2 Corintios 7:1 - Xochapa Mixteco

¹ Ta saa ñani mani yo, xa ndi̱kaꞌan Ndioxi xiꞌin yo ya ki̱ndoo ra xiꞌin yo, yakan ná kundaa ni yo mií yo, ná kuxika yo nuu ndá ka ñaꞌa väꞌa, ya xáa yakua ikin kuñu yo xiꞌin ya vaꞌa yo. Ná nditaxi ndiꞌi yo mií yo ndaꞌa Ndioxi, ya xaa toꞌo yo ra, saa kua nduu yo na i̱í nuu ra.

2 Corintios 7:1 Mawu Ofanana

San Mateo 12:33

Saa ndi̱kaꞌan tuku Jesús xiꞌin na, káchi ra saa: ―Tá íyo itun vaꞌa, ta kuiꞌi vaꞌa kúun ndaꞌa nu. Tá tu íyo itun väꞌa, ta kuiꞌi väꞌa kúun ndaꞌa nu. Ya kuchiñu yo kundaa ini yo án nu vaꞌa ku nu án nu väꞌa ku nu, ta vaꞌa kiꞌin yo kuenta xaꞌa kuiꞌi kúun ndaꞌa nu.

San Mateo 5:48

Xaꞌa ya ñaa kua ná koo ndo naꞌa, na ndaa ini, tá kuꞌva íyo Iva yo Ndioxi ra i̱í, ra ndaa ini ―káchi Jesús xiꞌin na.

San Mateo 5:8

’Vaꞌa ni kée ndo tá tu ndinuꞌu ni ini ndo kúu ndo naꞌa, na kúu mií nima vaꞌa nuu Ndioxi, chi vaxi iin kivi ta kuni ndo Ndioxi.

Los Hechos 9:31

Sindiꞌi ikán ta köo ka na ndi̱xaa nduvaꞌa xiꞌin na ndíkun ichí Jesús, na ndóo Judea tin na ndóo Galilea xiꞌin na ndóo Samaria. Vaꞌa ni xi̱ndoo na. Káñuꞌu ni na Ndioxi. Ta mií Tachi I̱í Ndioxi chíndee na, ñaa ndúndee ka na kándixa na Jesús. Ta saa ndúkuaꞌa tu na ndíkundikun ichí va ra.

ROMANOS 5:20

Tá ta̱xi Ndioxi ley ra ndaꞌa na, saa kua ku̱ndaa ini na ya ndee ni íyo kuachi na nuu ra. Tá ndee ni nda̱a kuachi na ta saa ndee ni ka ndaa tu ya vaꞌa i̱kan Ndioxi xiꞌin va na, xaꞌa ya kúꞌvi ni ini ra xíni ra na.

1 Corintios 6:20

Saa chi mií ra ku ra sa̱ta ndóꞌo̱ xiꞌin nií mií Tata yo Jesucristo, ta ndee ni yaꞌvi cha̱ꞌvi ra xaꞌa ndo. Xaꞌa ya ñaa kua xaa kaꞌnu ni ndo ra xiꞌin ikin kuñu ndo tin ya vaꞌa ndo, saa chi ñaꞌa mií ra ku uvi saa ya kúu mií ndo.

2 Corintios 1:20

Saa chi mií ra ku ra síxinu ndiꞌi ya ndi̱kaꞌan Ndioxi taxi ra ndaꞌa yo. Xaꞌa ya ñaa kua tá xáa kaꞌnu yo Ndioxi ta káꞌan yo soꞌva: “Saa ná koo”, káchi yo, chi tixin mií Jesucristo kua káꞌan yo saa.

