1 Pedro 1:4 - Xochapa Mixteco

⁴ ndikiꞌin yo iin ya vaꞌa ni, ya chi̱vaꞌa ra xaꞌa yo íyo ya nuu ndivi. Ta ya ikán ta nda iin kivi tïvi ya, ni küu yakua ya, nda iin kivi ndïꞌi xaꞌa ndee kúu mií ya.

1 Pedro 1:4 Mawu Ofanana

San Mateo 25:34

Ta yeꞌe, ra kúu rey kaꞌan i xiꞌin na ndóo ñaꞌñu kuáꞌá i, kachi i saa: “Naꞌa ndo, ndóꞌo̱ ku ndo niꞌi ya vaꞌa nuu Iva i Ndioxi. Naꞌa ndo kiꞌvi ndo nuu xáꞌnda chiñu ra, ya xa íyo ndúvi xaꞌa ndo nda tá täꞌan xikoo xaꞌa ñuu ivi yóꞌó.

San Marcos 10:17

Xa kee tuku Jesús kuꞌun va ra kua, ta saa ndi̱xaa iin ra taa, xínu ra ndi̱xaa ra, si̱kusiti ra nuu ra, saa ndi̱ndakan tuꞌun ñaꞌa ra, káchi ra saa: ―Tata Maestro, vaꞌa ni taa kúu mií un, ta kaꞌan loꞌo un xiꞌin i unkua xíniñuꞌu i ikan i, ya kuchiñu kutaku i xiꞌin Ndioxi ndiꞌi saa kivi ―káchi ra.

Los Hechos 20:32

’Ta vitin káꞌan ni i xaꞌa ndo xiꞌin Ndioxi ya ná kundaa ni ra ndóꞌo̱, saa ná kundaa ni tu tuꞌun va ra ndóꞌo̱, chi ya vaꞌa ni ku ya, saa kúu mií ya ndee ya taxi ya ndundee ka ini ndo saa taxi ra ndiꞌi ya vaꞌa ndaꞌa ndo, ya chi̱tuni ra taxi ra ndaꞌa na kúu ñuu ra, na i̱í.

Los Hechos 26:18

ya kuna un nuu na, sindiko koo un na kixi na nuu i, nuu yéꞌe̱, saa saña na ndaꞌa ndee kiti nǎꞌa ta ndikundikun na ichí Ndioxi, kandixa na yeꞌe saa xaa kaꞌnu ini Ndioxi xaꞌa kuachi na, saa kuchiñu na koo na xiꞌin na i̱í na ndíkun ichí i”, káchi Jesús xiꞌin i ―ka̱chi ra Pablo xiꞌin ra rey Agripa.

ROMANOS 8:17

Ta xaꞌa ya kúu yo seꞌe Ndioxi, yakan niꞌi yo ñaꞌa ya taxi ra ndaꞌa yo, tá kuꞌva íkan iin taa, ndítaꞌvi ra ñaꞌa ra xiꞌin seꞌe ra. Saa chi̱tuni Iva yo Ndioxi ikan ra xiꞌin ndiꞌi yo kúu seꞌe ra. Ta ndiꞌi ya vaꞌa ta̱xi ra ndaꞌa seꞌe ra Jesucristo, iin káchi saa niꞌi yo ya xiꞌin ra nuu ndivi nu̱nù. Tá tu xáꞌa ndee ini yo ndoꞌo yo xaꞌa ra, ta saa niꞌi tu yoo va ya vaꞌa xiꞌin ra nuu ndivi.

1 Corintios 9:25

Tá kúu ndiꞌi naꞌa, na xínu, xíka na xínu na ya síkuaꞌa na keꞌe taꞌan na xiꞌin inka naꞌa, ta xáꞌnu ini na xiꞌin ñaꞌa ya köo chíndee taꞌan xiꞌin na. Íkan na saa xaꞌa ya kúni na niꞌi na ñaꞌa, sundi ya ikán na ta ya ndíꞌi xaꞌa va ku ya. Ta ñaꞌa ya niꞌi yoo, ta nda iin kivi köo ndíꞌi xaꞌa ya.

