Efesios 1:7 - Xochapa Mixteco

⁷ Ta ya kuchiñu ra sikaku ra yoo kua cha̱ꞌvi Jesucristo xaꞌa kuachi yo xiꞌin nií ra nduta ndi̱xita nuu cruzin tá ndi̱xiꞌi ra. Saa ku̱u nuu ndi̱saña yo ki̱ndoo ndíka yo nuu ya väꞌa, ya xa̱ꞌnda chiñu nuu yo. Xaꞌa ya kaꞌnu ni ini Ndioxi kua i̱kan ra saa xiꞌin yo.

Efesios 1:7 Mawu Ofanana

San Mateo 20:28

Tá kuꞌva íkan yeꞌe Taa ra xa̱a ñuu ivi yóꞌó, chi yeꞌe ta köo vaxi i ya kaꞌnda i chiñu nuu naꞌa, sundi yeꞌe ta vaxi i ya koto vií i xiꞌin na saa xaa súvi i chiñu nuu na, ta saa kua kuchiñu na saña ndika na xaꞌa kuachi na ―káchi Jesús.

San Mateo 26:28

Chi nduta yóꞌó ku nií i rá kuita xaꞌa na ñuu ivi. Ta xiꞌin rá kuita yóꞌó ku rá kindoo Ndioxi iin trato xa̱á xiꞌin kuaꞌa ni naꞌa, nuu xáa kaꞌnu ini ra xaꞌa kuachi na.

San Mateo 6:12

Xaa kaꞌnu ini un xaꞌa kuachi nde, saa chi saa tu ndeꞌe va xáa kaꞌnu ini nde xaꞌa kuachi na íkan ya väꞌa xiꞌin nde.

San Marcos 14:24

Saa ndi̱kaꞌan ra xiꞌin nda, káchi ra saa: ―Nduta yóꞌó ku nií i, xaꞌa ya vaꞌa kuaꞌa ni naꞌa kua kuita rá. Ya yóꞌó kúni kachi ya, Ndioxi, ta ki̱ndoo ra iin trato ya xa̱á nuu ki̱ndoo vaꞌa na ñuu ivi xiꞌin ra.

San Lucas 1:77

Saa sinaꞌa un na ndá kuꞌva kuu sikaku Ndioxi yo na kúu ñuu ra, ya xaa kaꞌnu ini ra xaꞌa kuachi ndiꞌi yo.

San Lucas 24:47

Ta naꞌa na ndíkun sata ra tixin kivi ra taxi ra ndee ndaꞌa na kuꞌun na ndituꞌun na xiꞌin ndiꞌi kúu na ñuu ivi. Xiꞌna ñuu Jerusalén xáa na kaꞌan na xiꞌin naꞌa, ya ná ndiko koo ini na xaꞌa kuachi na, saa xaa kaꞌnu ini Ndioxi xaꞌa kuachi na”, káchi ya ta̱a na.

San Juan 20:23

Tá tu xáa kaꞌnu ini ndo xaꞌa kuachi naꞌa, ta saa tu Ndioxi xaa kaꞌnu ini ra xaꞌa kuachi na. Tá tu köo xáa kaꞌnu ini ndo xaꞌa kuachi na, ta ni Ndioxi xäa kaꞌnu ini ra xaꞌa kuachi na ―ka̱chi ra xiꞌin nda.

Los Hechos 10:43

Xa yachi ndi̱kaꞌan nda káꞌan ndoso tuꞌun yuꞌu Ndioxi xaꞌa Jesús, ndi̱kaꞌan nda tá ná kandixa ñaꞌa na ta xaa kaꞌnu ini ra xaꞌa kuachi na xiꞌin kivi ra ―káchi ra Pedro xiꞌin na.

Los Hechos 2:38

Saa ndi̱kuiin ra Pedro káꞌan ra xiꞌin nda káchi ra saa: ―Ndiko koo ini ndo xaꞌa ndiꞌi kuachi ndo. Ta saa kuchi ndo tixin kivi Jesucristo ya ná xaa kaꞌnu ini Ndioxi xaꞌa kuachi ndo. Saa kua ndikiꞌin ndo Tachi Ií ra koo ya xiꞌin ndo.

