1 Corintios 3:5 - Xochapa Mixteco

⁵ Ndikani vaꞌa ini ndo, ¿án chee ni yeꞌe, Pablo, túvi ndo? ¿Án ra Apolos ku ra chee ni túvi ndo? Süvi saa íyo ya. Moso va ku nde xáa chiñu nde nuu Ndioxi, ta chíndee nde ndóꞌo̱ ya ná kandixa ni ndo Ndioxi va. Íkan iin iin nde chiñu ya ta̱xi Ndioxi ndaꞌa va nde.

1 Corintios 3:5 Mawu Ofanana

San Mateo 25:15

’Ta̱xi ra iin bolsa chee nuu ñúꞌu uꞌun xuꞌun talento ndaꞌa iin ra, saa ta̱xi ra inka bolsa nuu ñúꞌu uvi xuꞌun talento ndaꞌa inka ra ikán, ta inka bolsa ta̱xi ra ndaꞌa inka ra nuu ndíkaa iin xuꞌun talento ini ya. Saa chi xíni vaꞌa ra nda, ta tá kuꞌva kúchiñu nda xáa chiñu nda, kuꞌva saa xuꞌun ta̱xi ra ndaꞌac iin iin nda ikán. Ta ndi̱kiꞌin ra kuaꞌan xíka ra.

San Lucas 1:2

Tá íyo ya si̱naꞌa nda xi̱taꞌan xiꞌin ra, nda xi̱ni xiꞌin nuu ndiꞌi ya i̱kan ra, saa íyo ya ta̱a nda, chi nda ikán ku nda ndi̱kuiso chiñu kaꞌan ndoso nda tuꞌun ra.

San Juan 3:27

Ta saa ndi̱kuiin ra Juan káchi ra saa: ―Nda iin ñaꞌa küvi ikan naꞌa tá tu süvi Ndioxi ku ra táxi ndee ndaꞌa na.

Los Hechos 18:24

Tá xíka ra Pablo inka ñuu, ta saa ndi̱xaa iin ra náni Apolos ñuu Éfeso, ta ra judío ku ra ikán. Ñuu Alejandría ka̱ku ra, saa si̱kuaꞌa vaꞌa ra, xíni ni ra tuꞌun Ndioxi ya ta̱a na xinaꞌa.

Los Hechos 19:1

Tá íyo ra Apolos ñuu Corinto ta inka ra Pablo xíka chí ñuu ya ndóꞌni chí iku, iin saa ndi̱xaa ra nda ñuu Éfeso ya ndíkaa yuꞌu nduta ñûꞌu. Tá ndi̱xaa ra ñuu ikán ta ndi̱kitaꞌan ra xiꞌin sava nda kándixa Jesús.

ROMANOS 15:16

Chiñu kúu mií i kua xáa chiñu i nuu Jesucristo. Tá káa iin sutu káa i káꞌan ndoso i tuꞌun vaꞌa xaꞌa ra xiꞌin naꞌa, na köo kúu judío, ya kuchiñu na kuyati na nuu ra. Ta saa nduu na tá íin ñaꞌa ya sóko i nuu Ndioxi, ta vaꞌa ni ndikuiso ra na, saa chi xa ndi̱kaxin mií Tachi I̱í Ndioxi na, ta xaꞌa mií ra kua ndi̱kaxin ya na.

1 Corintios 12:28

Ta xa xíni yo mií Ndioxi ku ra to̱so yo veꞌe ñuꞌu ya xaa chiñu yo. Chiñu núnu̱ú ta̱xi ra ndaꞌa sava yo ku ya kúu yo apóstol, ta sava yo ku profeta, nda káꞌan tuꞌun yuꞌu Ndioxi, sava tu yo ku yo sínaꞌa tuꞌun Ndioxi, sava tu yo ta̱xi ra ichí ndaꞌa yo ya ikan yo yatuꞌun Ndioxi, sava yo ta̱xi ra ichí ndaꞌa yo ya sindaꞌa yo na kúꞌvi, sava tuku yo ta̱xi ra ichí ndaꞌa yo ya chindee taꞌan yo xiꞌin naꞌa, sava tuku yo ta̱xi ra ichí ndaꞌa yo ya kaꞌnda chiñu yo nuu na veꞌe ñuꞌu, sava tuku yo ta̱xi ra ichí ndaꞌa yo ya kaꞌan yo inka nuu tuꞌun ya köo ndi̱sikuaꞌa yo.

