1 Corintios 4:1 - Xochapa Mixteco

¹ Tá kivi ndíkani ini ndo xaꞌa yeꞌe xiꞌin ra Apolos, ta xíniñuꞌu ndo ndikani ini ndo ya kúu nde ndisaa moso kuiti nda xáa chiñu nuu Tata yo Jesucristo, ta ka̱na ra ndeꞌe xaꞌa ya ndáa ini ra xíni ra ndeꞌe sinaꞌa nde naꞌa xaꞌa chiñu ra ya íyo sěꞌe.

1 Corintios 4:1 Mawu Ofanana

San Mateo 13:11

Saa ndi̱kuiin ra káꞌan ra xiꞌin nda: ―Ndóꞌo̱, ta xa mií Ndioxi ku ra ta̱xi ichí ndaꞌa ndo ya kundaa ini ndo xaꞌa ichí nuu xáꞌnda chiñu ra, ya íyo sěꞌe. Sundi na ikán, ta köo ndítaxi ra ichí ndaꞌa na kundaa ini na.

San Mateo 24:45

Saa ndi̱kaꞌan tuku Jesús, káchi ra saa: ― Ná ndituꞌun i xiꞌin ndo unkua íkan iin ra xáa chiñu tatu, ra toꞌo ni. Xaꞌa ya vaꞌa ni xáa chiñu ra, ta ta̱xi xitoꞌo ra ichí ndaꞌa ra ndáa chiñu ra xiꞌin ndiꞌi na xáa chiñu nuu xitoꞌo ra, saa taxi ra kuxi na, tá ti̱ndaa hora kuxi na.

San Marcos 4:11

Saa ndi̱kuiin Jesús ndi̱kaꞌan ra xiꞌin na, káchi ra saa: ―Ndioxi táxi ra kundaa ini ndo xaꞌa ya íyo sěꞌe nuu xáꞌnda chiñu ra. Sundi na íyo chí keꞌe ta köo kúndaa ini na xiꞌin ya chi ndisaa tuꞌun ndíchi va kua xíni soꞌo na káꞌan i.

San Lucas 1:2

Tá íyo ya si̱naꞌa nda xi̱taꞌan xiꞌin ra, nda xi̱ni xiꞌin nuu ndiꞌi ya i̱kan ra, saa íyo ya ta̱a nda, chi nda ikán ku nda ndi̱kuiso chiñu kaꞌan ndoso nda tuꞌun ra.

San Lucas 12:42

Saa ndi̱kaꞌan Jesús xiꞌin ra, káchi ra saa: ―Iin ra moso, ra ndíso chiñu xiꞌin ñaꞌa xitoꞌo ra, ra ndaa ni ini ta ni xitoꞌo ra köo xíka ini ra xíni ñaꞌa ra, táxi ndiꞌi ra ñaꞌa kúu mií ra ndaꞌa moso ra. Ndáa ndiꞌi moso ra ñaꞌa ra, saa táxi ra ñaꞌa xitoꞌo ra xíxi ndiꞌi na xáa chiñu xiꞌin xitoꞌo ra.

San Lucas 8:10

Ñaa ndi̱kuiin Jesús ndi̱kaꞌan ra xiꞌin nda, káchi ra saa: ―Ndioxi táxi ra kundaa ini ndo ya sêꞌe ndá kuꞌva xáꞌnda chiñu ra. Ta inka na ta xiꞌin tuꞌun ndíchi káꞌan i xiꞌin na, yakan ni xíto na tin xíni soꞌo na ta ni köo xíin na kundaa ini na ―káchi Jesús xiꞌin nda.

ROMANOS 11:25

Ñani yo xiꞌin kuꞌva yo, ndóꞌo̱ köo kúu judío, kúni i kaꞌan i xiꞌin ndo ya ná kundaa ini ndo xaꞌa chiñu ya íyo sěꞌe ikan Ndioxi. Yakan kua xäa xíni ni ndo mií ndo, saa chi sava mií na Israel ta ndee ni ndu̱tuun ini na, köo xíin na kandixa na Jesucristo, ta saa ikan na nda ná xinu naꞌa, na köo kúu judío, na ndi̱kaxin Ndioxi sikaku ra.

ROMANOS 16:25

Ta ná xaa toꞌo yo Ndioxi chi mií ra ku ra chíndee yoo, táxi ra ndee ndaꞌa ndo ya tuun ni ndíkun ndo tuꞌun vaꞌa xaꞌa Jesucristo, ya ndítuꞌun i xiꞌin ndo. Tuꞌun vaꞌa yóꞌó kua ndi̱xiyo sěꞌe xinaꞌa, ta vitin si̱naꞌa tuvi Ndioxi ya nuu yo.