Los Hechos 20:28

Ta ndóꞌo̱ ku ndo ndi̱kaxin Tachi I̱í Ndioxi ya kundiso chiñu ndo xiꞌin na veꞌe ñuꞌu. Tá íkan nda ndáa levo sana nda, saa ikan ndo. Xaa kuenta ni ndo xiꞌin mií ndo tin xaa kuenta ni ndo xiꞌin na kuaꞌan ichí Jesús. Chi na ikán ku na sa̱ta ra xiꞌin ni̱í mií ra nduta ndi̱xita nuu cruzin.

Los Hechos 3:19

Saa ndi̱kaꞌan ka ra xiꞌin na káchi ra saa: ―Na taꞌan yo, ndiko koo ndo nuu Ndioxi, ta ndiko koo ini ndo xaꞌa kuachi ndo, ta saa xaa kaꞌnu ini ra xaꞌa kuachi ndo. Ikan ndo saa, ta chindee Ndioxi ndóꞌo̱ ndikiꞌin ndo ini ndo koo vaꞌa ini ndo.

ROMANOS 2:4

Xa kúndaa ini ndo, ya vaꞌa ni Ndioxi xiꞌin ndo, ta íyo ni ra ya kaꞌnu ini xiꞌin ndo xaꞌa ya väꞌa íkan ndo. Xaꞌa ya vaꞌa ni ini Ndioxi, ta ¿án ndiꞌi saa ichí kundee ini ra kuni ra ya väꞌa íkan ndo, káꞌán ndo? ¿án köo kúndaa ini ndo ya kúni Ndioxi sindikoo ndo ya väꞌa íkan ndo, ta ndikundikun ndo ichí ra? Xaꞌa ya ndátun ra ndiko koo ndo ichí ra, yakan íkan ni ra ya vaꞌa xiꞌin ndo.

ROMANOS 3:24

Sundi mií Ndioxi ku ra i̱kan ya vaꞌa xiꞌin yo, nda̱sa vaꞌa ra yoo, ndu̱u yo tá íin naꞌa, na köo ka kuachi ku mií nuu ra. Xaꞌa ya vaꞌa ni Ndioxi, yakan si̱niꞌi uun ra ya vaꞌa, ya chee ni yóꞌó nuu yo. Ta nda iin ñaꞌa köo ndíkan yo xaꞌa ya nda̱sa vaꞌa Ndioxi yoo. Iindaa Jesucristo ku ra cha̱ꞌvi xaꞌa yo chi ndi̱xiꞌi ra ndaꞌa cruzin.

ROMANOS 3:25

Si̱niꞌi Ndioxi Jesucristo ya ndi̱soko ra mií ra xaꞌa kuachi ndiꞌi ni kúu yo. Ndiꞌi naꞌa na kándixa ya ndi̱xita nií ra ndaꞌa cruzin xaꞌa kuachi na, ta xáa kaꞌnu ini ra xaꞌa kuachi na. Ta ya vaꞌa i̱kan Ndioxi xiꞌin na kua sínaꞌa na ya kúu ra iin taa ra ndaa ni ini. Ta köo ndi̱sitixuꞌvi kama ra na xaꞌa ya väꞌa i̱kan na xinaꞌa, ya kaꞌnu ni ini Ndioxi yakan ku̱ndee ini ra xiꞌin ya väꞌa i̱kan yo.

ROMANOS 9:23

I̱kan Ndioxi saa chi ku̱ni ra si̱naꞌa ra yoo ya ndee ni ndee kúu mií ra, ta kúndaꞌvi ni ini ra xíni ra yoo ndi̱kaxin ra niꞌi yo ya vaꞌa, ya luvi ni taxi ra ndaꞌa yo.

1 Corintios 1:30

Ta Ndioxi i̱kan ra saa, si̱kitaꞌan ra ndóꞌo̱ xiꞌin Tata yo Jesucristo. Ta mií Tata yo Jesucristo ku ra táxi ya ndíchi ndaꞌa yo, saa ndása tu ra yoo ndúu yo naꞌa, na köo ka kuachi kúu mií nuu ra, ta ndása i̱í ra yoo, saa ndáxin ra yoo ndaꞌa kuachi nuu núꞌni yo.