1 Corintios 16:12

Ta ra ñani yo, ra Apolos, ta ndi̱kaꞌan ni i xiꞌin ra xaa ra xiꞌin nda ñani yo koto nda ndóꞌo̱, sundi köo ndi̱kuvi xaa ra nuu ndo vitin, ná koto ra saa xaa ra nuu ndo nda inka ichí.

1 Corintios 3:10

Ta yeꞌe, Ndioxi ku ra i̱kan ya mani xiꞌin i ta̱xi ra ichí ndaꞌa i ya koo i tá káa iin ra xíni, ra ndíso chiñu síkuaꞌa veꞌe, saa káa i, táva i yu̱ú xaꞌa ya, ta inka ku nda síkuaꞌa ya. Ta nda síkuaꞌa veꞌe nuu ta̱va i yu̱ú xaꞌa, ta ndee ni xíniñuꞌu nda kiꞌin vaꞌa nda kuenta ndá kuꞌva síkuaꞌa nda ya.

1 Corintios 3:22

Tá kúu yeꞌe Pablo xiꞌin ra Apolos, xiꞌin ra Pedro tin ñuu ivi yóꞌó, saa tu ya táku yo, xiꞌin ya xáꞌni yoo, saa tu tiempo ya ndóo yo vitin, xiꞌin ya kuu tiempo ya vaxi. Ndiꞌi ya yóꞌó ta xaꞌa mií ndo íyo ndiꞌi ya.

1 Corintios 3:7

Yakan kua ni köo ndáa yaꞌvi ya unku nde chíꞌi ta unku nde kóso ya. Ya ndee ni ndáa yaꞌvi ku ya íkan Ndioxi, chi mií ra ku ra táxi xáꞌnu ñaꞌa chíꞌi nde.

1 Corintios 9:17

Sundi tá xaꞌa ya kúni mií i íkan i ku chiñu yóꞌó nuu Jesucristo, ta nda naꞌa ta chaꞌvi va na yeꞌe. Ta süvi saa íyo ya, süvi mií i ndínduku chiñu yóꞌó, chi mií Ndioxi ku ra ka̱na yeꞌe ta xa̱ꞌnda ra chiñu nuu i ya kaꞌan ndoso i tuꞌun vaꞌa xaꞌa Tata yo Jesucristo xiꞌin naꞌa.

2 Corintios 11:23

Tá tu kútai ni ini nda chi nda xáa chiñu ni nuu Cristo ku nda túvi nda, ta yeꞌe, ta ndee vaꞌa ka va xáa chiñu i nuu ra. Nda tá káa iin ra kíꞌvi va saa káa i ya káꞌan i saa. Chi yeꞌe ta ndee ni ka chíkaa i ndee nuu nda ñaa, kuaꞌa ni ichí ku̱nduvaꞌa na xiꞌin i, ta kuaꞌa ni ichí chi̱kaa na yeꞌe veꞌe kàà nuu nda ñaa, ta ndi̱xaꞌa ndee ndiꞌi ini i ndo̱ꞌo i saa, ta kuaꞌa ni ichí ku̱ni kaꞌni na yeꞌe.

2 Corintios 3:3

Ta teꞌe ni va náꞌa ya chi ndóꞌo̱, tá íin tutu ya ta̱a Jesucristo ta̱xi ra ndaꞌa nde, saa íin ndo, ta süvi xiꞌin nduta káꞌi tutu kua ta̱a ra ya, chi xiꞌin mií Tachi I̱í Ndioxi ra táku kua ta̱a ra ya. Ta köo ndi̱taa ra ya nuu yu̱ú, chi nuu nima naꞌa va ta̱a ra ya.

2 Corintios 3:6

Iindaa mií Ndioxi ku ra ta̱xi ndee ndaꞌa nde ya kuchiñu nde xaa súvi nde tuꞌun ya xa̱á ki̱ndoo ra ikan ra xiꞌin na ñuu ra. Ta tuꞌun ya xa̱á ki̱ndoo ra xiꞌin yo, ta köo ndi̱kaꞌi ya nuu yu̱ú tá kuꞌva ndi̱xiyo ley Ndioxi ya ta̱xi ra ndaꞌa ra Moisés xinaꞌa, chi ley ikán ta ta̱xi ya kuachi xaꞌa naꞌa ndi̱xiꞌi na, sundi Tachi I̱í Ndioxi ta ya táxi kutaku yo ku ya.

2 Corintios 4:1

Ta ndeꞌe ta köo ndíko koo ini nde xiꞌin chiñu ya ta̱xi Ndioxi ndaꞌa nde íkan nde, chi xaꞌa ya kúndaꞌvi ni ini ra xíni ra ndeꞌe va kua ta̱xi ra chiñu yóꞌó ndaꞌa nde.

