2 Corintios 4:4 - Xochapa Mixteco

⁴ Saa ndóꞌo na chi kiti nǎꞌa kúu ndioxi ñuu ivi yóꞌó ku ri ndi̱kasi ya xínituni na ya ná kändixa na tuꞌun vaꞌa xaꞌa Jesucristo ya káꞌan nde xiꞌin na, ta na ikán, tá íin na kuáa̱ saa íin na. Chi köo táxi ri kuni na ya yéꞌe̱ luvi ni kúu mií tuꞌun vaꞌa xaꞌa Jesucristo. Chi mií Jesucristo, tá káa níí mií Ndioxi saa káa ra.

2 Corintios 4:4 Mawu Ofanana

San Mateo 13:22

Ta ndikin ya ndi̱koyo tañu iñu ku ya káꞌan xaꞌa na xíni soꞌo tuꞌun Ndioxi, saa ndíꞌi ni ini na xaꞌa chiñu íyo ñuu ivi yóꞌó, án kúni na ndukuika ni na, ta ndiꞌi ya yóꞌó ta síndiꞌi xaꞌa ya tuꞌun Ndioxi ya xi̱ni soꞌo na, ta köo táxi ya kuaꞌnu tuꞌun ra nima na.

San Juan 1:14

Ta Tuꞌun Ndioxi ikán, ndu̱u ya iin taa, tá íin mií yo saa ndu̱u ra, ta ndi̱xika ra xiꞌin nde ñuu ivi yóꞌó. Ta xi̱ni nde ya vaꞌa luvi ni kúu mií ra. Ta mií ya luvi ni kúu mií Ndioxi kua kúu mií ra, chi iindaa mií ra ku Seꞌe Ndioxi. Iin chútu ndaa ya vaꞌa, ya ndaa ini ra.

San Juan 1:18

Nda iin mituꞌun naꞌa täꞌan kuni xiꞌin nuu Ndioxi. Iindaa Jesucristo Seꞌe Ndioxi, ra iin mituꞌun nuu ra, ra íyo xiꞌin ra, ra ikán ku ra xíni vaꞌa Ndioxi, ta ra ikán ku ra sínaꞌa yoo ndá kuꞌva káa Ndioxi.

San Juan 12:31

Vitin kua ti̱ndaa kivi ya taxi Ndioxi kuachi xaꞌa na ñuu ivi. Ta kindaa ra ichí ndaꞌa kiti nǎꞌa, ri xáꞌnda chiñu ñuu ivi yóꞌó, keta ri kuꞌun ri.

San Juan 12:35

Saa ndi̱kuiin Jesús káꞌan ra xiꞌin na, káchi ra saa: ―Siloꞌo ni kivi íyo yeꞌe kúu ñu̱ꞌu̱ xiꞌin ndo. Yakan xíniñuꞌu ndo ndikundikun ndo ichí nuu yéꞌe̱, süvi ka vi ya iin kama soꞌva ku̱u ta xaa ya naá tiin ya ndóꞌo̱. Chi ndiꞌi na xíka nuu naá, ta ni köo xíni na nuu kuꞌun na.

San Juan 12:40

Ndi̱kasi Ndioxi nuu na ndu̱u kuáa̱ na, saa nda̱sa tuun ra nima na, Ya ná küchiñu na koto na, Ta saa ná küaꞌa na kandixa na xiꞌin ndinuꞌu nima na, ya ná ndïko na nuu i ya sindaꞌa i na, káchi ya ta̱a ra Isaías.

San Juan 12:45

Ta na xíni yeꞌe, ta xíni tu na ra ti̱ꞌvi yeꞌe vaxi va i.

San Juan 14:30

’Ta soo uvi ndaa tuꞌun káꞌan i xiꞌin ndo, chi xa vaxi kiti nǎꞌa, kiti xáꞌnda chiñu nuu na ñuu ivi yóꞌó. Ta nda loꞌo köo xáꞌnda chiñu ri nuu yeꞌe.

