1 Timoteo 2:7 - Xochapa Mixteco

⁷ Ta xaꞌa ya ikán kua ta̱xi ra chiñu ndaꞌa i kaka i kaꞌan ndoso i tuꞌun ra ya ndaa xiꞌin naꞌa. Saa ta̱xi ra chiñu ndaꞌa i kúu i apóstol ra xáa chiñu nuu Tata yo Jesucristo, ta xa̱ꞌnda ra chiñu nuu i ya sinaꞌa i naꞌa, na köo kúu judío. Ta ya káꞌan i xiꞌin ndo ta ya ndaa ni kua, köo síndaꞌvi i ndóꞌo̱.

1 Timoteo 2:7 Mawu Ofanana

San Juan 7:35

Saa xa̱á nda judío ndákan tuꞌun taꞌan mií nda, káchi nda saa: ―¿Míí chí kuꞌun ra yakan káꞌan ra, küchiñu yo niꞌi ñaꞌa yo? ¿Án sana kuꞌun ra ñuu na griego nuu ndóo sava na taꞌan yo, ta kuꞌun ra sinaꞌa ra na griego ikán?

Los Hechos 14:27

Tá ndi̱xaa nda saa si̱kitaꞌan ndiꞌi nda na kándixa Jesús. Iin ndi̱kitaꞌan ndiꞌi na, ta saa ndi̱tuꞌun ndiꞌi nda xaꞌa ya vaꞌa ni i̱kan Ndioxi xiꞌin nda, ta ndi̱kaꞌan nda xiꞌin na ndá kuꞌva xu̱na Ndioxi ichí nuu na köo kúu judío ya kandixa na Jesús.

Los Hechos 22:21

Saa ndi̱kuiin ra káꞌan ra xiꞌin i: “Kuaꞌan chi vitin tiꞌvi i yóꞌo̱ kuꞌun xika un, kuꞌun un nda inka ñuu kaꞌan un xiꞌin na köo kúu judío xaꞌa i”, káchi ra xiꞌin i ―káchi ra Pablo xiꞌin na judío.

Los Hechos 26:20

Ndikun xa̱á i káꞌan i xiꞌin na, xiꞌna na ndóo ñuu Damasco xa̱á i káꞌan i xiꞌin, tá ndi̱ꞌi ikán ta xa̱á i káꞌan i xiꞌin na ndóo ñuu Jerusalén, saa ndi̱xaꞌan i ndiꞌi ka inka ñuu ya ñúꞌu estado Judea. Saa ke̱e tu i ndi̱xaꞌan i nda inka ñuu nuu ndóo na köo kúu judío. Ndi̱xaꞌan i ndi̱kaꞌan ndoso i xiꞌin na ya ná ndiko koo ini na nuu Ndioxi, saa ikan na ya vaꞌa xaꞌa ya ndi̱ko koo ini na nuu ra.

Los Hechos 9:15

Saa ndi̱kuiin Tata yo Jesús káꞌan ra: ―Kuáꞌan koto un ra, chi ra ikán ku ra ndi̱kaxin i kuꞌun ra ndituꞌun ra xaꞌa i xiꞌin naꞌa na köo kúu judío, saa ndituꞌun tu ra xiꞌin nda rey va. Saa kuꞌun tu ra ndituꞌun ra xaꞌa i xiꞌin na judío va.

ROMANOS 1:9

Ta mií Iva yo Ndioxi ndíkuiin xaꞌa i ya köo xíkuiin i káꞌan ni i xiꞌin ra xaꞌa ndo. Ndinuꞌu ni ini i xáa chiñu i nuu ra káꞌan ndoso i tuꞌun vaꞌa xaꞌa Jesucristo, ra kúu Seꞌe ra.

ROMANOS 10:14

Ná ndikani ini yo vitin, ¿ta unkua ikan na kana na ra, kaꞌan na xiꞌin ra, ta täꞌan kundaa ini na xaꞌa ra, ni täꞌan kuni soꞌo na tuꞌun xaꞌa ra? chi köo naꞌa ndituꞌun xiꞌin na xaꞌa ra.

ROMANOS 11:13

Ta vitin káꞌan i xiꞌin ndóꞌo̱ köo kúu judío, ya ná kundaa ini ndo, yeꞌe ku ra apóstol, ra ti̱ꞌvi Ndioxi vaxi i kaꞌan ndoso i tuꞌun ra xiꞌin ndo, ta chiñu ndee ni ndee ku ya yóꞌó nuu i, ndáa yaꞌvi ni ya.

ROMANOS 15:16

Chiñu kúu mií i kua xáa chiñu i nuu Jesucristo. Tá káa iin sutu káa i káꞌan ndoso i tuꞌun vaꞌa xaꞌa ra xiꞌin naꞌa, na köo kúu judío, ya kuchiñu na kuyati na nuu ra. Ta saa nduu na tá íin ñaꞌa ya sóko i nuu Ndioxi, ta vaꞌa ni ndikuiso ra na, saa chi xa ndi̱kaxin mií Tachi I̱í Ndioxi na, ta xaꞌa mií ra kua ndi̱kaxin ya na.

