1 Pedro 1:22 - Xochapa Mixteco

²² Ta xaꞌa ya xáa súvi ni ndo tuꞌun vaꞌa ya ndaa xi̱ni soꞌo ndo yakan ndu̱vaꞌa ya vaꞌa ndo, saa chíndee taꞌan Tachi I̱í ra xiꞌin ndo ya ndinuꞌu ni kúꞌvi ini ndo xíni taꞌan ndo. Ikan ndo saa: ndinuꞌu ni ini ndo kuꞌvi ini ndo kuni taꞌan ndo.

1 Pedro 1:22 Mawu Ofanana

San Juan 15:17

Ta ya yóꞌó kua xáꞌnda chiñu i nuu ndo: Kuꞌvi ni ini ndo kuni taꞌan ndo.

San Juan 15:3

Ta ndóꞌo̱ xa ndu̱yaa ndo xiꞌin tuꞌun ya ndi̱kaꞌan i xiꞌin ndo.

San Juan 17:17

Tuꞌun un ta ya ndaa kua, yakan chindee un na ná nduu na ivi, na i̱í, ta ná ndikundikun na yóꞌo̱ xiꞌin ndiꞌi ni kúu nima na.

San Juan 17:19

Xa ndi̱taxi ndiꞌi i mií i ndaꞌa un ya xaa súvi i ya kúni un, ta saa na ndíkun yeꞌe ná nditaxi ndiꞌi na mií na ya xaa súvi na ya kúni un tixin ya ndaa ni kúu mií un.

Los Hechos 15:9

Chi nuu Ndioxi ta iin ndáa yaꞌvi ndiꞌi va yo. Tá kúꞌva nda̱sa yaa ra nima yoo saa nda̱sa yaa tu ra nima na ikán va, xaꞌa ya ndáa ini na xíni na ra.

Los Hechos 6:7

Ta ndiꞌi ni kúu xíta tuꞌun xaꞌa Jesús kuaꞌan ya, xa̱á ndúkuaꞌa na ndíkun ichí ra mi ñuu Jerusalén. Nda mií nda sutu nuu na judío kuaꞌa ni nda xa̱á kándixa Jesús.

ROMANOS 1:5

Ta xaꞌa mií ra kua ta̱xi Ndioxi ya toꞌo chee ni ndaꞌa i kúu i apóstol, yakan ti̱ꞌvi ra yeꞌe ya chindee taꞌan i xiꞌin ndiꞌi ni kúu naꞌa, na ndóo ndiꞌi ni kúu ñuu ivi, na köo kúu judío ya kandixa na ra, saa xaa toꞌo na ra.

ROMANOS 2:8

Sundi sava naꞌa, na ikú ni ini, na köo xíin ikan ya vaꞌa, ndisaa ya väꞌa kúni na ikán na, na ikán ta kundoꞌo ni na ikan Ndioxi chi sáa ni ini ra xíni ra na, yakan yáꞌa ni xaa nduvaꞌa ra xiꞌin na.

ROMANOS 8:13

Saa chi tá íkan yo ya kúni kuñu yo, ta saa kua ku̱aꞌan yo ichí nuu ndíꞌi xaꞌa yo, kuvi yo. Ta saa ni, tá xiꞌin ndee Tachi Ndioxi síndiꞌi xaꞌa yo ya väꞌa, ya kúni ikin kuñu yo, ta saa kua ndixa kutaku yo nuu Ndioxi.

2 Corintios 6:6

Xaꞌa ya vaꞌa ni íyo nde nuu naꞌa kua sínaꞌa nde mií nde nuu na ya kúu nde taa, nda xáa chiñu nuu Ndioxi, chi íyo ni ya xínituni nde xaꞌa ya xíni nde ya ndaa, ta xáꞌa ndee ni ini nde nuu ndiꞌi ya, ni köo ndíko koo ini nde, vaꞌa ni ini nde xiꞌin naꞌa. Íkan nde saa xaꞌa ya íyo Tachi I̱í Ndioxi xiꞌin nde, ta ndinuꞌu ni ini nde kúꞌvi ini nde xíni nde na,

