1 Pedro 4:11 - Xochapa Mixteco

¹¹ Ta ndóꞌo̱ ndi̱niꞌi ya vaꞌa xínituni ke̱e nuu Ndioxi ya kaꞌan ndoso ndo, ta vaꞌa kaꞌan ndoso ndo tá kuꞌva kúni mií Iva yo Ndioxi. Ta saa ndóꞌo̱ ndi̱niꞌi ya vaꞌa chindee taꞌan ndo xiꞌin inka naꞌa, ta vaꞌa chindee taꞌan ndo xiꞌin na xiꞌin ndiꞌi ndee ya ta̱xi Iva yo Ndioxi ndaꞌa ndo. Ta ndiꞌi ya íkan ndo, ta vaꞌa ikan ndo ya, ya xaa kaꞌnu ndo Ndioxi tixin Tata yo Jesucristo, ra ndee ni ndee ku mií xiꞌin ya luvi ni kúu mií ra, ta saa koo ra ndiꞌi saa kúu tiempo. Saa ná koo.

1 Pedro 4:11 Mawu Ofanana

San Mateo 6:13

Täxi un ndikava nde ndaꞌa ya väꞌa, chindee un ndeꞌe nuu ya väꞌa. Chi yóꞌo̱ ku ra xáꞌnda chiñu, yóꞌo̱ ku ra kúu mií ndee ta ndiꞌi naꞌa xáa kaꞌnu yóꞌo̱ ndiꞌi saa kivi ya vaxi. Saa ná koo ya”. Soꞌva kachi ndo xiꞌin Ndioxi ―káchi Jesús xiꞌin na.

San Juan 13:31

Tá ke̱ta ra Judas kuaꞌan ra, saa ndi̱kaꞌan Jesús xiꞌin nda ítaꞌan xiꞌin ra, káchi ra saa: Vitin kua kuni naꞌa ya chee ni Taa ra xa̱a ñuu ivi yóꞌó, ta tixin ra ikán kua ndikunuu ya toꞌo Iva ra.

Los Hechos 7:38

Ta suvi mií ra Moisés ku ra ndi̱xika xiꞌin xii sikua yo tá ndi̱xika na iku yuyu. Ta suvi xiꞌin ra ikán kua ndi̱kaꞌan tatun ya ke̱e nuu Ndioxi. Ndi̱kaꞌan ya xiꞌin ra xiki iku yuyu ya náni Sinaí. Ta̱xi ya tuꞌun Ndioxi ndaꞌa ra ta̱a ra. Ta saa íyo ya ta̱xi ra ndaꞌa xii sikua yo ya sinaꞌa na seꞌe na, ta ya ikán kua xíni yo nda kivi vitin. Tuꞌun Ndioxi ikán ta nda tá káa ya táku saa káa ya.

ROMANOS 11:36

Mií Ndioxi ku ra si̱kuaꞌa ndiꞌi ni kúu ñaꞌa ya íyo, xaꞌa mií ra si̱kuaꞌa ra ndiꞌi ya, ta ndiꞌi ya ndi̱kuaꞌa íyo ya xaa súvi ya kúni mií ra. ¡Yakan kua ná kunuu vaꞌa ni ya toꞌo ra ndiꞌi saa tiempo! Saa ná koo.

ROMANOS 12:3

Xaꞌa ya vaꞌa ni Ndioxi ta si̱niꞌi uun ra nuu i káꞌan i xiꞌin ndo, yakan xíkan ni i ya mani nuu ndo ndïkani ini ndo ya vaꞌa ni ka mií ndo nuu inka naꞌa. Vaꞌa ka kiꞌin ni ndo kuenta ndá kuꞌva ndíkani ini ndo xaꞌa mií ndo. Ta ndáꞌvi, ndáꞌvi ndikani ini ndo, ikan ndo tá kuꞌva íyo ya vaꞌa ta̱xi Ndioxi ndaꞌa iin iin ndo ya kándixa ndo ra.

ROMANOS 16:27

Iindaa mituꞌun ku Ndioxi, ta iin mií ra ku ra ndíchi ni. Saa ná kunuu vaꞌa ni ya toꞌo ra ndiꞌi saa kivi ya vaxi, xaꞌa ya i̱kan Jesucristo. Saa ná koo.