ROMANOS 9:1

Ta vaꞌa ná kundaa ini ndo chi yeꞌe, ta yeꞌe kándixa Jesucristo ku i yakan ndaa ni káꞌan i, mií Tachi I̱í Ndioxi ku ya ndíkuiin xaꞌa i, chíndee ya yeꞌe káꞌan i saa xiꞌin ndo, chi ndinuꞌu ni ini i káꞌan i ya ndaa xiꞌin ndo, káchi i soꞌva:

1 Corintios 9:1

¿Án köo xíni ndo ya kúu i ra ka̱na Tata yo Jesucristo xáa chiñu i nuu ra? Ta íyo ichí i ikan i tá kuꞌva íkan inka nda xáa chiñu nuu ra. Chi yeꞌe ta xi̱ni xiꞌin nuu i ra. Ta ndóꞌo̱ ku ndo íin tá íin chiñu vaꞌa ni íkan i xáa chiñu i, chi tá ndi̱tuꞌun i tuꞌun vaꞌa xaꞌa Tata yo Jesucristo xiꞌin ndo kua ka̱ndixa ndo ra.

2 Corintios 11:31

Chi mií Ndioxi Iva mií Tata yo Jesucristo ku ra xíniñuꞌu ni yo xaa kaꞌnu yo ndiꞌi saa ichí, ta mií ra ku ra xíni xaꞌa ya kaꞌan i ya ndaa xiꞌin ndo.

Gálatas 1:16

Xaꞌa ya ikán kua tá ndi̱xinu kivi ya chi̱tuni mií Ndioxi, ta saa kua si̱tuvi ra Seꞌe ra Jesucristo nuu i, ya ta̱xi ra chiñu ndaꞌa i kuꞌun i kaꞌan ndoso i tuꞌun vaꞌa xaꞌa Jesucristo xiꞌin naꞌa, na köo kúu judío. Tá kivi ku̱u saa, ta köo ndi̱xaꞌan i ndakan tuꞌun i nda iin naꞌa, na xíni ni ya sinaꞌa na yeꞌe.

Gálatas 1:20

Ta mií Iva yo Ndioxi xíni xaꞌa ya káꞌan i xiꞌin ndo, ya ndaa ni kua káꞌan i xiꞌin ndo.

Gálatas 2:16

Sundi xa xíni yo, nda iin naꞌa, küchiñu ndikitaꞌan vaꞌa xiꞌin Ndioxi xaꞌa ya xáa súvi ni na ley ra. Ndi̱saa xaꞌa ya ndáa ni ini yo xíni yo Jesucristo va kua ndíkuiso vaꞌa ra yoo. Xaꞌa ya ikán kua kándixa ni yo Jesucristo, ya ná kuchiñu yo nduu yo naꞌa, na vaꞌa, na köo ka kuachi kúu mií nuu ra. Ta süvi xaꞌa ya xáa súvi yo ley Ndioxi kua ndíkuiso mani ra yoo nuu ra, chi tá tu xaꞌa ya xáa súvi yo ley ra kua, ta nda iin yo küchiñu ndikundoo vaꞌa xiꞌin ra, ndikuu.

Gálatas 2:9

Ta nda ñani yo ra Jacobo xiꞌin ra Pedro tin ra Juan, nda ikán ku nda ndíso chiñu xiꞌin na veꞌe ñuꞌu ñuu Jerusalén. Saa ndi̱kuni nda ikán yeꞌe ya ta̱xi Ndioxi chiñu ndaꞌa i xáa chiñu i nuu ra, ñaa ti̱in nda ndaꞌa i xiꞌin ra Bernabé ñani yo, ya ná kuꞌun ndeꞌe xaa chiñu nde xiꞌin na köo kúu judío ta mií nda ku nda xaa chiñu xiꞌin na judío.

Gálatas 3:9

Ya yóꞌó kúni kachi ya, ndiꞌi yo ndáa ni ini xíni Ndioxi tá kuꞌva xi̱ndaa ini ra Abraham xi̱ni ñaꞌa ra, ta niꞌi yo ya vaꞌa xaꞌa ya kándixa ni yo kuꞌva ka̱ndixa ni ra ikán Ndioxi.

2 Timoteo 1:11

Ta ka̱na Ndioxi yeꞌe ya kaꞌan ndoso i tuꞌun vaꞌa xaꞌa ra, saa kaka i xaa chiñu i nuu ra, ta̱xi ra chiñu ndaꞌa i ya sinaꞌa i naꞌa, na köo kúu judío.

2 Pedro 2:5

Ni na xi̱ndoo xinaꞌa vaꞌa, ta köo ndi̱xaa kaꞌnu ini ra xaꞌa na, ti̱ꞌvi ra saví íꞌná xa̱ꞌni rá na. Ta ndi̱xiyo iin taa ra vaꞌa ni xi̱nani ra Noé, saa ndi̱kaꞌan ndoso ra tuꞌun Ndioxi xiꞌin na ya ná ikan na ya ndaa, ta ndisaa ra ikán ku ra ndi̱kaku xiꞌin inka ka uxa naꞌa.