1 Corintios 5:10 - Xochapa Mixteco

¹⁰ Sundi köo ndi̱kaꞌan i xiꞌin ndo xaꞌa na ñuu ivi yóꞌó tá kúu na xíka sii xiꞌin taꞌan, xiꞌin na kútoo ni ya kuika xiꞌin na kuiꞌna xiꞌin na káñuꞌu ndioxi ya ndíi. Chi tá ndíkaꞌan i xiꞌin ndo xaꞌa ndiꞌi na yóꞌó ta xíniñuꞌu ndo kee vaꞌa vi ndo ñuu ivi yóꞌó, ndikuu.

1 Corintios 5:10 Mawu Ofanana

San Lucas 18:11

Ta ra fariseo ikán káꞌan ra xiꞌin Ndioxi, káchi ra saa: “Tata, táxi ni i tixaꞌvi ndaꞌa un saa chi köo káa i tá káa inka naꞌa, köo kuiꞌna i, ni köo íyo i kuachi xiꞌin inka naꞌa, ni xiꞌin yá síꞌi inka taa köo xíka i, ta ni süvi tá káa ra ndíkaya xuꞌun kuaꞌan ndaꞌa gobierno yóꞌó saa káa i.

San Juan 15:19

Tá tu taꞌan na ñuu ivi yóꞌó ku ndo, ta kuꞌvi ini na kuni na ndóꞌo̱, ndikuu. Sundi ndóꞌo̱ ta süvi taꞌan na ku ndo. Chi yeꞌe ta ndi̱kaxin i ndóꞌo̱ ya ndu̱u ndo kuenta mií i. Ta xaꞌa ya ñaa kua kúndasi nuu na xíni na ndóꞌo̱.

San Juan 17:6

’Ivi na ndi̱kaxin un ta̱xi un ndaꞌa i ta si̱naꞌa i yóꞌo̱ nuu na. Na ndíkun yóꞌo̱ ku na, ta ta̱xi un na ndaꞌa i. Ta xáa súvi ndiꞌi na tuꞌun un ya ndi̱kaꞌan i xiꞌin na.

San Juan 17:9

’Yakan xíkan i ya mani nuu un xaꞌa na. Köo káꞌan i xiꞌin un xaꞌa na ñuu ivi. Ndisaa xaꞌa na ta̱xi un ndaꞌa i káꞌan i xaꞌa xiꞌin un, chi kuenta mií un ku na.

San Juan 8:23

Saa ndi̱kaꞌan Jesús xiꞌin nda, káchi ra saa: ―Ndóꞌo̱ ta ndo ivi nìnù yóꞌó va ku ndo, sundi yeꞌe, ta yeꞌe ki̱xi chí ni̱nu ku i. Ndóꞌo̱ ñuu ivi yóꞌó ku ndo, sundi yeꞌe ta süvi yeꞌe ñuu ivi yóꞌó ku i.

1 Corintios 1:20

Ta ná kundaa ini yo, chi na ndíchi ni xiꞌin naꞌa, na ndee ni si̱kuaꞌa vaꞌa, xiꞌin na ndee ni vaꞌa xíni xaꞌa ñaꞌa ya íyo ñuu ivi yóꞌó, ta ni köo iin káchi íin ya ndíchi kúu mií na yóꞌó nuu ya ndee ni ndíchi kúu mií Ndioxi. Ta ya ndíchi kúu mií na ñuu ivi yóꞌó, tá káa ñaꞌa ya köo ndáa yaꞌvi va saa káa ya nuu Ndioxi.

1 Corintios 10:27

Tá ndá na köo kándixa Jesucristo kána ndóꞌo̱ kuꞌun ndo kuxi ndo xiꞌin na, tá tu kúni ndo kuꞌun ndo ta vaꞌa kuꞌun ndo kuxi ndo xiꞌin na. Ndá ka mií ñaꞌa táxi na kuxi ndo, ta vaꞌa kuxi ndo ya. Tá táxi na kuñu kuxi ndo ta vaꞌa kuxi ndo ya, ndäkan tuꞌun ndo mií ke̱e ya, ya ná ndïkani uvi ini ndo xiꞌin ya.

