1 Corintios 6:13 - Xochapa Mixteco

¹³ Ta saa káꞌan tuku sava ndo: “Ñaꞌa xíxi yo ta tixin yo kuaꞌan ya, ta suvi ni mií Ndioxi ku ra si̱kuaꞌa tixin yo nuu kuaꞌan ñaꞌa xíxi yo”, káchi ndo. Ni saa va ta ya ndíꞌi xaꞌa ku uvi saa va ya. Sundi ikin kuñu yo, ta köo ndi̱sikuaꞌa ra ya, ya ikan yo ndisaa chiñu kíꞌvi xiꞌin ya. Xaꞌa ya xaa kaꞌnu yo Tata yo Jesucristo va kua si̱kuaꞌa ra ya, ta suvi ni mií ra ku ra xáꞌnda chiñu nuu ikin kuñu yo.

1 Corintios 6:13 Mawu Ofanana

San Mateo 15:17

¿Án köo kúndaa ini ndo? Ndiꞌi ya xíxi naꞌa án ya xáxi na ta chí yuꞌu na kuakee ya, saa xáa ya tixin na. Sindiꞌi saa kána koo ya xíta ya nuu táta na.

San Mateo 15:20

Ndiꞌi ya yóꞌó ku ya ndása yakua naꞌa nuu Ndioxi, sundi ya köo ndóo ndaꞌa na kuxi na, ta köo ndása yakua ya na nuu Ndioxi ―káchi Jesús.

San Marcos 7:19

Saa chi ya xíxi na án ya yáxi na, ta süvi chí nima na kuaꞌan ya, chí tixin va na kuaꞌan ya, ta saa kána koo ya xíta ya ―káchi ra xiꞌin na. Xiꞌin ya ndi̱kaꞌan Jesús ikán kúni kachi ya, ndiꞌi ñaꞌa xíxi yo ta ya vaꞌa ku ndiꞌi ya nuu Ndioxi.

San Juan 6:27

Xäa chiñu ndo xaꞌa ndisaa ya kuxi ndo, chi ya ñaa ta ya ndíꞌi xaꞌa va kua, sundi xaa chiñu ndo xaꞌa ya köo ndíꞌi xaꞌa, ya chindee ndóꞌo̱ koo ndo xiꞌin Ndioxi ndiꞌi saa kivi ya vaxi. Chi yeꞌe Taa ra xa̱a ñuu ivi yóꞌó ku ra kúu mií ichí ya taxi i ya ndaꞌa ndo, chi Iva i Ndioxi ku ra ta̱xi ichí ndaꞌa i ya ikan i saa ―káchi Jesús xiꞌin na.

San Juan 6:49

Xii sikua yo ku na xi̱xi ya ku maná iku yuyu, ta saa ni ndi̱xiꞌi ndiꞌi na.

ROMANOS 12:1

Ñani yo xiꞌin kuꞌva yo, xíkan ni i ya mani nuu ndo ya ná nditaxi táku ndo mií ndo ndaꞌa Ndioxi. Soko ndiꞌi ndo mií ndo nuu ra. Tá íin naꞌa na ií, na síkusini ni ini ra, saa koo ndo. Nditaxi ndiꞌi ndo mií ndo ndaꞌa ra xaꞌa ya kúndaꞌvi ni ini ra xíni ra ndóꞌo̱. Tá íkan ndo saa ta xáa kaꞌnu ni ndo ra, ta ya ñaa ku mií ya ndixa ni ka ndáa yaꞌvi nuu ra.

ROMANOS 14:17

Xíniñuꞌu yo kundaa ini yo chi süvi xaꞌa ya xíxi yo, ta ni süvi xaꞌa nduta xíꞌi yo kua ndáa yaꞌvi ni chindee yoo koo yo nuu xáꞌnda chiñu Ndioxi. Ya ndee ni ndee ku ya ikan yo ya vaꞌa, ya ndaa xiꞌin taꞌan yo, ta vívií ná koo yo xiꞌin taꞌan yo, ná kusini ni yo xaꞌa ya ta̱xi Tachi I̱í Ndioxi ndaꞌa yo ya koo vaꞌa ni ini yo.

