1 Corintios 4:14 - Xochapa Mixteco

¹⁴ Ta süvi xaꞌa ya kúni i sikaꞌán i nuu ndo kua táa i tutu yóꞌó xaa ya nuu ndo. Sundi yeꞌe, ta kúni i kundaa yuꞌu i ndóꞌo̱, tá kuꞌva ndáa yuꞌu iin taa seꞌe ra, saa íkan i xiꞌin ndo xaꞌa ya kúꞌvi ni ini i xíni i ndóꞌo̱.

1 Corintios 4:14 Mawu Ofanana

Los Hechos 20:31

Yakan kua kuenta ni koo ndo, täxi ndo sindaꞌvi na ndóꞌo̱. Ndikaꞌán ini ndo, uni kuiya ndi̱xiyo i xiꞌin ndo ndi̱kani i nuu ndo, ndi̱kaꞌan i xiꞌin ndo nduvi niuun ya xíniñuꞌu ndo kuenta ni koo ndo. Nda xáku i ndi̱kaꞌan i xiꞌin ndo.

1 Corintios 15:34

Ndikani vaꞌa ini ndo xaꞌa ñaꞌa íkan ndo, ta ndiko koo ini ndo xaꞌa ya väꞌa íkan ndo, saa ndikundikun ndo ichí vaꞌa. Saa chi sava ndo, vani xa ndíkun va ndo ichí Ndioxi, sundi täꞌan kuni taꞌan ndo xiꞌin ra. Xaꞌa ya ñaa kua káꞌan i xiꞌin ndo ya ná kukaꞌan nuu ndo. Ndá kuꞌva kua koo ikin kuñu yo tá ná nditaku yo

1 Corintios 4:15

Vani nda uxi mil ná koo nda sínaꞌa ndóꞌo̱ xaꞌa Tata yo Jesucristo, sundi iindaa va ku iva ndo. Ta yeꞌe, tá káa iva ndo, saa káa i. Chi yeꞌe ku ra núnu̱ú ndi̱tuꞌun xiꞌin ndo tuꞌun vaꞌa xaꞌa Jesucristo, ta saa ndi̱kitaꞌan vaꞌa ndo xiꞌin ra.

1 Corintios 4:17

Xaꞌa ya ñaa kua tíꞌvi i ra Timoteo ñani yo xaa ra nuu ndo, vaꞌa ni ítaꞌan ra xiꞌin i. Nda tá káa seꞌe i saa káa ra, kúꞌvi ni ini i xíni i ra xaꞌa ra ya ndíkun ra Tata yo Jesucristo. Ta ra ñaa ku ra ndituꞌun xiꞌin ndo, sindikaꞌán ra ini ndo ndá kuꞌva íyo i, ta kuꞌva saa sínaꞌa i naꞌa ndiꞌi ni kúu veꞌe ñuꞌu.

1 Corintios 6:5

Soꞌva káꞌan i xiꞌin ndo ya ná kukaꞌan nuu ndo: ¿Án köo loꞌo vi na ndíchi tañu ndo ya kuchiñu na xaa nani na kuachi xiꞌin na taꞌan yo na veꞌe ñuꞌu ñaa?

1 Corintios 9:15

Ta yeꞌe, ta nda iin kivi köo ndítaxi i ya chaꞌvi ndo yeꞌe xaꞌa ya xáa chiñu i nuu Tata yo Jesucristo. Ya táa i soꞌva nuu ndo káꞌan i xiꞌin ndo ta süvi ya kúni i taxi ndo ñaꞌa ndaꞌa i kua. ¡Vaꞌa ka ná kuvi i ta kïꞌin i xuꞌun ndaꞌa ndo, xaꞌa ya káꞌan ndoso i tuꞌun Ndioxi xiꞌin ndo, chi yeꞌe, ta vaꞌa ni kúni i ya íkan i chiñu yóꞌó!

2 Corintios 11:11

Xaꞌa ya káꞌan i saa xiꞌin ndo, ta süvi ya köo kúꞌvi ini i xíni ndóꞌo̱ kua, mií Ndioxi xíni ya ndee ni kúꞌvi ini i xíni i ndóꞌo̱.

