1 Pedro 1:2 - Xochapa Mixteco

² Saa chi xa yachi vi ndi̱kaxin Ndioxi ndóꞌo̱, saa nda̱sa vaꞌa ra ndóꞌo̱ tixin Tachi ra. I̱kan ra saa xiꞌin ndo chi kúni ra xa̱a súvi ndo ya ndi̱kaꞌan ra, saa nda̱sa i̱í ra ndóꞌo̱, ya ná xaa súvi ndo ya káꞌan ra xiꞌin ndo, ta tixin nií Tata yo Jesucristo kua ndi̱kata ra kuachi ndo. Ta mií Iva yo Ndioxi ná taxi ni ka ya vaꞌa ndaꞌa ndo xaꞌa ya kúꞌvi ni ini ra xíni ra ndóꞌo̱, saa ná koo vaꞌa ni ndo.

1 Pedro 1:2 Mawu Ofanana

San Mateo 24:22

Ta xaꞌa ya kúꞌvi ni ini Ndioxi xíni ra na ndi̱kaxin ra ndíkun ichí ra kua chi̱tuni ra loꞌo kivi ndoꞌo na ñuu ivi yóꞌó. Tá ra köo ndi̱chituni ku ra ya ndoꞌo na loꞌo kivi ta nda iin naꞌa käku, ndikuu.

San Mateo 24:24

Chi kana koo kuaꞌa ni na vata kachi na saa: “Yeꞌe ku ra ku Cristo ra ti̱ꞌvi Ndioxi”, án “Yeꞌe ku profeta ra káꞌan ndoso tuꞌun yuꞌu Ndioxi”, kachi na, ta süvi na ndaa ku na. Ikan na yatuꞌun nuu sindaꞌvi na naꞌa, saa ndikanda ni ini na xiꞌin ya vata ikan na nuu naꞌa, ta nda na ndi̱kaxin Ndioxi kuni na sindaꞌvi na.

San Mateo 24:31

Saa tiꞌvi i na tatun Ndioxi ta ndee ni ndaꞌi na xiꞌin trompeta tivi na kuꞌun na ndikaya na ndiꞌi na ndi̱kaxin i ya kundikun na ichí i. Ta ndiꞌi ni kúu xaꞌa ñuu ivi kana koo na, xaa na nuu i.

San Marcos 13:20

Xaꞌa ya kúꞌvi ini Ndioxi xíni ra na ndi̱kaxin ra, xaꞌa ya ikán kua chi̱tuni ra loꞌo kivi tixuꞌvi na ñuu ivi yóꞌó. Tá tu köo ndi̱kan ra saa, ta nda iin naꞌa küchiñu kaku ndikuu.

San Marcos 13:22

Saa chi kuaꞌa ni nda taa vata kixi, kaꞌan nda, nda ikán ku nda ti̱ꞌvi Ndioxi sikaku na ñuu ivi yoꞌo, án nda ikán ku profeta nda vaxi kaꞌan ndoso tuꞌun yuꞌu ra, kachi nda. Ta kuaꞌa ni yatuꞌun ikan nda, saa ikan nda ya ndíchi ni nuu na ya sindaꞌvi nda na, nda sava na ndi̱kaxin Ndioxi kuni nda sindaꞌvi nda.

San Marcos 13:27

Ta yeꞌe tiꞌvi i na tatun ya kuꞌun na ndikaya na ndiꞌi naꞌa, na ndi̱kaxin i ndíkun yeꞌe, kuꞌun na xaꞌa ndiꞌi ni kúu ñuu ivi yóꞌó ndikaya na naꞌa kixi na nuu i.

San Lucas 18:7

Tá tu saa i̱kan ra ikán, ta ndisaa ka vi Ndioxi, ¿án chïndee ra na ndi̱kaxin ra tá ná kaꞌan na xiꞌin ra vitin taan? ¿Án ndïkuiin kama ra yuꞌu na?

Los Hechos 15:18

Soꞌva káchi Iva yo Ndioxi ndi̱kaꞌan ra xaꞌa ya yóꞌó xinaꞌa chi mií ra ku ra táxi kundaa ini naꞌa xaꞌa ndiꞌi ñaꞌa ―káchi ra Jacobo xiꞌin na.