Gálatas 3:1

¿Ndachu kíꞌvi ni íkan ndo, ñani yo, na ñuu Galacia? ¿Ta unku na sa̱ka ini ndo ya köo xíin ka ndo kandixa ndo ya ndaa si̱naꞌa nde ndóꞌo̱ xaꞌa Jesucristo? Chi tá si̱naꞌa i ndóꞌo̱ ta ndee ni va teꞌe si̱naꞌa i ndóꞌo̱ xaꞌa ya ndi̱xiꞌi ra nuu cruzin xaꞌa kuachi ndiꞌi yo.

Gálatas 5:5

Sundi ndeꞌe ta tixin Tachi I̱í ra kua kúndaa teꞌe ini nde ya ndikuiso Ndioxi ndeꞌe nuu ra, nduu nde tá íin naꞌa, na köo ka kuachi kúu mií nuu ra, xaꞌa ya ndáa ni ini nde xíni nde Jesucristo.

Gálatas 5:7

Ta ndóꞌo̱, ta vaꞌa ni va xa̱a súvi ndo ndi̱xika ndo ichí ra ya ndaa. Ta ¿unku na si̱ndaꞌvi ndóꞌo̱ ya kündikun ka ndo ichí ra?

Efesios 4:3

Ta saa nduku ndo kuꞌva ya ndikitaꞌan vií ndo kundoo vaꞌa ni ndo xiꞌin taꞌan ndo tá kuꞌva si̱kitaꞌan vií mií Tachi I̱í Ndioxi ndóꞌo̱, chi xaꞌa ya ikán kua si̱kitaꞌan ya ndóꞌo̱ xiꞌin taꞌan ndo ya ná koo vaꞌa ni ndo.

Filipenses 1:9

Káꞌan ni i xaꞌa ndo xiꞌin Ndioxi ya ná kuꞌvi ni ka ini ndo kuni ndo Ndioxi iin iin kivi. Ta saa ná kuꞌvi ni tu ini ndo kuni ndo inka naꞌa va. Ta saa ná niꞌi ni ka ndo ya ndíchi nuu ra ya kuchiñu ndo kundaa ni ka ini ndo.

1 Tesalonicenses 3:12

Ta ná chindee ni Tata yo Jesucristo ndóꞌo̱ kuaꞌnu ni ka ndo xiꞌin ya kúꞌvi ni ini ndo xíni taꞌan ndo, ta saa ná kuꞌvi ni ini ndo kuni ndo ndiꞌi naꞌa. Ta saa kuꞌvi ni ini ndo kuni taꞌan ndo tá kuꞌva kúꞌvi ni ini nde xíni nde ndóꞌo̱.

2 Tesalonicenses 1:3

Ñani yo xiꞌin kuꞌva yo, ndiꞌi saa ichí xíniñuꞌu ni nde kaꞌan nde xaꞌa ndo xiꞌin Ndioxi. Chi ndóꞌo̱, ta kándixa ni ndo ra, ta vitin taan xáꞌnu ka ndo xiꞌin tuꞌun ra, saa kúꞌvi ni ini ndo xíni taꞌan ndo.

2 Tesalonicenses 2:13

Sundi ndeꞌe, ta ndiꞌi saa ichí táxi ni nde tixaꞌvi ndaꞌa Ndioxi xaꞌa ndo, chi Ndioxi ta kúꞌvi ni ini ra xíni ra ndóꞌo̱. Saa ndi̱kaxin ra ndóꞌo̱ ya sikaku ra xiꞌna ndóꞌo̱, nda̱sa vaꞌa ra ini ndo tixin Tachi I̱í ra. Xaꞌa ya ndáa ni ini ndo xíni ndo ya ndaa xaꞌa Tata yo Jesucristo.

