1 Corintios 4:5 - Xochapa Mixteco5 Xaꞌa ya ñaa kua káꞌan i xiꞌin ndo, táxi i nuu ndo. Käꞌan kama ni ndo xaꞌa naꞌa ya xaa nani ndo kuachi xiꞌin na. Kundatun ndo nda ná xinu mií tiempo ya ndiko koo Tata yo Jesucristo, chi mií ra ku ra sindiyeꞌe ndiꞌi saa kúu. Ta saa kua ndituvi ndiꞌi ñaꞌa ya íyo sěꞌe vitin. Ta saa kua ndituvi nda ñaꞌa ya íyo sěꞌe nima naꞌa, ndá kuꞌva ku ya ndíkani ini na. Ta suvi mií tiempo ikán kua xaa kaꞌnu Ndioxi naꞌa, tá kuꞌva íyo ya i̱kan na, saa koo ya ikan ra xiꞌin na. Onani mutuwo |
1 Corintios 4:5
48 Mawu Ofanana
Saa ndi̱kaꞌan ra xitoꞌo ra, káchi ra saa: “Vaꞌa ni xa̱a súvi un chiñu, vaꞌa ni moso ku mií un. Vaꞌa ni kundaa ini i kuni i yóꞌo̱. Sikuiso chiñu i yóꞌo̱ xiꞌin kuaꞌa ni ka chiñu i, chi vaꞌa ni xa̱a súvi un chiñu loꞌo yóꞌó. Ta vitin naꞌa kiꞌvi un veꞌe i, nuu kusini ni un xiꞌin i”, káchi xitoꞌo ra xiꞌin ra.
Yakan ndóꞌo̱, ñani yo tin kuꞌva yo, köo ichí ndo kaꞌan kuachi ndo xaꞌa na xáa chiñu nuu inka taa. Ndisaa mií ra xáa chiñu na nuu ku ra kúu mií ichí kaꞌan ra xaꞌa na, án vaꞌa xáa chiñu na, án väꞌa xáa chiñu na. Ta saa ni kindoo vaꞌa va na nuu xitoꞌo na, saa chi mií Táta yo Jesús ku ra kúu mií ichí ya taxi ra ndee ndaꞌa na xaꞌa chiñu íkan na nuu ra.
Naꞌa na ndixa kúu judío ku naꞌa, na ndixa kándixa Ndioxi. Ta kúu mií na tuni Ndioxi ya ndixa ndaa kua kúu na, naꞌa na ndâku nima nuu ra. Chi mií Tachi I̱í Ndioxi kua ndi̱nama nima na yakan ndi̱kuiso vaꞌa ra na nuu mií ra. Ta süvi na ñuu ivi yóꞌó ku na ndíxaa saa, süvi mií na ku na ndíkuiso vaꞌa ñaꞌa, chi mií Ndioxi ku ra i̱kan saa xiꞌin na. Ndi̱kuiso vaꞌa ra na nuu ra.
Ta xa si̱ndoo ndaꞌa va nde ndiꞌi ñaꞌa ya kaꞌa̱n ni nuu i̱kan sěꞌe nde tá yachi, ta ni köo naꞌa síndaꞌvi nde xiꞌin ya vata, ni tuꞌun Ndioxi ta köo ndínama nde ya xiꞌin ya vata. Nina xiꞌin ya ndaa kua sínaꞌa nde naꞌa, ta köo ñaꞌa ndi̱tiseꞌe nde nuu na. Mií Ndioxi ku ra ndíkuiin xaꞌa nde ya káꞌan nde nina ya ndaa. Ta xaꞌa ya yóꞌó kua vaꞌa kándixa naꞌa tuꞌun ya káꞌan nde, chi xíni na ya ndaa kua káꞌan nde.
Saa chi xa kúndaa ini yo vaxi kivi ta kundita ndiꞌi yo nuu Tata yo Jesucristo, nuu índuꞌu ra xáa nani ra kuachi. Ta saa kundita yo nuu ra ya xaa nani ra kuachi xiꞌin iin iin yo nuu chaꞌvi ra yoo xaꞌa chiñu i̱kan yo, án ya vaꞌa i̱kan yo, án ya väꞌa i̱kan yo kivi xi̱taku yo ini ikin kuñu yo ñuu ivi yóꞌó.
Ñani yo xiꞌin kuꞌva yo, käꞌan väꞌa ndo xaꞌa ñani taꞌan ndo. Chi ndiꞌi ndóꞌo̱ íkan saa, ta tá íin ndo xáa nani kuachi xiꞌin taꞌan ndo, saa íin ndo, tá káꞌan väꞌa ndo xaꞌa ley saa xáa nani ndo ya káꞌan ya. Chi tá káꞌan väꞌa ndo xaꞌa ya ta köo xáa súvi ndo ya káꞌan ya, saa ndúu ndo tá íyo na xáa nani ya káꞌan va ya.
Chi ndiꞌi tindoꞌo ya vaxi nuu ndo, ta tá kuꞌva xíto ndoso na kàà ya oro xiꞌin ñu̱ꞌu̱ iꞌni ni, ya ná nduyéꞌe̱ luvi ya nduu latun ni ka ya. Ta kuꞌva saa íyo ya ndáa ni ini ndo Ndioxi, chi ya ikán kua ndáa yaꞌvi ni ka nuu oro ya ndíꞌi xaꞌa, yakan tá ndóꞌo̱ ndo saa, ta ndïkava ini ndo, chi tá ná ndiko koo Tata yo Jesucristo kixi ra ta vaꞌa ni kaꞌan ra xaꞌa ndo, chinuu vaꞌa ni ra tuꞌun ndo.
Vaxi kivi ta ndiko koo Tata yo Jesucristo ñuu ivi yóꞌó, kixi ra tañu vi̱kó. Ndiꞌi saa naꞌa kuni xiꞌin nuu na ra kixi ra. Nda naꞌa, na tu̱vi itun íyo kàà xi̱ín nuu, na xa̱a ndu̱vaꞌa ni xiꞌin ra, si̱tikueꞌe ni na ra, ta nda na ikán kuni kixi ra. Ta naꞌa, na ndóo ndiꞌi ni kúu ñaꞌñu ñuu ivi, na köo ndi̱xiin kandixa ñaꞌa, nda na ikán kusuchi ni ini, kuaku ni na tá ná kuni na ra. Saa ná koo.
Saa xi̱ni i ndiꞌi na ndi̱xiꞌi, na kúu mií chiñu naꞌnu tin na kúu mií chiñu vali. Ta ndíta ndiꞌi na ikán yati nuu ndíchi tai i̱í itun toꞌo chee. Saa ndi̱xuna kuaꞌa ni tutu nuu ndóso ya i̱kan ndiꞌi naꞌa tá xi̱taku na ñuu ivi, ñaa ndi̱xuna inka tutu nuu ndóso kivi ndiꞌi na koo xiꞌin Ndioxi ndiꞌi saa kivi ya vaxi. Saa xa̱a nani Ndioxi xaꞌa kuachi ndiꞌi na xa ndi̱xiꞌi. Tá kuꞌva íyo ya i̱kan na ndóso nuu tutu ikán, saa íyo kuachi na ya xa̱a nani Ndioxi xiꞌin na, na i̱kan ya vaꞌa ta koo na xiꞌin ra, na i̱kan ya väꞌa ta kuꞌun na ndaya.
Zotsatsa