Efesios 1:18 - Xochapa Mixteco

¹⁸ saa ná ndikuná ra ya xínituni ndo ya kuchiñu ndo kundaa ini ndo xaꞌa ñaꞌa ya vaꞌa luvi ni, ya xa xa̱a vií ra taxi ra ndaꞌa naꞌa, na ka̱na ra kundikun ñaꞌa. Ta saa kua vaꞌa niꞌi ni ndo ya vaꞌa, ya ki̱ndoo ra taxi ra ndaꞌa ndóꞌo̱, na ñuu ra, na i̱í.

Efesios 1:18 Mawu Ofanana

San Mateo 13:15

Nima na yóꞌó ta xa ku̱teꞌe yu̱ú ya. Ndíkasi tuun na soꞌo na. Saa ndíkasi na nduchi nuu na, chi köo xíin na koto na. Ni köo xíin na kuni soꞌo na. Ya íkan na saa ta xïin na kundaa ini na ya ndaa, Ni köo xíin na kixi na nuu i ya sindaꞌa i na.

San Marcos 10:17

Xa kee tuku Jesús kuꞌun va ra kua, ta saa ndi̱xaa iin ra taa, xínu ra ndi̱xaa ra, si̱kusiti ra nuu ra, saa ndi̱ndakan tuꞌun ñaꞌa ra, káchi ra saa: ―Tata Maestro, vaꞌa ni taa kúu mií un, ta kaꞌan loꞌo un xiꞌin i unkua xíniñuꞌu i ikan i, ya kuchiñu kutaku i xiꞌin Ndioxi ndiꞌi saa kivi ―káchi ra.

San Lucas 24:45

Saa ta̱xi ra ndi̱xuna ya xínituni na, ya kuchiñu kundaa ini na xaꞌa tuꞌun Ndioxi.

Los Hechos 16:14

Ta iin yá taꞌan ná ikán náni yá Lidia ke̱e yá iin ñuu vaꞌa ya chee ni Tiatira nani ya, saa kúu mií yá chiñu xíko yá toto, ta ya vaꞌa ni ku ya xíko yá, ndakua ndíꞌi tuun ya xíko yá. Ta káñuꞌu ni yá ikán Ndioxi. Saa xíni soꞌo ni yá ya káꞌan ra Pablo, ta chi̱ndee Iva yo yá xu̱na yá nima yá nuu tuꞌun ra.

Los Hechos 26:18

ya kuna un nuu na, sindiko koo un na kixi na nuu i, nuu yéꞌe̱, saa saña na ndaꞌa ndee kiti nǎꞌa ta ndikundikun na ichí Ndioxi, kandixa na yeꞌe saa xaa kaꞌnu ini Ndioxi xaꞌa kuachi na, saa kuchiñu na koo na xiꞌin na i̱í na ndíkun ichí i”, káchi Jesús xiꞌin i ―ka̱chi ra Pablo xiꞌin ra rey Agripa.

ROMANOS 11:29

Saa chi Ndioxi, ta köo kíndaa ra ñaꞌa ya xa ta̱xi ra ndaꞌa naꞌa, ni naꞌa na ka̱na ra, ta xa na ka̱na ra kúu va na, köo ndíko koo ini ra xaꞌa ya íkan ra xiꞌin na.

ROMANOS 2:4

Xa kúndaa ini ndo, ya vaꞌa ni Ndioxi xiꞌin ndo, ta íyo ni ra ya kaꞌnu ini xiꞌin ndo xaꞌa ya väꞌa íkan ndo. Xaꞌa ya vaꞌa ni ini Ndioxi, ta ¿án ndiꞌi saa ichí kundee ini ra kuni ra ya väꞌa íkan ndo, káꞌán ndo? ¿án köo kúndaa ini ndo ya kúni Ndioxi sindikoo ndo ya väꞌa íkan ndo, ta ndikundikun ndo ichí ra? Xaꞌa ya ndátun ra ndiko koo ndo ichí ra, yakan íkan ni ra ya vaꞌa xiꞌin ndo.

