1 Corintios 6:9 - Xochapa Mixteco

⁹ ¿Án köo xíni ndo, naꞌa, na íkan ya väꞌa ta küchiñu na koo na xiꞌin Ndioxi nuu xáꞌnda chiñu ra? Sïndaꞌvi ndo mií ndo chi ni na xíka sií xiꞌin taꞌan küvi koo na xiꞌin Ndioxi, ni na káñuꞌu ndioxi ndíi, ni taa ra kuakiꞌvi xiꞌin inka ñaꞌa, ni ñaꞌa yá kuakiꞌvi xiꞌin inka taa, ni taa ra kíxi xiꞌin inka taa, ni taa ra ndúu síꞌi nuu inka taa,

1 Corintios 6:9 Mawu Ofanana

San Mateo 19:29

Ta ndiꞌi na síndikoo veꞌe na, án ñani na, án kuꞌva na, án iva siꞌí na, án yá síꞌi na, án seꞌe na, án ñuꞌú na, xaꞌa ya ndíkun na yeꞌe. Ta na yóꞌó ta kuaꞌa ni ya vaꞌa niꞌi na nuu Ndioxi. Nda iin ciento ka ya vaꞌa niꞌi na sata iin iin ñaꞌa ya si̱ndoo na. Ta saa niꞌi na koo na xiꞌin Ndioxi ndiꞌi saa kivi ya vaxi.

San Mateo 25:34

Ta yeꞌe, ra kúu rey kaꞌan i xiꞌin na ndóo ñaꞌñu kuáꞌá i, kachi i saa: “Naꞌa ndo, ndóꞌo̱ ku ndo niꞌi ya vaꞌa nuu Iva i Ndioxi. Naꞌa ndo kiꞌvi ndo nuu xáꞌnda chiñu ra, ya xa íyo ndúvi xaꞌa ndo nda tá täꞌan xikoo xaꞌa ñuu ivi yóꞌó.

San Lucas 21:8

Ta saa ndi̱kuiin Jesús, káchi ra saa: ―Kuenta ni koo ndo ya ná sïndaꞌvi naꞌa ndóꞌo̱. Saa chi kixi sava taa sindaꞌvi nda ndóꞌo̱, kaꞌan nda xiꞌin ndo, nda ikán ku nda ti̱ꞌvi Ndioxi vaxi sikaku na ñuu ivi yóꞌó, kachi nda. Ta saa kaꞌan tu nda, xa yati ni ti̱ndaa tiempo, kachi nda xiꞌin ndo. Ta kündikun ndo nda.

Los Hechos 20:32

’Ta vitin káꞌan ni i xaꞌa ndo xiꞌin Ndioxi ya ná kundaa ni ra ndóꞌo̱, saa ná kundaa ni tu tuꞌun va ra ndóꞌo̱, chi ya vaꞌa ni ku ya, saa kúu mií ya ndee ya taxi ya ndundee ka ini ndo saa taxi ra ndiꞌi ya vaꞌa ndaꞌa ndo, ya chi̱tuni ra taxi ra ndaꞌa na kúu ñuu ra, na i̱í.

Los Hechos 24:25

Saa ndi̱xaꞌan ra Pablo ndi̱tuꞌun ra xiꞌin na, ndi̱kaꞌan ra ya xíniñuꞌu naꞌa ikan na ya ndaa, ta saa xíniñuꞌu na ndixita na mií na nuu ya väꞌa, chi vaxi kivi ta taxi Ndioxi kuachi xaꞌa ndiꞌi na íkan ya väꞌa, káchi ra. Saa ndi̱ndiꞌvi ni ra Felix ikán saa ndi̱kaꞌan ra xiꞌin ra Pablo káchi ra saa: Vaꞌa kuaꞌan, tá ná kunaꞌa i saa kana i yóꞌo̱ kixi un ndituꞌun ka un xiꞌin i ―káchi ra xiꞌin ra Pablo.

ROMANOS 1:18

Ndioxi ta sínaꞌa ra yóo ya ndixa kua sáa ni ini ra xíni ra ndiꞌi ñaꞌa ya väꞌa íkan yo, xiꞌin ya väꞌa íkan naꞌa xaꞌa ya köo xíin na kandixa na ra, tin ya väꞌa íkan na xiꞌin taꞌan na. Vani xa xíni na ya ndaa ta köo xíin na ikan na ya, xaꞌa ya íkan na saa, ta köo táxi na kundaa ini nda iin naꞌa ya ndaa.

1 Corintios 15:33

Ta ndóꞌo̱, ¡täxi ndo sindaꞌvi naꞌa ndóꞌo̱! Tá káchi na káꞌan: “Tá ítaꞌan vaꞌa ni yo xiꞌin naꞌa, na íkan ya väꞌa, ta ìyo ni sixinu na ini yo ikan yo ya väꞌa, tá kuꞌva íkan mií na”.

