2 Corintios 5:1 - Xochapa Mixteco

¹ Ta xa kúndaa vaꞌa ini yo chi ikin kuñu yo ya kúu mií yo ñuu ivi yóꞌó, ta tá íyo veꞌe manta ya ndíꞌi xaꞌa va saa íyo ya. Sundi tá ná ndiꞌi xaꞌa ya yóꞌó, ta xa íyo inka veꞌe ikin kuñu yo ya xa̱á si̱kuaꞌa Ndioxi nuu ndivi. Ta ya ikán ta köo ndíꞌi xaꞌa ya, ndiꞌi saa ichí koo ya chi süvi na ñuu ivi yóꞌó ku na ndi̱sikuaꞌa ya.

2 Corintios 5:1 Mawu Ofanana

San Marcos 14:58

―Ndeꞌe ta xi̱ni soꞌo nde ndi̱kaꞌan ra, káchi ra saa: “Yeꞌe ta sindiꞌi xaꞌa i veꞌe ñuꞌu kaꞌnu yóꞌó ya si̱kuaꞌa na ivi, ta tixin kivi uni sixinu i inka ya, ta süvi taꞌan ya síkuaꞌa na ivi yóꞌó koo ya”, káchi ra ―káchi nda xaꞌa Jesús.

Los Hechos 7:48

Vani si̱kuaꞌa ra Salomón veꞌe ñuꞌu ikán xaꞌa Ndioxi, sundi Ndioxi ra chee, ra kaꞌnu, ta köo íyo ra ini veꞌe ñuꞌu ya si̱kuaꞌa na ivi yóꞌó. Tá káchi ra xiꞌin iin ra ta̱a tuꞌun yuꞌu ra xinaꞌa:

1 Corintios 3:9

Chi ndeꞌe, ta iin káchi ítaꞌan nde xáa chiñu nde xiꞌin taꞌan nde nuu Ndioxi. Ta ndóꞌo̱ ku ndo íin tá íin ñuꞌú ya xáa chiñu Ndioxi xiꞌin, án tá íin veꞌe ya síkuaꞌa Ndioxi, saa íin ndo nuu ra.

2 Corintios 4:7

Tuꞌun vaꞌa xaꞌa Jesucristo ta tá káa íin ya kuika saa íin ya. Ta ndiꞌi yo kándixa tuꞌun yóꞌó tá íin kisi ñuꞌú ya ñúꞌu ya kuika ikán saa íin yo. Yakan vaꞌa xíto inka naꞌa ndee ya íyo xiꞌin yo ta nuu Ndioxi vaxi ya, süvi nuu mií yo vaxi ya.

2 Corintios 5:4

Chi kivi táku yo xiꞌin ikin kuñu yo ya kúu mií yo ñuu ivi yóꞌó, ta táná ni yo, saa xáku suchi ni yo, saa chi köo kúni yo ndundaa ikin kuñu kúu mií yo ndaꞌa yo. Yo kúni nduxaa ka va ku yo, ya ná ndinama ikin kuñu yo nduu ya iin ikin kuñu ya táku, ya köo ndíꞌi ka xaꞌa nda iin kivi.

Colosenses 2:11

Ta xaꞌa ya xa ndu̱u ndo iin xiꞌin Tata yo Jesucristo kua kúu mií ndo tuni Ndioxi, ta süvi xiꞌin ndaꞌa na ivi yóꞌó kua ndíkunuu tuni Ndioxi ndóꞌo̱, chi mií Ndioxi ku ra chi̱nuu ya ndóꞌo̱. Xaꞌa ya si̱kaku Tata yo Jesucristo ndóꞌo̱ kua ndi̱saña ndo nuu ndee ya väꞌa ku̱u mií ndo ikin kuñu ndo.

2 Timoteo 1:12

Xaꞌa ya káꞌan ndoso i tuꞌun vaꞌa xaꞌa ra kua ndóꞌo ni i vitin. Sundi köo kúkaꞌán nuu i xaꞌa ya ndóꞌo i. Chi yeꞌe, ta xa kúndaa teꞌe ini i unku ra ndáa ni ini i xíni i, ta ndee ni ndee kúu mií ra ya chindee ra yeꞌe ya xaa súvi i ndiꞌi chiñu ya ta̱xi ra ndaꞌa i xaa súvi i.

