1 Corintios 4:10 - Xochapa Mixteco

¹⁰ Xaꞌa ya ndíkun nde Jesucristo, ta ni köo ndáa yaꞌvi nde nuu naꞌa, tá íin nde kíꞌvi va, saa íin nde nuu na. Ta ndóꞌo̱, ta xaꞌa ya ndíkun ndo Jesucristo ta tá íin naꞌa, na ndíchi ni va saa ndu̱u ndo. Ta ndeꞌe, ta vita ni va kúni nde ta mií ka va ndo ku ndo ndu̱ndee ni ka nuu nde, túvi ndo. Vaꞌa ni va káꞌan naꞌa xaꞌa ndo, xáa toꞌo ni na ndóꞌo̱, ta ndeꞌe, ta kúndasi nuu va na xíni na ndeꞌe.

1 Corintios 4:10 Mawu Ofanana

San Mateo 24:9

’Ta kivi ikán tiin na ndóꞌo̱ kuꞌun ndo xiꞌin na, ta nditaxi na ndóꞌo̱ ndaꞌa na chiñu ya xaa nduvaꞌa ni na xiꞌin ndo, ta kaꞌni na sava ndo. Ta ndiꞌi naꞌa kundasi nuu na kuni na ndóꞌo̱ xaꞌa ya ndíkun ndo yeꞌe.

San Mateo 5:11

’Vaꞌa ni kée ndo, tá íyo naꞌa kánaꞌa xiꞌin ndo, sítixuꞌvi na ndóꞌo̱, ta káꞌan kini na xiꞌin ndo, xaꞌa ya ndíkun ndo yeꞌe.

San Lucas 10:16

Ta saa ndi̱kaꞌan ra xiꞌin uni xiko uxi saa nda ikán, káchi ra saa: ―Ndiꞌi na ndíkiꞌin tuꞌun ya káꞌan ndóꞌo̱, tuꞌun yeꞌe kua ndíkiꞌin na. Ta ndiꞌi na kúndasi ndóꞌo̱, yeꞌe ku i kúndasi na. Ndiꞌi na kúndasi yeꞌe, Ndioxi ku ra kúndasi na ikán, saa chi Ndioxi ku ra ti̱ꞌvi yeꞌe vaxi i ñuu ivi yóꞌó ―káchi Jesús xiꞌin nda.

San Lucas 18:9

Saa ndóo sava na ndíkani ini vaꞌa ni mií na túvi na yakan kúndasi nuu na xíni na inka naꞌa. Xaꞌa ya ikán kua xa̱á Jesús káꞌan ra tuꞌun ndíchi yóꞌó, káchi ra saa:

San Lucas 6:22

’Vaꞌa ni kée ndo tá tu kúndasi nuu naꞌa xíni na ndóꞌo̱, köo xíin ka na kaꞌan na xiꞌin ndo, káꞌan uꞌvi na xaꞌa ndo, chínuu kuéꞌe na tuꞌun ndo xaꞌa ya kándixa ndo yeꞌe, ra kú Taa ra xa̱a ñuu ivi yóꞌó.

Los Hechos 17:18

Ta sava nda xíka ikán ku nda ndíchi ni chi si̱kuaꞌa nda xiꞌin na náni epicúreos, ta sava nda si̱kuaꞌa xiꞌin na náni estoicos xa̱á nda káꞌan nda xaꞌa ra, káchi nda saa: ―¿Unkua káꞌan ví ra? ra síndaꞌvi naꞌa va ku ra ―káchi nda. Ta inka na káꞌan: ―Ra xíka káꞌan ndoso xaꞌa inka ndioxi va ku ra ―káchi nda. Saa káchi nda chi xi̱ni soꞌo nda káꞌan ra tuꞌun vaꞌa xaꞌa Jesús ta káꞌan ra xiꞌin na ya ndi̱taku ra.

Los Hechos 17:32

Saa tá xi̱ni soꞌo na ya ndi̱kaꞌan ra ya ndítaku na ndíi, ta saa xa̱á sava na kúsiki ndaa na ra, ta inka na káchi saa: ―Vaꞌa kuáꞌan, nda inka kixi un saa kuni soꞌo ka nde ya káꞌan un ―káchi na xiꞌin ra.