1 Corintios 15:50

Vaꞌa ná kundaa ini ndo ñani yo: Chi nda iin yo ta küchiñu yo koo yo xiꞌin Ndioxi nuu xáꞌnda chiñu ra, tá ná kuu mií yo ikin kuñu yo taꞌan ya kúu mií yo táku yo ñuu ivi yóꞌó vitin. Chi ñaꞌa ya táꞌi ta küchiñu ya koo ya xiꞌin ñaꞌa ya nda loꞌo köo táꞌi.

1 Corintios 3:16

Ta saa ndóꞌo̱, ¿án köo kúndaa ini ndo ya íin ndo tá káa veꞌe ñuꞌu Ndioxi, ta íyo tu Tachi I̱í ra xiꞌin va ndo?

1 Corintios 5:1

Xa ndiꞌi naꞌa xíni xaꞌa ya íkan iin ra ndíkaa xiꞌin ndo veꞌe ñuꞌu. Xíni na ya kini ni íkan ra, chi ndi̱kiꞌin ra siꞌí ndáꞌvi ra ndu̱u yá síꞌi ra. Nda naꞌa, na köo xíni tuꞌun Ndioxi ta köo na íkan saa.

1 Corintios 5:10

Sundi köo ndi̱kaꞌan i xiꞌin ndo xaꞌa na ñuu ivi yóꞌó tá kúu na xíka sii xiꞌin taꞌan, xiꞌin na kútoo ni ya kuika xiꞌin na kuiꞌna xiꞌin na káñuꞌu ndioxi ya ndíi. Chi tá ndíkaꞌan i xiꞌin ndo xaꞌa ndiꞌi na yóꞌó ta xíniñuꞌu ndo kee vaꞌa vi ndo ñuu ivi yóꞌó, ndikuu.

1 Corintios 5:11

Ya ndi̱kaꞌan i xiꞌin ndo kua ná kütaꞌan ndo xiꞌin naꞌa, na káꞌan ndíkun na Jesucristo, ta kútoo na kaka sii na xiꞌin taꞌan na, án síkuiꞌna na, án xáa káꞌnu na ndioxi ndíi án kánaꞌa kini na xaꞌa inka naꞌa, án na xíꞌi ku na, án na síndaꞌvi naꞌa ku na. Ndiꞌi naꞌa, na íkan saa ta ni kütaꞌan ndo xiꞌin na, ni küxi ndo xiꞌin na.

1 Corintios 6:10

ni na kuiꞌna, ni na kútoo ni ya kuika, ni na xíꞌi ni, ni na síndaꞌvi naꞌa, ni na kánaꞌa xiꞌin inka naꞌa, nda iin na yóꞌó küchiñu koo nuu xáꞌnda chiñu Ndioxi.

1 Corintios 6:18

Xaꞌa ya ñaa kua käka sií ndo xiꞌin ikin kuñu ndo. Chi kuachi yóꞌó ka ku mií ya ndee ni xáa yakua ikin kuñu ndo nuu tá kúu ndiꞌi ka kuachi ya väꞌa íkan ndo, chi ndá ka ya väꞌa íkan ndo ta köo iin káchi íyo ya xiꞌin kuachi yóꞌó, chi ya yóꞌó ta síndiꞌi xaꞌa ya ikin kuñu ndo. Yakan vaꞌa ka kunu ndo nuu taꞌan kuachi yóꞌó.

1 Corintios 6:19

¿Án köo xíni ndo ya kúu ikin kuñu ndo veꞌe ñuꞌu Tachi I̱í Ndioxi, ya ta̱xi ra ndaꞌa ndo íyo ya xiꞌin ndo? ta mií ra ku ra xáꞌnda chiñu nuu ndo.

1 Corintios 9:24

Ta xa kúndaa vaꞌa ini ndo, naꞌa na xínu nuu kéꞌe taꞌan na, ta kuaꞌa ni va ku na xínu, ta süvi ndiꞌi na níꞌi ñaꞌa, iindaa va ku na kúchiñu níꞌi ya. Ta saa ndóꞌo̱, ndinuꞌu ni ini ndo xaa súvi ndo ya kúni Ndioxi, tá kuꞌva íkan na kéꞌe taꞌan saa ikan ndo ndakua ná ndikiꞌin ndo ñaꞌa ya niꞌi ndo nuu Ndioxi.

2 Corintios 12:21

Yakan ndíꞌi ka vi ini i tá ná xaa i koto i ndóꞌo̱, chi ndee ni ìyo si̱kaꞌán Ndioxi nuu i chi sana täꞌan ndiko koo ini ndo xaꞌa kuachi ndo ya íkan ndo yachi. Ta xaꞌa ya íkan ndo saa, ta án sana nda kuaku suchi ni ini i xaꞌa sava ndo, chi täꞌan sindoo ndo ñaꞌa väꞌa íkan ndo, xíka sií yaa va ndo xiꞌin taꞌan ndo, ta saa íkan ndo ñaꞌa ya kaꞌa̱n ni nuu.