ROMANOS 6:12

Täxi ndo kaꞌnda chiñu kuachi ndo nuu ikin kuñu ndo, ta ni xäa súvi ndo ya väꞌa ya kútoo ni ya ikan ya, chi ya ndíꞌi xaꞌa va ku ikin kuñu ndo.

ROMANOS 7:4

Ta ná kundaa ini yo xaꞌa ya yóꞌó unkua kúni kachi ya ñani yo: Vitin ki̱ndoo ndika ndo nuu ley ya si̱naꞌa ra Moisés xinaꞌa. Xaꞌa ya iin ndu̱u ikin kuñu ndo xiꞌin ikin kuñu Jesucristo, ta iin káchi ndi̱xiꞌi ndo xiꞌin ra. Ta vitin tá íin ndo ndi̱xiꞌi saa ndu̱u ndo nuu ley ikán. Xaꞌa ya ikán kua ki̱ndoo ndíka ndo ya kuchiñu taxi ndo mií ndo ndaꞌa Jesucristo, ra ndi̱xiꞌi ta ndi̱taku ra. Yakan vaꞌa ikan ndo kuaꞌa ni ya vaꞌa nuu Ndioxi.

1 Corintios 3:16

Ta saa ndóꞌo̱, ¿án köo kúndaa ini ndo ya íin ndo tá káa veꞌe ñuꞌu Ndioxi, ta íyo tu Tachi I̱í ra xiꞌin va ndo?

1 Corintios 6:15

¿Án köo kúndaa ini ndo, iin iin ñaꞌñu ikin kuñu yo ta kúu ya ikin kuñu Tata yo Jesucristo? Ta ¿án vaꞌa sikitaꞌan yo ikin kuñu Tata yo Jesucristo xiꞌin ikin kuñu iin ñaꞌa yá xíko mií nuu ndiꞌi taa? ¡Küvi ikan yo saa!

1 Corintios 6:19

¿Án köo xíni ndo ya kúu ikin kuñu ndo veꞌe ñuꞌu Tachi I̱í Ndioxi, ya ta̱xi ra ndaꞌa ndo íyo ya xiꞌin ndo? ta mií ra ku ra xáꞌnda chiñu nuu ndo.

2 Corintios 11:2

Chi yeꞌe, ta ndee ni ndíꞌi ini i xaꞌa ndo, tá kuꞌva ndíꞌi ini Ndioxi xíni ra ndóꞌo̱, saa ndíꞌi ni ini i xíni i ndóꞌo̱. Chi ki̱ndoo i taxi i ndóꞌo̱ ndaꞌa ra, tá kuꞌva íkan taa, táxi ra seꞌe síꞌi ra tíndaꞌa yá xiꞌin iin taa. Ta kuꞌva saa íyo yeꞌe nditaxi i ndóꞌo̱ ndaꞌa Jesucristo tindaꞌa ndo xiꞌin ra. Tá kuꞌva íin ná kuâán taki vali ná täꞌan tindaa nda iin taa, kuꞌva saa kúni i koo ndo nditaxi i ndóꞌo̱ ndaꞌa Jesucristo.

2 Corintios 5:15

Sundi mií Jesucristo ku ra ndi̱xiꞌi xaꞌa ndiꞌi yo ya ná kuchiñu yo ikan yo tá kuꞌva kúni mií ra, ta ná ïkan yo tá kuꞌva kúni mií yo, saa chi mií ra ku ra ndi̱xiꞌi xaꞌa yo, ta ndi̱taku ra.

Gálatas 5:24

Ta saa ndiꞌi yo íyo xiꞌin Jesucristo xaꞌa ya ndi̱xiꞌi ra nuu cruzin xaꞌa yo, ta saa iin káchi ndi̱xiꞌi tu ikin kuñu yoo va xiꞌin ndiꞌi ñaꞌa väꞌa ya ndee ni ku̱too ikin kuñu yo xaa súvi ya yachi.

Efesios 5:23

Saa chi taa, ií ná síꞌi ku nda ku xi̱ní xiꞌin ná, tá kuꞌva íyo Cristo xiꞌin na veꞌe ñuꞌu. Mií ra ku xi̱ní xiꞌin na ta ndáa chiñu ra xiꞌin na, ta sikaku ra na, chi ikin kuñu mií ra ku na.