Gálatas 3:18

Ya vaꞌa ta̱xi Ndioxi ndaꞌa yo, ta süvi xaꞌa ya xáa súvi yo ley ya ta̱a ra Moisés kua ta̱xi ra ya ndaꞌa yo, chi xaꞌa ya xa ki̱ndoo ra xiꞌin ra Abraham yachi vi kua i̱kan ra saa xiꞌin yo. Chi tá tu xaꞌa ya xáa súvi yo ley kua ndi̱niꞌi yo ya vaꞌa nuu ra, ta köo ndáa yaꞌvi ka ya xa ki̱ndoo ra taxi ra ndaꞌa yo, ndikuu. Chi nda iin ñaꞌa köo ndi̱kan ra Abraham xaꞌa ya ndi̱niꞌi ra ya vaꞌa ikán nuu Ndioxi, ya ndi̱niꞌi uun va ra kua.

Efesios 1:11

Chi xa yachi ka vi ndi̱kaxin Ndioxi yoo tixin Seꞌe ra Jesucristo ya nduu yo seꞌe ra, ta saa niꞌi yo ndiꞌi ñaꞌa nuu ra ya chi̱tuni ra taxi ra ndaꞌa yo, saa chi mií ra ta ndee ni vaꞌa kíꞌin ra kuenta xiꞌin ñaꞌa íkan ra, ya ná kana vaꞌa ndiꞌi ya tá kuꞌva kúni mií ra.

Efesios 1:14

Ta Tachi I̱í ra ya íyo xiꞌin yo kua xiꞌna ta̱xi ra ndaꞌa yo ya káꞌan ra xiꞌin yo ya niꞌi yo ya ki̱ndoo ra xiꞌin yo taxi ra ndaꞌa yo. Chi tixin Tachi I̱í ra kua taxi ra saña ndíka mií yo kúu na ñuu ra. Xaꞌa ya i̱kan Ndioxi saa xiꞌin yo kua xíniñuꞌu yo xaa kaꞌnu ni yo ra chi ndee ni kaꞌnu ra.

Efesios 1:18

saa ná ndikuná ra ya xínituni ndo ya kuchiñu ndo kundaa ini ndo xaꞌa ñaꞌa ya vaꞌa luvi ni, ya xa xa̱a vií ra taxi ra ndaꞌa naꞌa, na ka̱na ra kundikun ñaꞌa. Ta saa kua vaꞌa niꞌi ni ndo ya vaꞌa, ya ki̱ndoo ra taxi ra ndaꞌa ndóꞌo̱, na ñuu ra, na i̱í.

Colosenses 1:12

Saa taxi ndo tixaꞌvi ndaꞌa Iva yo Ndioxi xiꞌin ya kúsini ni ndo, chi táxi ra ndiꞌi ñaꞌa ya xíniñuꞌu yo ndaꞌa yo ya kuchiñu yo ndikiꞌin yo ñaꞌa ya ndi̱kaꞌan ra nditaꞌvi ra xiꞌin ndiꞌi yo ñuu ra, yo i̱í, yo xíka nuu yéꞌe̱.

Colosenses 1:5

Íkan ndo saa ndáa ni ini ndo Ndioxi, saa kúꞌvi ni ini ndo xíni ndo ra chi ku̱ndaa teꞌe ini ndo ya niꞌi ndo ñaꞌa nuu ra, ya chi̱vaꞌa ra xaꞌa ndo nuu ndivi. Chi xa ku̱ndaa teꞌe ni ini ndo tá xi̱ni soꞌo ndo tuꞌun vaꞌa ya ndaa ni xaꞌa Tata yo Jesucristo.

Colosenses 3:24

Ta ndikaꞌán ini ndo, chi vaxi kivi ta niꞌi ni ndo ya vaꞌa, ya ki̱ndoo Tata yo Jesucristo taxi ra ndaꞌa ndo. Saa chi nuu mií ra xáa chiñu ndo.

