1 Pedro 5:9 - Xochapa Mixteco

⁹ Ndaku ni koo ini ndo, tuun ni kundaa ini ndo Tata yo Jesucristo, täxi ndo keꞌe ri nǎꞌa ndóꞌo̱. Chi tá kuꞌva ndóꞌo ndóꞌo̱, saa ndóꞌo ndiꞌi ni kúu na taꞌan yo, na kándixa Tata yo Jesucristo na ndóo ndiꞌi saa kúu xaꞌa ñuu ivi.

1 Pedro 5:9 Mawu Ofanana

San Lucas 22:32

Sundi yeꞌe ta xa káꞌan ni i xaꞌa un xiꞌin Ndioxi ya ná ndïko koo ini un ya ndáa ni ini un xíni un ra. Tá ndi̱ko koo un nuu ra, ta xaꞌa un ndee xiꞌin ndiꞌi na itáꞌan xiꞌin un ―káchi Jesús xiꞌin ra Simón Pedro.

San Juan 16:33

Soꞌva káꞌan i xiꞌin ndo ya ná kündiꞌi ini ndo, ta tuun ni kundikun ndo yeꞌe saa koo vaꞌa ni ini ndo. Saa chi kixi ni tindoꞌo nuu ndo ñuu ivi yóꞌó, sundi kundaa ni ini ndo kuni ndo yeꞌe, saa chi yeꞌe ta xa ku̱chiñu i xa̱a kanaa i ñuu ivi yóꞌó ―káchi Jesús.

Los Hechos 14:22

Tá ndi̱xaa nda iin iin ñuu ikán saa ta̱xi ka nda ndee ndaꞌa na ndíkun Jesús ya ná kundaa ni ka ini na kuni na ra. Ta saa ndi̱kaꞌan ka ra Pablo xiꞌin na, káchi ra saa: ―Xíniñuꞌu yo ndoꞌo ni yo saa kuchiñu yo kiꞌvi yo koo yo xiꞌin Ndioxi nuu xáꞌnda chiñu ra ―káchi ra xiꞌin na.

1 Corintios 10:13

Chi taꞌan tindoꞌo̱ ya ndóꞌo ndóꞌo̱ ku ya ndóꞌo ndiꞌi ni kúu va naꞌa. Sundi Ndioxi ta vaꞌa ni va ra chi síxinu ndiꞌi ra ya káꞌan ra, ta saa ikan ra xiꞌin ndo chindee ra ndóꞌo̱ yaꞌa ndo nuu ndiꞌi tindoꞌo ya ndee ni vaxi nuu ndo, ta täxi ra kixi tindoꞌo ndee ni nuu ndo ya küchiñu ndo xiꞌin, sinaꞌa ra ndóꞌo̱ ndá kuꞌva yaꞌa ndo nuu ndiꞌi ya.

Efesios 4:27

Ta vaꞌa ka kama ná ndi̱ko̱ ini ndo xiꞌin taꞌan ndo, ta täxi ndo ichí ndaꞌa kiti nǎꞌa ya kuchiñu ri sindiꞌi xaꞌa ri ndóꞌo̱.

Efesios 6:16

Ta saa tu tá kuꞌva íyo nda lapa ndíso nda kàà xiꞌin ndaꞌa nda ya kuchiñu nda ndasi nda mií nda nuu ñaꞌa ya kúni sitikueꞌe nda, ta kuꞌva saa ikan ndo kundaa ni ini ndo kuni ndo Tata yo Jesucristo. Chi tá íkan ndo saa ta ndasi ndaꞌa ra ndóꞌo̱ nuu itun kuxin, itun xíxi ñu̱ꞌu̱ nuu, itun tíꞌvi kiti nǎꞌa vaxi nuu ndo ya sitikueꞌe ri ndóꞌo̱.

Colosenses 2:5

Vani köo íyo mií i xiꞌin ndo vitin, sundi ya vaꞌa i ta íyo ya xiꞌin ndo. Ta vaꞌa ni kúni i xaꞌa ya xi̱ni soꞌo i xaꞌa ndo ya ndóo vívií ndo tá kuꞌva kúni mií Ndioxi, ta ndee ni ndinuꞌu ini ndo ndáa ini ndo xíni ndo Tata yo Jesucristo.

1 Tesalonicenses 3:3

ya ná ndïkava ini ndo xaꞌa ya tíxuꞌvi ni ndo vitin. Xa xíni tu mií va ndo ya xíniñuꞌu yo ndoꞌo ni yo.

1 Timoteo 6:12

Xaꞌa ya ndáa ni ini un xíni un Tata yo Jesucristo, ta tá káa iin ra kéꞌe taꞌan saa káa un, chikaa ni ka un ndee ikan un tá kuꞌva íkan iin ra lapa ra ndee ni chíkaa ndee tá kuaꞌan ra nuu kuachi. Ta saa ikan un ya ná kuchiñu un niꞌi un koo un xiꞌin Ndioxi ndiꞌi saa kivi ya vaxi. Chi xaꞌa ya kutaku un xiꞌin ra kua ka̱na ra yóꞌo̱, ta nuu ndiꞌi na kua ki̱ndoo un ya xaa súvi un tuꞌun ra ya kándixa un.

2 Timoteo 3:12

Ta xa xíni yo, na kúni kundikun ichí Tata yo Jesucristo, ta ndee ni va kundoꞌo na ikan naꞌa, na köo xíni tuꞌun ra.