2 Corintios 4:5

Tá káꞌan ndoso nde tuꞌun vaꞌa xaꞌa Jesucristo xiꞌin naꞌa, ta süvi xaꞌa mií nde kua káꞌan nde xiꞌin na, chi xaꞌa mií Jesucristo kua káꞌan nde xiꞌin na, ya kúu ra Tata yo. Ta ndeꞌe, tá íin moso ndo, na xáa chiñu nuu ndo, saa íin nde. Ta xaꞌa Tata yo Jesucristo kua íkan nde saa.

2 Corintios 4:7

Tuꞌun vaꞌa xaꞌa Jesucristo ta tá káa íin ya kuika saa íin ya. Ta ndiꞌi yo kándixa tuꞌun yóꞌó tá íin kisi ñuꞌú ya ñúꞌu ya kuika ikán saa íin yo. Yakan vaꞌa xíto inka naꞌa ndee ya íyo xiꞌin yo ta nuu Ndioxi vaxi ya, süvi nuu mií yo vaxi ya.

2 Corintios 5:18

Ta mií Ndioxi ku ra i̱kan saa xiꞌin yo, nda̱sa xa̱á ra yóo, chi si̱kitaꞌan vaꞌa ra yóo xiꞌin mií ra tixin Jesucristo. Ta ñaa ta̱xi ra chiñu ndaꞌa ndeꞌe ya chindee nde naꞌa, ndikitaꞌan mani na xiꞌin ra.

2 Corintios 6:1

Ndóꞌo̱ xiꞌin ndeꞌe, ta iin káchi xáa chiñu yo nuu Ndioxi, yakan xíkan ni nde ya mani nuu ndo ya ná kundàà vií ni ndo ya vaꞌa ndi̱niꞌi ndo nuu Tata yo.

2 Corintios 6:4

Nda vaꞌa ka va íkan nde, chi ndiꞌi ya íkan nde nuu na ta káꞌan ya xaꞌa nde ya xáa chiñu nde nuu Ndioxi. Xáꞌa ndee ini nde xiꞌin ndiꞌi tindoꞌo ya vaxi nuu nde, saa tu tindiꞌi ini ya vaxi nuu nde, xiꞌin ya kúmani ñaꞌa xíniñuꞌu nde, saa kúndee ini nde xiꞌin ndiꞌi ya suchi ini vaxi nuu nde.

Efesios 3:7

Ta yeꞌe, xaꞌa ya vaꞌa ni Ndioxi xiꞌin i, kúꞌvi ni ini ra xíni ra yeꞌe yakan i̱kan ra saa xiꞌin i, si̱niꞌi uun ra chiñu yóꞌó nuu i ya kaꞌan ndoso i tuꞌun vaꞌa xaꞌa ra xiꞌin naꞌa, ndá kuꞌva kua kaku na.

Colosenses 1:23

Saa nduu ndo tá tu tuun ni kándixa ndo tuꞌun vaꞌa xaꞌa Tata yo Jesucristo tá tu ná sïndikoo ndo tuꞌun ra ya ndee ni teꞌe xi̱ni soꞌo ndo. Ta xa ndiꞌi ni kúu xaꞌa ñuu ivi xi̱ni soꞌo na xaꞌa tuꞌun ra, taꞌan ya ikán kua káꞌan ndoso yeꞌe Pablo.

Colosenses 1:25

Ta xaꞌa mií ndo kua ta̱xi Ndioxi chiñu ndaꞌa i ya chindee taꞌan i xiꞌin ndo nuu káꞌan ndoso i tuꞌun ra xiꞌin naꞌa ndiꞌi ni kúu ñaꞌñu.

1 Timoteo 1:12

Táxi ni i tixaꞌvi ndaꞌa Tata yo Jesucristo, taa ra ta̱xi ni ndee ndaꞌa i, saa chi ndáa ni ini ra xíni ra yeꞌe yakan ndi̱kaxin ra yeꞌe ya xaa súvi i chiñu nuu ra.

1 Pedro 4:10

Saa chi Iva yo Ndioxi ta xa kuaꞌa ni va ya vaꞌa, ya xínituni ke̱e nuu ndivi ta̱xi ra ndaꞌa iin iin ndo, ya kuniñuꞌu ndo ya ikan ndo ya vaꞌa xiꞌin taꞌan ndo. Saa kua kuchiñu ndo ikan ndo kuaꞌa ni ya vaꞌa xaꞌa ya kúꞌvi ni ini Ndioxi xíni ra ndóꞌo̱.