2 Corintios 8:9

Chi xa xíni mií ndo ya kúꞌvi ni ini mií Tata yo Jesucristo xíni ra yoo kua nda̱sa ndaꞌvi ra mií ra, vani kuika ni ndi̱xiyo ra ta saa nda̱sa ndaꞌvi ra mií ra xaꞌa ndóꞌo̱, ya ná ndukuika ndo.

Efesios 1:14

Ta Tachi I̱í ra ya íyo xiꞌin yo kua xiꞌna ta̱xi ra ndaꞌa yo ya káꞌan ra xiꞌin yo ya niꞌi yo ya ki̱ndoo ra xiꞌin yo taxi ra ndaꞌa yo. Chi tixin Tachi I̱í ra kua taxi ra saña ndíka mií yo kúu na ñuu ra. Xaꞌa ya i̱kan Ndioxi saa xiꞌin yo kua xíniñuꞌu yo xaa kaꞌnu ni yo ra chi ndee ni kaꞌnu ra.

Efesios 1:18

saa ná ndikuná ra ya xínituni ndo ya kuchiñu ndo kundaa ini ndo xaꞌa ñaꞌa ya vaꞌa luvi ni, ya xa xa̱a vií ra taxi ra ndaꞌa naꞌa, na ka̱na ra kundikun ñaꞌa. Ta saa kua vaꞌa niꞌi ni ndo ya vaꞌa, ya ki̱ndoo ra taxi ra ndaꞌa ndóꞌo̱, na ñuu ra, na i̱í.

Efesios 1:6

Ta i̱kán ra saa xiꞌin yo, ya ná xaa kaꞌnu ni yo ra. Xaꞌa ya kúꞌvi ni ini ra xíni ra yoo kua ndi̱niꞌi uun yo nuu ra, ya i̱kan ra saa xiꞌin yo. Ndi̱kuiso ra yoo tixin Seꞌe ra, ra ndee ni kúꞌvi ini ra xíni ra.

Efesios 1:8

Xaꞌa ya vaꞌa ni ra xiꞌin yo kua ndi̱niꞌi ni yo ya vaꞌa yóꞌó nuu ra, xiꞌin ndiꞌi ya ndíchi tin ya xínituni yo ta̱xi ra ndaꞌa yo.

Efesios 2:4

Sundi xaꞌa ya vaꞌa ni ini Ndioxi xiꞌin yo, yakan ku̱ndaꞌvi ni ini ra xi̱ni ra yoo, ta saa ku̱ꞌvi ni ini ra xi̱ni ra yo.

Efesios 2:7

I̱kan Ndioxi saa xiꞌin yo chi kúni ni ra ya kundaa ini yo xaꞌa ra kivi vaxi ya ndee ni vaꞌa ini ra xiꞌin yo, ta saa kúꞌvi ni ini ra xíni ra yoo tixin seꞌe ra Jesucristo.

Efesios 3:16

Xíkan ni i ya mani nuu ra ya ná taxi ra Tachi I̱í ra koo ya xiꞌin ndo, saa taxi ra ndee ndaꞌa ndo ya vaꞌa nduxuxa nima ndo xiꞌin tuꞌun ra, ta vaꞌa ikan Ndioxi saa xiꞌin ndo, chi ndee ya kúu mií ra ta chee ni ya ta ni köo ndíꞌi tu xaꞌa va ya.

Efesios 3:8

Vani köo ndáa yaꞌvi ni va i nuu ndiꞌi na ñani yo, na kúu ñuu Ndioxi, ta ta̱xi ra ichí ndaꞌa i ya kaꞌan ndoso i tuꞌun vaꞌa xaꞌa ra xiꞌin naꞌa, na köo kúu judío. Ta tuꞌun vaꞌa ni ikán, ta tá káa ya kuika ni saa káa ya, chi köo ndíꞌi xaꞌa ya.

Filipenses 4:19

Ta mií Iva i Ndioxi ku ra taxi ndiꞌi ñaꞌa ndaꞌa ndo ya xíniñuꞌu nuu ndo. Chi kuaꞌa ni ya kuika íyo nuu ra nuu ndivi, ta mií ra ku ra taxi ndiꞌi ñaꞌa ya kúmani nuu ndo ndaꞌa ndo, xaꞌa ya i̱kan Tata yo Jesucristo xaꞌa ndo.