Efesios 2:3

Saa ndi̱xiyo ndiꞌi va yo yachi: I̱kan ni yo ndiꞌi nuu ñaꞌa ya väꞌa, ya ku̱too ni mií ikin kuñu yo ikan ya. I̱kan yo tá kuꞌva íkan ndiꞌi naꞌa, xa̱a súvi ni yo ndiꞌi ñaꞌa ya ndi̱kani ini yo vaꞌa ni nuu yo, túvi yo. Ta xaꞌa ya ikán kua xíniñuꞌu yo sitixuꞌvi ni Ndioxi yoo, chi sáa ni ini ra xíni ra ya väꞌa íkan yo.

1 Tesalonicenses 3:13

Ta káꞌan ni nde xiꞌin Ndioxi ya ná chindee ra ndóꞌo̱ koo tuun ni tuꞌun ra nima ndo, saa nduu ndo naꞌa, na i̱í ni, na köo nda iin kuachi kúu mií nuu Iva yo Ndioxi. Ta saa kua koo ndúvi ndo, tá ná ndiko koo tuku Tata yo Jesucristo kixi ra xiꞌin ndiꞌi na ñuu ra, na i̱í.

1 Tesalonicenses 4:7

Saa chi Ndioxi ta ka̱na ra yoo ya kuu yo naꞌa, na i̱í nuu ra, ta köo ndi̱kana ra yoo kundikun yo ra ya ikan yo ya väꞌa nuu ra.

1 Tesalonicenses 5:23

Ta mií Ndioxi, ra táxi koo vaꞌa ni ini yo ná xaa i̱í ni ra ndiꞌi ni kúu ya vaꞌa ndo xiꞌin ya xínituni ndo xiꞌin ikin kuñu ndo. Saa ná chivaꞌa ra ndóꞌo̱, nda iin kuachi ná küu mií ndo tá kivi ná ndiko koo tuku Tata yo Jesucristo kixi ra ñuu ivi yóꞌó.

HEBREOS 12:23

Ta ñuu ikán ku nuu ndi̱kitaꞌan ndo xiꞌin na núnu̱ú na kúu seꞌe Ndioxi, ta na ikán ta xa íyo kivi na nuu tutu ra, na íin tá íin tachi, na ndi̱xiyo ivi na vaꞌa ni, na ndu̱u tá íin naꞌa, na köo ka kuachi kúu mií nuu Ndioxi, na xa nda̱sa i̱í ra. Na ikán ku na xa ndi̱xaa nuu ra xaꞌa ya kúu ra, ra xáa nani kuachi xiꞌin na.

HEBREOS 12:28

Nuu xáꞌnda chiñu Ndioxi, nuu koo yo xiꞌin ra kua ndoo koo chi küvi kanda ya ikán kutaꞌa ya. Yakan kua ná taxi ni yo tixaꞌvi ndaꞌa ra, ta saa ná xaa kaꞌnu ni yo ra tá kuꞌva kútoo mií ra, xaꞌa ya íꞌvi yo xíni yo ra.

HEBREOS 4:1

Yakan yoo, ta ná kundiꞌi ni ini yo, kiꞌvi yo koo yo nuu ndikundee yo xiꞌin Ndioxi. Ta kuenta ni ná koo yo süvi ka vi ya ndoo sava yo chí sata, ta küchiñu yo kiꞌvi yo koo yo nuu ndikundee yo xiꞌin ra.

HEBREOS 6:9

Ñani yo, ndóꞌo̱ ku ndo kúꞌvi ni ini nde xíni nde. Vani ndee ni uꞌvi tuꞌun ya káꞌan nde xiꞌin ndo yóꞌó, sundi ndeꞌe ta xíni nde ya ndee ni vaꞌa ndíkun ndo ichí nuu sikaku ndo mií ndo, chindee ndo mií ndo.

Santiago 4:8

Ta vaꞌa kuyati ndo nuu Ndioxi saa kuyati ra nuu ndo. Ta ndóꞌo̱ íyo kuachi, kukuiin ndo xiꞌin ya väꞌa kéꞌe ndo, ndikata ndo ndaꞌa ndo. Saa tu ndóꞌo̱ uvi ini këꞌe ka ndo saa, ndasa vaꞌa ndo nima ndo ná nduvií ndo.