ROMANOS 3:2

Ya ndaa ku ya ndáa yaꞌvi ni ya kúu yo judío. Saa chi xiꞌna ndaꞌa yoo kua ta̱xi Ndioxi ichí ya kuu mií yo tuꞌun ra ya ndi̱kaꞌan ra.

1 Corintios 10:31

Sundi yeꞌe, ta ya káꞌan i xiꞌin ndo ku ya yóꞌó: Tá íkan ndo ndá ka mií ñaꞌa án ya xíxi ndo ku ya án ya xíꞌi ndo ku ya, ta xaa kaꞌnu ndo ra xaꞌa ndiꞌi va ya.

1 Corintios 12:4

Ta kúni i ná kundaa ini ndo ya íyo kuaꞌa ni nuu ndee vaꞌa ya síniꞌi Tachi I̱í Ndioxi nuu naꞌa, na kándixa Jesucristo, sundi suvi iin mií Tachi ra kua síniꞌi ndiꞌi va ya.

1 Corintios 3:10

Ta yeꞌe, Ndioxi ku ra i̱kan ya mani xiꞌin i ta̱xi ra ichí ndaꞌa i ya koo i tá káa iin ra xíni, ra ndíso chiñu síkuaꞌa veꞌe, saa káa i, táva i yu̱ú xaꞌa ya, ta inka ku nda síkuaꞌa ya. Ta nda síkuaꞌa veꞌe nuu ta̱va i yu̱ú xaꞌa, ta ndee ni xíniñuꞌu nda kiꞌin vaꞌa nda kuenta ndá kuꞌva síkuaꞌa nda ya.

1 Corintios 6:20

Saa chi mií ra ku ra sa̱ta ndóꞌo̱ xiꞌin nií mií Tata yo Jesucristo, ta ndee ni yaꞌvi cha̱ꞌvi ra xaꞌa ndo. Xaꞌa ya ñaa kua xaa kaꞌnu ni ndo ra xiꞌin ikin kuñu ndo tin ya vaꞌa ndo, saa chi ñaꞌa mií ra ku uvi saa ya kúu mií ndo.

2 Corintios 2:17

Ndeꞌe, ta köo kíꞌin nde yaꞌvi nde xaꞌa ya ndítuꞌun nde tuꞌun Ndioxi xiꞌin naꞌa, tá kuꞌva íkan sava na, chi síndaꞌvi na ivi. Sundi ndeꞌe, ta ndaa ni ndítuꞌun nde xiꞌin na. Nuu Ndioxi káꞌan nde xiꞌin na, chi mií ra ku ra ti̱ꞌvi ndeꞌe kaꞌan ndoso nde xaꞌa ra, xaꞌa ya xa iin ndi̱kitaꞌan nde xiꞌin Jesucristo.

2 Corintios 9:13

Ndúkuaꞌa naꞌa taxi tixaꞌvi ndaꞌa Ndioxi, chi kíꞌin na kuenta ya xáa súvi ndo tuꞌun vaꞌa xaꞌa Tata yo Jesucristo ya káꞌan ndoso ndo. Ta saa ndúkuaꞌa ni naꞌa táxi tixaꞌvi ndaꞌa ra xaꞌa ya ndee ni vaꞌa chíndee ndo na taꞌan ndo, ta saa chíndee tu ndo ndiꞌi va naꞌa.

Efesios 1:19

Ta saa kua vaꞌa kundaa ini ndo xaꞌa ndee ya chee, ya kaꞌnu ni táxi Ndioxi ndaꞌa ndiꞌi yo kándixa ñaꞌa. Ta suvi xiꞌin mií ndee Ndioxi ya chee ni kua xi̱niñuꞌu ra

Efesios 4:29

Nda iin tuꞌun väꞌa ná käna koo ka yuꞌu ndo kaꞌan ndo, ndisaa tuꞌun vaꞌa ya chíndee taꞌan ndo xiꞌin inka naꞌa, ya táxi ndo ndee ndaꞌa na xíni soꞌo ya káꞌan ndo, ndisaa ya ikán vaꞌa kaꞌan ndo.

Efesios 5:20

Ndiꞌi saa ichí taxi ni ndo tixaꞌvi ndaꞌa Iva yo Ndioxi, xaꞌa ndiꞌi ni kúu ñaꞌa tixin Tata yo Jesucristo.

Efesios 6:10

Ta ya si̱ndiꞌi i káꞌan i xiꞌin ndo kua, kundaa ni ini ndo kuni ndo ndee ya chee ni kúu mií Tata yo Jesucristo. Saa kuchiñu ndo ndundee ni ini ndo xiꞌin ndee ra.