1 Corintios 2:7

Ndeꞌe, ta sínaꞌa nde ya ndíchi kúu mií Ndioxi, ya ndi̱xiyo sěꞌe yachi nda kivi tá xi̱koo xaꞌa ñuu ivi yóꞌó. Nda saa vi chi̱tuni Ndioxi ya ndíchi yóꞌó ya kuchiñu niꞌi ni yo ya vaꞌa xiꞌin ya.

1 Corintios 3:5

Ndikani vaꞌa ini ndo, ¿án chee ni yeꞌe, Pablo, túvi ndo? ¿Án ra Apolos ku ra chee ni túvi ndo? Süvi saa íyo ya. Moso va ku nde xáa chiñu nde nuu Ndioxi, ta chíndee nde ndóꞌo̱ ya ná kandixa ni ndo Ndioxi va. Íkan iin iin nde chiñu ya ta̱xi Ndioxi ndaꞌa va nde.

1 Corintios 4:13

Ni tá kánaꞌa ni na xaꞌa nde, ta xiꞌin tuꞌun toꞌo ndíkuiin nde yuꞌu na. Tá íkan na xiꞌin taka ya íyo ñuu ivi yóꞌó va íkan na xiꞌin nde, tá íin ñaꞌa ya xa xáta na, saa íin nde nuu na, nda kivi vitin.

1 Corintios 4:2

Xa xíni yo, iin naꞌa, na ndíso chiñu xiꞌin ñaꞌa ya ta̱xi Ndioxi ndaꞌa na, ta xíniñuꞌu na kuu na naꞌa, na ndaa ini, na ndixa xáa súvi chiñu ndi̱kiꞌvi ndaꞌa na.

2 Corintios 11:23

Tá tu kútai ni ini nda chi nda xáa chiñu ni nuu Cristo ku nda túvi nda, ta yeꞌe, ta ndee vaꞌa ka va xáa chiñu i nuu ra. Nda tá káa iin ra kíꞌvi va saa káa i ya káꞌan i saa. Chi yeꞌe ta ndee ni ka chíkaa i ndee nuu nda ñaa, kuaꞌa ni ichí ku̱nduvaꞌa na xiꞌin i, ta kuaꞌa ni ichí chi̱kaa na yeꞌe veꞌe kàà nuu nda ñaa, ta ndi̱xaꞌa ndee ndiꞌi ini i ndo̱ꞌo i saa, ta kuaꞌa ni ichí ku̱ni kaꞌni na yeꞌe.

2 Corintios 12:6

Ta saa ni ná kaꞌan vaꞌa ni i xaꞌa mií i, ndikuu, ta süvi ra kíꞌvi ku i ya káꞌan i saa, chi ya ndaa ni va kua káꞌan i xiꞌin ndo. Sundi yeꞌe, ta köo kúni i xaa kaꞌnu xiꞌin mií i nuu ndo, chi köo kúni i ya ndikani ini ndo xaꞌa i ya ndee ni ndáa yaꞌvi i nuu ndo xaꞌa kuꞌva íyo i án xaꞌa ya káꞌan i xiꞌin ndo.

2 Corintios 4:5

Tá káꞌan ndoso nde tuꞌun vaꞌa xaꞌa Jesucristo xiꞌin naꞌa, ta süvi xaꞌa mií nde kua káꞌan nde xiꞌin na, chi xaꞌa mií Jesucristo kua káꞌan nde xiꞌin na, ya kúu ra Tata yo. Ta ndeꞌe, tá íin moso ndo, na xáa chiñu nuu ndo, saa íin nde. Ta xaꞌa Tata yo Jesucristo kua íkan nde saa.

2 Corintios 6:4

Nda vaꞌa ka va íkan nde, chi ndiꞌi ya íkan nde nuu na ta káꞌan ya xaꞌa nde ya xáa chiñu nde nuu Ndioxi. Xáꞌa ndee ini nde xiꞌin ndiꞌi tindoꞌo ya vaxi nuu nde, saa tu tindiꞌi ini ya vaxi nuu nde, xiꞌin ya kúmani ñaꞌa xíniñuꞌu nde, saa kúndee ini nde xiꞌin ndiꞌi ya suchi ini vaxi nuu nde.

Efesios 1:9

Ta si̱naꞌa ra ñaꞌa nuu yo ya chi̱tuni mií ra ndi̱xiyo sěꞌe nuu ra. Ta ndee ni kúsini ra si̱naꞌa ra ya yóꞌó nuu yo tixin seꞌe ra Jesucristo, chi saa chi̱kaa ini ra ikan ra xiꞌin yo.

