1 Corintios 16:13 - Xochapa Mixteco

¹³ Ñani yo xiꞌin kuꞌva yo, kuenta ni koo ndo, ta ndinuꞌu ni ini ndo kandixa ndo Tata yo Jesucristo. Kuu ïꞌvi ndo, ndaku koo nima ndo, ta tuun ni kundikun ndo Tata yo.

1 Corintios 16:13 Mawu Ofanana

San Mateo 25:13

Saa ndi̱kaꞌan ka ra xiꞌin nda, káchi ra: ―Saa ndóꞌo̱, kundoo tuꞌva ndo chi köo xíni ndo ndá kivi kua, ni ndá hora kua ndiko koo yeꞌe Taa ra xa̱a ñuu ivi yóꞌó ―káchi ra xiꞌin nda.

San Mateo 26:41

Küsun ndo, kaꞌan ni ndo xiꞌin Ndioxi ya ná ndïkava ndo nuu ya väꞌa. Saa chi kúni ni va ndo ikan ndo ya vaꞌa, sundi vita ni va ini ndo ―káchi ra xiꞌin nda.

San Lucas 21:36

Xíniñuꞌu ndo koo nduvi ndo, ndinuni kaꞌan ndo xiꞌin Ndioxi ndiꞌi saa tiempo ya ná ndöꞌo ndo saa, ta kuchiñu ndo kaku ndo nuu ndiꞌi tindoꞌo ya vaxi ñuu ivi. Ta saa kuchiñu ndo kundita ndo ndikuiso ndo yeꞌe, Ra xa̱a ñuu ivi yóꞌó ―káchi Jesús xiꞌin na.

1 Corintios 14:20

Ñani yo, vaꞌa ndikani ini ndo tá kuꞌva ndíkani ini naꞌa, na xa xuxa ini, ta ndïkani ini ndo tá kuꞌva ndíkani ini na vali xaꞌa ñaꞌa ya káꞌan i xiꞌin ndo. Ndisaa nuu ya väꞌa ná koo naá ni ini ndo tá kuꞌva naá ni nuu na vali nuu ya väꞌa, saa ná koo ndo.

1 Corintios 15:58

Ñani mani, xaꞌa ya ñaa kua xíniñuꞌu ndo ndee ni ndee kundikun ndo ichí Ndioxi, xaꞌa ni ndo ndee ta ndïko koo ini ndo ya íkan ndo saa, iin tuun saa chikaa ini ndo xaa chiñu ni ndo xaꞌa Tata yo, saa chi chiñu íkan ndo nuu ra, ta süvi ya uun ku ya.

2 Corintios 1:24

Ta ya ñaa ta köo kúni kachi ya, xáꞌnda ni nde nuu ndo xaꞌa kuꞌva ya ndáa ini ndo xíni ndo Ndioxi, chi ndóꞌo̱ ta xa ndee ni va ndáa ini ndo xíni ndo ra, ta ndisaa ya kúni ndeꞌe kua, iin káchi xaa chiñu nde xiꞌin ndo nuu chindee taꞌan nde xiꞌin va ndo ya ná kusini ni ndo.

Gálatas 5:1

Na taꞌan yo, xaꞌa ya sa̱ña Jesucristo yoo yakan vaꞌa íyo ndíka yo. Kuenta ni koo ndo, tuun ni kundikun ndo ichí nuu íyo ndíka ndo, ta täxi ndo nduu tuku ndo naꞌa, na íin tá íin naꞌa, na sa̱ta na xáa chiñu nuu na xiꞌin ya nduxa.

Efesios 3:16

Xíkan ni i ya mani nuu ra ya ná taxi ra Tachi I̱í ra koo ya xiꞌin ndo, saa taxi ra ndee ndaꞌa ndo ya vaꞌa nduxuxa nima ndo xiꞌin tuꞌun ra, ta vaꞌa ikan Ndioxi saa xiꞌin ndo, chi ndee ya kúu mií ra ta chee ni ya ta ni köo ndíꞌi tu xaꞌa va ya.

Efesios 6:10

Ta ya si̱ndiꞌi i káꞌan i xiꞌin ndo kua, kundaa ni ini ndo kuni ndo ndee ya chee ni kúu mií Tata yo Jesucristo. Saa kuchiñu ndo ndundee ni ini ndo xiꞌin ndee ra.

