1 Pedro 1:3 - Xochapa Mixteco

³ Ta ná xaa kaꞌnu yo Iva yo Ndioxi ra kúu Iva Tata yo Jesucristo, saa chi kúndaꞌvi ni ini ra xíni ra yoo, ta yakan ta̱xi ra ndi̱kaku uvi tuku yo xaꞌa ya ndi̱taku Tata yo Jesucristo tañu na ndíi, saa kua ta̱xi ra ya kúndaa teꞌe ini yo

1 Pedro 1:3 Mawu Ofanana

San Juan 1:13

Ta mií ya ndaa seꞌe Ndioxi ndúu na, chi köo ndi̱kaku na tá kuꞌva káku seꞌe iin taa xiꞌin iin ñaꞌa. Sundi ka̱ku na tá kuꞌva kúni mií Ndioxi.

ROMANOS 12:12

Ta kusini ni ndo chi ndátun ndo taxi Ndioxi ya vaꞌa ndaꞌa ndo, tá vaxi tindoꞌo nuu ndo tíxuꞌvi ndo, ta kuaꞌa ndee ni ini ndo xiꞌin ya, ta xïkuiin ndo, kaꞌan ni ndo xiꞌin Ndioxi.

ROMANOS 15:13

Ta vitin káꞌan i xiꞌin mií Ndioxi ra chíkaa ndee ini ndo ya kundatun ndo ya vaꞌa ikan ra xiꞌin ndo. Ná taxi ni ra ya kúsini ni ndo, saa ná koo vaꞌa ni ini ndo. Ta saa ná ndundee ni ka ya kándixa ndo ya ndátun ndo niꞌi ndo tixin ndee Tachi I̱í ra.

ROMANOS 4:25

Saa chi mií ra ku ra ta̱xi Jesucristo ya ndi̱xiꞌi ra xaꞌa kuachi yo, ta xaꞌa ya ndi̱taku ra yakan ku̱chiñu ra si̱kitaꞌan ra yoo xiꞌin Ndioxi, saa ku̱chiñu yo ndu̱u yo tá íin naꞌa na vaꞌa, na köo ka kuachi kúu mií nuu ra.

ROMANOS 5:10

Chi yachi tá íin yo ka̱nitaꞌan xiꞌin Ndioxi saa ndi̱xiyo yo, xaꞌa ya köo ndi̱xaa súvi yo ya káꞌan ra xiꞌin yo. Vani saa i̱kan yo, ta saa ni si̱kitaꞌan mani ra yoo xiꞌin mií ra, xaꞌa ya ti̱ꞌvi ra Seꞌe ra Jesucristo ki̱xi ra ndi̱xiꞌi ra xaꞌa yo. Ta ndisaa ka ví vitin sikaku ra yoo, chi xa ndi̱kitaꞌan mani yo xiꞌin ra.

ROMANOS 8:11

Ndioxi ku ra si̱taku Jesús tá ndi̱xiꞌi ra. Ta suvi ni mií ra si̱taku Cristo Jesús ku ra taxi kutaku ndo. Saa taxi ra kutaku ikin kuñu ndo ya ndíꞌi xaꞌa. Tixin mií Tachi ra ya íyo xiꞌin ndo kua sitaku ra ndoꞌo̱.

ROMANOS 8:24

Tá si̱kaku Ndioxi yoo, saa xa̱á yo ndátun yo xaa súvi ra ndiꞌi ya vaꞌa ndi̱kaꞌan ra xiꞌin yo. Ta saa ni kúni Ndioxi ná kundatun yo, ndakua sixinu ndiꞌi ra ya ndi̱kaꞌan ra. Chi tá xa si̱xinu ra ya ndi̱kaꞌan ra xiꞌin yo, ta köo xíniñuꞌu ka yo kundatun yo xaa súvi tuku ra ya, ndikuu.

1 Corintios 13:13

Tá kuꞌva káꞌan i saa íyo va ya, sundi uni nuu ya yóꞌó ku mií ya ndïꞌi xaꞌa: ya ndee ni ndáa ini yo xíni yo Ndioxi, xiꞌin ya kándixa yo ya sixinu Ndioxi ya ndi̱kaꞌan ra taxi ra ndaꞌa yo, saa tu ya kúꞌvi ni ini ta̱xi ra ndaꞌa yo. Sundi ya ndee ni ka ndee ndáa yaꞌvi nuu uni ya yóꞌó kúu ya, kúꞌvi ni ini ta̱xi Ndioxi ndaꞌa yo kuꞌvi ini yo kuni yo inka naꞌa.