Los Hechos 2:23

Sundi tá ti̱in ndo Jesús ta xa xíni va Ndioxi unkua kundoꞌo ra, chi tá íyo ya chi̱tuni Ndioxi, saa íyo ndiꞌi ya ndo̱ꞌo ra. Ta ndóꞌo̱ xa̱ꞌni ndo ra chi ta̱xi ndo ra ndaꞌa naꞌa na väꞌa, ta̱xi ndo xa̱ꞌni ñaꞌa na Roma. Saa ndi̱xiyo yuꞌu ndo xiꞌin na, chi̱nuu na ra nuu itun cruzin ta ikán ndi̱xiꞌi ra.

Los Hechos 20:32

’Ta vitin káꞌan ni i xaꞌa ndo xiꞌin Ndioxi ya ná kundaa ni ra ndóꞌo̱, saa ná kundaa ni tu tuꞌun va ra ndóꞌo̱, chi ya vaꞌa ni ku ya, saa kúu mií ya ndee ya taxi ya ndundee ka ini ndo saa taxi ra ndiꞌi ya vaꞌa ndaꞌa ndo, ya chi̱tuni ra taxi ra ndaꞌa na kúu ñuu ra, na i̱í.

ROMANOS 1:5

Ta xaꞌa mií ra kua ta̱xi Ndioxi ya toꞌo chee ni ndaꞌa i kúu i apóstol, yakan ti̱ꞌvi ra yeꞌe ya chindee taꞌan i xiꞌin ndiꞌi ni kúu naꞌa, na ndóo ndiꞌi ni kúu ñuu ivi, na köo kúu judío ya kandixa na ra, saa xaa toꞌo na ra.

ROMANOS 1:7

Táa i tutu yóꞌó xaa ya ndaꞌa ndóꞌo̱, ñani yo, xiꞌin ndóꞌo̱ kuꞌva yo ndóo ñuu Roma, chi ndóꞌo̱ ku naꞌa, na kúꞌvi ni ini Ndioxi xíni ra. Saa ka̱na ra ndóꞌo̱ ya kuu ndo naꞌa, na i̱í nuu ra, koo vaꞌa ni ini ndo, ná taxi ni ra ya vaꞌa ndaꞌa ndo ya ndi̱niꞌi uun ndo nuu Iva yo Ndioxi xiꞌin Tata yo Jesucristo.

ROMANOS 11:2

Xiꞌin ya yóꞌó kúndaa ini yo ya köo ndi̱kundasi nuu Ndioxi kuni ra na ñuu ra, na ndi̱kaxin ra. ¿Án ñúꞌu ini ndo xaꞌa ya ndi̱kaꞌan ra profeta Elías, ra ndi̱kaꞌan tuꞌun yuꞌu Ndioxi xinaꞌa, tá ndi̱kaꞌan kuachi ra xaꞌa na Israel nuu Ndioxi, káchi ra saa:

ROMANOS 11:28

Ta vitin xaꞌa ya ku̱ndasi nuu na judío xi̱ni na tuꞌun vaꞌa xaꞌa Jesucristo, yakan kua kúu na naꞌa, na káni taꞌan xiꞌin Ndioxi. Ta xaꞌa ya íkan na saa, ta nda ndóꞌo̱ köo kúu judío ndi̱niꞌi ya vaꞌa kandixa ndo Jesucristo. Ta saa ni kúꞌvi ni ini Ndioxi xíni ra na ikán, saa chi na ikán ku na ndi̱kaxin ra, kúu na ñuu ra, tá íyo ya ndi̱kaꞌan ra nuu ki̱ndoo ra xiꞌin xii sikua na xinaꞌa.

ROMANOS 15:16

Chiñu kúu mií i kua xáa chiñu i nuu Jesucristo. Tá káa iin sutu káa i káꞌan ndoso i tuꞌun vaꞌa xaꞌa ra xiꞌin naꞌa, na köo kúu judío, ya kuchiñu na kuyati na nuu ra. Ta saa nduu na tá íin ñaꞌa ya sóko i nuu Ndioxi, ta vaꞌa ni ndikuiso ra na, saa chi xa ndi̱kaxin mií Tachi I̱í Ndioxi na, ta xaꞌa mií ra kua ndi̱kaxin ya na.

ROMANOS 16:19

Yakan kúsini ni i xiꞌin ndo, saa chi ndiꞌi naꞌa xíni ya vaꞌa ni xáa súvi ndo ya kúni Ndioxi. Ta saa káꞌan i xiꞌin ndo ya ndíchi ni ná koo ndo ya ikan ndo ya vaꞌa, ta nda loꞌo xäa ndíchi ndo mií ndo ya ikan ndo ya väꞌa.