Gálatas 6:7

Sïndaꞌvi ndo mií ndo, saa chi nda iin naꞌa küvi kusiki ndaa na Ndioxi. Chi tá kúu na chíꞌi, tá kuꞌva chíꞌi na ta kuꞌva saa íyo ñaꞌa ndíkuiso na tá síkee na.

Colosenses 3:5

Ta vitin köo ka ndo tá kuꞌva ndi̱xiyo ndo yachi. Vaꞌa sindiꞌi xaꞌa ndo ya chíndaꞌa ndóꞌo̱ ikan ndo ya väꞌa, tá kúu nda taa ta küvi kiꞌvi nda xiꞌin inka ñaꞌa tá tu süvi yá síꞌi nda ku yá, ni ná síꞌi ta ná kïꞌvi ná xiꞌin inka taa tá tu süvi i̱í ná ku nda, ta saa küni ndo ikan ndo ndá ka ñaꞌa ya väꞌa, kütoo ni ndo ndikani ini ndo xaꞌa ya väꞌa, ta ni kütoo ni ndo koo kuaꞌa ni ñaꞌa ndo, chi tá íkan ndo saa, ta tá íin naꞌa, na xáa kaꞌnu ndioxi ndíi, saa íin ndo.

HEBREOS 12:14

Ta nduku ndo kuꞌva ya koo vaꞌa ni ndo xiꞌin ndiꞌi naꞌa. I̱í ni koo ndo, saa chi tá tu köo i̱í ini ndo ta küchiñu ndo kuni ndo Ndioxi. Ta ni nda iin naꞌa, ta küchiñu na kuni na ra, tá tu kéꞌe na ya väꞌa.

HEBREOS 12:16

Ta nda iin ndóꞌo̱, käka sií xiꞌin ñaꞌa án xiꞌin taa, ta ni kündasi nuu ndo kuni ndo Ndioxi tá kuꞌva i̱kan ra Esaú xinaꞌa. Chi xaꞌa ya kúu ra seꞌe núnu̱ú iva siꞌí ra kua ku̱u mií ra ichí ya ndikiꞌin ra ya vaꞌa ndaꞌa na, sundi ra ikán, ta ndi̱xiko ra ya xaꞌa iin koꞌo loꞌo ñaꞌa xíxi.

HEBREOS 13:4

Ndóꞌo̱ taa nda xa ti̱ndaꞌa, án ná síꞌi xa ti̱ndaꞌa ta xíniñuꞌu ndo kañuꞌu ndo yá síꞌi ndo án i̱í ndo. Ta käka ndo xiꞌin inka ñaꞌa án inka taa, saa chi Ndioxi ta ndee ni xaa nduvaꞌa ra xiꞌin ndiꞌi na íkan saa.

Santiago 1:16

Yakan ndóꞌo̱ ñani mani mií i, ta sïndaꞌvi ndo mií ndo.

1 Juan 3:7

Na taꞌan yo, tá íin seꞌe i saa íin ndo, ta káꞌan i xiꞌin ndo täxi ndo sindaꞌvi naꞌa ndóꞌo̱. Chi na íkan ya ndaa ta na vaꞌa ku na, tá káa mií Tata yo Jesucristo ra vaꞌa ku ra.

El Apocalipsis 21:8

Ta na síndikoo ichí i xaꞌa ya íꞌvi na tixuꞌvi na xaꞌa i, ta kuꞌun na yavi nuu xíxi ni ñu̱ꞌu̱ xiꞌin ñuꞌú káꞌndi ya náni azufre, saa kundoꞌo na köo xíin kandixa yeꞌe, na íkan ndiꞌi saa nuu ya väꞌa, ya kini, xiꞌin na xáꞌni ndìì, xiꞌin nda taa nda kuakiꞌvi xiꞌin inka ñaꞌa, án ndiꞌi ná ñaꞌa ná kuakiꞌvi xiꞌin inka taa, saa tu na tási xiꞌin na káñuꞌu yu̱ú savi án na káñuꞌu inka naꞌna ya köo kúu ndioxi ra ndaa, xiꞌin ndiꞌi na ndítuꞌun vata. Ta ya ndoꞌo ni na yóꞌó ku nuu “kuvi na ichí uvi” ―káchi Ndioxi ndi̱kaꞌan ra xiꞌin i.

El Apocalipsis 22:15

Ta na väꞌa ndoo na kundoo na chí keꞌe, chi na ikán ku na i̱kan ya väꞌa, ya kini ni. Saa tu na tuꞌva, na tási, saa tu nda taa nda ndi̱xika xiꞌin ná síꞌi, ta saa tu ná síꞌi ná ndi̱kiꞌvi xiꞌin taa, ta saa tu na xa̱ꞌni ndìì, saa tu na xa̱a kaꞌnu inka ndioxi án inka naꞌna ndioxi ra köo kúu Ndioxi ndaa, saa tu na kútoo ni kaka xiꞌin ya síki, ta síndaꞌvi na naꞌa. Ndiꞌi na ikán küchiñu na koo na ñuu i̱í xiꞌin Ndioxi.