HEBREOS 11:10

Soꞌva i̱kan ra Abraham xaꞌa ya xi̱ndatun ra, koo ra iin ñuu ya ndee ni tuun ndi̱kuaꞌa kútu ta köo ndíꞌi xaꞌa ya, iin ñuu ya vaꞌa ni, ya taxi Ndioxi ndaꞌa ra. Saa chi ñuu ikán ta mií Ndioxi ku ra ta̱va xaꞌa ya, ta ndi̱kani ini ra ndá kuꞌva koo ya.

HEBREOS 9:11

Sundi Jesucristo ta xa ki̱xi ra ñuu ivi yóꞌó, ta vitin ra ikán ku ra kúu sutu ra chee ni nuu yo. Chi ki̱xi ra ya taxi ra ndiꞌi ya vaꞌa kúu mií Ndioxi ndaꞌa yo. Ta vitin íyo ra xáa chiñu ra veꞌe ñuꞌu ya chee, ya luvi ni íyo nuu ndivi, ya ndee ni ka vaꞌa ku ya ikán nuu ya íyo ñuu ivi yóꞌó, saa chi süvi na ivi yóꞌó ku na ndi̱sikuaꞌa ya, Ndioxi ku ra si̱kuaꞌa ya.

HEBREOS 9:24

Saa chi veꞌe ñuꞌu nuu ndee ni I̱í ndi̱kiꞌvi Jesucristo, ta süvi na ñuu ivi yóꞌó ku na ndi̱sikuaꞌa ya. Chi ya si̱kuaꞌa na ivi yóꞌó, ta tá káa copia mií veꞌe ñuꞌu ya ndee ni vaꞌa íyo mií nuu ndivi saa káa ya si̱kuaꞌa na. Ta ikán ku nuu ndi̱kiꞌvi Jesucristo ini veꞌe ñuꞌu ya ndee ni vaꞌa ikán, káꞌan ndaꞌvi ra xaꞌa yo xiꞌin Ndioxi, ya ná xaa kaꞌnu ini ra xaꞌa yo.

1 Pedro 1:4

ndikiꞌin yo iin ya vaꞌa ni, ya chi̱vaꞌa ra xaꞌa yo íyo ya nuu ndivi. Ta ya ikán ta nda iin kivi tïvi ya, ni küu yakua ya, nda iin kivi ndïꞌi xaꞌa ndee kúu mií ya.

2 Pedro 3:11

Iin ndiꞌi xaꞌa yaa ya, yakan ndóꞌo̱ ta ndikani vaꞌa ini ndo ndá kuꞌva xíniñuꞌu ndo koo ndo, vívií koo ndo, i̱í koo ndo tá kuꞌva kúni mií Iva yo Ndioxi saa koo ndo.

1 Juan 3:14

Saa chi yoo ta xaꞌa ya kúꞌvi ini yo xíni taꞌan yo yakan kúndaa ini yo tá íin yo xa ndíi ndi̱xiyo yo ta ndi̱taku yo. Chi na köo kúꞌvi ini xíni taꞌan tá íin na ndíi saa íin na nuu Ndioxi.

1 Juan 3:19

Ta xaꞌa ya kúꞌvi ini yo xíni taꞌan yo kua ndínaꞌa yo mií yo ya kúu yo kuenta ya ndaa, ta ndikundee ini yo xiꞌin ndee ya táxi Ndioxi ndaꞌa yo.

1 Juan 3:2

Ñani mani, vitin ta xa seꞌe Ndioxi kúu yoo, ta köo xíni yo ndá kuꞌva nduu yo kivi ná ndiko koo tuku Tata yo Jesucristo ñuu ivi yóꞌó. Sundi yoo ta kúndaa ini yo, kivi ná ndiko koo ra ta nduu yo tá kuꞌva káa mií ra, saa chi kivi ikán ta kuni xiꞌin nuu yo ra tá kuꞌva káa ra.