2 Timoteo 4:8

Ta xíni i vaꞌa ni ini Ndioxi ta nina ya ndaa íkan ra xiꞌin naꞌa, chi mií ra ku ra xáa nani kuachi xiꞌin na. Ta saa ikan ra xiꞌin i taxi ra ya vaꞌa ndaꞌa i, tá kuꞌva íkan na xiꞌin naꞌa, na kéꞌe taꞌan níꞌi na ñaꞌa xaꞌa ya vaꞌa íkan na. Kuꞌva saa ikan Ndioxi xiꞌin i, taxi ra ya vaꞌa ndaꞌa i chi xa xa̱a súvi ndiꞌi i chiñu ya ta̱xi ra ndaꞌa i. Ta süvi ndisaa yeꞌe niꞌi ya vaꞌa ikan ra, ndiꞌi na ndíkun ichí ra ta ndátun na ndiko koo ra, na ikán ku na niꞌi ya vaꞌa.

HEBREOS 10:34

Saa ku̱ndaꞌvi ni ini ndo xi̱ni ndo na tá ñúꞌu na veꞌe kàà. Ta nda kúsini ndo tá xíto ndo kíndaa na ñaꞌa ndo ndaꞌa ndo. Saa chi ndóꞌo̱, ra xíni ndo, vaꞌa ni ka ñaꞌa kúu mií ndo nuu ndivi, ya taxi Ndioxi ndaꞌa ndo, saa chi ya ikán ta nda iin ichí ndïꞌi xaꞌa ya.

HEBREOS 9:15

Xaꞌa ya yóꞌó kua ndi̱xiꞌi Jesucristo xaꞌa yo, ta si̱kitaꞌan mani ra yoo ivi yóꞌó xiꞌin Ndioxi, nuu ki̱ndoo ra iin trato ya vaꞌa ni, ya xa̱á xiꞌin yo, ta ikán ku nuu ndo̱o kuachi yo ya i̱kan yo tixin trato ya yata ki̱ndoo Ndioxi xiꞌin yo tá núnu̱ú. Ta vitin kuchiñu niꞌi ndiꞌi yo ya vaꞌa ki̱ndoo Ndioxi taxi ra ndaꞌa yo ka̱na ra kundikun ñaꞌa.

Santiago 1:11

Chi tá kétá ñu̱ꞌù saa ndísaa ni, ñaa xáa íchi mií i̱ku ya, saa xáa ya kóyo ita ya, ta ndíꞌi xaꞌa ya ndee ni luvi kúu mií ya. Ta saa kundoꞌo naꞌa, na kuika. Uvi ndaa va kivi ndee ni xáa chiñu na nuu ya kuika kúu mií na, saa ndiꞌi xaꞌa na kundoꞌo na tá ndóꞌo ita.

1 Pedro 3:9

Tá ndá na íkan ya väꞌa xiꞌin ndo, ta ïkan ndo ya väꞌa xiꞌin na, käꞌan kini ndo xiꞌin na, vaꞌa ka kaꞌan ndo xaꞌa na xiꞌin Ndioxi ná chikaa ra ya vaꞌa na, ta saa kua niꞌi tu ndóꞌo̱ va ya vaꞌa nuu ra. Chi xaꞌa ya ikán kua ka̱na ra ndóꞌo̱ ya niꞌi ndo ya vaꞌa nuu ra.

1 Pedro 5:4

Saa chi tá ná ndiko koo Tata yo Jesucristo, ra ndáa yoo, ra chee nuu yo, ra íyo tá íyo nda ndáa levo, ta saa kua niꞌi yo iin corona ya ndee ni luvi ta nda iin ichí ndïꞌi xaꞌa ya.

El Apocalipsis 21:27

Ta nda iin ya kini, ni ya yakua küchiñu ya kiꞌvi ya ñuu i̱í ikán. Ni na ka̱ndixa ñaꞌa ya köo kúu Ndioxi ra ndaa ta kïꞌvi na, nda iin ñaꞌa ya väꞌa kïꞌvi ya ñuu ikán. Ndisaa naꞌa na ndóso kivi nuu tutu mií Levo ikán ku na kuchiñu kiꞌvi, saa chi nuu tutu ikán ndóso ndiꞌi kivi ndiꞌi na kutaku xiꞌin Ndioxi ndiꞌi saa kivi ya vaxi.