1 Timoteo 1:3

Ta xa kúndaa ini un tá kivi ke̱e i chí ñuu Éfeso saa ndi̱kiꞌin i kuaꞌan i chí ñuu Macedonia ta ndi̱kaꞌan i xiꞌin un ndoo un koo un ñuu Éfeso ñaa, ya ná kaꞌnda chiñu un nuu sava naꞌa, na sínaꞌa ya vata, ya ná sïnaꞌa ka na kuꞌva saa.

1 Timoteo 1:5

Yakan káꞌan i xiꞌin un ya kaꞌan un xiꞌin na ñani yo ya ná kuꞌvi ni ini na kuni taꞌan na xiꞌin ndinuꞌu nima na, ta ni ya xínituni na ta täxi ya kuachi xaꞌa na nuu ra, chi ndinuꞌu ni ini na ndáa ini na xíni na ra.

1 Timoteo 4:12

Täxi un xaa ni̱nu̱ na yóꞌo̱, xaꞌa ya loꞌo un, kuâán un. Vivií koo un nuu na ya ná kuni na ikan na taꞌan ya vaꞌa íkan un, xaꞌa kuꞌva ndituꞌun un xiꞌin na, xiꞌin kuꞌva xíka un nuu na, xiꞌin kuꞌva kúꞌvi ini un xíni un na, saa kundaa ni ini un kuni un Tata yo Jesucristo, kundaa ni un mií un, xäa yakua xiꞌin mií un.

1 Timoteo 5:2

Saa ikan tu un xiꞌin ná kuꞌva yo, ná nana chee xikuaꞌa, vií kaꞌan un xiꞌin ná, tá kuꞌva káꞌan un xiꞌin nana un saa kaꞌan un xiꞌin ná. Saa tu ná kuâán vali, vií kaꞌan un xiꞌin ná, tá kuꞌva káꞌan un xiꞌin ná kuꞌva un, saa kaꞌan un xiꞌin ná.

2 Timoteo 1:14

Mií Tachi I̱í Ndioxi ya íyo xiꞌin yo ná chindee yóꞌo̱ ya kuchiñu un kiꞌin ni un kuenta xiꞌin tuꞌun vaꞌa ya si̱kuiso chiñu Ndioxi yóꞌo̱, ta säma un ya.

HEBREOS 11:8

Xaꞌa ya xi̱ndaa ni ini ra Abraham xi̱ni ra Ndioxi kua xa̱a súvi ra chiñu ya ndi̱kaꞌan Ndioxi xiꞌin ra. Saa ke̱ta ra kuaꞌan ra koo ra inka ñuu nuu ki̱ndoo Ndioxi xiꞌin ra taxi ra ya ndaꞌa ra koo ra xiꞌin seꞌe ra, ta ni köo kúndaa ini ra ndá ñaꞌñu kua kuaꞌan ra.

HEBREOS 13:1

Ta ndóꞌo̱, kuꞌvi ni ini ndo kuni taꞌan ndo, chi ndiꞌi ndóꞌo̱ ndíkun Tata yo Jesucristo, ta tá íyo ñani mií ndo án kuꞌva mií ndo, saa íyo ndo xiꞌin taꞌan ndo.

HEBREOS 5:9

Yakan tá sindiꞌi ra xa̱a súvi ra ndiꞌi ya ndi̱kaꞌan Ndioxi xiꞌin ra, saa kua ndi̱xinu ra ndu̱u ra taa, ra ndee ni ndixa xíniñuꞌu yo ya sikaku ra yoo koo yo xiꞌin ra ndiꞌi saa ichí tá tu xáa súvi yo ya káꞌan ra.

HEBREOS 6:10

Saa chi Ndioxi, ta vaꞌa ni ra, ndaa ni ini ra yakan ndïndoso ini ra xaꞌa chiñu ya íkan ndo, saa ndikaꞌán ini ra xaꞌa ndiꞌi ka ñaꞌa ya i̱kan ndo. Chi sínaꞌa ndo mií ndo ya kúꞌvi ni ini ndo xíni ndo ra, xaꞌa ya chíndee ndo naꞌa, na kándixa ñaꞌa. Ta nda vitin ta chíndee ka ndo na.