Los Hechos 26:24

Tá ndi̱kaꞌan ra Pablo tuꞌun ikán nuu ndíkuiin ra xaꞌa ra, ta saa ndi̱kuiin ra Festo ndee ka vi káꞌan ra, káchi ra saa: ―¡Pablo, yóꞌo̱ sána va ku un, xaꞌa ya ka̱ꞌvi ni un yakan kuaꞌan ndúkiꞌvi un! ―káchi ra xiꞌin ra.

Los Hechos 9:16

Saa chi yeꞌe ta sinaꞌa i ra ndá kuꞌva xíniñuꞌu ra ndoꞌo ni ra xaꞌa kivi i ―káchi Jesús xiꞌin ra Ananías.

1 Corintios 1:21

Xaꞌa ya ndíchi ni xi̱ní mií na ñuu ivi yóꞌó túvi na, yakan kua köo ndi̱xiin na kandixa na Ndioxi. Xaꞌa ya ikán kua vaꞌa ka si̱kaku Ndioxi naꞌa, na kándixa tuꞌun ya ndi̱tuꞌun nde xaꞌa Jesucristo xiꞌin na. Vani kuaꞌa ni naꞌa ndíkani ini xaꞌa tuꞌun ya ndi̱kaꞌan nde xiꞌin na, tuꞌun kíꞌvi va kua túvi na.

1 Corintios 1:23

Sundi ndeꞌe, ta xaꞌa Jesucristo, ra ndi̱xiꞌi nuu cruzin xaꞌa kuachi va yo kua káꞌan ndoso nde xiꞌin na. Ta tuꞌun yóꞌó nda tá káa yu̱ú nuu káchiꞌi xaꞌa na kóyo na, saa káa ya nuu na judío. Ta na griego ndíkani ini na, tá káa ya kíꞌvi va, saa káa ya nuu na.

1 Corintios 1:25

Saa chi tuꞌun Ndioxi ya köo ndáa yaꞌvi nuu naꞌa, na ndíchi ni túvi mií na ñuu ivi yóꞌó, ya ikán ka ku ya ndáa yaꞌvi ni nuu ya xínituni mií na. Ta ya ndíkani ini naꞌa, káꞌan na xaꞌa tuꞌun Ndioxi, ni köo ndee ya, vita ni ya káchi na. Ta ya ikán ka ku ya yáꞌa ni ka ndee, nuu ndee ya kúu mií na ñuu ivi yóꞌó.

1 Corintios 10:12

Xaꞌa ya ñaa kua, vií ná kundikun ndo ichí Tata yo Jesucristo, ndóꞌo̱ ndíkani ini ya tuun ni ndíkun ndo ra, ta kuenta ni koo ndo ya ná köyo ndo nuu kuachi.

1 Corintios 2:14

Ta naꞌa, na köo íyo Tachi I̱í Ndioxi xiꞌin ta köo kúchiñu na kundaa ini na xaꞌa ya vaꞌa ke̱e nuu ndivi, chi tá káa tuꞌun ya kíꞌvi va saa káa ya nuu na. Köo kúchiñu na kundaa ini na xaꞌa ya, saa chi ndisaa naꞌa, na kúu mií Tachi I̱í Ndioxi ku na kúchiñu kúndaa ini xiꞌin ya.

1 Corintios 2:3

Yachi tá ndi̱xaꞌan i nuu ndo ta vita ni kúni i, íꞌvi ni i ndakua kísi ya yeꞌe.

1 Corintios 3:18

Sïndaꞌvi ndo mií ndo. Tá ndá ndóꞌo̱ ndíkani ini ya ndíchi ni ndo, chi xíni ni ndo xiꞌin ya ndíchi íyo ñuu ivi yóꞌó túvi ndo, ta vaꞌa xíniñuꞌu ndo ndasa ndo mií ndo tá kuꞌva íin naꞌa, na köo xíni, ta saa kua ndixa nduu ndo naꞌa, na ndee ni ndíchi.

