2 Corintios 6:6 - Xochapa Mixteco

⁶ Xaꞌa ya vaꞌa ni íyo nde nuu naꞌa kua sínaꞌa nde mií nde nuu na ya kúu nde taa, nda xáa chiñu nuu Ndioxi, chi íyo ni ya xínituni nde xaꞌa ya xíni nde ya ndaa, ta xáꞌa ndee ni ini nde nuu ndiꞌi ya, ni köo ndíko koo ini nde, vaꞌa ni ini nde xiꞌin naꞌa. Íkan nde saa xaꞌa ya íyo Tachi I̱í Ndioxi xiꞌin nde, ta ndinuꞌu ni ini nde kúꞌvi ini nde xíni nde na,

2 Corintios 6:6 Mawu Ofanana

Colosenses 1:27

Ta saa kua i̱kan Iva yo Ndioxi, saa chi ku̱ni ra ya ná kundaa ini na kúu kuenta mií ra xaꞌa ñaꞌa ya ndi̱xiyo sěꞌe xinaꞌa. Ta tuꞌun ra ya ndaa, ya chee ni, ya luvi ni, ta ya kuni soꞌo ndiꞌi ni kúu naꞌa kua. Ta ya káꞌan tuꞌun Iva yo xaꞌa ya ndixiyo sěꞌe yóꞌó kua: íyo Tata yo Jesucristo nima ndóꞌo̱ köo kúu judío vitin, ta kúndaa teꞌe ini ndo ya koo ndo xiꞌin ra nuu ndivi.

Efesios 4:32

Ta vitin xíniñuꞌu ndo koo ndo naꞌa, na vaꞌa ini. Kundaꞌvi ini ndo kuni taꞌan ndo. Xaa kaꞌnu ini ndo xaꞌa taꞌan ndo, tá kuꞌva xa̱a kaꞌnu ini Ndioxi xaꞌa ndo tixin Tata yo Jesucristo.

Efesios 4:2

Ta ndiꞌi saa kivi koo ndo naꞌa, na ni̱nu̱ ini, na vaꞌa ini, na kaꞌnu ni ini, na xáꞌa ndee ini xiꞌin taꞌan xaꞌa ya kúꞌvi ni ini ndo xíni taꞌan ndo.

Gálatas 5:22

Ta süvi saa íkan Tachi I̱í Ndioxi xiꞌin yo, chi ya chíndee taꞌan ka va kua xiꞌin yo kuꞌvi ini yo kuni yo na taꞌan yo, saa táxi ya kusini ni yo, ta táxi ya íyo vaꞌa ini yo xiꞌin taꞌan yo, saa táxi ya ndúu yo na kaꞌnu ini, ta táxi ya ndúu yo na toꞌo ni ini, saa táxi tu ya ndúu yo naꞌa, na tái ni ini, ta táxi tu ya ndúu yo naꞌa na ndáa ni ini naꞌa xíni na án Ndioxi ta ndáa ini ra xíni ra yoo,

Gálatas 3:5

Ta ¿án xaꞌa ya xáa súvi ndo ley Ndioxi kua ta̱xi ra Tachi I̱í ra ndaꞌa ndo, túvi ndo? Saa tu ya íkan Ndioxi yatuꞌun xiꞌin va ndo ta ¿án xaꞌa ya xáa súvi ndo ley Ndioxi kua, túvi ndo? Süvi saa íyo ya. Xaꞌa ya xi̱ni soꞌo ndo tuꞌun vaꞌa xaꞌa Tata yo Jesucristo, ta ka̱ndixa ndo ya sikaku ra ndóꞌo̱. Xaꞌa ya ikán kua ta̱xi ra Tachi I̱í ra ndaꞌa ndo, saa tu ya íkan ra yatuꞌun xiꞌin va ndo.