2 Corintios 4:4

Saa ndóꞌo na chi kiti nǎꞌa kúu ndioxi ñuu ivi yóꞌó ku ri ndi̱kasi ya xínituni na ya ná kändixa na tuꞌun vaꞌa xaꞌa Jesucristo ya káꞌan nde xiꞌin na, ta na ikán, tá íin na kuáa̱ saa íin na. Chi köo táxi ri kuni na ya yéꞌe̱ luvi ni kúu mií tuꞌun vaꞌa xaꞌa Jesucristo. Chi mií Jesucristo, tá káa níí mií Ndioxi saa káa ra.

2 Corintios 4:6

Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

Gálatas 5:5

Sundi ndeꞌe ta tixin Tachi I̱í ra kua kúndaa teꞌe ini nde ya ndikuiso Ndioxi ndeꞌe nuu ra, nduu nde tá íin naꞌa, na köo ka kuachi kúu mií nuu ra, xaꞌa ya ndáa ni ini nde xíni nde Jesucristo.

Efesios 1:11

Chi xa yachi ka vi ndi̱kaxin Ndioxi yoo tixin Seꞌe ra Jesucristo ya nduu yo seꞌe ra, ta saa niꞌi yo ndiꞌi ñaꞌa nuu ra ya chi̱tuni ra taxi ra ndaꞌa yo, saa chi mií ra ta ndee ni vaꞌa kíꞌin ra kuenta xiꞌin ñaꞌa íkan ra, ya ná kana vaꞌa ndiꞌi ya tá kuꞌva kúni mií ra.

Efesios 1:7

Ta ya kuchiñu ra sikaku ra yoo kua cha̱ꞌvi Jesucristo xaꞌa kuachi yo xiꞌin nií ra nduta ndi̱xita nuu cruzin tá ndi̱xiꞌi ra. Saa ku̱u nuu ndi̱saña yo ki̱ndoo ndíka yo nuu ya väꞌa, ya xa̱ꞌnda chiñu nuu yo. Xaꞌa ya kaꞌnu ni ini Ndioxi kua i̱kan ra saa xiꞌin yo.

Efesios 2:12

Ndikaꞌán ini ndo kivi tá köo Jesucristo ndi̱xiyo xiꞌin ndo, ta ndi̱xiyo xíka ni va ndo nuu ra, ta xaꞌa ya köo kúu ndo na ñuu Israel yakan köo ndi̱xiyo ichí ndaꞌa ndo niꞌi ndo ya ki̱ndoo Ndioxi taxi ra ndaꞌa na Israel. Ndaꞌvi ni ndi̱xiyo ndo ñuu ivi yóꞌó, chi nda loꞌo köo ndi̱kundaa ini ndo xaꞌa Ndioxi ra ndaa. Yakan nda loꞌo köo ndi̱xika ini ndo niꞌi ndo ya vaꞌa nuu ra.

Efesios 3:16

Xíkan ni i ya mani nuu ra ya ná taxi ra Tachi I̱í ra koo ya xiꞌin ndo, saa taxi ra ndee ndaꞌa ndo ya vaꞌa nduxuxa nima ndo xiꞌin tuꞌun ra, ta vaꞌa ikan Ndioxi saa xiꞌin ndo, chi ndee ya kúu mií ra ta chee ni ya ta ni köo ndíꞌi tu xaꞌa va ya.

Efesios 3:8

Vani köo ndáa yaꞌvi ni va i nuu ndiꞌi na ñani yo, na kúu ñuu Ndioxi, ta ta̱xi ra ichí ndaꞌa i ya kaꞌan ndoso i tuꞌun vaꞌa xaꞌa ra xiꞌin naꞌa, na köo kúu judío. Ta tuꞌun vaꞌa ni ikán, ta tá káa ya kuika ni saa káa ya, chi köo ndíꞌi xaꞌa ya.

