1 Juan 3:5 - Xochapa Mixteco

⁵ Ta ndóꞌo̱ xa xíni ndo ya ki̱xi Tata yo Jesucristo ñuu ivi yóꞌó ki̱ndaa ra kuachi yo. Chi mií ra ta nda iin kuachi ra köo.

1 Juan 3:5 Mawu Ofanana

San Mateo 1:21

Kaku seꞌe yá ta chinuu un kivi ra kunani ra JESÚS, saa chi ra ikán ku ra sikaku na ñuu ra xaꞌa kuachi na.

San Lucas 23:41

Vaꞌa ka vi yoo ya ndaa kua ndóꞌo va yo xaꞌa kuachi yo, ta ra ndaꞌvi yóꞌó, nda iin kuachi ra köo ―káchi ra.

San Lucas 23:47

Saa xi̱ni ra ínuu nuu iin ciento nda lapa ñuu Roma ya ku̱u, ta xa̱á ra xáa kaꞌnu ra Ndioxi, káchi ra saa: ―Ya ndixa ni kua, ra vaꞌa ni va ku ra yóꞌó ―káchi ra ikán soꞌva.

San Juan 1:29

Ta ndi̱tuvi inka kivi saa xi̱ni ra Juan Jesús vaxi ra nuu ra, saa ndi̱kaꞌan ra xiꞌin naꞌa, káchi ra saa: ―¡Koto ndo vii! Ra káa ku ra síniꞌi Ndioxi kuvi ra xaꞌa kuachi yo ñuu ivi. Tá íyo levo síniꞌi naꞌa nuu Ndioxi ya síndiꞌi xaꞌa ra kuachi na, ta saa íyo ra káa.

San Juan 1:31

Ni yeꞌe ta köo xíni i unku ra ti̱ꞌvi Ndioxi vaxi sikaku yoo, ta xaꞌa ya ná kuni túvi na Israel ra yóꞌó kua síkuchi i naꞌa xiꞌin tikuii vaxi i ―káchi ra Juan.

San Juan 14:30

’Ta soo uvi ndaa tuꞌun káꞌan i xiꞌin ndo, chi xa vaxi kiti nǎꞌa, kiti xáꞌnda chiñu nuu na ñuu ivi yóꞌó. Ta nda loꞌo köo xáꞌnda chiñu ri nuu yeꞌe.

San Juan 8:46

¿Án ndá ndóꞌo̱ táxi kuachi i xaꞌa ndá ya väꞌa ikán i? Ya ndaa káꞌan i xiꞌin ndo, ta ¿ndachu köo xíin ndo kandixa ndo yeꞌe?

2 Corintios 5:21

Nda iin kuachi köo ndi̱kan Jesucristo, ta xaꞌa kuachi yoo kua si̱kuiso Ndioxi kuachi sata ra, ya ná kuchiñu yoo nduu yo tá íin naꞌa, na köo ka kuachi kúu mií nuu Ndioxi, xaꞌa ya ndi̱kitaꞌan yo xiꞌin Jesucristo.

1 Timoteo 1:15

Ta vaꞌa ná kundaa ini un xiꞌin ya káꞌan i xiꞌin un, chi ya ndaa ni kua, ta ndiꞌi na xíniñuꞌu kundaa ini xaꞌa ya yóꞌó: Chi Tata yo Jesucristo ku ra ki̱xi ñuu ivi yóꞌó ya sikaku ra yo ivi kuachi, ta kúni i káꞌan i xiꞌin un, xiꞌna yeꞌe ku ra ndee ni kuachi íyo nuu ndiꞌi na ivi.

1 Timoteo 3:16

Ta saa ná kundaa ini ndo chi nda vitin ta ndee ni ndee ya ndaa si̱naꞌa Tata yo Jesucristo nuu yo kándixa ñaꞌa, ta soꞌva íyo ya: Tata yo Jesucristo ta ndu̱u ra taꞌan mií yo ivi yóꞌó, ta ki̱xi ra ñuu ivi yóꞌó. Ta Tachi I̱í Ndioxi kua ndíkuiin xaꞌa ra. Ta xi̱ni na tatun Ndioxi ra. Saa ndi̱kaꞌan ndoso nda xi̱ndikun sata ra xaꞌa ra nuu ndiꞌi naꞌa, na köo kúu judío. Ndiꞌi ni kúu xaꞌa ñuu ivi yóꞌó íyo naꞌa, na kándixa ra. Saa ndi̱kiꞌin tuku Iva yo Ndioxi ra, nda̱a tuku ra kuaꞌan ra nuu ndivi.

Tito 2:14

Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.