Colosenses 1:14

Ta xaꞌa ya ndi̱xiꞌi ra xaꞌa yo kua cha̱ꞌvi ra xaꞌa kuachi yo, si̱kaku ra yoo, sa̱ña ndika ra yoo, saa xa̱a kaꞌnu ini Ndioxi xaꞌa kuachi yo.

Colosenses 1:27

Ta saa kua i̱kan Iva yo Ndioxi, saa chi ku̱ni ra ya ná kundaa ini na kúu kuenta mií ra xaꞌa ñaꞌa ya ndi̱xiyo sěꞌe xinaꞌa. Ta tuꞌun ra ya ndaa, ya chee ni, ya luvi ni, ta ya kuni soꞌo ndiꞌi ni kúu naꞌa kua. Ta ya káꞌan tuꞌun Iva yo xaꞌa ya ndixiyo sěꞌe yóꞌó kua: íyo Tata yo Jesucristo nima ndóꞌo̱ köo kúu judío vitin, ta kúndaa teꞌe ini ndo ya koo ndo xiꞌin ra nuu ndivi.

Colosenses 2:13

Chi yachi tá íin ndóꞌo̱ ndíi saa ndi̱xiyo ndo xaꞌa kuachi ndo, ta ni tuni Ndioxi köo ndi̱xiyo ndóꞌo̱. Sundi vitin ta xa ta̱xi Ndioxi iin káchi táku ndo xiꞌin Tata yo Jesucristo, saa xa̱a kaꞌnu ini ra xaꞌa kuachi ndo.

Colosenses 2:2

Saa ná taxi ni Ndioxi ndee ndaꞌa ndo ya xaꞌa ni ndo ndee xiꞌin taꞌan ndo xaꞌa ya kúꞌvi ni ini ndo xínitaꞌan ndo. Xaꞌa ya ñaa kua ndítuꞌun ni i xiꞌin ndo, ndíkani i nuu ndo chi kúꞌvi ni ini i xíni i ndóꞌo̱. Ta vaꞌa ná taxi ra ndukuika ni ndo xiꞌin ya ndíchi ni chi̱tuni Ndioxi ndi̱xiyo sěꞌe yachi, chi ya ndi̱xiyo sěꞌe ikán ku mií Tata yo Jesucristo.

1 Timoteo 2:6

Saa ta̱xi ra mií ra ndi̱xiꞌi ra xaꞌa kuachi ndiꞌi yo. Ta xaꞌa ya i̱kan ra saa kua cha̱ꞌvi ra xaꞌa yo, ya vaꞌa ku̱chiñu yo ndi̱saña ndika yo nuu kuachi yo. Ta ya yóꞌó ku tuꞌun vaꞌa ya ta̱xi Iva yo Ndioxi ndaꞌa na ñuu ivi yóꞌó, tá kivi chi̱tuni mií ra.

Tito 2:14

Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.

Tito 3:6

Xaꞌa ya xa̱a súvi Tata yo Jesucristo, ra síkaku yo kua si̱niꞌi ni Iva yo Ndioxi Tachi I̱í ra nuu yo, ta ndee ni ndee íyo ya xiꞌin yo.

HEBREOS 9:22

I̱kan ra saa, saa chi saa káꞌan ley Ndioxi, ndiꞌi ñaꞌa ta xíniñuꞌu ya nduu vaꞌa ya xiꞌin nií, chi tá tu köo xíta nií, ta köo xáa kaꞌnu ini Ndioxi xaꞌa kuachi naꞌa, káchi ya.

1 Pedro 2:24

Tá ndi̱xiꞌi Cristo nuu itun cruzin ta nuu nu ikán kua ndi̱kundiso ndiꞌi ra kuachi yo to̱so ra ya sata ikin kuñu ra kuaꞌan ya xiꞌin ra. I̱kan ra saa xiꞌin yo ya ná köo ka ndee kuu mií kuachi yo ya kaꞌnda chiñu ka ya nuu yo, saa kutaku yo ikan yo ya vaꞌa. Xaꞌa ya ndo̱ꞌo ni ra yakan si̱ndaꞌa ra yoo.