HEBREOS 9:14

Tá tu ku̱chiñu nií ikán xiꞌin yaá nda̱sa vaꞌa ya sata ikin kuñu na, ta ¡ndisaa ka vi nií Jesucristo, ndee ni ka ndee kúu mií rá ikán chi nda loꞌo kuachi ra köo, yakan vaꞌa ndasa vaꞌa rá yoo xaꞌa Tachi ra ya táku ndiꞌi saa ichí! Saa chi nií mií ra ku rá ndása vaꞌa nima yo, ndúvaꞌa yo nuu kuachi ya xáꞌni yoo, ta saa kua kuchiñu yo xaa chiñu yo nuu Ndioxi, ra táku.

Santiago 1:21

Xaꞌa ya ñaa kua vaꞌa ka sindoo ndiꞌi ndo ya väꞌa íkan ndo, xiꞌin ya kini ni íyo ka nima ndo. Ta xíniñuꞌu ndo kaꞌnu ndo mií ndo, xaa ni̱nu̱ ndo mií ndo ya ndikiꞌin ndo tuꞌun Ndioxi ya ta̱xi ra ndaꞌa iin iin ndo íyo ya nima ndo. Chi tuꞌun ra kua kúu mií ndee ya sikaku ya ndóꞌo̱.

Santiago 4:8

Ta vaꞌa kuyati ndo nuu Ndioxi saa kuyati ra nuu ndo. Ta ndóꞌo̱ íyo kuachi, kukuiin ndo xiꞌin ya väꞌa kéꞌe ndo, ndikata ndo ndaꞌa ndo. Saa tu ndóꞌo̱ uvi ini këꞌe ka ndo saa, ndasa vaꞌa ndo nima ndo ná nduvií ndo.

1 Pedro 1:2

Saa chi xa yachi vi ndi̱kaxin Ndioxi ndóꞌo̱, saa nda̱sa vaꞌa ra ndóꞌo̱ tixin Tachi ra. I̱kan ra saa xiꞌin ndo chi kúni ra xa̱a súvi ndo ya ndi̱kaꞌan ra, saa nda̱sa i̱í ra ndóꞌo̱, ya ná xaa súvi ndo ya káꞌan ra xiꞌin ndo, ta tixin nií Tata yo Jesucristo kua ndi̱kata ra kuachi ndo. Ta mií Iva yo Ndioxi ná taxi ni ka ya vaꞌa ndaꞌa ndo xaꞌa ya kúꞌvi ni ini ra xíni ra ndóꞌo̱, saa ná koo vaꞌa ni ndo.

1 Pedro 2:17

Xaa toꞌo ndo ndiꞌi naꞌa, ta kuꞌvi ni ini ndo kuni ndo nda ñani yo xiꞌin ná kuꞌva yo, na ndíkun Tata yo Jesucristo. Ta xaa kaꞌnu ni ndo Ndioxi, saa xaa toꞌo ndo na chiñu naꞌnu, na kúu rey.

1 Pedro 3:1

Saa ndóꞌo̱ kuꞌva yo, ndóꞌo̱ xa ti̱ndaꞌa, íyo ií, ta xaa toꞌo ndo ií ndo. Chi sava ií ndo ta täꞌan kandixa nda tuꞌun Tata yo, tá ná kuni nda ya vaꞌa ni íkan ndo, ta nda iin tuꞌun köo xíniñuꞌu ndo kaꞌan ndo xiꞌin nda,

1 Pedro 3:20

Chi na ikán ta köo ndi̱xiin na xaa súvi na ya ndi̱kaꞌan Ndioxi xiꞌin na tá tiempo ya ndi̱xiyo ra Noé. Ndee ni ndi̱xaꞌa ndee ini Ndioxi xi̱ndatun ra na tá ndi̱xika ra Noé si̱kuaꞌa ra itun barco ya kaku na. Ta ndisaa una kuiti ndi̱xiyo na ndi̱kaku, köo ndi̱xiꞌi na xiꞌin tikuii.