2 Timoteo 4:7

Tá káa iin ra lapa, ra ndee ni vaꞌa xíka nuu kuachi, saa íyo i. Ta íyo tu i tá káa iin taa, ra ndee ni vaꞌa xínu va, chi ndee ni chi̱kaa ini i xa̱a súvi ni i chiñu nuu Tata yo Jesucristo, ta vitin xa si̱xinu ndiꞌi i chiñu i̱kan i nuu ra. Ta köo ndi̱sindoo i ichí ra, ndee ni ndáa ini i xíni i ra.

HEBREOS 11:33

Xaꞌa ya xi̱ndaa ni ini na ikán Ndioxi yakan kua vaꞌa ku̱chiñu na nuu inka na ñuu, tá ndi̱xaꞌan na nuu kuachi ka̱ni taꞌan na. Ta sava ka na vaꞌa ni xaa nani na kuachi xiꞌin inka naꞌa. Ta sava na ikán ndi̱kiꞌin na ya ki̱ndoo Ndioxi taxi ra ndaꞌa na. Ta sava na ku̱chiñu na ndi̱kasi na yuꞌu kiti lión, köo ndi̱kuchiñu ri tiin ri na.

HEBREOS 12:8

Sundi tá tu köo sítixuꞌvi Ndioxi ndóꞌo̱, tá kuꞌva íkan na ivi yóꞌó xiꞌin seꞌe na, ta kúni kachi ya süvi ndixa seꞌe ra ku ndóꞌo̱, tá íin na ka̱ku niꞌnu va, saa íin ndo, ndikuu.

Santiago 4:7

Yakan nditaxi ndiꞌi ndo mií ndo ndaꞌa Iva yo Ndioxi, ndaku koo ini ndo, täxi ndo sindaꞌvi kiti nǎꞌa ndóꞌo̱, ni xäa súvi ndo ndá ka ya káꞌan ri, ta saa kutaꞌa ri, saa kuxiyo ri kuꞌun ri.

1 Pedro 1:6

Xaꞌa ya ñaa kua kusini ni ndo vitin, vani vaxi kivi ya ndee ni kuaꞌa nuu tindoꞌo kixi nuu ndo koto ndoso ya ndóꞌo̱, ta kuaꞌa ndee ni ini ndo xiꞌin ya.

1 Pedro 2:21

Xaꞌa ya ñaa kua ka̱na Ndioxi ndóꞌo̱ ya xaꞌa ndee ni ini ndo kundoꞌo ndo tá kuꞌva ndo̱ꞌo mií Cristo xaꞌa ndo, kuꞌva saa xíniñuꞌu ndo ikan ndo, chi saa íyo ya si̱naꞌa ra ndóꞌo̱ ikan ndo.

1 Pedro 3:14

Tá tu ndóꞌo ni ndo xaꞌa ya íkan ndo ya vaꞌa, ta kusini ni ndo, chi ndóꞌo̱ ta ndo vaꞌa ni kée va ndo ku ndo. Ta kündiꞌi ini ndo, ni ku ïꞌvi ndo nuu na xáa nduvaꞌa xiꞌin ndo.

1 Pedro 4:13

Tá ndóꞌo ndo saa ta kusini ni ndo, chi iin káchi ndóꞌo ndo tá kuꞌva ndo̱ꞌo mií Tata yo Jesucristo. Saa tá ná ndiko koo tuku ra kixi ra ta kuni ndo ndee ya chee luvi ni kúu mií ra, ta kusini ni ndo.

El Apocalipsis 1:9

Yeꞌe Juan ñani ndo ku i, saa chi iin káchi kándixa yo Tata yo Jesucristo, ta ndóꞌo̱ xiꞌin yeꞌe ndíkun yo ichí nuu xáꞌnda chiñu Ndioxi. Xaꞌa ya iin ku yo xiꞌin taꞌan yo, ta iin káchi tíxuꞌvi ndiꞌi yo xiꞌin taꞌan yo, saa táxi Ndioxi ndee ra ndaꞌa yo, ya kúndee ini yo xiꞌin ya tíxuꞌvi yo. Xaꞌa ya ndi̱kaꞌan ndoso i tuꞌun Ndioxi ya si̱naꞌa Tata yo Jesucristo yeꞌe, yakan ti̱in na chiñu yeꞌe ndi̱xaꞌan na ndi̱ndaka na yeꞌe iku loꞌo ya Patmos, ya ndíkaa maꞌñu nduta ñûꞌu xaꞌa ya síndoꞌo ni na ini i.

El Apocalipsis 6:11

Saa ta̱xi Ndioxi toto yaa ni ndaꞌa na kundixi na, ta ndi̱kaꞌan ra xiꞌin na ya ndikundee ka na siloꞌo tiempo. Saa chi íyo ka na taꞌan na, na kúmani ka kuvi tá kuꞌva ndi̱xiꞌi mií na xaꞌa ya ndíkun na ichí ra.

El Apocalipsis 7:14

Saa ndi̱kuiin i ndi̱kaꞌan i xiꞌin ra, káchi i saa: ―Köo xíni i, Tata. Mií un xíni unku na, káchi i xiꞌin ra. Saa ndi̱kuiin ra, káchi ra saa: ―Ndiꞌi na yóꞌó ku na ka̱na koo nuu yáꞌa ni vi ndi̱xuꞌvi na, ndo̱ꞌo ka vi na, ta ndi̱kata na tikoto na xiꞌin nií kiti Levo loꞌo, yakan ndu̱u yaa ni ya.