1 Pedro 1:15

Ya vaꞌa ni ka kua ná nduu ndo naꞌa, na i̱í ni, ta kuꞌva saa xaa súvi ndiꞌi ndo chiñu ya íkan ndo, chi Ndioxi ra ka̱na ndóꞌo̱ kundikun ndo ra, ta i̱í ni ra.

1 Pedro 1:17

Ta ndóꞌo̱, tá káꞌan ndo xiꞌin Ndioxi, ta kaꞌan ndo xiꞌin ra ya kúu ra Iva ndo. Ta vaꞌa va chi köo ndi̱kaxin ra nda iin naꞌa, iin kuꞌva xáa nani ra kuachi xiꞌin ndiꞌi na. Xaꞌa ya ñaa kua xíniñuꞌu ndo xaa súvi ndo ndiꞌi ñaꞌa íkan ndo xiꞌin ya toꞌo, nani ndóo naꞌa ndo ñuu ivi yóꞌó.

1 Pedro 1:22

Ta xaꞌa ya xáa súvi ni ndo tuꞌun vaꞌa ya ndaa xi̱ni soꞌo ndo yakan ndu̱vaꞌa ya vaꞌa ndo, saa chíndee taꞌan Tachi I̱í ra xiꞌin ndo ya ndinuꞌu ni kúꞌvi ini ndo xíni taꞌan ndo. Ikan ndo saa: ndinuꞌu ni ini ndo kuꞌvi ini ndo kuni taꞌan ndo.

1 Pedro 2:11

Ñani yo tin kuꞌva yo, ndóꞌo̱ ta tá íin naꞌa, na ndóo tóo xiꞌin na xíka tóo ñuu ivi yóꞌó saa íin ndo, yakan xíkan ni i ya mani nuu ndo, ndee koo ini ndo ta täxi ka ndo kaꞌnda chiñu ya väꞌa kúni kaꞌnda chiñu nuu ikin kuñu ndo, chi ndiꞌi ya väꞌa ñaa ta kánitaꞌan ya xiꞌin ya vaꞌa ndo.

1 Pedro 5:10

Sundi ndóꞌo̱ ta kündiꞌi ini ndo chi tá sindiꞌi ndi̱yaꞌa uvi ndaa kivi ya ndi̱xuꞌvi ni ndo, ta mií Ndioxi ku ra ndasa xuxa ini ndo, ta saa taxi ra ndee ndaꞌa ndo ya tuun ni kundikun ndo ra, saa niꞌi ndo ndee nuu ra ndundee ini ndo ta ta̱xi ra ichí ndaꞌa ndo tuun ni koo ndo xiꞌin ra.

1 Juan 1:7

Sundi tá tu xíka yo nuu yéꞌe̱ tá kuꞌva íyo Ndioxi nuu yéꞌe̱, ta saa íyo yo iin yuꞌu xiꞌin taꞌan yo. Ta ni̱í Jesucristo Seꞌe Ndioxi ku rá ndíkata ndiꞌi kuachi yo, ndúvaꞌa yo nuu Iva yo Ndioxi.

1 Juan 1:9

Sundi tá tu náꞌma yo kuachi yo nuu Ndioxi ta xáa kaꞌnu ini ra xaꞌa yo, ndíkata ra ndiꞌi kuachi yo, saa ndása vaꞌa ra yoo, saa chi vaꞌa ni mií ra, ndaa ni ini ra ta síxinu ndiꞌi ra ya káꞌan ra.

1 Juan 3:3

Ta ndiꞌi na ndinuu ni ndátun ya ndiko koo ra ndisama ra na, ta ndíkundee ni na xinu koo na nduu na tá kuꞌva íyo mií ra, saa chi ra i̱í ku ra.