1 Corintios 3:2

Tuꞌun ya si̱naꞌa i ndóꞌo̱, ta ya köo ndíchi kundaa ini ndo xiꞌin ku ya. Tá íyo nduta leche chíchin na vali, saa íyo ya si̱naꞌa i ndóꞌo̱, xaꞌa ya íin ndo tá íin na vali, yakan täꞌan kuchiñu ndo kuxi ndo taꞌan ñaꞌa ya xíxi na xa xuxa ini. Ya ñaa kúni kachi ya nda vitin ta täꞌan ka kuchiñu vaꞌa ndo kundaa ini ndo xiꞌin tuꞌun Ndioxi.

1 Corintios 4:8

Saa ndóꞌo̱ ndíkani ini ndo, xaa kúu mií ndo ndiꞌi ñaꞌa ya xíniñuꞌu ndo, ta xa ndu̱kuika ni ndo yakan ni köo xíniñuꞌu ka ndo ndeꞌe, túvi ndo. Ta vaꞌa ni va, tá tu xa ndu̱u ndo rey na xáꞌnda chiñu, ta nda ndeꞌe niꞌi loꞌo kaꞌnda chiñu nde xiꞌin va tu ndo.

2 Corintios 10:10

Chi sava ndo káꞌan: “Tutu ya táa ra Pablo ñaa, ta ndee ni kueꞌe káꞌan ra xiꞌin ya, ndaku ni káꞌan ra, sundi mií ra ta ni köo ndee káꞌan vi ra, vita ni va ini ra, ta ni köo ndáa yaꞌvi tuꞌun káꞌan ra nuu naꞌa, káchi ndo xaꞌa i”.

2 Corintios 11:19

Chi ndóꞌo̱, ta ndee ni ndíchi ndo, ta saa ni vaꞌa ni kúni ndo xíni ndo na kíꞌvi ikán, yakan vitin ta tá íkan na ikán, saa íkan tu yeꞌe va ya ná kuni soꞌo ndo ya káꞌan i xiꞌin ndo.

2 Corintios 11:29

Tá ndá naꞌa ndúvita ini ta nda yeꞌe ndúvita ini xiꞌin na, tá ndá na síndikava inka naꞌa nuu kuachi, ta ndee ni sáa ini i xíni i na íkan saa.

2 Corintios 13:9

Yakan kúsini ni va nde tá vita ni ini nde, chi ndeꞌe, ta kúni nde ya ná nduu ndee ni ndóꞌo̱. Saa káꞌan ni nde xaꞌa ndo xiꞌin Ndioxi ya ná nduu xa̱á ka ndo, saa xinu ndo nduu ndo naꞌa, na vaꞌa ni.

2 Corintios 4:12

Kuꞌva soꞌva kua ndóꞌo̱ ndeꞌe xaꞌa chiñu ya ta̱xi Ndioxi ndaꞌa nde, nda ìyo kuvi nde, ta xaꞌa ya yóꞌó kua vaꞌa táku ndóꞌo̱ nuu Ndioxi vitin.

2 Corintios 6:8

Sava ichí xáa toꞌo na ndeꞌe, ta inka ichí kúndasi nuu na xíni na ndeꞌe, ta sava tu ichí káꞌan vaꞌa ni na xaꞌa nde ta sava tu ichí kánaꞌa ni va na xiꞌin nde, sava na káꞌan ndeꞌe vata ku nde, káchi na xaꞌa nde, ta süvi ya ndaa kua káꞌan na xaꞌa nde, chi ndeꞌe, ta nina ya ndaa ndítuꞌun nde.

1 Tesalonicenses 4:8

Ta ndiꞌi naꞌa, na köo xíin xaa súvi ya yóꞌó, ta süvi ya káꞌan ndeꞌe kua köo xíin na xaa súvi na, chi ya káꞌan mií Iva yo Ndioxi kua köo xíin na xaa súvi na, chi mií ra ku ra táxi Tachi I̱í ra ndaꞌa yo íyo ya xiꞌin yo.

1 Pedro 4:14

Tá ndá naꞌa kánaꞌa xaꞌa ndo ya ndíkun ndo Tata yo Jesucristo, ta vaꞌa ni kée ndo chi íyo Tachi I̱í Ndioxi ya ndee ni xiꞌin ndo, chi naꞌa, na köo xíni Ndioxi ta na kánaꞌa va ku na xaꞌa ra, ta ndóꞌo̱ ta xáa kaꞌnu ni va ndo ra.