2 Corintios 3:7 - Xochapa Mixteco

⁷ Saa chi ley Ndioxi ya ta̱a ra nuu yu̱ú ikán ta̱xi ra ndaꞌa ra Moisés, ta ndi̱kaꞌan Ndioxi nuu ley ikán xaꞌa naꞌa, na köo xáa súvi ndiꞌi ya káꞌan ya ta xíniñuꞌu na kuvi na, káchi ya xaꞌa na. Yakan tá ndi̱kiꞌin ra Moisés ley ikán ta luvi ka vi ndi̱yeꞌe nuu ra ni köo ndi̱kuchiñu na Israel koto na nuu ra xaꞌa ya ndee ni ndi̱yeꞌe nuu ra. Ni saa va ta köo ndi̱kuchiñu ley ikán koo ya ndiꞌi saa tiempo.

2 Corintios 3:7 Mawu Ofanana

Los Hechos 6:15

Ñaa ndi̱koto na chiñu xiꞌin ndiꞌi ka na ndóo ikán, ndi̱koto na nuu ra Esteban. Tá káa nuu tatun Ndioxi saa ndu̱u nuu ra xi̱ni na.

ROMANOS 10:4

Sundi ley Ndioxi ya xa̱ꞌnda chiñu ra nuu na Israel xinaꞌa ta si̱xinu Jesucristo ya, yakan ndiꞌi naꞌa na kándixa Jesucristo, ta Ndioxi ndása vaꞌa ra na, ndúu na naꞌa, na köo ka kuachi kúu mií nuu ra.

ROMANOS 4:15

Chi ley Ndioxi ta tindoꞌo va ku ya táxi ya tá yáꞌa ndoso na ya. Chi tá köo káꞌan ya saa, ta köo kuachi ndíso na, ndikuu.

ROMANOS 5:20

Tá ta̱xi Ndioxi ley ra ndaꞌa na, saa kua ku̱ndaa ini na ya ndee ni íyo kuachi na nuu ra. Tá ndee ni nda̱a kuachi na ta saa ndee ni ka ndaa tu ya vaꞌa i̱kan Ndioxi xiꞌin va na, xaꞌa ya kúꞌvi ni ini ra xíni ra na.

ROMANOS 7:10

Ta saa ku̱ndaa ini i ley Ndioxi ya ndi̱kani ini i chindee yeꞌe kutaku i xiꞌin Ndioxi, ta ya xa̱ꞌni yeꞌe va ku ya, chi káꞌan ya xaꞌa i ya ndee ni íyo kuachi i nuu Ndioxi.

ROMANOS 7:22

Ndinuꞌu ni va ini i kúsini i xíni i ley Ndioxi.

ROMANOS 7:5

Chi tá täꞌan kandixa yo Jesucristo ta ndi̱xika yo ichí väꞌa nuu xa̱ꞌnda chiñu ni ndiꞌi ñaꞌa ya väꞌa nuu yo, tá ndi̱xiyo yo tixin ley ya ta̱a ra Moisés, ta si̱ndikaꞌán ni ka ya ikán ini yo ikan yo kuachi ku̱too ni mií ikin kuñu yo ikan ya. Ta ndiꞌi ñaꞌa i̱kan yo ta süvi ya vaꞌa ku ya, chi ya xa̱ꞌni mií va yo ndi̱xiyo ya.

1 Corintios 13:10

Sundi tá ná tindaa kivi ya xinu mií ya ndixa ni ndinuꞌu ndaa, ya ndǎku ni, ta nda loꞌo ka ñaꞌa köo kúmani xiꞌin ya, saa kua ndiꞌi xaꞌa ya xíni yo iin ñaꞌñu loꞌo.

2 Corintios 3:3

Ta teꞌe ni va náꞌa ya chi ndóꞌo̱, tá íin tutu ya ta̱a Jesucristo ta̱xi ra ndaꞌa nde, saa íin ndo, ta süvi xiꞌin nduta káꞌi tutu kua ta̱a ra ya, chi xiꞌin mií Tachi I̱í Ndioxi ra táku kua ta̱a ra ya. Ta köo ndi̱taa ra ya nuu yu̱ú, chi nuu nima naꞌa va ta̱a ra ya.

