1 Corintios 4:2 - Xochapa Mixteco

² Xa xíni yo, iin naꞌa, na ndíso chiñu xiꞌin ñaꞌa ya ta̱xi Ndioxi ndaꞌa na, ta xíniñuꞌu na kuu na naꞌa, na ndaa ini, na ndixa xáa súvi chiñu ndi̱kiꞌvi ndaꞌa na.

1 Corintios 4:2 Mawu Ofanana

San Mateo 25:21

Saa ndi̱kaꞌan xitoꞌo ra káchi ra saa: “Vaꞌa ni i̱kan un, vaꞌa ni moso kuu mií un, vaꞌa ni kundaa ini i kuni i yóꞌo̱. Sikuiso chiñu i yóꞌo̱ nuu kuaꞌa ni ka ñaꞌa i, saa chi vaꞌa ni xa̱a súvi un chiñu loꞌo yóꞌó. Ta vitin naꞌa kiꞌvi un veꞌe i, ta kusini ni un xiꞌin i”, káchi patrón ra xiꞌin ra.

San Mateo 25:23

Saa ndi̱kaꞌan ra xitoꞌo ra, káchi ra saa: “Vaꞌa ni xa̱a súvi un chiñu, vaꞌa ni moso ku mií un. Vaꞌa ni kundaa ini i kuni i yóꞌo̱. Sikuiso chiñu i yóꞌo̱ xiꞌin kuaꞌa ni ka chiñu i, chi vaꞌa ni xa̱a súvi un chiñu loꞌo yóꞌó. Ta vitin naꞌa kiꞌvi un veꞌe i, nuu kusini ni un xiꞌin i”, káchi xitoꞌo ra xiꞌin ra.

San Lucas 12:42

Saa ndi̱kaꞌan Jesús xiꞌin ra, káchi ra saa: ―Iin ra moso, ra ndíso chiñu xiꞌin ñaꞌa xitoꞌo ra, ra ndaa ni ini ta ni xitoꞌo ra köo xíka ini ra xíni ñaꞌa ra, táxi ndiꞌi ra ñaꞌa kúu mií ra ndaꞌa moso ra. Ndáa ndiꞌi moso ra ñaꞌa ra, saa táxi ra ñaꞌa xitoꞌo ra xíxi ndiꞌi na xáa chiñu xiꞌin xitoꞌo ra.

1 Corintios 4:1

Tá kivi ndíkani ini ndo xaꞌa yeꞌe xiꞌin ra Apolos, ta xíniñuꞌu ndo ndikani ini ndo ya kúu nde ndisaa moso kuiti nda xáa chiñu nuu Tata yo Jesucristo, ta ka̱na ra ndeꞌe xaꞌa ya ndáa ini ra xíni ra ndeꞌe sinaꞌa nde naꞌa xaꞌa chiñu ra ya íyo sěꞌe.

1 Corintios 4:17

Xaꞌa ya ñaa kua tíꞌvi i ra Timoteo ñani yo xaa ra nuu ndo, vaꞌa ni ítaꞌan ra xiꞌin i. Nda tá káa seꞌe i saa káa ra, kúꞌvi ni ini i xíni i ra xaꞌa ra ya ndíkun ra Tata yo Jesucristo. Ta ra ñaa ku ra ndituꞌun xiꞌin ndo, sindikaꞌán ra ini ndo ndá kuꞌva íyo i, ta kuꞌva saa sínaꞌa i naꞌa ndiꞌi ni kúu veꞌe ñuꞌu.

1 Corintios 4:3

Ta yeꞌe, ni köo ndíꞌi ini i xaꞌa ya káꞌan ndo xaꞌa i ya xaa nani ndo kuachi i xiꞌin i, ni nda nuu na chiñu naꞌnu kuꞌun i tá ná kuꞌun ndo xiꞌin i, köo ndíꞌi ini i chi yeꞌe ta küvi xaa nani mií i kuachi i xaꞌa chiñu ya íkan i.

1 Corintios 7:25

Ta xaꞌa nda kuâán xiꞌin ná kuâán taki ná täꞌan tindaꞌa, ta köo ñaꞌa ndíxaꞌnda chiñu Tata yo nuu i xaꞌa na. Sundi vaꞌa va kaꞌan i xiꞌin ndo ndá kuꞌva ku ya ndíkani ini i, saa chi ta̱xi Tata yo ya xínituni i ndaꞌa i xaꞌa ya kúndaꞌvi ni ini ra xíni ra yeꞌe.

2 Corintios 2:17

Ndeꞌe, ta köo kíꞌin nde yaꞌvi nde xaꞌa ya ndítuꞌun nde tuꞌun Ndioxi xiꞌin naꞌa, tá kuꞌva íkan sava na, chi síndaꞌvi na ivi. Sundi ndeꞌe, ta ndaa ni ndítuꞌun nde xiꞌin na. Nuu Ndioxi káꞌan nde xiꞌin na, chi mií ra ku ra ti̱ꞌvi ndeꞌe kaꞌan ndoso nde xaꞌa ra, xaꞌa ya xa iin ndi̱kitaꞌan nde xiꞌin Jesucristo.

2 Corintios 4:2

Ta xa si̱ndoo ndaꞌa va nde ndiꞌi ñaꞌa ya kaꞌa̱n ni nuu i̱kan sěꞌe nde tá yachi, ta ni köo naꞌa síndaꞌvi nde xiꞌin ya vata, ni tuꞌun Ndioxi ta köo ndínama nde ya xiꞌin ya vata. Nina xiꞌin ya ndaa kua sínaꞌa nde naꞌa, ta köo ñaꞌa ndi̱tiseꞌe nde nuu na. Mií Ndioxi ku ra ndíkuiin xaꞌa nde ya káꞌan nde nina ya ndaa. Ta xaꞌa ya yóꞌó kua vaꞌa kándixa naꞌa tuꞌun ya káꞌan nde, chi xíni na ya ndaa kua káꞌan nde.

Colosenses 1:7

Ta ya yóꞌó kua xi̱ni soꞌo ndo si̱naꞌa ra ñani yo, ra Epafras, ra xáa chiñu xiꞌin nde nuu Tata yo Jesucristo. Ta ndinuꞌu ni ini ra xáa chiñu ra nuu Tata yo ya chindee ra ndóꞌo̱.

Colosenses 4:17

Ta vaꞌa kaꞌan ndo xiꞌin ra ñani yo, ra Arquipo, ya xíniñuꞌu ra xaa súvi ra chiñu ya ta̱xi Tata yo Jesucristo ndaꞌa ra.

Colosenses 4:7

Ta ra ñani yo, ra Tíquico, ra kúꞌvi ni ini yo xíni yo, ra ndee ni vaꞌa xáa chiñu nuu Ndioxi, ra ítaꞌan xiꞌin i xáa chiñu nde nuu Iva yo, ra yóꞌó ku ra ndituꞌun xiꞌin ndo xaꞌa ndiꞌi ya ndóꞌo i.