2 Corintios 7:7 - Xochapa Mixteco

⁷ Ta saa ni süvi ndisaa xaꞌa ya xa̱a ra nuu nde kua ndi̱ndiko ini nde, chi xaꞌa ya ndee ni vaꞌa ndi̱xaꞌa ndo ndee xiꞌin ra kua si̱ndiko ni ini nde. Ndi̱tuꞌun ra xiꞌin nde ya ndee ni kúni ndo kuni ndo ndeꞌe, ta saa ndi̱kaꞌan ra xiꞌin nde ya kúsuchi ni ini ndo xaꞌa kuachi ndo. Saa ndi̱tuꞌun ra xiꞌin nde ya ndee ni ndíꞌi ini ndo xaꞌa i, yakan ndee ni vaꞌa ka ku̱ni i xiꞌin tuꞌun ya xi̱ni soꞌo i xaꞌa ndo.

2 Corintios 7:7 Mawu Ofanana

San Mateo 26:75

Saa ndi̱kaꞌán ini ra, ya ndi̱kaꞌan Jesús xiꞌin ra, káchi ra saa: “Täꞌan ka vi kana cheꞌle, ta xa uni ichí vi ndikuaa un ya köo xíni un yeꞌe”, káchi ra xiꞌin ra. Saa ke̱ta ra keꞌe ta xa̱á ndinuni loꞌo xáku suchi ni ini ra.

San Mateo 5:4

’Vaꞌa ni kée ndo tá tu xáku ni ndo, saa chi vaxi kivi ta sindiko Ndioxi ini ndo.

San Lucas 22:44

Ta ndíꞌi ka vi ini ra, ndinuni loꞌo káꞌan ra xiꞌin Ndioxi, ndakua ndi̱xinu titiin nuu ra. Ndoo ka vi rá kóyo vaxi nùù nuu ra. Tá íin koꞌndo nduta nií, saa íin rá kóyo nuu ñuꞌú.

Los Hechos 11:23

Tá ndi̱xaa ra Bernabé ikán ta xi̱ni ra ya kuaꞌa ni ya vaꞌa íkan Ndioxi xiꞌin na, ñaa kúsini ni ra. Ta saa ndi̱xaꞌa ra ndee xiꞌin na ya ndinuꞌu ni ini na ná kundikun na ichí Tata yo, ta vitin taan ná kandixa ka ñaꞌa na, káchi ra xiꞌin na.

ROMANOS 1:12

Ta saa ndóꞌo̱ xiꞌin yeꞌe, chindee taꞌan yo xiꞌin na taꞌan yo, saa chi ndinuꞌu ni ini yo kándixa yo Jesucristo.

1 Corintios 5:2

¡Ta ndóꞌo̱, ta ndo kútai ini va ku ndo xaꞌa ya väꞌa íkan ra ñaa nuu ndo! ¡Ndóꞌo̱ kuchiꞌña ini vi ku ndo, ndikuu, ta köo íkan ndo saa! Ta ra íkan saa, ta vaꞌa tava ndo ra, ná keta ra veꞌe ñuꞌu, täxi ka ndo ndikaa ra xiꞌin ndo.

2 Corintios 1:14

ta ya ndixa kua xa ku̱ndaa loꞌo ini ndo xiꞌin ya xa ndi̱kaꞌan nde xiꞌin ndo. Saa tá ná ndiko koo Tata yo Jesucristo ta kusini ni ndo xiꞌin nde, saa tu ndeꞌe va kusini ni nde xiꞌin ndo.

2 Corintios 1:4

Chi mií ra ku ra síndiko ini yo xiꞌin ndiꞌi ni kúu tindoꞌo ya ndóꞌó yo, ta saa kuchiñu yo chindee taꞌan yo xiꞌin inka naꞌa, sindiko yo ini na, tá kuꞌva síndiko mií ra ini yo.

2 Corintios 2:9

Ya ta̱a i tutu xaa nuu ndo nuu káꞌan i xiꞌin ndo xaꞌa ya i̱kan ra ñaa, ta xaꞌa ya kúni i koto ndoso i ndóꞌo̱ án ya ndixa kua xáa súvi ndiꞌi ndo ya káꞌan i xiꞌin ndo, xaꞌa ya ñaa kua ta̱a i ya xaa ya nuu ndo.

2 Corintios 5:2

Ta kivi táku yo ñuu ivi yóꞌó ta ndee ni va táná yo xaꞌa ya ndee ni tíxuꞌvi ikin kuñu yo, ta ndakua kunǎꞌa kuꞌun yo nuu ndivi ya ná taxi kii Ndioxi ikin kuñu yo, ya xa̱á íyo nuu ndivi ndaꞌa yo, túvi yo.