2 Corintios 3:6

Iindaa mií Ndioxi ku ra ta̱xi ndee ndaꞌa nde ya kuchiñu nde xaa súvi nde tuꞌun ya xa̱á ki̱ndoo ra ikan ra xiꞌin na ñuu ra. Ta tuꞌun ya xa̱á ki̱ndoo ra xiꞌin yo, ta köo ndi̱kaꞌi ya nuu yu̱ú tá kuꞌva ndi̱xiyo ley Ndioxi ya ta̱xi ra ndaꞌa ra Moisés xinaꞌa, chi ley ikán ta ta̱xi ya kuachi xaꞌa naꞌa ndi̱xiꞌi na, sundi Tachi I̱í Ndioxi ta ya táxi kutaku yo ku ya.

2 Corintios 3:8

Tá tu saa ndo̱ꞌo ley ikán, ta ndisaa ka vi luvi ni ka tuꞌun ra ya xa̱á ki̱ndoo Ndioxi xiꞌin yo vitin, yáꞌa ni ka luvi ya ta̱xi Tachi I̱í ra ndaꞌa yo ya koo ya xiꞌin yo.

Gálatas 3:10

Ta ndiꞌi naꞌa, na ndíkani ini ya xíniñuꞌu ni na xaa súvi na ya káꞌan ley Ndioxi ya ta̱a ra Moisés, saa kua nduu na, na vaꞌa, na köo ka kuachi kúu mií nuu Ndioxi, káꞌán na, ta íyo chiꞌña sata na, chi saa káꞌan tuꞌun Ndioxi, káchi ya soꞌva: “Ndiꞌi naꞌa, na köo kúchiñu xaa súvi ndiꞌi ni kúu ya káꞌan ley Ndioxi ya ta̱a ra Moisés, ta na ndíso chiꞌña ku ndiꞌi na”, káchi tuꞌun ra.

Gálatas 3:21

Ta ya ndítuꞌun i xaꞌa xiꞌin ndo, ta ¿án köo ndi̱xiyo yuꞌu ya xiꞌin ley ya ta̱a ra Moisés xaꞌa ya ki̱ndoo Ndioxi xiꞌin ra Abraham, túvi ndo? ¡Ta süvi saa íyo ya! Chi tá tu ya ndi̱kuchiñu ku ley ikán taxi ya kutaku yo ndiꞌi saa tiempo xiꞌin Ndioxi, xaꞌa ya xáa súvi ni yo ya, ta ndikuiso vaꞌa va ra yoo nduu yo naꞌa, na köo ka kuachi kúu mií nuu ra, ndikuu.

HEBREOS 12:18

Ta vaꞌa ná kundaa ini ndo chi xa síin va kua i̱kan Iva yo Ndioxi xiꞌin yoo nuu xií sikua yo. Chi yoo ta köo ndi̱kuyati yo nuu ra tá kuꞌva ku̱yati na ikán nuu ra tá kivi ta̱xi ra ley ra ndaꞌa na. Chi ndee ni ìyo ku̱u nuu iku ya ku̱chiñu na xi̱ni xiꞌin nuu na, ta ndee ka vi xíxi ñu̱ꞌu̱, saa ndee ka vi xíka tachi ta iin nánaa káa nuu mií iku Sinaí ikán.

HEBREOS 3:3

Sundi Jesús ku ra ndee ni ka nuu ra Moisés, saa chi Jesús ku ra káa tá káa iin ra síkuaꞌa veꞌe, ta ra Moisés ku ra káa tá káa mií veꞌe ya síkuaꞌa na. Ta ra síkuaꞌa ya ku ra ndíkunuu vaꞌa ni ka tuꞌun nuu mií veꞌe ikán.

HEBREOS 9:4

Ta ini Cuarto ikán íyo iin ñaꞌa nuu chóꞌma nda sutu xuxa vaꞌa nuu Ndioxi, iin ndíxi níí ya oro. Ta saa íyo tu iin xatun náni arca, ta ini nu ikán ndíkaa iin kisi nuu ñúꞌu maná, saa ndíkaa tu itun vara xi̱niñuꞌu ra Aarón, itun na̱na ndíxin, ta ñúꞌu tu yu̱ú nuu ta̱a ra Moisés uxi saa nuu ley Ndioxi ya ta̱xi Ndioxi ndaꞌa ra, nuu ndi̱kaꞌan Ndioxi xiꞌin ra ya xaa súvi ra ya ndi̱kaꞌan ra xiꞌin ra.