ROMANOS 16:26

Vitin táxi Ndioxi ya kundaa ini naꞌa xiꞌin tuꞌun ya ta̱a nda profeta, nda ndi̱kaꞌan ndoso tuꞌun yuꞌu Ndioxi xinaꞌa. Saa chi Ndioxi, ra táku ndiꞌi saa kivi, ta kúni ra ná kundaa ini ndiꞌi ni kúu naꞌa, na köo kúu judío xaꞌa tuꞌun ra. Saa kuchiñu na kandixa ni na ra, ta xaa súvi na ya káꞌan ra.

ROMANOS 8:13

Saa chi tá íkan yo ya kúni kuñu yo, ta saa kua ku̱aꞌan yo ichí nuu ndíꞌi xaꞌa yo, kuvi yo. Ta saa ni, tá xiꞌin ndee Tachi Ndioxi síndiꞌi xaꞌa yo ya väꞌa, ya kúni ikin kuñu yo, ta saa kua ndixa kutaku yo nuu Ndioxi.

ROMANOS 8:33

¿Án ndá naꞌa kuchiñu taxi kuachi xaꞌa yoo ndi̱kaxin Ndioxi? Ya ndaa kua nda iin naꞌa küchiñu ikan saa xiꞌin yo, chi mií Ndioxi ku ra xa nda̱sa vaꞌa yo, ndu̱u yo tá íin naꞌa, na köo ka kuachi kúu mií nuu ra.

1 Corintios 1:30

Ta Ndioxi i̱kan ra saa, si̱kitaꞌan ra ndóꞌo̱ xiꞌin Tata yo Jesucristo. Ta mií Tata yo Jesucristo ku ra táxi ya ndíchi ndaꞌa yo, saa ndása tu ra yoo ndúu yo naꞌa, na köo ka kuachi kúu mií nuu ra, ta ndása i̱í ra yoo, saa ndáxin ra yoo ndaꞌa kuachi nuu núꞌni yo.

1 Corintios 6:11

Taꞌan ya väꞌa yóꞌó ku ya i̱kan sava ndo yachi. Sundi vitin ta xa ndo̱o kuachi ndo, xa ndu̱u ndo naꞌa, na i̱í, na köo ka kuachi kúu mií nuu Ndioxi. Ta xa ndi̱kuiso vaꞌa ra ndóꞌo̱ tixin ndee Tata yo Jesucristo, saa tu xiꞌin ndee Tachi I̱í mií Iva yo Ndioxi va.

2 Corintios 10:5

Ta suvi xiꞌin ndee Ndioxi kua kuchiñu nde sindiꞌi xaꞌa nde ndiꞌi tuꞌun väꞌa ya kánaꞌa naꞌa xaꞌa nde. Ta kuꞌva soꞌva kua kúchiñu nde síndiꞌi xaꞌa nde ndiꞌi ñaꞌa ya ndee ni xáa tai ini naꞌa, chi köo táxi ya kundaa ini na xaꞌa Ndioxi. Ta saa sínaꞌa nde na ya ná nditaxi ndiꞌi na ya ndíchi ndíkani ini na ndaꞌa Jesucristo, saa kua kuchiñu na xaa súvi na ya kúni mií ra.

2 Corintios 13:14

Ta saa ná niꞌi ni ndo ya vaꞌa nuu Tata yo Jesucristo xiꞌin ya kúꞌvi ni ini Iva yo Ndioxi xíni ra ndóꞌo̱. Saa ná koo Tachi I̱í Ndioxi xiꞌin ndiꞌi ndo ndiꞌi saa ichí. Saa ná koo.

Colosenses 3:12

Chi mií Ndioxi ku ra ndi̱kaxin ndóꞌo̱ xaꞌa ya kúꞌvi ni ini ra xíni ra ndóꞌo̱ ya nduu ndo na ñuu ra, na i̱í. Xaꞌa ya ñaa kua xíniñuꞌu ndo koo vií ndo xiꞌin taꞌan ndo, kundaꞌvi ini ndo kuni ndo naꞌa, saa ikan ndo ya vaꞌa xiꞌin na, xaa toꞌo taꞌan ndo, xaꞌa ndee ini ndo xiꞌin taꞌan ndo.