1 Corintios 15:20

Sundi vaꞌa ná kundaa ini ndo, chi ya ndaa ni ndixa kua ndi̱taku Tata yo Jesucristo tañu na ndíi. Chi ra ikán ta tá káa ñaꞌa ya núnu̱ú ya síkee naꞌa nuu chíꞌi na, saa káa ra xaꞌa ya kúu ra ra núnu̱ú ndi̱taku tañu ndiꞌi na ndíi, na xa ndi̱xiꞌi.

2 Corintios 1:3

Saa ná kunuu vaꞌa ni ya toꞌo Ndioxi, ra kúu Iva Tata yo Jesucristo, Iva yo ra kúndaꞌvi ni ini xíni yoo ku ra ta ndiꞌi saa ichí síndiko ra ini yo.

Gálatas 6:16

Ta saa ná koo ni ya vaꞌa xiꞌin ndo, xiꞌin ya kúndaꞌvi ini Ndioxi xíni ra ndiꞌi ndóꞌo̱ na kúu ñuu Ndioxi, na xáa súvi ni ya káꞌan i xiꞌin ndo.

Efesios 1:17

Xáku ndaꞌvi i nuu Ndioxi ra chee ni, ra kúu Iva Tata yo Jesucristo ya ná taxi ra ya xínituni ndaꞌa ndo, ta saa ná xinu ndo kundaa vaꞌa ini ndo xaꞌa ra ta nda kuni taꞌan vaꞌa ka ndo xiꞌin ra,

Efesios 1:3

Ta saa ná xaa kaꞌnu ni yo Ndioxi ra kúu Iva Tata yo Jesucristo, chi ta̱xi ni ra ndiꞌi ya vaꞌa íyo nuu ndivi ndaꞌa yo tixin Jesucristo.

Efesios 1:7

Ta ya kuchiñu ra sikaku ra yoo kua cha̱ꞌvi Jesucristo xaꞌa kuachi yo xiꞌin nií ra nduta ndi̱xita nuu cruzin tá ndi̱xiꞌi ra. Saa ku̱u nuu ndi̱saña yo ki̱ndoo ndíka yo nuu ya väꞌa, ya xa̱ꞌnda chiñu nuu yo. Xaꞌa ya kaꞌnu ni ini Ndioxi kua i̱kan ra saa xiꞌin yo.

Efesios 2:4

Sundi xaꞌa ya vaꞌa ni ini Ndioxi xiꞌin yo, yakan ku̱ndaꞌvi ni ini ra xi̱ni ra yoo, ta saa ku̱ꞌvi ni ini ra xi̱ni ra yo.

Efesios 3:20

Ta xiꞌin ndee mií Ndioxi ya íyo xiꞌin yo kua kuchiñu ikan ra ya chee ni xiꞌin yo, chi ndee ni ndee kúu mií ra ta yáꞌa ni ka va kuaꞌa ñaꞌa kuchiñu ra ikan ra nuu ya ndákan yo nuu ra án ya ndíkani ini yo xaꞌa.

Colosenses 1:23

Saa nduu ndo tá tu tuun ni kándixa ndo tuꞌun vaꞌa xaꞌa Tata yo Jesucristo tá tu ná sïndikoo ndo tuꞌun ra ya ndee ni teꞌe xi̱ni soꞌo ndo. Ta xa ndiꞌi ni kúu xaꞌa ñuu ivi xi̱ni soꞌo na xaꞌa tuꞌun ra, taꞌan ya ikán kua káꞌan ndoso yeꞌe Pablo.

Colosenses 1:27

Ta saa kua i̱kan Iva yo Ndioxi, saa chi ku̱ni ra ya ná kundaa ini na kúu kuenta mií ra xaꞌa ñaꞌa ya ndi̱xiyo sěꞌe xinaꞌa. Ta tuꞌun ra ya ndaa, ya chee ni, ya luvi ni, ta ya kuni soꞌo ndiꞌi ni kúu naꞌa kua. Ta ya káꞌan tuꞌun Iva yo xaꞌa ya ndixiyo sěꞌe yóꞌó kua: íyo Tata yo Jesucristo nima ndóꞌo̱ köo kúu judío vitin, ta kúndaa teꞌe ini ndo ya koo ndo xiꞌin ra nuu ndivi.