HEBREOS 1:3

Ta ya luvi ni yéꞌe̱ kúu mií Seꞌe Ndioxi kua yéꞌe̱ mií Ndioxi. Tá káa níi mií Ndioxi saa káa níi mií Jesucristo, saa ta̱xi Ndioxi ichí ndaꞌa ra ya ndíso chiñu ra xiꞌin ndiꞌi ñaꞌa ya íyo ñuu ivi yóꞌó. Ta xiꞌin tuꞌun ra ya ndee ni ndee kua xáa chiñu ndiꞌi ya nda vitin. Saa ndi̱kata ra kuachi yo xiꞌin ndee mií ra, ta sindiꞌi nda̱a ra nuu ndivi ndi̱kunduꞌu ra ñaꞌñu kuáꞌá Ndioxi nuu tai toꞌo, xáꞌnda chiñu ra xiꞌin ra.

HEBREOS 4:15

Saa chi sutu ra ínuu nuu yo ku ra ta kúndaꞌvi ni ini ra xíni ra yoo, xaꞌa ya xíni ra köo ndee ini yo, köo ndaku ini yo nuu ya väꞌa, chi tá káa níí ya ndóꞌo yoo, saa ndi̱xiyo tu ya ndo̱ꞌo mií va ra, xi̱to ndoso ni ya väꞌa ra, sundi nda iin kuachi köo ndi̱kiꞌvi ra.

HEBREOS 7:26

Jesús ku ra ku sutu chee ni ka, ra ndee ni xíniñuꞌu yo. Saa chi ra ikán ta ra i̱í ni ku ra, nda iin kuachi ni ya väꞌa köo ndi̱kan ra, ta köo íyo yuꞌu ra xiꞌin na íkan kuachi, saa nda̱a ra kuaꞌan ra nuu ndivi, ta sukun ni ka nda̱a ra kuaꞌan ra.

HEBREOS 9:26

Tá ndi̱kan Jesucristo tá kuꞌva i̱kan nda sutu ikán tá nuu kuiya, ta nda tá xa̱á xi̱koo ñuu ivi yóꞌó vi xíniñuꞌu ra kuvi ra kuaꞌa ni ichí, ndikuu. Sundi tiempo ya ku̱yati ndiꞌi xaꞌa ñuu ivi ndóo yo vitin kua ki̱xi ra, ta iindaa va ichí ndi̱taxi ra mií ra ndisoko ra mií ra xaꞌa yo, ta ya i̱kan ra saa ndi̱taxi ra mií ra ndaꞌa Ndioxi yakan si̱ndiꞌi xaꞌa ra kuachi yo.

HEBREOS 9:28

Saa chi saa i̱kan Jesucristo iin ichí va ndi̱xiꞌi ra ya ndi̱soko ra mií ra nuu ndi̱kata ra kuachi kuaꞌa ni naꞌa. Ta sindiꞌi, tá ná ndiko koo tuku ra ichí uvi, ta kïxi ka ra ya kuvi ra xaꞌa kuachi yo, sundi kixi ra sikaku ra yo ndátun ñaꞌa.

1 Pedro 1:18

Chi xa xíni mií ndo Ndioxi ku ra cha̱ꞌvi xaꞌa ndo nuu ndi̱saña ndo ndaꞌa ichí ya väꞌa ya köo ndáa yaꞌvi si̱ndikoo xií si̱kuaꞌa ndo ndaꞌa ndo. Ta süvi xiꞌin yu̱ú ya oro án ya plata kua ndi̱xiniñuꞌu ra chaꞌvi ra xaꞌa ndo, ni ya yaꞌvi ni kua ikán, ta köo ndee ni ya,

1 Pedro 1:20

Tá täꞌan ka xikoo xaꞌa ñuu ivi yóꞌó vi kua ndi̱kaꞌan Iva yo Ndioxi xaꞌa Tata yo Jesucristo ya kuvi ra xaꞌa kuachi yo ñuu ivi yóꞌó. Saa tá xa kuaꞌan kúyati kivi sindiꞌi saa kua ti̱ꞌvi Ndioxi Tata yo Jesucristo ki̱xi ra ñuu ivi yóꞌó xaꞌa ya vaꞌa yoo chi kúꞌvi ni ini ra xíni ra yoo.

1 Pedro 2:22

Nda iin kuachi ra köo ndi̱xiyo, ni köo ndi̱sindaꞌvi ra nda iin naꞌa.