San Juan 15:24

Tá tu köo yatuꞌun ndi̱xini na ikan i ta köo kuachi na, ndikuu, sundi xi̱ni na ya, ta saa ni kúndasi nuu na xíni na yeꞌe ta kúndasi nuu tu na xíni na Iva va i. Ta kuaꞌa ni yatuꞌun i̱kan i nda iin na köo ndi̱kan taꞌan ya i̱kan i.

San Juan 16:11

Ta suvi mií ya chindee na kundaa ini na saa chi xa ndi̱taꞌnda xaꞌa kiti nǎꞌa, kiti ínuu nuu ndiꞌi tachi nduvaꞌa, ri xáꞌnda nuu na ñuu ivi yóꞌó, ndi̱taꞌnda xaꞌa ri ya ndiꞌi xaꞌa ri.

San Juan 8:12

Saa xa̱á tuku ra káꞌan ra xiꞌin naꞌa, káchi ra saa: ―Yeꞌe ku ñu̱ꞌu̱ ya síndiyeꞌe nuu na ñuu ivi yóꞌó. Ta ndiꞌi na ndíkun yeꞌe ta käka na ichí ya naá, chi kúu mií na ñu̱ꞌu̱ ya táxi kutaku na ―káchi ra xiꞌin na.

Los Hechos 26:18

ya kuna un nuu na, sindiko koo un na kixi na nuu i, nuu yéꞌe̱, saa saña na ndaꞌa ndee kiti nǎꞌa ta ndikundikun na ichí Ndioxi, kandixa na yeꞌe saa xaa kaꞌnu ini Ndioxi xaꞌa kuachi na, saa kuchiñu na koo na xiꞌin na i̱í na ndíkun ichí i”, káchi Jesús xiꞌin i ―ka̱chi ra Pablo xiꞌin ra rey Agripa.

Los Hechos 26:23

Chi nda ikán ta ndi̱kaꞌan nda xaꞌa Cristo ra ndi̱kaxin Ndioxi sikaku yoo. Ndoꞌo ni ra kuvi ra sundi ra ikán ku ra núnu̱ú nditaku nuu ndiꞌi na ndíi. Ta kaꞌan ra xiꞌin na ndá kuꞌva kaku na. Tá íkan ñu̱ꞌu̱ ndíyeꞌe saa koo ra, chi kuna ra nuu ndiꞌi yo kúu judío xiꞌin na köo kúu judío ya kundaa ini yo xaꞌa tuꞌun Ndioxi ―káchi ra Pablo xiꞌin ra rey Agripa.

1 Corintios 10:20

Ta kúni i ná kundaa ini ndo, chi tá sóko na ñaꞌa nuu ndioxi na, ta süvi nuu Ndioxi sóko na ya, nuu tachi nduvaꞌa va sóko na ya, yakan yeꞌe ta köo kúni i ya koo yuꞌu ndo xiꞌin tachi nduvaꞌa.

2 Corintios 2:11

Ta vaꞌa ná ndikiꞌin mani yo ra, ya ná täxi yo sindaꞌvi kiti nǎꞌa yo, saa chi xa ndiꞌi yo xíni ndá kuꞌva kua xáa chiñu ri.

2 Corintios 2:12

Tá ndi̱xaꞌan i ñuu Troas ya ndituꞌun i tuꞌun vaꞌa xaꞌa Jesucristo xiꞌin naꞌa, ta ndee ni vaꞌa xu̱na Tata yo ichí nuu i ya xaa chiñu i ikán.

2 Corintios 3:11

Tá luvi ni va ndi̱xiyo mií ley Ndioxi ikán, vani köo ndïkundee ya koo ya ndiꞌi saa tiempo, ta kachi ka vi ya xa̱á, ya luvi ni ka ki̱ndoo Ndioxi xiꞌin yo vitin, ta nda iin ichí ndïꞌi xaꞌa ya.

2 Corintios 3:14

Tá íin toto ya xi̱ndasi nuu ra Moisés, saa ndo̱ꞌo na Israel chi ndi̱kundasi ya xínituni na. Yakan nda vitin tá káꞌvi na ley yata íyo ndaꞌa na ta köo kúndaa ini na xiꞌin ya. Nda vitin ta ndási yaa nuu na, iindaa Jesucristo ku ra kuchiñu kindaa ya ndási nuu na.