Efesios 6:19

Saa kaꞌan ni ndo xaꞌa i xiꞌin Ndioxi ya ná taxi ra ndee ndaꞌa i tá káꞌan ndoso i tuꞌun vaꞌa xaꞌa ra xiꞌin naꞌa, ya ná kuchiñu na kundaa ini na xaꞌa ñaꞌa ya chi̱tuni Ndioxi ndi̱xiyo sěꞌe, ya kúu tuꞌun vaꞌa xaꞌa ra.

Colosenses 2:2

Saa ná taxi ni Ndioxi ndee ndaꞌa ndo ya xaꞌa ni ndo ndee xiꞌin taꞌan ndo xaꞌa ya kúꞌvi ni ini ndo xínitaꞌan ndo. Xaꞌa ya ñaa kua ndítuꞌun ni i xiꞌin ndo, ndíkani i nuu ndo chi kúꞌvi ni ini i xíni i ndóꞌo̱. Ta vaꞌa ná taxi ra ndukuika ni ndo xiꞌin ya ndíchi ni chi̱tuni Ndioxi ndi̱xiyo sěꞌe yachi, chi ya ndi̱xiyo sěꞌe ikán ku mií Tata yo Jesucristo.

Colosenses 4:3

Ta kaꞌan ni ndo xiꞌin ra ya ná kuna ra yeꞌe nuu nde ya ndituꞌun ka nde tuꞌun vaꞌa xaꞌa ra xiꞌin naꞌa ya ná kuchiñu ndituꞌun nde xaꞌa ñaꞌa ya ndi̱xiyo sěꞌe yachi, chi vitin ta xa si̱tuvi ra ya tixin Tata yo Jesucristo nuu na, ta xaꞌa ya ndítuꞌun i xaꞌa ra kua ndíkaa i veꞌe kàà yóꞌó.

1 Timoteo 3:16

Ta saa ná kundaa ini ndo chi nda vitin ta ndee ni ndee ya ndaa si̱naꞌa Tata yo Jesucristo nuu yo kándixa ñaꞌa, ta soꞌva íyo ya: Tata yo Jesucristo ta ndu̱u ra taꞌan mií yo ivi yóꞌó, ta ki̱xi ra ñuu ivi yóꞌó. Ta Tachi I̱í Ndioxi kua ndíkuiin xaꞌa ra. Ta xi̱ni na tatun Ndioxi ra. Saa ndi̱kaꞌan ndoso nda xi̱ndikun sata ra xaꞌa ra nuu ndiꞌi naꞌa, na köo kúu judío. Ndiꞌi ni kúu xaꞌa ñuu ivi yóꞌó íyo naꞌa, na kándixa ra. Saa ndi̱kiꞌin tuku Iva yo Ndioxi ra, nda̱a tuku ra kuaꞌan ra nuu ndivi.

1 Timoteo 3:6

Nda ñani yo, nda kúni kuu mií taꞌan chiñu yóꞌó, ta köo xíniñuꞌu koo nda, nda sikan xa̱á xíni tuꞌun Ndioxi, saa chi ìyo ni ndutái ini nda ta koyo nda nuu ya väꞌa, tá ndo̱ꞌo mií kiti nǎꞌa.

1 Timoteo 3:9

Xíniñuꞌu kuu nda taa nda kándixa ni tuꞌun vaꞌa xaꞌa Tata yo Jesucristo ya si̱tuvi Ndioxi nuu yo ku̱ndaa ini yo, ta saa ná koo vaꞌa ya xínituni nda, ná täxi ya kuachi xaꞌa nda.

Tito 1:7

Saa chi nda kúu xi̱ní xiꞌin na veꞌe ñuꞌu, ta xíniñuꞌu nda ndǎku ni koo ini nda xaꞌa ya ndíso chiñu nda xiꞌin chiñu Ndioxi. Ná chïnuu vaꞌa ni nda tuꞌun nda, ná säa kama ni nda, ná käka nda koꞌo nda, saa ná täva nda kuachi xiꞌin naꞌa, ta ná ïkan nda ndá ka ñaꞌa väꞌa ya kuu mií nda xuꞌun.

1 Pedro 4:10

Saa chi Iva yo Ndioxi ta xa kuaꞌa ni va ya vaꞌa, ya xínituni ke̱e nuu ndivi ta̱xi ra ndaꞌa iin iin ndo, ya kuniñuꞌu ndo ya ikan ndo ya vaꞌa xiꞌin taꞌan ndo. Saa kua kuchiñu ndo ikan ndo kuaꞌa ni ya vaꞌa xaꞌa ya kúꞌvi ni ini Ndioxi xíni ra ndóꞌo̱.