1 Corintios 2:6 - Xochapa Mixteco

⁶ Ta saa ni, ya ndaa kua ndítuꞌun nde tuꞌun ndíchi xiꞌin naꞌa, na xa xuxa ini xiꞌin tuꞌun Ndioxi. Ta ya ndíchi ndítuꞌun nde xiꞌin na, ta süvi taꞌan ya ndíchi íyo ñuu ivi yóꞌó ku ya, ni süvi taꞌan ya ndíchi kúu mií na chiñu ñuu ivi yóꞌó ku ya, chi ya ndíchi kúu mií na chiñu yóꞌó, ta ya ndíꞌi xaꞌa va ku ya.

1 Corintios 2:6 Mawu Ofanana

San Mateo 13:22

Ta ndikin ya ndi̱koyo tañu iñu ku ya káꞌan xaꞌa na xíni soꞌo tuꞌun Ndioxi, saa ndíꞌi ni ini na xaꞌa chiñu íyo ñuu ivi yóꞌó, án kúni na ndukuika ni na, ta ndiꞌi ya yóꞌó ta síndiꞌi xaꞌa ya tuꞌun Ndioxi ya xi̱ni soꞌo na, ta köo táxi ya kuaꞌnu tuꞌun ra nima na.

San Mateo 19:21

Saa ndi̱kuiin Jesús, káꞌan ra: ―Tá tu kúni un koo un iin taa ra vaꞌa ni, kuáꞌan xiko ndiꞌi ñaꞌa ya kúu mií un, saa siniꞌi un xuꞌun nuu na ndaꞌvi. Saa kua ndukuika ni un xiꞌin Ndioxi nuu ndivi. Tá ndiꞌi i̱kan un saa, ta saa kixi un kundikun un yeꞌe ―káchi Jesús xiꞌin ra.

San Mateo 5:48

Xaꞌa ya ñaa kua ná koo ndo naꞌa, na ndaa ini, tá kuꞌva íyo Iva yo Ndioxi ra i̱í, ra ndaa ini ―káchi Jesús xiꞌin na.

San Lucas 16:8

Saa tá ku̱ndaa ini ra kuika ikán ta ndi̱kaꞌan vaꞌa ra, xaꞌa ya i̱kan moso ra. Yakan káꞌan i xiꞌin ndo na kuäꞌan ichí Ndioxi ta xíni ni na ndá kuꞌva ikan na ya ndikitaꞌan vií na xiꞌin naꞌa, listo ni ka na ikán nuu na xíni Ndioxi ―káchi Jesús.

1 Corintios 1:28

I̱kan Ndioxi saa xiꞌin ndo ndi̱kaxin ra ndóꞌo̱ na vita ini, ndóꞌo̱ köo ndáa yaꞌvi nuu na ñuu ivi yóꞌó. I̱kan ra saa xiꞌin ndóꞌo̱ ya ná kundaa ini na ya kúndasi ni nuu ra ndiꞌi ñaꞌa ya ndee ni ndáa yaꞌvi nuu mií na.

1 Corintios 12:8

Saa chi táxi Tachi I̱í Ndioxi ya vaꞌa ndaꞌa sava na, ya kúchiñu na kúndaa ini na xiꞌin tuꞌun ya ndee ni ndíchi, ta sava tuku na ndee ni íyo ya xínituni na, ndíchi ka vi íyo ya káꞌan na.

1 Corintios 14:20

Ñani yo, vaꞌa ndikani ini ndo tá kuꞌva ndíkani ini naꞌa, na xa xuxa ini, ta ndïkani ini ndo tá kuꞌva ndíkani ini na vali xaꞌa ñaꞌa ya káꞌan i xiꞌin ndo. Ndisaa nuu ya väꞌa ná koo naá ni ini ndo tá kuꞌva naá ni nuu na vali nuu ya väꞌa, saa ná koo ndo.

1 Corintios 2:1

Ñani yo xiꞌin kuꞌva yo, tá ndi̱xaꞌan i xi̱to i ndóꞌo̱. Tá ndi̱kaꞌan ndoso i tuꞌun xaꞌa Jesucristo xiꞌin ndo xaꞌa ñaꞌa ya ndi̱xiyo sěꞌe nuu ndo yachi. Ta köo ndi̱xiniñuꞌu i tuꞌun ndíchi ni kaꞌan i xiꞌin ndo, tuꞌun ya kuchiñu ndo kundaa ini ndo xiꞌin va ku ya ndi̱kaꞌan i xiꞌin ndo.