1 Pedro 2:24

Tá ndi̱xiꞌi Cristo nuu itun cruzin ta nuu nu ikán kua ndi̱kundiso ndiꞌi ra kuachi yo to̱so ra ya sata ikin kuñu ra kuaꞌan ya xiꞌin ra. I̱kan ra saa xiꞌin yo ya ná köo ka ndee kuu mií kuachi yo ya kaꞌnda chiñu ka ya nuu yo, saa kutaku yo ikan yo ya vaꞌa. Xaꞌa ya ndo̱ꞌo ni ra yakan si̱ndaꞌa ra yoo.

1 Pedro 3:18

Saa chi saa kua ndo̱ꞌo tu mií va Tata yo Jesucristo xaꞌa yo, ndi̱xiꞌi ra xaꞌa kuachi yo, ta iindaa ichí ndo̱ꞌo ra ndi̱xiꞌi ra, ta küvi ka ra. Ra vaꞌa ni ndi̱xiyo ra, ta ndi̱xiꞌi ra xaꞌa ndiꞌi yo ivi kuachi ya kuchiñu kundaka ra yoo kuꞌun yo nuu Ndioxi. Tá ndi̱xiꞌi ra ta ndi̱ꞌi xaꞌa ikin kuñu ra, saa tá ndi̱taku ra xiꞌin ikin kuñu ra ya xa̱á küvi kuni yo.

1 Juan 1:2

Ta ndu̱u ra, ra ivi tá íin mií yo ivi yóꞌó. Saa ki̱xi ra ñuu ivi yóꞌó ta xi̱ni xiꞌin nuu nde ra yakan kua ndíkuiin nde xaꞌa ra tin káꞌan nde xaꞌa ra xiꞌin ndo. Chi ra ikán ku ra táxi kutaku yo xiꞌin Ndioxi ndiꞌi saa kivi, ta xiꞌin Iva yo Ndioxi ndi̱xiyo ra, ta vitin ndi̱tuvi ra nuu yo.

1 Juan 1:7

Sundi tá tu xíka yo nuu yéꞌe̱ tá kuꞌva íyo Ndioxi nuu yéꞌe̱, ta saa íyo yo iin yuꞌu xiꞌin taꞌan yo. Ta ni̱í Jesucristo Seꞌe Ndioxi ku rá ndíkata ndiꞌi kuachi yo, ndúvaꞌa yo nuu Iva yo Ndioxi.

1 Juan 2:1

Ndóꞌo̱ ndíkun Jesucristo, tá íin seꞌe i saa íin ndo, yakan táa i tutu yóꞌó xaa ya nuu ndo ya ná ïkan ndo ya väꞌa. Sundi tá ndá ndóꞌo̱ ndíkava nuu kuachi ta vaꞌa ná kundaa ini ndo chi Tata yo Jesucristo ku ra ndaa ni ini, ta ra ikán ku ra ndíchi ndíkuiin xaꞌa yo nuu Iva yo Ndioxi.

1 Juan 2:2

Chi Jesucristo ku ra ndi̱soko mií, ndi̱xiꞌi ra xaꞌa kuachi ndiꞌi yo yakan vaꞌa xa̱a kaꞌnu ini Ndioxi xaꞌa yo. Ta süvi iindaa xaꞌa kuachi yoo ndi̱xiꞌi ra. Ndi̱xiꞌi ra xaꞌa kuachi ndiꞌi ni kúu na ñuu ivi.

1 Juan 2:29

Xa xíni yo Tata yo Jesucristo ku ra vaꞌa ni, ra ndaa ni ini, yakan ndiꞌi naꞌa, na íkan ya ndaa, ta na ñaa ku na kúu seꞌe Ndioxi.

1 Juan 3:8

Na köo xíin sindoo ya väꞌa, na ikan ku seꞌe kiti nǎꞌa, chi kiti nǎꞌa nda kivi xaꞌa vi i̱kan ri ya väꞌa yakan kua ki̱xi Seꞌe Ndioxi si̱ndiꞌi xaꞌa ra ya íkan ri.

El Apocalipsis 1:5

Saa ná ikan tu Tata yo Jesucristo ya vaꞌa xiꞌin ndo, saa chi ndaa ni ini ra, ta ndinuꞌu ini ra ndíkuiin ra xaꞌa tuꞌun ndaa ni káꞌan ra. Ta ra ikán ku ra núnuu ndi̱taku tañu ndiꞌi na ndíi, yakan kúu mií ra ichí kaꞌnda chiñu ra nuu nda rey ñuu ivi yóꞌó. Ta kúꞌvi ni ini ra xíni ra yoo, ta köo ka kuachi ndíso yo nuu Ndioxi, saa chi ndi̱xiꞌi Jesucristo xaꞌa kuachi yo, ta xiꞌin nií ra nduta ndi̱xita ndi̱kata ra kuachi yo, nda̱sa vaꞌa ra yoo nuu Ndioxi.