2 Corintios 3:18

Yakan kua tá kúu ndiꞌi yo kándixa Tata yo Jesucristo, ta köo ndási ka nuu yo, vaꞌa xíto teꞌe yo, yakan kua tá íin yu̱ú tatan saa íin yo chi sínaꞌa teꞌe yo ya luvi ni íkan ra xiꞌin ya ndee ni luvi kúu mií ra. Ta saa kua ndúu yo tá kuꞌva káa mií Tata yo Jesucristo. Ta ya ndínama yo iin iin kivi ta mií Tata yo Jesucristo ra kúu Tachi ku ra íkan saa xiꞌin yo.

2 Corintios 4:6

Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

Gálatas 1:4

Chi Tata yo Jesucristo ta ndi̱taxi ra mií ra ndi̱xiꞌi ra xaꞌa kuachi yo, xaꞌa ya saa chi̱tuni mií Iva yo Ndioxi, ya kuchiñu yo kaku yo nuu ya väꞌa, ya xáꞌnda chiñu ñuu ivi yóꞌó, nuu ndóo yo tiempo vitin.

Efesios 2:2

Saa ndi̱xiyo ndo yachi, i̱kan ni ndo ya väꞌa xaꞌa ya xi̱ndikun ndo ichí taꞌan ya ndíkun na ñuu ivi yóꞌó, ta xa̱a súvi ndo ya ndi̱kaꞌan kiti nǎꞌa, kiti xáꞌnda chiñu nuu ndiꞌi tachi nduvaꞌa xiꞌin ndo, ta nda vitin ta xáꞌnda chiñu yaa va ri nuu naꞌa, na köo xíin kuni soꞌo ya káꞌan Ndioxi.

Efesios 6:12

Ta süvi xiꞌin na taꞌan mií yo kua kánitaꞌan yo, chi xiꞌin tachi nduvaꞌa ya ndee ni naꞌnu tin ndiꞌi ni kúu ya kúu mií chiñu xáꞌnda chiñu ndiꞌi ñaꞌñu xiꞌin ka inka nuu ndiꞌi ndee kiti nǎꞌa ya íyo nuu naá ñuu ivi yóꞌó tin xiꞌin ya íyo nìnu nuu sukun ni ñuu ivi yóꞌó kua kánitaꞌan yo.

Filipenses 2:6

chi mií ra, vani Ndioxi ku ra, tá kuꞌva íyo Iva ra Ndioxi saa káa ra, ta köo iin tuun ndíndasa ra mií ra ya kúu ra Ndioxi,

Colosenses 1:15

Nda iin naꞌa küvi kuni xiꞌin nuu Ndioxi, sundi na xíni Cristo ku na xíni Ndioxi, chi iin ku Cristo xiꞌin Ndioxi. Nda tá yachi ka, tá täꞌan xikoo xaꞌa ñuu ivi yóꞌó, ta xa íyo va ra, chi mií ra ku ra chee ni xáꞌnda chiñu nuu ndiꞌi ni kúu ñaꞌa ya íyo.

Colosenses 1:27

Ta saa kua i̱kan Iva yo Ndioxi, saa chi ku̱ni ra ya ná kundaa ini na kúu kuenta mií ra xaꞌa ñaꞌa ya ndi̱xiyo sěꞌe xinaꞌa. Ta tuꞌun ra ya ndaa, ya chee ni, ya luvi ni, ta ya kuni soꞌo ndiꞌi ni kúu naꞌa kua. Ta ya káꞌan tuꞌun Iva yo xaꞌa ya ndixiyo sěꞌe yóꞌó kua: íyo Tata yo Jesucristo nima ndóꞌo̱ köo kúu judío vitin, ta kúndaa teꞌe ini ndo ya koo ndo xiꞌin ra nuu ndivi.

