Efesios 1:23 - Xochapa Mixteco

²³ Ta na veꞌe ñuꞌu tá káa mií ikin kuñu Cristo saa íin na. Ta mií ra ku ra táxi ndá ka ñaꞌa ya kúmani nuu na, saa síkutu ni ra ya vaꞌa íyo ya ini na xaꞌa ya íyo ra xiꞌin na.

Efesios 1:23 Mawu Ofanana

San Juan 1:16

Ta xaꞌa ya chútu ni ya vaꞌa ini ra ikán, ta nda yoo ndi̱niꞌi ya vaꞌa xiꞌin ra. Ndakua ndíkun taꞌan ya táxi ra ndaꞌa yo.

ROMANOS 13:5

Yakan kua xíniñuꞌu yo kuni soꞌo yo ya káꞌan na chiñu xiꞌin yo. Süvi xaꞌa ya íꞌvi yo nuu na xaa nduvaꞌa na xiꞌin yo kua, saa chi ya yóꞌó ku ya kúni Ndioxi, tá íkan yo saa ta íyo vaꞌa ini yo, nda ya xínituni yo ta köo táxi ya kuachi xaꞌa yo.

1 Corintios 12:6

Saa íyo kuaꞌa ni kuꞌva ya xáa chiñu yo nuu Ndioxi, ta suvi xiꞌin ndee iindaa mií ra kua táxi ra íkan iin iin yo saa.

1 Corintios 15:28

Tá xa ku̱chiñu ra nuu tá kúu ndiꞌi ñaꞌa, ta ya kúu ra Seꞌe Ndioxi, ta nditaxi ndiꞌi ra mií ra ndaꞌa Iva yo Ndioxi, chi mií Iva yo ku ra ta̱xi ndee ndaꞌa ra, ta vitin nditaxi yaa ra ya ndaꞌa Iva yo ya ná kaꞌnda chiñu ra nuu tá kúu ndiꞌi ni kúu ñaꞌa.

Efesios 2:16

Saa chi tá ndi̱xiꞌi Cristo nuu cruzin, saa kua si̱ndiꞌi xaꞌa ra ya ka̱nitaꞌan ni uvi saa yo ñuu xiꞌin taꞌan yo, ñaa ta̱xi ra ndi̱kundoo vaꞌa yo xiꞌin Ndioxi, saa nda̱sa ra uvi saa yo ñuu ikán ndu̱u yo iin nuu ikin kuñu xiꞌin mií ra.

Efesios 3:10

Xaꞌa ya i̱kan Ndioxi soꞌva kua kúni ra ná kuni ndiꞌi na tatun ra, na naꞌnu xáa chiñu nuu ra xiꞌin ndiꞌi ndee tachi nduvaꞌa ya xáa chiñu maꞌñu ndivi ni̱nù. Ta xaꞌa ya i̱kan ra soꞌva xiꞌin na veꞌe ñuꞌu kua kúni ra ná kundaa ini ndiꞌi ndee yóꞌó, ya iindaa mituꞌun mií Ndioxi ku ra ndee ni ndixa ndíchi nuu ndiꞌi ni kúu ñaꞌa.

Efesios 3:19

Saa káꞌan ni i xiꞌin Ndioxi ya ná taxi ra ya xínituni ndo ndaꞌa ndo ya ná kuchiñu ndo kundaa ini ndo chi ya kúꞌvi ni ini ra xíni ra ndóꞌo̱ ta yáꞌa ni ka ndee ya ikán nuu ndá ka ya xínituni ndo. Káꞌan ni i xiꞌin ra xaꞌa ndo ya ná xinu ndo kuni taꞌan ni ndo xiꞌin ra, saa ná sikutu ni ra ya vaꞌa ini ndo.

Efesios 4:10

Yakan ta nu̱u̱ ra ta saa nda̱a tuku ra nda ni̱nù nuu ndee ni sukun, ya kuchiñu sikutu ndiꞌi ra ndee kúu mií ra.

Efesios 4:12

Ta mií Cristo ku ra si̱niꞌi ndee vaꞌa yóꞌó nuu ndiꞌi yo kúu ñuu ra, yo i̱í, xa̱a ndúvi ra xiꞌin yo xaꞌa chiñu ra ya chindee taꞌan yo xiꞌin taꞌan yo, saa xaꞌa ni yo ndee xiꞌin na kúu ikin kuñu ra.

Efesios 4:13

Saa xíniñuꞌu yo ikan yo nda ná xinu koo ndiꞌi yo nduu yo iin yuꞌu xaꞌa ya kándixa yo ra tin ya kúndaa ini yo xaꞌa Tata yo Jesucristo, ra kúu Seꞌe Ndioxi. Chi yoo ta kúni yo xinu koo yo nduu yo naꞌa, na xuxa ini xiꞌin tuꞌun ra, saa xinu yo nduu yo tá kuꞌva káa mií ra.

Efesios 4:4

Chi tá kuꞌva káa ikin kuñu mií ra saa íin ndiꞌi yo. Ta iindaa ku Tachi I̱í Ndioxi ya íyo xiꞌin yo, saa ka̱na ra yoo ya kandixa yo iindaa mituꞌun mií seꞌe ra.

Colosenses 1:24

Ta yeꞌe, ta kúsini ni va i ya tíxuꞌvi i xaꞌa ndo vitin ñani yo xiꞌin kuꞌva yo na veꞌe ñuꞌu, chi xaꞌa ya tíxuꞌvi i saa kua síxinu ka i ya ti̱xuꞌvi ni Jesucristo xaꞌa ndóꞌo̱ kándixa ra, chi ikin kuñu ra ku ndo.

Colosenses 2:19

Chi na ñaa, ta köo táxi na kaꞌnda chiñu Cristo nuu na, ra kúu xi̱ní xáꞌnda chiñu nuu ndiꞌi na veꞌe ñuꞌu, chi mií ra kú ra táxi táku ndiꞌi na, ta ikin kuñu ra ku ndiꞌi yo kándixa ñaꞌa. Tá kuꞌva íyo tuchi ya chítaꞌan ikin kuñu yo, kuꞌva saa íyo Jesucristo xiꞌin yo chíndee ra yoo ya ná kuchiñu yo ndikitaꞌan vaꞌa yo xiꞌin taꞌan yo, ta saa kuchiñu yo kuaꞌnu yo tá kuꞌva kúni mií Ndioxi.

Colosenses 3:11

Ta xaꞌa ya xa ndu̱u ndo na xa̱á vitin ta köo ndáa yaꞌvi ka ya án ndo judío ku ndo án süvi ndo judío ku ndo, án ndo kúu mií tuni Ndioxi ku ndo, án ndo köo tuni Ndioxi ku ndo, án ndo ka̱ꞌvi ni ku ndo án ndo köo ndi̱kaꞌvi ku ndo, án ndo ke̱e inka ñuu kani ni ku ndo, án ndo xáa chiñu xiꞌin ya nduxa ku ndo, án ndo íyo ndika ku ndo, nda iin ya yóꞌó köo ndáa yaꞌvi ni, ya ndee ni ndáa yaꞌvi kua íyo Cristo xiꞌin ndo vitin.

Colosenses 3:15

Ta taxi ndo ná koo ya vaꞌa táxi Cristo ndaꞌa ndo ya kaꞌnda chiñu ya nima ndo, chi mií Cristo ku ra ka̱na ndóꞌo̱ ya nduu ndo iin ikin kuñu xiꞌin ra, ta taxi ni ndo tixaꞌvi ndaꞌa Ndioxi ndiꞌi saa ichí.