1 Corintios 7:5 - Xochapa Mixteco

⁵ Xaꞌa ya ñaa kua küxiꞌnda ndo mií ndo nuu taꞌan ndo, sundi tá tu xa ndi̱kani ini ndo ya tïndaa taꞌan ndo uvi ndaa kivi, xaꞌa ya kúni ndo kaꞌan ndo xiꞌin Ndioxi, ta vaꞌa chitaꞌan tuꞌun ndo xaꞌa ya. Tá xa ndi̱xinu ichí ndi̱kaꞌan ndo xiꞌin Ndioxi ta saa vaꞌa tindaa taꞌan tuku ndo. Saa chi tá tu ná tïndaa taꞌan tuku ndo, ta ìyo ni sindaꞌvi kiti nǎꞌa ndóꞌo̱, ta koyo ndo nuu kuachi.

1 Corintios 7:5 Mawu Ofanana

San Mateo 17:21

Saa chi tachi nduvaꞌa taꞌan ya yóꞌó, ta xíniñuꞌu ndo kaꞌan ni ndo xiꞌin Ndioxi tin kuxi suꞌun ndo, saa kuchiñu ndo tava ndo ya ―káchi Jesús xiꞌin nda.

San Mateo 19:11

Saa ndi̱kuiin Jesús, káchi ra saa: ―Süvi ndiꞌi naꞌa kúchiñu koo saa. Ndisaa na ta̱xi Ndioxi tïndaꞌa na, na ikán ku na köo tíndaꞌa.

San Mateo 4:10

Saa ndi̱kuiin Jesús, ndi̱kaꞌan ra xiꞌin ri, káchi ra saa: ―¡Kuataꞌa, keta kuáꞌan, kiti nǎꞌa! saa chi tuꞌun Ndioxi káchi ya saa: “Ndisaa Ndioxi xaa toꞌo naꞌa, ta ndisaa mií ra kandixa na”, káchi tuꞌun ra ―káchi Jesús xiꞌin kiti nǎꞌa.

1 Corintios 7:4

Saa chi ñaꞌá yá íyo ií, ta köo xáꞌnda chiñu ka yá nuu ikin kuñu yá, ií yá ku ra xáꞌnda chiñu nuu ikin kuñu yá. Ta ni ií yá ta köo xáꞌnda chiñu ra nuu ikin kuñu ra, yá síꞌi ra ku yá xáꞌnda chiñu nuu ikin kuñu ra.

1 Tesalonicenses 3:5

Xaꞌa ya ñaa kua köo ndi̱kundee ka ini i kundatun i, chi kúni ni i kundaa ini i ndá kuꞌva kándixa ndo Tata yo Jesucristo, yakan vaꞌa ka ti̱ꞌvi i ra Timoteo ñani yo xaa ra nuu ndo koto ra ndóꞌo̱. Süvi ka vi ya sindaꞌvi kiti nǎꞌa ndóꞌo̱ ya ikan ndo ya väꞌa, chi tá tu ná ikan ndo saa ta ni köo ndáa yaꞌvi ya i̱kan nde xiꞌin ndo, ya uun kuiti va kua xa̱a chiñu nde xiꞌin ndo.