1 Timoteo 1:11

Ta naꞌa, na íkan ya väꞌa, ta köo íyo yuꞌu na xiꞌin tuꞌun vaꞌa ya ndaa, ya luvi ni sínaꞌa yo, chi mií Ndioxi ra vaꞌa ni ku ra ta̱xi chiñu ikán ndaꞌa i ya kaꞌan ndoso i ya xiꞌin naꞌa.

Tito 2:13

Saa ná koo yo nani ndátun yo tindaa kivi ya ndee ni chee nuu ndiko koo Tata yo Jesucristo kixi ra ñuu ivi yóꞌó sikaku ra yoo. Chi mií ra ku Ndioxi ra chee ni, ta kusini ni yo xiꞌin ra tá ná ndiko koo ra xiꞌin ndee ya luvi ni yéꞌe̱ kúu mií ra.

HEBREOS 1:3

Ta ya luvi ni yéꞌe̱ kúu mií Seꞌe Ndioxi kua yéꞌe̱ mií Ndioxi. Tá káa níi mií Ndioxi saa káa níi mií Jesucristo, saa ta̱xi Ndioxi ichí ndaꞌa ra ya ndíso chiñu ra xiꞌin ndiꞌi ñaꞌa ya íyo ñuu ivi yóꞌó. Ta xiꞌin tuꞌun ra ya ndee ni ndee kua xáa chiñu ndiꞌi ya nda vitin. Saa ndi̱kata ra kuachi yo xiꞌin ndee mií ra, ta sindiꞌi nda̱a ra nuu ndivi ndi̱kunduꞌu ra ñaꞌñu kuáꞌá Ndioxi nuu tai toꞌo, xáꞌnda chiñu ra xiꞌin ra.

HEBREOS 6:4

Sundi naꞌa, na xa ndi̱yeꞌe tuꞌun Ndioxi nima tá yachi ta si̱ndoo na ya, na ikán ta küchiñu ka ndiko koo tuku ini na chi xa ku̱ndaa vaꞌa ini xaꞌa ya ndaa ya síndiyeꞌe nima na, ta saa ndi̱niꞌi na ya vaꞌa nuu Ndioxi, ndi̱kiꞌin na Tachi I̱í ra ndi̱xiyo ya xiꞌin na.

2 Pedro 1:19

Ta xaꞌa ya xa xi̱ni nde xiꞌin ya xi̱ni soꞌo nde kua ndinuꞌu ni kándixa nde tuꞌun ya ta̱a nda ndi̱kaꞌan ndoso tuꞌun yuꞌu Ndioxi xinaꞌa, chi ya ndaa ni ku ya. Ta vaꞌa ni íkan ndo ya ndee ni xíni soꞌo ndo ya. Chi tuꞌun ikán ta tá káa ñu̱ꞌu̱ ya síndiyeꞌe nuu naá ni saa káa ya. Chi Cristo ku ra síndiyeꞌe nuu naá ni, ta tá káa kiti kimi kéta tá túvi, saa káa ra, ta kuꞌva saa síndiyeꞌe ra nima ndo.

1 Juan 2:11

Sundi naꞌa, na kúndasi nuu xíni taꞌan, ta íyo na nuu naá, saa xíka na nuu naá, ta köo xíni na nuu xíka na chi küvi koto na, tá íin na kuáa̱ saa ndu̱u na xiꞌin ya naá.

1 Juan 2:8

Sundi tá káa ya xa̱á káa tuꞌun yóꞌó. Ta kúndaa ini yo ya ndixa ku ya, saa chi Jesucristo ku ra xa̱a súvi ya. Ta saa tu ndóꞌo̱ ndíkun sata va ra xáa ndo lucha síxinu ndo ya. Chi ya naá, ya väꞌa ta yáꞌa ya kuaꞌan ya, ta xa vaxi ndíyeꞌe ya ndaa.

1 Juan 5:19

Xíni yo seꞌe Ndioxi ku yoo ta ndáa ra yoo. Ta ndiꞌi ka naꞌa, na köo ndíkun ñaꞌa, ta kiti nǎꞌa ku ri xáꞌnda chiñu nuu na.