1 Tesalonicenses 1:3

Ta táxi ni nde tixaꞌvi ndaꞌa Iva yo Ndioxi xaꞌa kuꞌva ya kándixa ni ndo ra, saa kúꞌvi ni ini ndo xíni ndo ra, ta ya ñaa kua xáꞌa ni ndee xiꞌin ndo ya ndee ni vaꞌa xáa chiñu ndo nuu ra, chi kúndaa teꞌe ini ndo ya xaa súvi ra ya ndi̱kaꞌan ra xiꞌin ndo, ta ya ñaa kua chíndee ni ndóꞌo̱ ndee ni tuun ndíkun ndo Tata yo Jesucristo.

1 Tesalonicenses 4:13

Ñani yo xiꞌin kuꞌva yo, kúni nde ná kundaa ini ndo xaꞌa na taꞌan yo na xa ndi̱xiꞌi, ya ná küsuchi ni ini ndo xaꞌa na tá kuꞌva kúsuchi ini naꞌa, na köo xíni Tata yo Jesucristo, chi na ikán ta ni köo xíni na unkua kundoꞌo na.

2 Tesalonicenses 2:16

Ta mií Tata yo Jesucristo xiꞌin mií Iva yo Ndioxi ku ra kúꞌvi ni ini xíni yoo, saa si̱ndiko ra ini yo ndiꞌi saa kúu ichí, ta ndixaꞌa ni ra ndee xiꞌin yo ya ndee ni tuun kundikun yo ra, xaꞌa ya vaꞌa ni ini ra xiꞌin yo.

1 Timoteo 1:14

Ta yáꞌa ni vi ku̱ndaꞌvi ini ra xi̱ni ra yeꞌe, ñaa chi̱ndee ra yeꞌe ndáa ni ini i xíni i ra, saa ta̱xi ra ndee ndaꞌa i ya kuꞌvi ni ini i kuni i inka naꞌa xaꞌa mií ra.

Tito 2:13

Saa ná koo yo nani ndátun yo tindaa kivi ya ndee ni chee nuu ndiko koo Tata yo Jesucristo kixi ra ñuu ivi yóꞌó sikaku ra yoo. Chi mií ra ku Ndioxi ra chee ni, ta kusini ni yo xiꞌin ra tá ná ndiko koo ra xiꞌin ndee ya luvi ni yéꞌe̱ kúu mií ra.

HEBREOS 3:6

Sundi Jesucristo, xaꞌa ya kúu ra Seꞌe Ndioxi ta xáa súvi ni ra chiñu ya ta̱xi Ndioxi ndaꞌa ra, yakan xáꞌnda chiñu ra veꞌe ra. Saa yoo, ta na veꞌe Ndioxi ku yo, yoo ku yo xáꞌnda chiñu ra nuu, tá tu ndinuꞌu ni ini yo ndáa ni ini yo xíni yo Ndioxi, saa kúsini ni yo ndátun yo niꞌi yo ya taxi Ndioxi ndaꞌa yo.

Santiago 1:18

Ta saa chi̱tuni ra nda̱sa xa̱á ra nima yo xiꞌin tuꞌun ra ya ndaa, ya ná kuchiñu yo nduu yo naꞌa, na vaꞌa, ta xiꞌna ka yoo ku yo núnu̱ú nda̱sa xa̱á ra nuu tá kúu ndiꞌi ñaꞌa ya si̱kuaꞌa ra íyo ñuu ivi yóꞌó.

1 Pedro 1:13

Xaꞌa ya ikán kua koo ndúvi ndo vívií ndikani ini ndo, táku koo ini ndo, ndee ni ndaku koo ini ndo ya ndikiꞌin ndo ñaꞌa vaꞌa ya niꞌi ndo nuu Tata yo Jesucristo tá ná ndiko koo ra kixi ra.

1 Pedro 1:21

Xaꞌa ya vaꞌa i̱kan Tata yo Jesucristo kua xa̱á ndo kándixa ni ndo Iva yo Ndioxi, ra si̱taku Tata yo Jesucristo tañu na ndíi, saa ta̱xi ni Ndioxi ya toꞌo ndaꞌa ra. Yakan kua ndátun ni ndo, saa ndáa ni ini ndo ya xaa súvi ndiꞌi ra ya ndi̱kaꞌan ra xiꞌin ndo taxi ra ndaꞌa ndo.