2 Corintios 7:6

Ta vaꞌa chi mií Iva yo Ndioxi ku ra síndiko ini naꞌa, na ndee ni ndíkava ini, ta si̱ndiko ra ini nde xaꞌa ya xa̱a ra ñani yo ra Tito xíto ra ndeꞌe.

2 Corintios 7:8

Vani ku̱suchi ni ini ndo i̱kan i xaꞌa tuꞌun ya ndi̱kaꞌan i xiꞌin ndo nuu tutu ya ti̱ꞌvi i xaa ndaꞌa ndo, ta köo ndíko koo ini i ta̱a i ya xaa ya nuu ndo, vani ndi̱ko koo ini i tá sikan ndi̱kaꞌan i saa xiꞌin ndo chi ku̱suchi ni ini ndo uvi ndaa kivi xaꞌa ya ndi̱kaꞌan i saa xiꞌin ndo.

2 Corintios 8:16

Táxi ni i tixaꞌvi ndaꞌa Ndioxi xaꞌa ra Tito, ñani yo, chi chi̱kaa Ndioxi ya vaꞌa ini ra, ya ndíkani ini ra tá kuꞌva ndíkani ini yeꞌe, ya chindee taꞌan nde xiꞌin ndo.

Filipenses 1:20

Chi yeꞌe ta ya ndee ni kúni i kua xaa kaꞌnu ni i Tata yo Jesucristo xiꞌin ikin kuñu i ndiꞌi saa ichí tá táku i án tá ndi̱xiꞌi i, saa chi kúndaa teꞌe ini i ya täxi Tata yo kukaꞌan nuu i, ta siín mií ra ná chindee yeꞌe ya kuchiñu i xaa kaꞌnu ni i ra vitin xiꞌin ndiꞌi saa kivi ya vaxi.

Colosenses 2:5

Vani köo íyo mií i xiꞌin ndo vitin, sundi ya vaꞌa i ta íyo ya xiꞌin ndo. Ta vaꞌa ni kúni i xaꞌa ya xi̱ni soꞌo i xaꞌa ndo ya ndóo vívií ndo tá kuꞌva kúni mií Ndioxi, ta ndee ni ndinuꞌu ini ndo ndáa ini ndo xíni ndo Tata yo Jesucristo.

1 Tesalonicenses 3:6

Ta vitin xa ke̱e ra Timoteo ñani yo, ñuu ndo Tesalónica ikán, ndi̱ko koo ra xa̱a ra nuu nde ta vaꞌa ni va káꞌan ra xaꞌa ndo ya ndee ni kándixa ndo Tata yo Jesucristo ta saa kúꞌvi ni ini ndo xíni taꞌan ndo, ta ndíkaꞌán ni ini ndo xaꞌa nde, saa kúni ni ndo kuni ndo ndeꞌe, káchi ra. Ta saa tu ndeꞌe va, ndee ni kúni nde kuni nde ndóꞌo̱.

1 Tesalonicenses 3:8

Ndakua vaꞌa ku̱ni nde, ndi̱kiꞌin ni nde ini nde tá ku̱ndaa ni nde xaꞌa ndo ya vaꞌa ni tuun ndíkun ndo Tata yo Jesucristo.

HEBREOS 2:1

Xaꞌa ya yóꞌó kua xíniñuꞌu yo chikaa ni soꞌo yo xaꞌa tuꞌun Ndioxi ya xi̱ni soꞌo yo ya ná sïndoo yo ichí ra, ta ná kandixa ni ka yo ra.

Santiago 5:17

Tá kúu ra Elías tá kuꞌva íyo mií yo saa ndi̱xiyo ra, ta ndi̱kaꞌan ra xiꞌin Ndioxi ya ná küun savi, ta köo ndi̱kuun rá uni kuiya sava.

2 Juan 1:4

Kúsini ni i ya ndi̱kitaꞌan i xiꞌin sava ndo xíka ndo ichí ya ndaa tá kuꞌva íyo ya ta̱xi Iva yo Ndioxi xa̱ꞌnda chiñu ra nuu yo, saa íyo ya íkan ndo.

Judas 1:3

Ñani mani, xa yachi vi kúni ni i taa i tutu yóꞌó xaa ya ndaꞌa ndo nuu káꞌan i xiꞌin ndo xaꞌa ya síkaku Iva yo Ndioxi yoo. Ta nda vitin vi táa i ya xaa ya nuu ndo ya ndúku ni i ya mani nuu ndo káꞌan i xiꞌin ndo, täxi ndo sindaꞌvi nda sínaꞌa ya vata ndóꞌo̱, ta xaꞌa ni ka ndo nde ya kandixa ni ndo tá kuꞌva ku̱ndaa ini na ñuu Ndioxi.