2 Corintios 12:15

Vaꞌa ni kúni i ya tíin ndiꞌi i xuꞌun ya kúu mií i xiꞌin ndo, ta nda mií i ta taxi i mií i xaꞌa ya chindee i ndóꞌo̱. Ndee ni va kúꞌvi ka ini i xíni i ndóꞌo̱, sundi ndóꞌo̱ ta loꞌo ni va kúꞌvi ini ndo xíni ndo yeꞌe.

2 Corintios 11:11

Xaꞌa ya káꞌan i saa xiꞌin ndo, ta süvi ya köo kúꞌvi ini i xíni ndóꞌo̱ kua, mií Ndioxi xíni ya ndee ni kúꞌvi ini i xíni i ndóꞌo̱.

2 Corintios 11:6

Án sana köo xíni i ndá kuꞌva ndituꞌun vaꞌa ni i nuu naꞌa, sundi ya xíni i ya ndaa xaꞌa Ndioxi, ta xíni vaꞌa va i, saa íyo ya xa si̱naꞌa i nuu ndo, téꞌe ni va íyo ya si̱naꞌa i ndóꞌo̱.

2 Corintios 11:4

Chi ndóꞌo̱ ta ya vaꞌa ndíkuiso ndo ku ndiꞌi va tuꞌun ya ndíkani inka nda taa nuu ndo, ni xa síin kua káꞌan nda xiꞌin ndo, sínaꞌa nda ndóꞌo̱. Ta saa vaꞌa ni ndíkuiso ndo inka nuu tachi, ta süvi taꞌan Tachi I̱í Ndioxi ya xa ndi̱kiꞌin ndo ku ya káꞌan nda xaꞌa xiꞌin ndo, ta saa vaꞌa ni xíni soꞌo ndo ya káꞌan nda xiꞌin ndo xaꞌa tuꞌun vaꞌa xaꞌa Jesucristo. Ta süvi taꞌan kuꞌva si̱naꞌa nde ndóꞌo̱ kua káꞌan nda xiꞌin ndo, chi xa síin va kua káꞌan nda xiꞌin ndo.

2 Corintios 7:2

Xíkan ni nde ya mani nuu ndo ya ná kuna ndo nima ndo nuu nde, ya ndikiꞌin mani ndo ndeꞌe. Saa chi nda iin ya väꞌa köo ndíkan nde xiꞌin ndo, ta saa ni nda iin ndo köo ndi̱xaa ndikuu nde xiꞌin, ni nda iin tu ndo köo ndi̱sindaꞌvi va nde.

2 Corintios 4:6

Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

2 Corintios 3:3

Ta teꞌe ni va náꞌa ya chi ndóꞌo̱, tá íin tutu ya ta̱a Jesucristo ta̱xi ra ndaꞌa nde, saa íin ndo, ta süvi xiꞌin nduta káꞌi tutu kua ta̱a ra ya, chi xiꞌin mií Tachi I̱í Ndioxi ra táku kua ta̱a ra ya. Ta köo ndi̱taa ra ya nuu yu̱ú, chi nuu nima naꞌa va ta̱a ra ya.

2 Corintios 2:4

Tá kivi ta̱a i tutu ikán xaa ya nuu ndo, ta ndee ni kúsuchi ini i, saa ndíꞌi ka vi ini i, xáku ka vi i, ta ya ndi̱kaꞌan i xiꞌin ndo saa, ta süvi ya xaa suchi i ini ndo kua, chi yeꞌe, ta ku̱ni i ná kundaa ini ndo ya ndee ni kúꞌvi ini i xíni i ndóꞌo̱.