1 Pedro 3:8

Vitin káꞌan i xiꞌin ndo, vívií koo ndo xiꞌin taꞌan ndo, iin yuꞌu koo ndo. Vívií kutaꞌan ndo. Kuꞌvi ini ndo kuni taꞌan ndo, kundaꞌvi ini ndo kuni taꞌan ndo, xaa ni̱nu̱ ndo mií ndo.

1 Pedro 4:17

Saa chi vitin kua ti̱ndaa tiempo ya xaa nani Ndioxi kuachi xiꞌin ndiꞌi naꞌa. Tá kuꞌva kéꞌe na saa ikan ra xiꞌin na, ta xiꞌna xiꞌin naꞌa, na ndíkun ñaꞌa kua xáa ra ikan ra saa. Tá tu xiꞌna xiꞌin yoo kua íkan ra saa ya ndee ni ndóꞌo yo, ta yáꞌa ni ka va ndee kundoꞌo naꞌa, na köo xíin xaa súvi tuꞌun vaꞌa xaꞌa ra.

1 Pedro 4:8

Chi ya ndee ni ndee nuu ndiꞌi ya kua kuꞌvi ni ini ndo kuni taꞌan ndo, chi saa kua kuchiñu ndo xaa kaꞌnu ini ndo xaꞌa kuachi na taꞌan ndo, ta xaꞌa ya kúꞌvi ni ini ndo xíni ndo na kua kuchiñu ndo xaa kaꞌnu ini ndo xaꞌa kuachi na, ni ndee ni ndee káa ya.

2 Pedro 1:7

Ta xíniñuꞌu ndo kuꞌvi ni ini ndo kuni ndo na taꞌan yo, na ndíkun Tata yo Jesucristo xiꞌin ndiꞌi ka naꞌa.

1 Juan 3:11

Ya yóꞌó ku tuꞌun Ndioxi ya xi̱ni soꞌo yo tá núnu̱ú vaꞌa: Ya ná kuꞌvi ni ini yo kuni taꞌan yo.

1 Juan 3:23

Ta ya yóꞌó kua xáꞌnda chiñu Ndioxi nuu yo: Ná kandixa yo Seꞌe ra, ra kúu Jesucristo, ta ná kuꞌvi ini yo kuni taꞌan yo, tá kuꞌva xáꞌnda chiñu ra nuu yo.

1 Juan 4:12

Nda iin naꞌa köo ndi̱xini xiꞌin nuu Ndioxi. Sundi tá tu kúꞌvi ini yo xíni taꞌan yo, ta kúni kachi ya ítaꞌan vaꞌa Ndioxi xiꞌin yo. Ta saa kuchiñu yo kuꞌvi ini yo tá kuꞌva kúꞌvi ini mií ra xíni ra yoo.

1 Juan 4:20

Tá tu ndá na káꞌan: “Kúꞌvi ni ini i xíni i Ndioxi”, káchi na, ta kúndasi nuu na xíni na ñani taꞌan na, ta na ñaa ta na vata ku na. Saa chi tá tu köo kúꞌvi ini na xíni na ñani taꞌan na, na xíto na nuu, ta küvi kuꞌvi ini na kuni na Ndioxi, ra täꞌan kuni na.

1 Juan 4:7

Ñani yo, ná kuꞌvi ni ini yo kuni taꞌan yo chi ya kúꞌvi ni ini yo taꞌan yo ta nuu Ndioxi vaxi ya, saa xáꞌnda chiñu ra nuu yo. Ta ndiꞌi na kúꞌvi ni ini xíni taꞌan, ta na ñaa ku na ka̱ku nuu Ndioxi saa xíni na Ndioxi.

El Apocalipsis 2:4

Vani vaꞌa ni íkan ndo, ta saa ni íyo iin kuachi ndo nuu i. Saa chi ndóꞌo̱, ta siloꞌo ni va kúꞌvi ini ndo xíni ndo yeꞌe, köo kúꞌvi ka ini ndo xíni ndo yeꞌe tá kuꞌva ku̱ꞌvi ini ndo xi̱ni ndo yeꞌe tá sikan xa̱á ndo kándixa ndo yeꞌe.