1 Pedro 1:23

Saa chi ndóꞌo̱, ta ndi̱kaku uvi tuku ndo, ta köo ndi̱kaku ndo tixin iva siꞌí ndo na ñuu ivi yóꞌó, chi tixin tuꞌun Ndioxi ya táku ndiꞌi saa kivi kua ka̱ku ndo.

1 Pedro 2:2

Koo ndo tá kuꞌva íin na vali, na sikan ka̱ku, na ndee ni káꞌun ini ta kúni ni na chichin na, kuꞌva saa xíniñuꞌu ndo nduku ni ndo nina tuꞌun ya vaꞌa, ya kúu tuꞌun Tata yo, saa kua nduu ndo na ndinuꞌu ni ndíkun ichí ra, ya kaku ndo.

1 Pedro 3:15

Ya ndee ni xíniñuꞌu ndo ikan ndo kua yóꞌó, ná kuñuꞌu ni ini ndo ya xaa kaꞌnu ni ndo Tata yo Jesucristo. Ta ndiꞌi saa ichí koo ndúvi ndo ya ndikani ndo nuu naꞌa, na ndákan tuꞌun ndóꞌo̱ xaꞌa ya kándixa ndo ra.

1 Pedro 3:21

Taꞌan tikuií ikán ku tikuií rá síkuchi naꞌa ndóꞌo̱ vitin, rá síkaku ndóꞌo̱. Ta tikuií ikán ta köo ndíkata rá ya väꞌa íyo ikin kuñu yo, sundi ndása vaꞌa rá ya xínituni yo, saa síkaku rá yoo xaꞌa ya ndi̱taku Tata yo Jesucristo tañu na ndíi.

1 Pedro 3:5

Kuꞌva saa kua xa̱a súvi ná síꞌi mií na, ná i̱í ni ini xi̱ndoo xinaꞌa, saa kua xa̱a súvi ni ná mií ná chi ndee ni ka̱ndixa ná Ndioxi, ta xa̱a toꞌo ni ná ií ná.

1 Juan 2:29

Xa xíni yo Tata yo Jesucristo ku ra vaꞌa ni, ra ndaa ni ini, yakan ndiꞌi naꞌa, na íkan ya ndaa, ta na ñaa ku na kúu seꞌe Ndioxi.

1 Juan 3:3

Ta ndiꞌi na ndinuu ni ndátun ya ndiko koo ra ndisama ra na, ta ndíkundee ni na xinu koo na nduu na tá kuꞌva íyo mií ra, saa chi ra i̱í ku ra.

1 Juan 3:9

Ndiꞌi na kúu seꞌe Ndioxi ta köo íkan ka na ya väꞌa, chi Ndioxi ta xa íyo ra nima na, yakan küvi ka ikan na ya väꞌa, chi na xa ndi̱kaku uvi ku na i̱kan ra, ndu̱u na seꞌe ra.

1 Juan 4:7

Ñani yo, ná kuꞌvi ni ini yo kuni taꞌan yo chi ya kúꞌvi ni ini yo taꞌan yo ta nuu Ndioxi vaxi ya, saa xáꞌnda chiñu ra nuu yo. Ta ndiꞌi na kúꞌvi ni ini xíni taꞌan, ta na ñaa ku na ka̱ku nuu Ndioxi saa xíni na Ndioxi.

1 Juan 5:1

Ndiꞌi na kándixa ya ti̱ꞌvi Ndioxi Jesús ki̱xi ra sikaku ra yoo, ta na ikán ta seꞌe Ndioxi ndu̱u na. Ndiꞌi na kúꞌvi ini xíni Iva yo, ta kúꞌvi tu ini na xíni na ndiꞌi seꞌe va ra.

1 Juan 5:18

Ta yoo ndixa ndíkun Iva yo Ndioxi ta küvi ikan yo ya väꞌa tutuku tutuku. Saa chi ndáa Jesucristo Seꞌe Ndioxi mií yo ndíkun ñaꞌa. Ta täxi ra ndikava ndikuu yo ndaꞌa kiti nǎꞌa.

1 Juan 5:4

Saa chi ndiꞌi yo kúu seꞌe Ndioxi, ta kúchiñu yo nuu ya väꞌa íyo ñuu ivi yóꞌó. Xaꞌa ya ndáa ni ini yo Ndioxi xiꞌin Tata yo Jesucristo yakan vaꞌa kúchiñu yo nuu ya väꞌa.