2 Corintios 10:5 - Xochapa Mixteco

⁵ Ta suvi xiꞌin ndee Ndioxi kua kuchiñu nde sindiꞌi xaꞌa nde ndiꞌi tuꞌun väꞌa ya kánaꞌa naꞌa xaꞌa nde. Ta kuꞌva soꞌva kua kúchiñu nde síndiꞌi xaꞌa nde ndiꞌi ñaꞌa ya ndee ni xáa tai ini naꞌa, chi köo táxi ya kundaa ini na xaꞌa Ndioxi. Ta saa sínaꞌa nde na ya ná nditaxi ndiꞌi na ya ndíchi ndíkani ini na ndaꞌa Jesucristo, saa kua kuchiñu na xaa súvi na ya kúni mií ra.

2 Corintios 10:5 Mawu Ofanana

San Mateo 15:19

Saa chi ya väꞌa ndíkani ini na ta chí nima na kána koo ya. Ta ya ikán kua chíndaꞌa na kaꞌni na ndìì, án ya kaka sii na xiꞌin taꞌan na, saa tu ya kuakiꞌvi na kuâán xiꞌin taꞌan na, xiꞌin ndiꞌi ka ya kini íkan na, saa tu ya síkuiꞌna na tin ya káꞌan vata na xiꞌin ya kánaꞌa na xaꞌa inka naꞌa.

San Lucas 1:51

Xiꞌin ndee kúu mií ra i̱kan ra chiñu ndee ni, ta na ndíkani ini ndee ni na túvi na ta ndi̱saka nuu ndiꞌi ra ya ndíkani ini na.

ROMANOS 1:21

Vani xa xíni naꞌa ya íyo Ndioxi, ta ni köo ndi̱xiin na xaa toꞌo na ra, ni köo ndi̱taxi na tixaꞌvi ndaꞌa ra. Ta saa ndu̱ndee ka ya ndíkani ini mií na xaꞌa ndisaa chiñu kiꞌvi. Ñaa ndu̱tuun vaꞌa ka nima na.

ROMANOS 1:5

Ta xaꞌa mií ra kua ta̱xi Ndioxi ya toꞌo chee ni ndaꞌa i kúu i apóstol, yakan ti̱ꞌvi ra yeꞌe ya chindee taꞌan i xiꞌin ndiꞌi ni kúu naꞌa, na ndóo ndiꞌi ni kúu ñuu ivi, na köo kúu judío ya kandixa na ra, saa xaa toꞌo na ra.

ROMANOS 16:26

Vitin táxi Ndioxi ya kundaa ini naꞌa xiꞌin tuꞌun ya ta̱a nda profeta, nda ndi̱kaꞌan ndoso tuꞌun yuꞌu Ndioxi xinaꞌa. Saa chi Ndioxi, ra táku ndiꞌi saa kivi, ta kúni ra ná kundaa ini ndiꞌi ni kúu naꞌa, na köo kúu judío xaꞌa tuꞌun ra. Saa kuchiñu na kandixa ni na ra, ta xaa súvi na ya káꞌan ra.

ROMANOS 7:23

Sundi yeꞌe ta kúni ni i ikan i ya vaꞌa ndíkani ini i ikan i, ta saa ni ini ikin kuñu i íyo inka ñaꞌa ya káni taꞌan ni xiꞌin ley Ndioxi. Ta ya ikán kua chi̱nduꞌu kuachi i. Saa chi íyo ya ini ikin kuñu i, ta táxi ya ndúu i tá íin naꞌa, na ñúꞌu veꞌe kàà, saa káa i ndíkaa i ndaꞌa kuachi i.

1 Corintios 1:19

Tá íyo tuꞌun Ndioxi ya ta̱a na xinaꞌa, káchi ya saa: “Vaxi kivi ta sindiꞌi xaꞌa i ya ndíchi xi̱ní kúu mií na ñuu ivi yóꞌó, Ta saa sindiꞌi xaꞌa i ya xínituni na, ya vaꞌa na, ya káꞌan na ndíchi ni xi̱ní na, túvi mií na”.

1 Corintios 3:19

Saa chi ñaꞌa ya ndee ni ndíchi nuu na ñuu ivi yóꞌó, tá káa iin ya kíꞌvi saa káa ya nuu Ndioxi. Saa káꞌan tuꞌun Ndioxi ya ta̱a na xinaꞌa, káchi ya soꞌva: “Na ndíchi ni túvi na, ta xiꞌin ya ndíchi kúu mií na kua koyo na ikán Ndioxi”, káchi ya.

2 Corintios 11:20

Chi ndóꞌo̱ ta xáꞌa ndee ni ini ndo xiꞌin naꞌa, na xáa nduxa xiꞌin ndo xáa chiñu ndo, ta táva na xuꞌun ndaꞌa ndo. Ta saa vaꞌa ni kúni ndo xíni ndo na ya xáꞌnda na chiñu nuu ndo. Vaꞌa ni kúni ndo xíni ndo naꞌa, na vaꞌa ni ka náꞌa nuu mií ndo, nda káni na xaꞌnda nuu ndo, ta köo káꞌan ndo.