Filipenses 1:11

Saa kua ikan ni ndo ya vaꞌa, ya ndaa nuu ra, ta tixin mií Tata yo Jesucristo kua ikan ndo saa, ta saa kua kaꞌan vaꞌa ni naꞌa xaꞌa Ndioxi, ta ndikunuu vaꞌa ni ya toꞌo ra.

Filipenses 2:11

Ta ndiꞌi ni kúu naꞌa ndikuni ra ta kaꞌan na xaꞌa ra, kachi na saa: “Jesucristo ku ra Chee ni xáꞌnda chiñu nuu ndiꞌi yo”, kachi na. Ta saa kua ndikunuu sukun ni ya toꞌo Iva yo Ndioxi nduu chee ni ya.

Colosenses 4:6

Tá káꞌan ndo xiꞌin na, ta vivií ndi̱tuꞌun ndo xiꞌin na, nda tá kuꞌva yasin ñaꞌa xíxi yo ya kuakee iín xiꞌin, kuꞌva saa yasin ndituꞌun ndo xiꞌin na. Saa kua vaꞌa kuchiñu ndo ndikuiin ndo yuꞌu na tá ndákan tuꞌun na ndóꞌo̱ ndá ka ñaꞌa.

1 Tesalonicenses 2:4

Chi mií Ndioxi ku ra xi̱to ndoso ndeꞌe, ta xi̱ni ra kuchiñu nde xiꞌin chiñu ya ta̱xi ra ndaꞌa nde ya kaꞌan ndoso nde tuꞌun vaꞌa xaꞌa ra xiꞌin naꞌa. Ta ndeꞌe, ta köo íkan nde ndá ka ñaꞌa ya xaa sií nde ini na ñuu ivi yóꞌó, sundi íkan nde ñaꞌa ya xaa sií nde ini Ndioxi, chi mií ra ku ra xíto ndoso nima ndiꞌi yo án ya vaꞌa kua, án süvi ya vaꞌa kua.

1 Timoteo 1:17

Xaꞌa ya ikán kua, ¡ná xaa kaꞌnu ni yo Ndioxi, ná xaa toꞌo ni yo ra! ¡Chi nda xi̱naꞌa táku ra ta saa kutaku ra ndiꞌi saa kivi ya vaxi, nda iin yo köo kúchiñu kuni xiꞌin nuu yo ra, ta mií ra ku ra xáꞌnda chiñu nuu ndiꞌi ni kúu yo! ¡Iindaa mií ra ku Ndioxi ra ndaa ni, ra ndíchi ni! ¡Saa ná koo ya!

1 Timoteo 6:16

Ta iin mituꞌun mií Ndioxi ku ra táku ndiꞌi saa kivi, köo xíꞌi ra yáꞌa ni vi yéꞌe̱ nuu íyo ra, yakan nda iin na köo kúchiñu kuyati nuu ra. Ta nda iin naꞌa täꞌan kuni xiꞌin nuu na ra, ta ni küvi kuni na ra. Ná ndikiꞌin ni ra ikán ya toꞌo, ta saa ná xaa kaꞌnu ni ndiꞌi naꞌa ra, saa chi yáꞌa ni ndee kúu mií ra, ta ndiꞌi saa kivi kuu mií ra ya! Saa ná koo.

Tito 2:1

Sundi yóꞌo̱, ñani yo Tito, ta xíniñuꞌu un sinaꞌa un ndisaa ya ndaa xaꞌa ichí Tata yo Jesucristo ya kándixa yo.

Tito 2:15

Ta ya yóꞌó kua xíniñuꞌu un sinaꞌa un na ñani yo. Ta xa íyo ichí ta̱xi Tata yo Jesucristo ndaꞌa un ya xaꞌa un ndee xiꞌin na, saa ndaꞌi un xiꞌin na tá väꞌa íkan na. Ta nda iin na ná kündasi nuu kuni yóꞌo̱.

HEBREOS 13:7

Kuñuꞌu ini ndo xaꞌa naꞌa, na xi̱ndiso chiñu xiꞌin ndo, na ndi̱kaꞌan ndoso tuꞌun Ndioxi xiꞌin ndo. Koto ndo ndá kuꞌva vaꞌa ni i̱kan na tá kivi xi̱taku na ñuu ivi yóꞌó, ta ndá kuꞌva vaꞌa ni xi̱ndaa ini na xi̱ni na Ndioxi. Ta kuꞌva saa ikán ndóꞌo̱, tá i̱kan na ikán, saa ikan ndo.