2 Tesalonicenses 2:13

Sundi ndeꞌe, ta ndiꞌi saa ichí táxi ni nde tixaꞌvi ndaꞌa Ndioxi xaꞌa ndo, chi Ndioxi ta kúꞌvi ni ini ra xíni ra ndóꞌo̱. Saa ndi̱kaxin ra ndóꞌo̱ ya sikaku ra xiꞌna ndóꞌo̱, nda̱sa vaꞌa ra ini ndo tixin Tachi I̱í ra. Xaꞌa ya ndáa ni ini ndo xíni ndo ya ndaa xaꞌa Tata yo Jesucristo.

2 Timoteo 2:10

Ta xaꞌa ya ikán kua xáꞌa ndee ndiꞌi ini i ndóꞌo̱ ni i xaꞌa naꞌa, na ndi̱kaxin Ndioxi ya ná niꞌi na ya vaꞌa kaku na tixin Tata yo Jesucristo, ta saa kuchiñu na koo na xiꞌin ra ndiꞌi saa kivi nuu luvi ni káa nuu ndee ni yéꞌe̱.

Tito 1:1

Yeꞌe ku ra Pablo, ta suvi mií i ku ra xáa chiñu nuu Iva yo Ndioxi, ta xíka tu i chiñu nuu Tata yo Jesucristo va. Ta yeꞌe ku ra táa tutu yóꞌó xaa ya nuu un ñani yo Tito, chi mií Iva yo Ndioxi ku ra ndi̱kaxin yeꞌe, saa xa̱ꞌnda chiñu ra nuu i ya kaka i chindee taꞌan i xiꞌin na ñuu ra, na ndi̱kaxin ra, ya ndinuꞌu ni ini na ná kundaa ini na kuni na ra. Ta saa vaꞌa ná kundaa ini na ya ndaa xaꞌa Tata yo Jesucristo, tá kuꞌva kúni mií Iva yo Ndioxi.

HEBREOS 10:22

Xaꞌa ya ikán kua ná kuyati yo nuu Ndioxi xiꞌin ndinuꞌu nima yo, ta saa ndinuꞌu ni ini yo ná kundaa ni ini yo kuni yo ra, saa chi xa ndi̱kata ra nima yo xaꞌa ndiꞌi ya väꞌa, ta saa ndi̱kata ra ikin kuñu yo xiꞌin tikuii nduta vaꞌa ni.

HEBREOS 11:28

Xaꞌa ya xi̱ndaa ni ini ra Moisés xi̱ni ra Ndioxi, yakan tá ta̱va ra viko pascua ta xa̱ꞌnda ra chiñu nuu na taꞌan ra na judío, ya ná ndiyakun na nií kiti levo yeꞌe na, ya ná yäꞌa tatun Ndioxi ya xáꞌni ndìì kaꞌni ya seꞌe núnu̱ú na.

HEBREOS 12:24

Ta ndóꞌo̱, ku̱yati ndo nuu Jesús, ra ndíchi nuu Ndioxi nuu ki̱ndoo ra ya xa̱á xaꞌa ndo xáku ndaꞌvi ra xaꞌa ndo nuu Ndioxi. Saa chi ra ikán ku ra ki̱ndoo iin trato ya xa̱á xiꞌin ndo, ta xiꞌin nií ra ku rá nda̱sa i̱í Ndioxi ndóꞌo̱, saa chi ndee ni ka nií Jesús nuu nií ra Abel, ra ndi̱xiꞌi xinaꞌa.

HEBREOS 5:9

Yakan tá sindiꞌi ra xa̱a súvi ra ndiꞌi ya ndi̱kaꞌan Ndioxi xiꞌin ra, saa kua ndi̱xinu ra ndu̱u ra taa, ra ndee ni ndixa xíniñuꞌu yo ya sikaku ra yoo koo yo xiꞌin ra ndiꞌi saa ichí tá tu xáa súvi yo ya káꞌan ra.

1 Pedro 1:14

Yachi ta köo ndi̱kundaa ini ndo xaꞌa tuꞌun ra, yakan ke̱ꞌe ndo ya väꞌa nuu ra, sundi vitin ta ndu̱u ndo seꞌe ra, na xáa súvi ni ya kúni ra, yakan köo xíniñuꞌu ka ndo koo ndo tá kuꞌva ndi̱xiyo ndo yachi.