Efesios 4:1

Yeꞌe, Pablo, ndíkaa i veꞌe kàà xaꞌa ya xáa chiñu i nuu Tata yo Jesucristo, ta xíkan ni i ya mani nuu ndo ya ná koo ndo tá kuꞌva kúni mií ra, xaꞌa ya ñaa kua ka̱na ra ndóꞌo̱.

Efesios 4:4

Chi tá kuꞌva káa ikin kuñu mií ra saa íin ndiꞌi yo. Ta iindaa ku Tachi I̱í Ndioxi ya íyo xiꞌin yo, saa ka̱na ra yoo ya kandixa yo iindaa mituꞌun mií seꞌe ra.

Efesios 5:8

Saa chi yachi ta nuu naá va ndi̱xiyo ndo, sundi vitin ta xaꞌa ya ndíkun ndo Tata yo Cristo kua xíka ndo nuu yéꞌe̱. Xaꞌa ya ñaa kua xíniñuꞌu ndo koo ndo tá íin naꞌa, na xíka nuu ñu̱ꞌu̱ yéꞌe̱, nuu túvi.

Filipenses 3:14

Saa íkan i kuaꞌan i ya kuchiñu i ndikiꞌin i ñaꞌa ya ndi̱kaꞌan Ndioxi taxi ra ndaꞌa i tá kivi ka̱na ra yeꞌe tixin Tata yo Jesucristo.

Colosenses 1:12

Saa taxi ndo tixaꞌvi ndaꞌa Iva yo Ndioxi xiꞌin ya kúsini ni ndo, chi táxi ra ndiꞌi ñaꞌa ya xíniñuꞌu yo ndaꞌa yo ya kuchiñu yo ndikiꞌin yo ñaꞌa ya ndi̱kaꞌan ra nditaꞌvi ra xiꞌin ndiꞌi yo ñuu ra, yo i̱í, yo xíka nuu yéꞌe̱.

Colosenses 1:23

Saa nduu ndo tá tu tuun ni kándixa ndo tuꞌun vaꞌa xaꞌa Tata yo Jesucristo tá tu ná sïndikoo ndo tuꞌun ra ya ndee ni teꞌe xi̱ni soꞌo ndo. Ta xa ndiꞌi ni kúu xaꞌa ñuu ivi xi̱ni soꞌo na xaꞌa tuꞌun ra, taꞌan ya ikán kua káꞌan ndoso yeꞌe Pablo.

Colosenses 1:27

Ta saa kua i̱kan Iva yo Ndioxi, saa chi ku̱ni ra ya ná kundaa ini na kúu kuenta mií ra xaꞌa ñaꞌa ya ndi̱xiyo sěꞌe xinaꞌa. Ta tuꞌun ra ya ndaa, ya chee ni, ya luvi ni, ta ya kuni soꞌo ndiꞌi ni kúu naꞌa kua. Ta ya káꞌan tuꞌun Iva yo xaꞌa ya ndixiyo sěꞌe yóꞌó kua: íyo Tata yo Jesucristo nima ndóꞌo̱ köo kúu judío vitin, ta kúndaa teꞌe ini ndo ya koo ndo xiꞌin ra nuu ndivi.

Colosenses 1:5

Íkan ndo saa ndáa ni ini ndo Ndioxi, saa kúꞌvi ni ini ndo xíni ndo ra chi ku̱ndaa teꞌe ini ndo ya niꞌi ndo ñaꞌa nuu ra, ya chi̱vaꞌa ra xaꞌa ndo nuu ndivi. Chi xa ku̱ndaa teꞌe ni ini ndo tá xi̱ni soꞌo ndo tuꞌun vaꞌa ya ndaa ni xaꞌa Tata yo Jesucristo.