1 Corintios 2:13

Sundi ndeꞌe, ta ndítuꞌun nde xaꞌa ya ndíchi xiꞌin naꞌa, ta ya sínaꞌa Tachi I̱í ra ndeꞌe kua ndítuꞌun nde xaꞌa xiꞌin na. Ta süvi taꞌan tuꞌun ndíchi ya íyo xi̱ní na ñuu ivi yóꞌó kua ndítuꞌun nde xiꞌin na. Xiꞌin tuꞌun ndíchi, ya vaꞌa ke̱e nuu ndivi kua ndíkani nde xaꞌa ñaꞌa ya vaꞌa, ya ke̱e nuu ndivi xiꞌin na.

1 Corintios 2:8

Ta ya ndíchi yóꞌó, ta nda iin mií na chiñu ñuu ivi yóꞌó köo ndíkundaa ini xaꞌa ya. Saa chi tá ndíkundaa ini na xaꞌa ya, ta chïnuu vi na Tata yo Jesucristo nuu cruzin, ndikuu, chi ndee ni ndee ku mií ra.

1 Corintios 3:1

Ñani yo xiꞌin kuꞌva yo, yachi, ta yeꞌe köo ndíkuvi ndituꞌun i xiꞌin ndo tá kuꞌva ndítuꞌun i xiꞌin naꞌa, na xa xuxa tuꞌun Ndioxi ini. Yakan ndi̱kaꞌan i xiꞌin ndo tá kuꞌva káꞌan yo xiꞌin naꞌa, na ndíkani ini ndisaa xaꞌa mií, chi ndóꞌo̱ ta tá íin na lee vali va saa íin ndo, xaꞌa ya sikan ndi̱kundikun ndo ichí Tata yo Jesucristo.

2 Corintios 1:12

Ta ndeꞌe, ta ndee ni va kúsini nde chi vívií ni va ndi̱xiyo nde xiꞌin ndiꞌi ni kúu naꞌa, ta ndee ni ka vaꞌa xi̱taꞌan nde xiꞌin ndóꞌo̱. Chi köo ndi̱xiyo nde xiꞌin ndo tá kuꞌva ndíkani ini mií na ñuu ivi yóꞌó, tá kuꞌva kúni mií Ndioxi kua ndi̱xiyo nde xiꞌin ndo xaꞌa ya kúꞌvi ni ini ra xíni ra ndóꞌo̱.

2 Corintios 13:11

Ñani yo, ya yóꞌó ku ndiꞌi ya káꞌan nde xiꞌin ndo ta vaꞌa ná kusini ni ndo, saa chikaa ni ndo ndee ya kuaꞌnu ka ndo xiꞌin tuꞌun Ndioxi, ta ná ndu xaa ka ndo, ná nduu ndo tá kuꞌva kúni Ndioxi, ta iin yuꞌu koo ndo xiꞌin taꞌan ndo. Ta saa kua vaꞌa koo Ndioxi xiꞌin ndo, ra táxi ya vaꞌa koo ini ndo, xiꞌin ya kúꞌvi ni ini ra xíni ra ndóꞌo̱.

2 Corintios 4:3

Ta sava naꞌa köo kúndaa ini na xiꞌin tuꞌun Ndioxi ya káꞌan ndoso nde nuu na, chi íyo ñaꞌa ndási ini na, ta na ikán ku naꞌa, na ndíkun kuaꞌan ichí nuu ndiꞌi xaꞌa na.

2 Corintios 4:4

Saa ndóꞌo na chi kiti nǎꞌa kúu ndioxi ñuu ivi yóꞌó ku ri ndi̱kasi ya xínituni na ya ná kändixa na tuꞌun vaꞌa xaꞌa Jesucristo ya káꞌan nde xiꞌin na, ta na ikán, tá íin na kuáa̱ saa íin na. Chi köo táxi ri kuni na ya yéꞌe̱ luvi ni kúu mií tuꞌun vaꞌa xaꞌa Jesucristo. Chi mií Jesucristo, tá káa níí mií Ndioxi saa káa ra.

