndo ikan ndo tá kuꞌva kúni mií Tata yo Jesucristo, chi saa kua xaa kaꞌnu ni ndo ra xiꞌin ndiꞌi ni kúu ñaꞌa vaꞌa íkan ndo nuu ra, koo ndo tá kuꞌva íyo naꞌa, na ndíkun Tata yo Jesucristo. Ta saa kua vaꞌa kuaꞌnu ka ndo xiꞌin ya ndíchi xaꞌa mií ra.

Colosenses 3:10

Chi vitin ta xa ndu̱u ndo naꞌa, na xa̱á, na íin tá kuꞌva káa mií Ndioxi ra si̱kuaꞌa ndóꞌo̱ ku ra íkan saa xiꞌin ndo iin iin kivi nda ná xinu koo ndo kuni taꞌan vaꞌa ndo xiꞌin ra tá kuꞌva káa mií ra.

2 Tesalonicenses 2:17

Ta saa ná taxi ni ra ndee ndaꞌa ndo ya koo vaꞌa ni ini ndo ta ná kana vaꞌa ndiꞌi ya káꞌan ndo xiꞌin ya íkan ndo.

1 Timoteo 2:10

Ta ya ndee ni xíniñuꞌu ná ikan ná ku ñaꞌa ya vaꞌa ni, xaꞌa ya xáa toꞌo ni ná Ndioxi.

1 Timoteo 5:10

Ta saa tu ná ndóso vaꞌa tuꞌun xaꞌa ya íkan ná ya vaꞌa, ta vaꞌa ni xi̱ndaa ná seꞌe ná, ta saa ndi̱kuiso vaꞌa ni ná na xáa veꞌe ná, ta ndi̱kata ná xaꞌa nda ñani yo xiꞌin ná kuꞌva yo, saa chi̱ndee taꞌan ná xiꞌin naꞌa tá xi̱ñúꞌu na nuu tindoꞌo, ta vaꞌa ni i̱kan ná xiꞌin ndiꞌi naꞌa.

1 Timoteo 5:25

Saa tu chiñu vaꞌa íkan sava na, kama ni va kúndaa ini yo xiꞌin ya íkan na. Ta sava tuku na ta naꞌá ni va saa kúndaa ini yo xaꞌa ya vaꞌa íkan na, ni saa va, ta nda iin ñaꞌa kïndoo sěꞌe, chi ndituvi ndiꞌi ya íkan na.

1 Timoteo 6:18

Vaꞌa kaꞌan un xiꞌin nda ñani yo, nda ndúkuika ni, ya xíniñuꞌu nda ikan ni nda ya vaꞌa. Ta ná küxiꞌnda nda, ná kusini ni nda nditaꞌvi nda ñaꞌa nda xiꞌin inka naꞌa.

2 Timoteo 2:21

Tá tu ná küni soꞌo un ya sínaꞌa nda vata ikán, saa kua vaꞌa koo un tá kuꞌva íyo ndaꞌa chiñu, ya vaꞌa ni xíniñuꞌu na nuu viko ya íyo veꞌe kaꞌnu ikán. Ta kuꞌva saa ná nduvaꞌa nima yo nuu Ndioxi, ná ndu i̱í yo nuu ra tá kuꞌva kúni mií ra. Ta saa kua vaꞌa kuniñuꞌu ra yoo xaꞌa ndá ka chiñu ya kúni mií ra kuniñuꞌu ra yoo.

2 Timoteo 3:17

Ta saa kua kuchiñu nduu yo naꞌa, na xa íyo ndúvi, na xa si̱kuaꞌa xaa súvi chiñu vaꞌa nuu Ndioxi.

Tito 2:14

Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.

Tito 2:7

Tá kuꞌva kúni un ikan nda ñani yo, kuꞌva saa xíniñuꞌu un vívií koo un nuu na ya ná kuni na ikán na tá íkan un. Tá sínaꞌa un na ñani yo ta ndinuꞌu ni ini un sinaꞌa un na, toꞌo ndituꞌun un tuꞌun ya ndaa xiꞌin na.

Tito 3:1

Ta sinaꞌa un nda ñani yo, xiꞌin ná kuꞌva yo na veꞌe ñuꞌu, ya ná xaa toꞌo ni na ndiꞌi na chiñu, na xáꞌnda chiñu nuu yo, án na chiñu naꞌnu ku na, án na chiñu vali ku na, ta ná xaa toꞌo ni ñaꞌa na. Ndiꞌi saa ichí ná koo ndúvi na ya ikan na ya vaꞌa.

Tito 3:14

Saa nda ñani yo xiꞌin ná kuꞌva yo, ná sikuaꞌá na ikan ni na ya vaꞌa, ta ná chindee taꞌan ná xiꞌin naꞌa, na kúmani ñaꞌa nuu. Ta saa kua nduu na naꞌa, na ndáa yaꞌvi ni, na xáa chiñu ni.

Tito 3:8

Ñani yo, tuꞌun ya káꞌan i xiꞌin un yóꞌó, ta ya ndaa ni kua, yakan ndinuꞌu ni ini un sinaꞌa un ya, ya ná kundaa ini na taꞌan yo na kándixa Ndioxi ikan na ya vaꞌa, chi ya yóꞌó kua ndee ni vaꞌa, chíndee ni ya ndiꞌi na ñuu ivi.

HEBREOS 10:24

Ta saa ná nduku ka yo ndá kuꞌva kuniꞌi taꞌan yo ya kuꞌvi ni ini yo kuni taꞌan yo, ta ná ikan yo ndisaa ya vaꞌa xiꞌin taꞌan yo.

HEBREOS 13:21

Xaꞌa ya ikán kua káꞌan ni i xiꞌin ra ya ná chindee taꞌan ni ra xiꞌin ndo ya kuchiñu ndo xaa súvi ndo ndiꞌi ya vaꞌa kúni mií ra. Ta saa xáku ndaꞌvi ni i nuu ra ya ná chindee ra ndeꞌe ikan nde ndisaa ya kúni mií ra tixin Tata yo Jesucristo. Saa ná kunuu sukun ni ya toꞌo Tata yo Jesucristo ndiꞌi saa ichí, ndiꞌi saa kivi. Saa ná koo ya.

1 Pedro 2:12

Vívií koo ndo tañu naꞌa, na köo xíni Ndioxi, chi án sana kaꞌan na xaꞌa ndo ya köo vaꞌa íkan ndo, kachi na. Ta saa tá ná kuni na ya vaꞌa ní íyo ndo ta saa xaa kaꞌnu na Ndioxi tá kivi ná kixi ra xaa nani ra kuachi xiꞌin na ñuu ivi.

1 Juan 1:7

Sundi tá tu xíka yo nuu yéꞌe̱ tá kuꞌva íyo Ndioxi nuu yéꞌe̱, ta saa íyo yo iin yuꞌu xiꞌin taꞌan yo. Ta ni̱í Jesucristo Seꞌe Ndioxi ku rá ndíkata ndiꞌi kuachi yo, ndúvaꞌa yo nuu Iva yo Ndioxi.

1 Juan 2:6

Ndiꞌi na káꞌan, ítaꞌan vaꞌa na xiꞌin Jesucristo káchi na, ta xíniñuꞌu na koo na tá kuꞌva ndi̱xiyo mií Jesucristo ñuu ivi yóꞌó.