Colosenses 2:2

Saa ná taxi ni Ndioxi ndee ndaꞌa ndo ya xaꞌa ni ndo ndee xiꞌin taꞌan ndo xaꞌa ya kúꞌvi ni ini ndo xínitaꞌan ndo. Xaꞌa ya ñaa kua ndítuꞌun ni i xiꞌin ndo, ndíkani i nuu ndo chi kúꞌvi ni ini i xíni i ndóꞌo̱. Ta vaꞌa ná taxi ra ndukuika ni ndo xiꞌin ya ndíchi ni chi̱tuni Ndioxi ndi̱xiyo sěꞌe yachi, chi ya ndi̱xiyo sěꞌe ikán ku mií Tata yo Jesucristo.

Colosenses 3:15

Ta taxi ndo ná koo ya vaꞌa táxi Cristo ndaꞌa ndo ya kaꞌnda chiñu ya nima ndo, chi mií Cristo ku ra ka̱na ndóꞌo̱ ya nduu ndo iin ikin kuñu xiꞌin ra, ta taxi ni ndo tixaꞌvi ndaꞌa Ndioxi ndiꞌi saa ichí.

1 Tesalonicenses 2:12

Ta ndi̱xaꞌa ni nde ndee xiꞌin ndo ya ná koo ndo tá kuꞌva kúni mií Iva yo Ndioxi, chi ka̱na ra ndóꞌo̱ ya koo ndo xiꞌin ra nuu luvi ni káa nuu xáꞌnda chiñu ra.

1 Tesalonicenses 5:8

Sundi yoo ndíkun Tata yo Jesucristo, ta nduvi xíka yo nuu yéꞌe̱, yakan ná koo kaxin teꞌe ini yo. Tá íkan yo saa ta saa kua ndáa ni ini yo xíni yo ra, saa kúꞌvi ni ini yo xíni yo ra. Ta saa kua ndási ndaꞌa ra nima yo tá íin nda lapa nda íyo kàà ndási ya kándika nda, saa íin yo. Ta ndíkaa teꞌe ya téꞌe xi̱ní nda ya ndási ya xi̱ní nda, kuꞌva saa íkan ra xiꞌin yo ndáa ra xíni yo xaꞌa ya kúndaa teꞌe ini yo ya sikaku ra yoo.

2 Tesalonicenses 1:11

Xaꞌa ya ñaa kua káꞌan ni nde xaꞌa ndo xiꞌin Ndioxi, ndiꞌi saa tiempo ya ná chindee ra ndóꞌo̱ ya kuu ndo naꞌa, na ndee ni ndáa yaꞌvi nuu ra, ya ndi̱kaxin ra ndóꞌo̱ kundikun ndo Tata yo Jesucristo koo ndo tá kuꞌva kúni mií ra. Ta saa ná ikan ra ya vaꞌa xiꞌin ndo sixinu ra ya ndíkani ini ndo ikan ndo, saa chi ndáa ni ini ndo ra xaꞌa chiñu íkan ndo.

2 Tesalonicenses 2:16

Ta mií Tata yo Jesucristo xiꞌin mií Iva yo Ndioxi ku ra kúꞌvi ni ini xíni yoo, saa si̱ndiko ra ini yo ndiꞌi saa kúu ichí, ta ndixaꞌa ni ra ndee xiꞌin yo ya ndee ni tuun kundikun yo ra, xaꞌa ya vaꞌa ni ini ra xiꞌin yo.

1 Timoteo 6:12

Xaꞌa ya ndáa ni ini un xíni un Tata yo Jesucristo, ta tá káa iin ra kéꞌe taꞌan saa káa un, chikaa ni ka un ndee ikan un tá kuꞌva íkan iin ra lapa ra ndee ni chíkaa ndee tá kuaꞌan ra nuu kuachi. Ta saa ikan un ya ná kuchiñu un niꞌi un koo un xiꞌin Ndioxi ndiꞌi saa kivi ya vaxi. Chi xaꞌa ya kutaku un xiꞌin ra kua ka̱na ra yóꞌo̱, ta nuu ndiꞌi na kua ki̱ndoo un ya xaa súvi un tuꞌun ra ya kándixa un.