1 Corintios 13:4

Naꞌa, na íyo ya kúꞌvi ini táxi Ndioxi nima na, ta kaꞌnu ni va ini na, vií ni ini na, köo uní ini na, köo kútai ni ini na, ni köo xáa kaꞌnu na mií na,

1 Corintios 2:16

Xaꞌa ya ikán kua káꞌan tuꞌun Ndioxi ya ta̱a na xinaꞌa, káchi ya saa: “Nda iin naꞌa köo kúchiñu kundaa ini xaꞌa ya ndíkani ini Iva yo Ndioxi. Ni köo tu nda iin naꞌa, na ndíchi ni ya kuchiñu na sinaꞌa na ra”, káchi tuꞌun ra. Sundi ndeꞌe, ta kúndaa va ini nde xiꞌin ya yóꞌó, saa chi ndeꞌe, ta ta̱xi Ndioxi ya xínituni nde ndaꞌa nde tá kuꞌva íyo ya xínituni mií Tata yo Jesucristo, saa íyo ya xiꞌin nde.

ROMANOS 12:9

Tá kúꞌvi ni ini ndo xíni taꞌan ndo, ta ndixa ndinuꞌu ini ndo kuꞌvi ini ndo kuni taꞌan ndo. Kundasi nuu ndo kuni ndo ya väꞌa, ta chikaa ni ndo ndee ya kundikun ndo ya vaꞌa.

1 Juan 3:18

Ndóꞌo̱ ñani yo xiꞌin kuꞌva yo, tá íin seꞌe i saa íin ndo, ta káꞌan i xiꞌin ndo: Käꞌan ndo ndisaa tuꞌun mií xiꞌin taꞌan ndo, sundi ikan ndo ya vaꞌa xiꞌin ya ndaa nuu sínaꞌa ya ndixa kúꞌvi ini ndo xíni taꞌan ndo.

1 Pedro 1:22

Ta xaꞌa ya xáa súvi ni ndo tuꞌun vaꞌa ya ndaa xi̱ni soꞌo ndo yakan ndu̱vaꞌa ya vaꞌa ndo, saa chíndee taꞌan Tachi I̱í ra xiꞌin ndo ya ndinuꞌu ni kúꞌvi ini ndo xíni taꞌan ndo. Ikan ndo saa: ndinuꞌu ni ini ndo kuꞌvi ini ndo kuni taꞌan ndo.

1 Timoteo 4:12

Täxi un xaa ni̱nu̱ na yóꞌo̱, xaꞌa ya loꞌo un, kuâán un. Vivií koo un nuu na ya ná kuni na ikan na taꞌan ya vaꞌa íkan un, xaꞌa kuꞌva ndituꞌun un xiꞌin na, xiꞌin kuꞌva xíka un nuu na, xiꞌin kuꞌva kúꞌvi ini un xíni un na, saa kundaa ni ini un kuni un Tata yo Jesucristo, kundaa ni un mií un, xäa yakua xiꞌin mií un.

1 Tesalonicenses 2:10

Ta mií ndo ku ndo ndíkuiin xaꞌa nde xiꞌin Ndioxi, chi tá kivi ndi̱xiyo nde xiꞌin ndo ta vívií ni va ndi̱xiyo nde xiꞌin ndo, tá kuꞌva íyo naꞌa, na i̱í ini, na nda̱a̱ ni ini, na ndǎku ini, kuꞌva saa ndi̱xiyo nde xiꞌin ndo.

Colosenses 3:12

Chi mií Ndioxi ku ra ndi̱kaxin ndóꞌo̱ xaꞌa ya kúꞌvi ni ini ra xíni ra ndóꞌo̱ ya nduu ndo na ñuu ra, na i̱í. Xaꞌa ya ñaa kua xíniñuꞌu ndo koo vií ndo xiꞌin taꞌan ndo, kundaꞌvi ini ndo kuni ndo naꞌa, saa ikan ndo ya vaꞌa xiꞌin na, xaa toꞌo taꞌan ndo, xaꞌa ndee ini ndo xiꞌin taꞌan ndo.

Efesios 3:4

Tá ná kaꞌvi ndo tutu ya xa ta̱a i xaa ndaꞌa ndo, ta saa kua vaꞌa kuchiñu kundaa ini ndo xiꞌin ya káꞌan i xiꞌin ndo, ya kúndaa ini i xaꞌa ñaꞌa ya ndi̱xiyo sěꞌe xaꞌa Cristo.