1 Corintios 5:11

Ya ndi̱kaꞌan i xiꞌin ndo kua ná kütaꞌan ndo xiꞌin naꞌa, na káꞌan ndíkun na Jesucristo, ta kútoo na kaka sii na xiꞌin taꞌan na, án síkuiꞌna na, án xáa káꞌnu na ndioxi ndíi án kánaꞌa kini na xaꞌa inka naꞌa, án na xíꞌi ku na, án na síndaꞌvi naꞌa ku na. Ndiꞌi naꞌa, na íkan saa ta ni kütaꞌan ndo xiꞌin na, ni küxi ndo xiꞌin na.

1 Corintios 5:9

Xa yachi ta̱a i tutu xaa nuu ndo yá ná kütaꞌan ndo xiꞌin nda iin naꞌa, na xíka sii xiꞌin taꞌan.

2 Corintios 4:4

Saa ndóꞌo na chi kiti nǎꞌa kúu ndioxi ñuu ivi yóꞌó ku ri ndi̱kasi ya xínituni na ya ná kändixa na tuꞌun vaꞌa xaꞌa Jesucristo ya káꞌan nde xiꞌin na, ta na ikán, tá íin na kuáa̱ saa íin na. Chi köo táxi ri kuni na ya yéꞌe̱ luvi ni kúu mií tuꞌun vaꞌa xaꞌa Jesucristo. Chi mií Jesucristo, tá káa níí mií Ndioxi saa káa ra.

Efesios 2:2

Saa ndi̱xiyo ndo yachi, i̱kan ni ndo ya väꞌa xaꞌa ya xi̱ndikun ndo ichí taꞌan ya ndíkun na ñuu ivi yóꞌó, ta xa̱a súvi ndo ya ndi̱kaꞌan kiti nǎꞌa, kiti xáꞌnda chiñu nuu ndiꞌi tachi nduvaꞌa xiꞌin ndo, ta nda vitin ta xáꞌnda chiñu yaa va ri nuu naꞌa, na köo xíin kuni soꞌo ya káꞌan Ndioxi.

Filipenses 2:15

Ta saa ni naꞌa, ta nïꞌi na kuachi ndo ya kaꞌan na xaꞌa ndo, chi seꞌe Ndioxi ku ndo. Vani tañu naꞌa, na kini, na iku ini ndóo ndo, ta tá kuꞌva ndíyeꞌe kiti kimi nuu naá, saa ndiyeꞌe ndo ñuu ivi yóꞌó, chi yóꞌó ta tá káa nuu naá ni, saa káa ya.

1 Juan 4:5

Na ñaa ta na ñuu ivi yóꞌó ku na yakan káꞌan ni na xaꞌa ya kúu kuenta ivi yóꞌó, saa xíni soꞌo ni mií na ivi yóꞌó ya káꞌan na xiꞌin taꞌan na.

1 Juan 4:7

Ñani yo, ná kuꞌvi ni ini yo kuni taꞌan yo chi ya kúꞌvi ni ini yo taꞌan yo ta nuu Ndioxi vaxi ya, saa xáꞌnda chiñu ra nuu yo. Ta ndiꞌi na kúꞌvi ni ini xíni taꞌan, ta na ñaa ku na ka̱ku nuu Ndioxi saa xíni na Ndioxi.

1 Juan 5:19

Xíni yo seꞌe Ndioxi ku yoo ta ndáa ra yoo. Ta ndiꞌi ka naꞌa, na köo ndíkun ñaꞌa, ta kiti nǎꞌa ku ri xáꞌnda chiñu nuu na.

El Apocalipsis 12:9

Ta tatun ya íyo xiꞌin Ndioxi ta̱va ya kiti koó nǎꞌa xiꞌin ndiꞌi tachi nduvaꞌa ya íyo xiꞌin ri. Ta̱va ya ri ki̱ꞌin ñaꞌa ya si̱koyo ya nda nuu ñuꞌú. Ta kiti ko̱ó nǎꞌa ikán ku ko̱ó yata ni, ta inka kivi ri kua Satanás án kiti Timiaꞌan. Ta suvi mií ri ku ri síndaꞌvi ndiꞌi ni kúu na ñuu ivi.