1 Pedro 1:19

tá kuꞌva yáꞌa ni ndee kúu mií nií Tata yo Jesucristo nduta ndáa yaꞌvi ni, rá vaꞌa, rá ndi̱xita nuu cruzin, rá káa tá káa nií kiti levo loꞌo ri sóko sutu nuu Ndioxi, ri vaꞌa ni, ri köo nda loꞌo ya väꞌa kúu mií. Kuꞌva saa ndi̱xiyo nií ra, rá cha̱ꞌvi Ndioxi xaꞌa kuachi yo.

1 Pedro 1:20

Tá täꞌan ka xikoo xaꞌa ñuu ivi yóꞌó vi kua ndi̱kaꞌan Iva yo Ndioxi xaꞌa Tata yo Jesucristo ya kuvi ra xaꞌa kuachi yo ñuu ivi yóꞌó. Saa tá xa kuaꞌan kúyati kivi sindiꞌi saa kua ti̱ꞌvi Ndioxi Tata yo Jesucristo ki̱xi ra ñuu ivi yóꞌó xaꞌa ya vaꞌa yoo chi kúꞌvi ni ini ra xíni ra yoo.

1 Pedro 1:22

Ta xaꞌa ya xáa súvi ni ndo tuꞌun vaꞌa ya ndaa xi̱ni soꞌo ndo yakan ndu̱vaꞌa ya vaꞌa ndo, saa chíndee taꞌan Tachi I̱í ra xiꞌin ndo ya ndinuꞌu ni kúꞌvi ini ndo xíni taꞌan ndo. Ikan ndo saa: ndinuꞌu ni ini ndo kuꞌvi ini ndo kuni taꞌan ndo.

1 Pedro 2:9

Sundi ndóꞌo̱, ta mií Iva yo Ndioxi ku ra ndi̱kaxin ndóꞌo̱ ndu̱u ndo seꞌe mií ra, saa nda̱sa ra ndóꞌo̱ sutu na xáa chiñu nuu rey, ra kúu Tata yo Jesucristo, ta ndu̱u ndo iin ñuu na i̱í ni, na kúu kuenta mií Ndioxi. Ta mií Iva yo Ndioxi ku ra ndi̱kaxin ndóꞌo̱, ta̱va ra ndóꞌo̱ ichí nuu naá nuu xi̱ndoꞌni ndo, saa chi̱ndoo ra ndóꞌo̱ nuu luvi ni káa nuu íyo ñu̱ꞌu̱ yéꞌe̱ ya kúu mií ra. Ta ndi̱kaxin ra ndóꞌo̱ ya kaꞌan ndoso ndo tuꞌun ra ya ndee ni ndee kúu mií, ya kaꞌan ndo ya xiꞌin naꞌa ya kundaa ini na xaꞌa ya vaꞌa ni íkan Ndioxi.

2 Pedro 1:2

Ta mií Iva yo Ndioxi, ná taxi kuaꞌa ni ya vaꞌa koo xiꞌin ndo, saa ná koo vaꞌa ni ndo xaꞌa ya xíni taꞌan vaꞌa ni ndo xiꞌin Iva yo Ndioxi tin mií Tata yo Jesucristo, ra chee ni nuu yo.

2 Juan 1:1

Yeꞌe Juan, ra xikuaꞌa nuu na veꞌe ñuꞌu ku ra táa tutu yóꞌó xaa ya ndaꞌa ndóꞌo̱ na veꞌe ñuꞌu, na ndi̱kaxin Iva yo Ndioxi. Saa xaa tu ya ndaꞌa na xa ndi̱kaꞌan ndo xiꞌin xaꞌa tuꞌun ra ya ndaa, chi ndóꞌo̱ ku ndo kúꞌvi ni ini i xíni i. Ta süvi ndisaa yeꞌe ku ra kúꞌvi ini xíni ndóꞌo̱, ndiꞌi na xa ku̱ndaa ini xaꞌa ya ndaa ku na kúꞌvi ini xíni ndóꞌo̱.

2 Juan 1:13

Ta tíꞌvi ni tu na ñani yo, na veꞌe ñuꞌu, na ndi̱kaxin Ndioxi tuꞌun mani xaa nuu ndo ñani. Saa ná koo.

Judas 1:2

Ta ná niꞌi kuaꞌa ni ndo ya vaꞌa nuu Iva yo Ndioxi, ra kúndaꞌvi ni ini xíni ndóꞌo̱, saa ná koo vaꞌa ni ini ndo.