1 Pedro 3:18

Saa chi saa kua ndo̱ꞌo tu mií va Tata yo Jesucristo xaꞌa yo, ndi̱xiꞌi ra xaꞌa kuachi yo, ta iindaa ichí ndo̱ꞌo ra ndi̱xiꞌi ra, ta küvi ka ra. Ra vaꞌa ni ndi̱xiyo ra, ta ndi̱xiꞌi ra xaꞌa ndiꞌi yo ivi kuachi ya kuchiñu kundaka ra yoo kuꞌun yo nuu Ndioxi. Tá ndi̱xiꞌi ra ta ndi̱ꞌi xaꞌa ikin kuñu ra, saa tá ndi̱taku ra xiꞌin ikin kuñu ra ya xa̱á küvi kuni yo.

1 Juan 2:12

Ndóꞌo̱, na kándixa Jesucristo ta tá íin seꞌe i saa íin ndo, ta vitin táa i tutu yóꞌó xaa ya nuu ndo ya káꞌan i xiꞌin ndo. Ndioxi ta xáa kaꞌnu ini ra xaꞌa kuachi yo, xaꞌa ya i̱kan Tata yo Jesucristo xaꞌa yo.

1 Juan 2:2

Chi Jesucristo ku ra ndi̱soko mií, ndi̱xiꞌi ra xaꞌa kuachi ndiꞌi yo yakan vaꞌa xa̱a kaꞌnu ini Ndioxi xaꞌa yo. Ta süvi iindaa xaꞌa kuachi yoo ndi̱xiꞌi ra. Ndi̱xiꞌi ra xaꞌa kuachi ndiꞌi ni kúu na ñuu ivi.

1 Juan 4:10

Káꞌan i xiꞌin ndo unkua káchi mií ya ndaa ni kúꞌvi ini Ndioxi xíni ra yoo, saa chi süvi yoo ku yo xiꞌna ndi̱kuꞌvi ini kuni Ndioxi, xiꞌna mií ra ku ra xa̱á kúꞌvi ni ini xi̱ni yoo ta xaꞌa ya ikán kua ti̱ꞌvi ra Seꞌe ra, ra kúu Jesucristo. Ta ra ikán ndi̱soko ra mií ra ndi̱xiꞌi ra xaꞌa yo, cha̱ꞌvi ra xaꞌa kuachi yo nuu Ndioxi.

El Apocalipsis 14:4

Vaꞌa ni xi̱ndaa nda ikán mií nda, chi köo ndi̱kiꞌvi nda xiꞌin nda iin ná ñaꞌa, nda tá íyo iin taa ra köo ndi̱tindaa iin ñaꞌa, saa ndi̱xiyo nda ikán. Ta ndinuꞌu ni ini nda ndíkun nda sata Levo loꞌo ikán, nda mií nuu kuaꞌan ri ta ndíkun nda kuaꞌan nda sata ri. Chi ndee ni yaꞌvi cha̱ꞌvi Ndioxi xaꞌa nda. Tá káa ya vaꞌa, ya núnu̱ú sóko naꞌa nuu Ndioxi xiꞌin nuu kiti levo loꞌo, saa íyo nda ikán nuu ra.

El Apocalipsis 5:9

Saa xa̱á kumi saa ya táku ikán xiꞌin oko kumi saa na xikuaꞌa, xíta na iin yaa xa̱á nuu kiti Levo loꞌo ikán, káchi na saa: Yóꞌo̱ ku un kúu mií ichí tiin un tutu ñaa. Ta kúu mií un ichí kaꞌnda un uxa saa sello kixin kúu mií ya. Saa chi yóꞌo̱ ku un ndi̱soko xiꞌin mií nuu Ndioxi, si̱tikueꞌe ni na yóꞌo̱, ta xa̱ꞌni na yóꞌo̱, ndi̱xiꞌi un. Ta xiꞌin nií un nduta ndi̱xita, cha̱ꞌvi un xaꞌa kuachi na ñuu ivi, ya kuchiñu na nduu na seꞌe Ndioxi. Cha̱ꞌvi un xaꞌa ndiꞌi ni kúu nuu naꞌa, xiꞌin ndiꞌi ni kúu na káꞌan ndá ka inka nuu tuꞌun. Saa i̱kan un xaꞌa ndiꞌi ni kúu na ndóo ndiꞌi saa ñuu vali tin ñuu naꞌnu ya ñúꞌu ndiꞌi ni kúu ñuu ivi.