Tito 2:13

Saa ná koo yo nani ndátun yo tindaa kivi ya ndee ni chee nuu ndiko koo Tata yo Jesucristo kixi ra ñuu ivi yóꞌó sikaku ra yoo. Chi mií ra ku Ndioxi ra chee ni, ta kusini ni yo xiꞌin ra tá ná ndiko koo ra xiꞌin ndee ya luvi ni yéꞌe̱ kúu mií ra.

Tito 3:7

Saa nda̱sa vaꞌa ra yoo, ndu̱u yo tá íin naꞌa, na köo ka kuachi kúu mií nuu ra, xaꞌa ya vaꞌa ni ra xiꞌin yo kua i̱kan ra saa xiꞌin yo. Ta saa kúsini ni yo chi kúndaa teꞌe ini yo ya niꞌi yo nuu taxi Ndioxi ndaꞌa yo koo yo xiꞌin ra ndiꞌi saa kivi ya vaxi.

HEBREOS 10:32

Ta saa ndóꞌo̱, ndikaꞌán ni ini ndo ndá kuꞌva ndo̱ꞌo ndo yachi, tá sikan ndi̱yeꞌe nima ndo xiꞌin tuꞌun vaꞌa xaꞌa Tata yo Jesucristo, ta ndee ni tindoꞌo ki̱xi nuu ndo, ta ndi̱xaꞌa ndee ndiꞌi ini ndo xiꞌin ya ndinuꞌu ni ini ndo xi̱ndikun ndo sata ra.

HEBREOS 6:4

Sundi naꞌa, na xa ndi̱yeꞌe tuꞌun Ndioxi nima tá yachi ta si̱ndoo na ya, na ikán ta küchiñu ka ndiko koo tuku ini na chi xa ku̱ndaa vaꞌa ini xaꞌa ya ndaa ya síndiyeꞌe nima na, ta saa ndi̱niꞌi na ya vaꞌa nuu Ndioxi, ndi̱kiꞌin na Tachi I̱í ra ndi̱xiyo ya xiꞌin na.

1 Pedro 1:3

Ta ná xaa kaꞌnu yo Iva yo Ndioxi ra kúu Iva Tata yo Jesucristo, saa chi kúndaꞌvi ni ini ra xíni ra yoo, ta yakan ta̱xi ra ndi̱kaku uvi tuku yo xaꞌa ya ndi̱taku Tata yo Jesucristo tañu na ndíi, saa kua ta̱xi ra ya kúndaa teꞌe ini yo

1 Pedro 3:9

Tá ndá na íkan ya väꞌa xiꞌin ndo, ta ïkan ndo ya väꞌa xiꞌin na, käꞌan kini ndo xiꞌin na, vaꞌa ka kaꞌan ndo xaꞌa na xiꞌin Ndioxi ná chikaa ra ya vaꞌa na, ta saa kua niꞌi tu ndóꞌo̱ va ya vaꞌa nuu ra. Chi xaꞌa ya ikán kua ka̱na ra ndóꞌo̱ ya niꞌi ndo ya vaꞌa nuu ra.

1 Pedro 5:10

Sundi ndóꞌo̱ ta kündiꞌi ini ndo chi tá sindiꞌi ndi̱yaꞌa uvi ndaa kivi ya ndi̱xuꞌvi ni ndo, ta mií Ndioxi ku ra ndasa xuxa ini ndo, ta saa taxi ra ndee ndaꞌa ndo ya tuun ni kundikun ndo ra, saa niꞌi ndo ndee nuu ra ndundee ini ndo ta ta̱xi ra ichí ndaꞌa ndo tuun ni koo ndo xiꞌin ra.