Efesios 2:2

Saa ndi̱xiyo ndo yachi, i̱kan ni ndo ya väꞌa xaꞌa ya xi̱ndikun ndo ichí taꞌan ya ndíkun na ñuu ivi yóꞌó, ta xa̱a súvi ndo ya ndi̱kaꞌan kiti nǎꞌa, kiti xáꞌnda chiñu nuu ndiꞌi tachi nduvaꞌa xiꞌin ndo, ta nda vitin ta xáꞌnda chiñu yaa va ri nuu naꞌa, na köo xíin kuni soꞌo ya káꞌan Ndioxi.

Colosenses 1:28

Ta ndeꞌe káꞌan ndoso nde xaꞌa ra xiꞌin ndiꞌi naꞌa, ndíkani nde nuu na, saa sínaꞌa nde na xaꞌa ndiꞌi tuꞌun ra ya ndíchi táxi Ndioxi ndaꞌa nde. Chi kúni i sinaꞌa i na yóꞌó nuu Ndioxi ya nduu na naꞌa, na ndǎku ni ini nuu ra, ta xa ku̱ndaa vaꞌa ini na xiꞌin tuꞌun ra.

Colosenses 4:12

Saa tu ra Epafras, ra ñuu mií ndo, tíꞌvi ni ra tuꞌun mani xaa nuu ndo. Ta ndiꞌi saa ichí ndee ni káꞌan ra xaꞌa ndo xiꞌin Ndioxi ya ndee ni ná koo vaꞌa ndo, ta ná kuaꞌnu ni ka ndo xiꞌin tuꞌun Ndioxi ya kundaa vaꞌa ini ndo xiꞌin ya, saa xaa súvi ndo ya kúni mií Ndioxi.

HEBREOS 5:14

Sundi naꞌa, na kúndaa vaꞌa ini, ta xáꞌnu ka na xiꞌin tuꞌun Ndioxi. Ta na ikán ku na íin tá íin na xa xa̱ꞌnu, na xa vaꞌa xíxi mií, saa chi xíni na unkua vaꞌa ta unkua väꞌa.

HEBREOS 6:1

Ná kuaꞌnu ka yo xiꞌin tuꞌun Ndioxi nda ná xinu koo yo kuu yo tá íyo na xa xa̱ꞌnu. Ta ná ndïko koo tuku yo ikan yo taꞌan ñaꞌa ya xa si̱naꞌa na yoo tá xaꞌa. Chi tá xaꞌa ta si̱naꞌa na yo ya kundàà ni ini yo kuni yo Ndioxi, ta saa si̱naꞌa na yo ya sindoo yo ñaꞌa ya väꞌa, ya köo ndáa yaꞌvi i̱kan yo tá yachi.

Santiago 3:15

Ya ndíchi kúu mií ndo ta süvi nuu Ndioxi vaxi ya, ya kána koo xi̱ní na ñuu ivi yóꞌó va ku ya, chi kiti nǎꞌa ku ri táxi ndíkani ini ndo ya ndee ni ndíchi ndo, túvi ndo.

Santiago 3:2

Chi ndiꞌi yo ta yo yáꞌa yuꞌú ku ndiꞌi va yo, ta naꞌa, na köo yáꞌa tuꞌun káꞌan, na ñaa ku na xa ndi̱xinu íyo vaꞌa ni nima na xiꞌin ra, yakan kuchiñu na kaꞌnda chiñu na nuu ndiꞌi ikin kuñu na.

1 Pedro 5:10

Sundi ndóꞌo̱ ta kündiꞌi ini ndo chi tá sindiꞌi ndi̱yaꞌa uvi ndaa kivi ya ndi̱xuꞌvi ni ndo, ta mií Ndioxi ku ra ndasa xuxa ini ndo, ta saa taxi ra ndee ndaꞌa ndo ya tuun ni kundikun ndo ra, saa niꞌi ndo ndee nuu ra ndundee ini ndo ta ta̱xi ra ichí ndaꞌa ndo tuun ni koo ndo xiꞌin ra.