2 Corintios 12:19

Ta ¿án sana ndíkani ini ndo xaꞌa nde ya ndíkuiin nde xaꞌa nde ndiꞌi saa tiempo nuu ndo, káꞌán ndo, ta yakan kua táa nde tutu yóꞌó xaa ya nuu ndo, túvi ndo? Ta süvi saa íyo ya. Chi ndeꞌe ndíkun Ndioxi ku nde, ta nuu mií ra kua káꞌan nde xiꞌin ndo, chi ñani nde ku ndóꞌo̱, ta ndiꞌi ya íkan nde xiꞌin ndo ta xaꞌa ya kúni nde chindee taꞌan nde xiꞌin ndo va kua.

2 Corintios 7:3

Ya káꞌan i soꞌva xiꞌin ndo ta köo káꞌan i saa xiꞌin ndo ya táxi i kuachi xaꞌa ndo, saa chi ndee ni kúꞌvi ini nde xíni nde ndóꞌo̱, tá íyo ya xa ndi̱kaꞌan nde xiꞌin ndo, saa íyo ya. Ta nda iin ñaꞌa täꞌvi yoo xiꞌin taꞌan yo, ni ya táku yo vitin ni ya ná kuvi yo, köo ñaꞌa taꞌvi mií yo.

Colosenses 1:28

Ta ndeꞌe káꞌan ndoso nde xaꞌa ra xiꞌin ndiꞌi naꞌa, ndíkani nde nuu na, saa sínaꞌa nde na xaꞌa ndiꞌi tuꞌun ra ya ndíchi táxi Ndioxi ndaꞌa nde. Chi kúni i sinaꞌa i na yóꞌó nuu Ndioxi ya nduu na naꞌa, na ndǎku ni ini nuu ra, ta xa ku̱ndaa vaꞌa ini na xiꞌin tuꞌun ra.

1 Tesalonicenses 2:11

Tá íkan iin taa, ra vaꞌa ni ini xiꞌin seꞌe ra, saa i̱kan nde xiꞌin ndo, chi ndi̱kaꞌan ni nde xiꞌin ndo ya koo vií ndo xiꞌin taꞌan ndo, ta saa si̱ndiko nde ini ndo.

1 Tesalonicenses 5:14

Ta saa káꞌan tu nde xiꞌin ndo xaꞌa naꞌa, na köo xíin xaa chiñu, ndaꞌi ndo xiꞌin na ná xaa chiñu na, ta sindiko ndo ini tá kúu naꞌa, na ndíkava ni ini, saa chindee ndo na vita ini. Ta kaꞌnu koo ini ndo xiꞌin ndiꞌi naꞌa.

2 Tesalonicenses 3:14

Tá tu ndá na íkan saa, köo xíin na xaa súvi na ya káꞌan nde xiꞌin ndo nuu tutu yóꞌó, ta kiꞌin vaꞌa ndo kuenta unku na, saa kuxika ndo nuu na ñaa, kütaꞌan ka ndo xiꞌin na ya ná kukaꞌan nuu na.

FILEMÓN 1:10

Xaꞌa ya ñaa kua xíkan ni i ya mani nuu un ñani yo Filemón, xaꞌa ra Onésimo ñani yo, chi ra ñaa ta tá íyo seꞌe mií i saa íyo ra, xaꞌa ya ndi̱kundikun ra ichí Tata yo Jesucristo ini veꞌe kàà nuu ndíkaa i yóꞌó.

1 Juan 2:1

Ndóꞌo̱ ndíkun Jesucristo, tá íin seꞌe i saa íin ndo, yakan táa i tutu yóꞌó xaa ya nuu ndo ya ná ïkan ndo ya väꞌa. Sundi tá ndá ndóꞌo̱ ndíkava nuu kuachi ta vaꞌa ná kundaa ini ndo chi Tata yo Jesucristo ku ra ndaa ni ini, ta ra ikán ku ra ndíchi ndíkuiin xaꞌa yo nuu Iva yo Ndioxi.

3 Juan 1:4

Köo ka ya xáa sii ni ini i, ya kúsini ni i ku ya yóꞌó, saa chi yóꞌo̱ ta tá káa seꞌe i saa káa un, ta vaꞌa ni xíka un ichí ya ndaa.