Gálatas 3:2

Ta vitin kúni i ndakan tuꞌun i ndóꞌo̱, ta vaꞌa ndikuiin ndo yuꞌu i xaꞌa ya kaꞌan i xiꞌin ndo: Tá ndi̱kiꞌin ndo Tachi I̱í Ndioxi ta ¿án xaꞌa ya xáa súvi ndo ley Ndioxi kua ndi̱kiꞌin ndo ya, túvi ndo? Süvi saa íyo ya, xaꞌa ya xi̱ni soꞌo ndo tuꞌun vaꞌa xaꞌa Jesucristo va kua ndi̱kiꞌin ndo Tachi I̱í ra.

1 Corintios 2:4

Tá ndi̱kaꞌan ndoso i xiꞌin ndo xaꞌa tuꞌun ra, ta köo ndi̱xiniñuꞌu i tuꞌun ndíchi ni taꞌan ya xíniñuꞌu na ñuu ivi yóꞌó ya sixinu i ini ndo. Sundi mií Tachi I̱í Ndioxi xiꞌin ndee mií ra kua si̱xinu ra ini ndo xaꞌa tuꞌun ya ndi̱kaꞌan i xiꞌin ndo ya kúu ya ndaa ni.

ROMANOS 15:19

Ndixaꞌvi ni mií Ndioxi xaꞌa Tachi I̱í ra, saa chi chíndee ya yeꞌe íkan i yatuꞌun nuu na xiꞌin ya vaꞌa ni, ta soꞌva kua síxinu i tuꞌun vaꞌa xaꞌa Jesucristo. Nda ñuu Jerusalén kua xa̱á i káꞌan ndoso i tuꞌun vaꞌa xaꞌa ra, iin saa ndi̱xaa i nda ñuu Ilírico, ndi̱xika ndiꞌi i ndi̱kaꞌan i xiꞌin na xaꞌa tuꞌun vaꞌa ya síkaku mií na.

1 Pedro 1:12

Ta ya ta̱xi Ndioxi ku̱ndaa ini nda ndi̱kaꞌan tuꞌun yuꞌu ra xaꞌa, ta süvi xaꞌa mií nda kua ndi̱kaꞌan ya, xaꞌa yoo kua ndi̱kaꞌan ya. Ta taꞌan ya ikán ku tuꞌun vaꞌa xaꞌa Tata yo Jesucristo ya ndi̱kaꞌan ndoso inka nda xiꞌin ndo tixin Tachi I̱í Ndioxi ya ke̱e nuu ndivi. Ta nda mií na tatun Ndioxi ta kútoo ni na kuni na ya vaꞌa ikan Ndioxi xiꞌin yo.

Tito 2:7

Tá kuꞌva kúni un ikan nda ñani yo, kuꞌva saa xíniñuꞌu un vívií koo un nuu na ya ná kuni na ikán na tá íkan un. Tá sínaꞌa un na ñani yo ta ndinuꞌu ni ini un sinaꞌa un na, toꞌo ndituꞌun un tuꞌun ya ndaa xiꞌin na.

2 Timoteo 4:2

ya ná chikaa ni un ndee ya kaꞌan ndoso un tuꞌun ra xiꞌin naꞌa ndiꞌi saa kivi. Koo ndúvi un kaꞌan un xiꞌin na tá kivi vaꞌa ni kúni un án tá väꞌa kúni un. Ta teꞌe kaꞌan un xiꞌin na, sinaꞌa un na ya ná kundaa ini na xaꞌa ya väꞌa kéꞌe na, ta kaꞌan xiꞌin na ná sindoo na ya, saa xaꞌa ni un ndee xiꞌin na ya ná kundikun vaꞌa na ichí Tata yo Jesucristo. Ta toꞌo kaꞌan un xiꞌin na sinaꞌa un na, kaꞌnu koo ini un xiꞌin na.