2 Corintios 9:13

Ndúkuaꞌa naꞌa taxi tixaꞌvi ndaꞌa Ndioxi, chi kíꞌin na kuenta ya xáa súvi ndo tuꞌun vaꞌa xaꞌa Tata yo Jesucristo ya káꞌan ndoso ndo. Ta saa ndúkuaꞌa ni naꞌa táxi tixaꞌvi ndaꞌa ra xaꞌa ya ndee ni vaꞌa chíndee ndo na taꞌan ndo, ta saa chíndee tu ndo ndiꞌi va naꞌa.

Filipenses 4:7

Ta saa taxi Ndioxi ya koo vaꞌa ini ndo, chi iindaa ya vaꞌa táxi Ndioxi kua ndee ni vaꞌa, ta nda iin yo küchiñu xinu kundaa ini xiꞌin ya, ta ya ikán kua kundaa nima ndo xiꞌin ya xínituni ndo, xaꞌa ya kúu ndo kuenta Tata yo Jesucristo.

2 Tesalonicenses 2:4

Saa xáa ra kanitaꞌan ra xiꞌin Iva yo Ndioxi ta kanitaꞌan tu ra xiꞌin ndiꞌi ndioxi ya ndíi xáa kaꞌnu na ñuu ivi yóꞌó án ndá ka ya xáa kaꞌnu na. Saa kiꞌvi ra ndikunduꞌu ra nda ini veꞌe ñuꞌu kaꞌnu Iva yo Ndioxi, ta kaꞌan ra kúu ra ndioxi.

2 Tesalonicenses 2:8

saa kua keta túvi taa ra ndee ni nduvaꞌa ikán, ta xáa ra ikan ni ra ya väꞌa. Sundi tá ná ndiko koo Tata yo Jesucristo kixi ra ñuu ivi yóꞌó xiꞌin ndee chee ni kúu mií ra, ta ndisaa xiꞌin loꞌo paꞌa tachi yuꞌu ra kua kaꞌni ra taa nduvaꞌa ikán, sindiꞌi xaꞌa ñaꞌa ra.

HEBREOS 4:12

Saa chi tuꞌun Ndioxi, ta ya táku ku ya ta ndee ni kúnu kuakiꞌvi ya xáꞌnda ya. Ndee ni ka ndee tuꞌun ra nuu iin i̱chi̱ ya xi̱ín ni uvi saa yuꞌu. Chi tuꞌun ra, ta kuakiꞌvi ya xáꞌnda ya nima naꞌa, iin saa nda nuu vaꞌa na, xiꞌin tivavi na, xiꞌin mbeke ya ñúꞌu ini leke na, ta vaꞌa xíto ndoso ya ndiꞌi ya xínituni na xiꞌin ya ndíkani ini na, ya íyo nima na.

HEBREOS 5:9

Yakan tá sindiꞌi ra xa̱a súvi ra ndiꞌi ya ndi̱kaꞌan Ndioxi xiꞌin ra, saa kua ndi̱xinu ra ndu̱u ra taa, ra ndee ni ndixa xíniñuꞌu yo ya sikaku ra yoo koo yo xiꞌin ra ndiꞌi saa ichí tá tu xáa súvi yo ya káꞌan ra.

1 Pedro 1:2

Saa chi xa yachi vi ndi̱kaxin Ndioxi ndóꞌo̱, saa nda̱sa vaꞌa ra ndóꞌo̱ tixin Tachi ra. I̱kan ra saa xiꞌin ndo chi kúni ra xa̱a súvi ndo ya ndi̱kaꞌan ra, saa nda̱sa i̱í ra ndóꞌo̱, ya ná xaa súvi ndo ya káꞌan ra xiꞌin ndo, ta tixin nií Tata yo Jesucristo kua ndi̱kata ra kuachi ndo. Ta mií Iva yo Ndioxi ná taxi ni ka ya vaꞌa ndaꞌa ndo xaꞌa ya kúꞌvi ni ini ra xíni ra ndóꞌo̱, saa ná koo vaꞌa ni ndo.

1 Pedro 1:22

Ta xaꞌa ya xáa súvi ni ndo tuꞌun vaꞌa ya ndaa xi̱ni soꞌo ndo yakan ndu̱vaꞌa ya vaꞌa ndo, saa chíndee taꞌan Tachi I̱í ra xiꞌin ndo ya ndinuꞌu ni kúꞌvi ini ndo xíni taꞌan ndo. Ikan ndo saa: ndinuꞌu ni ini ndo kuꞌvi ini ndo kuni taꞌan ndo.