HEBREOS 5:12

Xa naꞌa ni va ndíkun ndo Jesucristo, ta xa kuꞌva kua sinaꞌa ndo inka naꞌa, ndikuu. Sundi ndóꞌo̱ ta tá íin na vali chíchin va saa íin ndo, saa chi ni köo ndíchi ya xi̱ni soꞌo ndo tá sikan ndi̱kundikun ndo Jesucristo, ta tuku kúni ndo ndikani nde ya nuu ndo. Tá íin na vali saa íin ndo, chi na vali ta ndisaa leche xíꞌi na, küvi kuxi na ñaꞌa ya xíxi na chee.

Santiago 1:19

Ñani yo xiꞌin kuꞌva yo, yeꞌe ta kúni i ndituꞌun i xiꞌin ndo ya ná kundaa ini ndo ya xíniñuꞌu ni ndo sikuaꞌá ndo kuni soꞌo ndo ya káꞌan inka naꞌa xiꞌin ndo, xiꞌna kuni soꞌo ndo ya káꞌan na xiꞌin ndo, saa ndi̱kuiin ndo yuꞌu na. Ta säa kama ni ndo.

Santiago 1:26

Tá ndá ndóꞌo̱ ndíkani ini ndee ni vaꞌa kándixa ndo Ndioxi, ta köo ndi̱xita ndo mií ndo nuu ya väꞌa káꞌan ndo, ta síndaꞌvi ndo mií va ndo, chi süvi ya ndaa kua káꞌan ndo ndíkun ndo Ndioxi.

1 Pedro 2:12

Vívií koo ndo tañu naꞌa, na köo xíni Ndioxi, chi án sana kaꞌan na xaꞌa ndo ya köo vaꞌa íkan ndo, kachi na. Ta saa tá ná kuni na ya vaꞌa ní íyo ndo ta saa xaa kaꞌnu na Ndioxi tá kivi ná kixi ra xaa nani ra kuachi xiꞌin na ñuu ivi.

1 Pedro 2:5

Ta saa ndóꞌo̱ tá káa yu̱ú táku ikán saa íin ndo, chi yu̱ú ikán kua ndee ni xíniñuꞌu ra síkuaꞌa ra veꞌe ñuꞌu i̱í ya küvi kuni yo. Ta ndóꞌo̱ ku ndo xáa chiñu ini veꞌe ñuꞌu ikán chi tá íin sutu nda i̱í, saa íin ndo xáa chiñu ndo ini ya, ta tixin Jesucristo kua sóko ndo ya i̱í, ya vaꞌa nuu Ndioxi.

1 Pedro 4:10

Saa chi Iva yo Ndioxi ta xa kuaꞌa ni va ya vaꞌa, ya xínituni ke̱e nuu ndivi ta̱xi ra ndaꞌa iin iin ndo, ya kuniñuꞌu ndo ya ikan ndo ya vaꞌa xiꞌin taꞌan ndo. Saa kua kuchiñu ndo ikan ndo kuaꞌa ni ya vaꞌa xaꞌa ya kúꞌvi ni ini Ndioxi xíni ra ndóꞌo̱.

1 Pedro 4:16

Sundi tá xaꞌa ya ndíkun ndo Cristo kua ndóꞌo̱ ni ndo ta kükaꞌán nuu ndo, taxi ni ndo tixaꞌvi ndaꞌa Ndioxi xaꞌa ya ndóꞌo ndo saa xaꞌa ra.

1 Pedro 5:11

¡Ná xaa kaꞌnu yo Ndioxi ndiꞌi saa kivi, ta ndiꞌi saa kivi ná kaꞌnda chiñu ra nuu ndiꞌi ñaꞌa íyo ñuu ivi! Saa ná koo.

Judas 1:25

Ná xaa kaꞌnu ni yo Ndioxi chi iin mituꞌun mií ra ku Ndioxi ra ndíchi ni, ra síkaku yoo, saa ná kunuu sukun ni ya toꞌo ra nuu luvi ni íyo ra, nuu ndee ni xáꞌnda chiñu ra xiꞌin ndiꞌi ndai kúu mií ra vitin tin ndiꞌi saa kúu kivi ya vaxi. Saa ná koo.