2 Timoteo 3:10

Ta yóꞌo̱ ñani yo, ta xa xíni vaꞌa un yeꞌe, ndá kuꞌva sínaꞌa i, ta ndá kuꞌva íyo i, ta xíni un unkua ndíkani ini i xaa súvi i, saa xíni un ya ndáa ni i ini i xíni Ndioxi, ta kúꞌvi ni ini i xíni i naꞌa, saa xíni un ya kaꞌnu ni ini i.

1 Timoteo 5:2

Saa ikan tu un xiꞌin ná kuꞌva yo, ná nana chee xikuaꞌa, vií kaꞌan un xiꞌin ná, tá kuꞌva káꞌan un xiꞌin nana un saa kaꞌan un xiꞌin ná. Saa tu ná kuâán vali, vií kaꞌan un xiꞌin ná, tá kuꞌva káꞌan un xiꞌin ná kuꞌva un, saa kaꞌan un xiꞌin ná.

Colosenses 2:3

Saa chi ndiꞌi ya kuika xiꞌin ya ndíchi ni kúu mií Ndioxi tin ya ndee ni xínituni ta ndaꞌa mií Cristo íyo ndiꞌi ya.

1 Corintios 12:8

Saa chi táxi Tachi I̱í Ndioxi ya vaꞌa ndaꞌa sava na, ya kúchiñu na kúndaa ini na xiꞌin tuꞌun ya ndee ni ndíchi, ta sava tuku na ndee ni íyo ya xínituni na, ndíchi ka vi íyo ya káꞌan na.

2 Corintios 1:23

Ta mií Ndioxi ku ra ndíkuiin xaꞌa ya káꞌan i xiꞌin ndo, ndá xaꞌa kua köo ndi̱xaa i nuu ndo ñuu Corinto koto i ndóꞌo̱, chi köo ndi̱kuni i kaꞌan i xiꞌin ndo ndá ka tuꞌun uꞌvi, ya sitikueꞌe i ndóꞌo̱, ta xaꞌa ya ñaa kua köo ndi̱xaa i nuu ndo.

2 Corintios 2:10

Vaꞌa ná kundaa ini ndo, chi tá xáa kaꞌnu ini ndo xaꞌa kuachi i̱kan ra ñaa, ta saa tu yeꞌe va, xáa kaꞌnu ini i xaꞌa ra, xaꞌa ya i̱kan ra saa xiꞌin ndóꞌo̱ na veꞌe ñuꞌu. Ta nuu Cristo kua íkan i saa, xáa kaꞌnu ini i xaꞌa ra, xaꞌa ya kúꞌvi ni ini i xíni i ndóꞌo̱.

2 Corintios 13:10

Táa kuee i tutu yóꞌó xaa ya nuu ndo yachi ka tá täꞌan xaa i nuu ndo, tá íyo xíka ni i saa káꞌan i xiꞌin ndo. Chi tá ná xaa i nuu ndo ta köo xíniñuꞌu i koo ndaku ni ini i xiꞌin ndo xiꞌin ichí ya ta̱xi Tata yo ndaꞌa i kuniñuꞌu i xiꞌin ndo. Chi ichí ta̱xi ra ndaꞌa i xaꞌa ndo, ta ya chindee taꞌan i xiꞌin va ndo kua, süvi xaꞌa ya sindiꞌi xaꞌa i ndóꞌo̱ xiꞌin kua.

Santiago 3:17

Sundi naꞌa, na kúu mií ya ndíchi vaxi nuu Ndioxi ta köo ikán na ñaꞌa ya väꞌa, nina ya vaꞌa íkan na, ni köo kuachi ini na, saa kúu na, naꞌa na vaꞌa ni ini xiꞌin na ivi, kúndaꞌvi ini na xíni ñaꞌa na, ndiꞌi saa ichí kúni na xaa súvi na ya vaꞌa. Saa íkan na ya vaꞌa xiꞌin ndiꞌi naꞌa, ta köo íyo uvi yuꞌu na, na íkan saa ku na ndixa ndíkun ichí Ndioxi.