Filipenses 1:27

Ta kuenta ni koo ndo xaa súvi ndo ndisaa ya káꞌan tuꞌun ra xiꞌin ndo. Án xaa i koto i ndóꞌo̱ án xäa i nuu ndo, sundi kúni i kuni soꞌo i tuꞌun vaꞌa xaꞌa ndo ya ndaku ni íyo ndo xiꞌin tuꞌun Tata yo, ta iin yuꞌu ni ku ndo, iin ítaꞌan ndiꞌi ndo xáa chiñu ndo xaꞌa ra.

Filipenses 4:1

Xaꞌa ya ñaa kua káꞌan ni i xiꞌin ndo ñani yo xiꞌin kuꞌva yo, tuun ni kundikun ndo Tata yo Jesucristo. Xa xíni mií ndo ndee ni kúꞌvi ini i xíni i ndóꞌo̱, ta kúni ni i kuni i ndóꞌo̱. Chi ndóꞌo̱ ku ndo xáa sií ni ini i, ta vaꞌa ni kée i xiꞌin ndo, kúsini ni i xiꞌin ndo, tá káa ñaꞌa ya níꞌi iin ra xínu, saa íyo ndo nuu i, ndáa yaꞌvi ni ndo.

Filipenses 4:13

Ta kúchiñu i xáꞌa ndee ini i xiꞌi ndiꞌi ni kúu va ya, chi Cristo ku ra táxi ndee ndaꞌa i yáꞌa i nuu iin iin ya.

Colosenses 1:23

Saa nduu ndo tá tu tuun ni kándixa ndo tuꞌun vaꞌa xaꞌa Tata yo Jesucristo tá tu ná sïndikoo ndo tuꞌun ra ya ndee ni teꞌe xi̱ni soꞌo ndo. Ta xa ndiꞌi ni kúu xaꞌa ñuu ivi xi̱ni soꞌo na xaꞌa tuꞌun ra, taꞌan ya ikán kua káꞌan ndoso yeꞌe Pablo.

Colosenses 4:12

Saa tu ra Epafras, ra ñuu mií ndo, tíꞌvi ni ra tuꞌun mani xaa nuu ndo. Ta ndiꞌi saa ichí ndee ni káꞌan ra xaꞌa ndo xiꞌin Ndioxi ya ndee ni ná koo vaꞌa ndo, ta ná kuaꞌnu ni ka ndo xiꞌin tuꞌun Ndioxi ya kundaa vaꞌa ini ndo xiꞌin ya, saa xaa súvi ndo ya kúni mií Ndioxi.

Colosenses 4:2

Ñani yo xiꞌin kuꞌva yo, xïkuiin ndo kaꞌan ni ndo xiꞌin Ndioxi, saa koo ndúvi ni ndo ndiꞌi saa kivi ya taxi ni ndo tixaꞌvi ndaꞌa ra.

1 Tesalonicenses 3:8

Ndakua vaꞌa ku̱ni nde, ndi̱kiꞌin ni nde ini nde tá ku̱ndaa ni nde xaꞌa ndo ya vaꞌa ni tuun ndíkun ndo Tata yo Jesucristo.

1 Tesalonicenses 5:6

Yakan kua ná köo yo tá kuꞌva íin naꞌa, na kíxi. Xíniñuꞌu yo kundito yo. Küsun yo tá íkan naꞌa, na köo íyo ndúví, ná kundito yo, ta ná koo kaxin teꞌe ini yo.

2 Tesalonicenses 2:15

Yakan káꞌan nde xiꞌin ndo ñani yo tin kuꞌva yo, tuun ni kundikun ndo ya si̱naꞌa nde ndóꞌo̱ kándixa ndo, xiꞌin ya ndi̱kaꞌan nde xiꞌin ndo, tin ya xi̱ni soꞌo ndo xaꞌa nde xiꞌin ya ta̱a nde nuu tutu ti̱ꞌvi nde xaa ndaꞌa ndo.

1 Timoteo 6:12

Xaꞌa ya ndáa ni ini un xíni un Tata yo Jesucristo, ta tá káa iin ra kéꞌe taꞌan saa káa un, chikaa ni ka un ndee ikan un tá kuꞌva íkan iin ra lapa ra ndee ni chíkaa ndee tá kuaꞌan ra nuu kuachi. Ta saa ikan un ya ná kuchiñu un niꞌi un koo un xiꞌin Ndioxi ndiꞌi saa kivi ya vaxi. Chi xaꞌa ya kutaku un xiꞌin ra kua ka̱na ra yóꞌo̱, ta nuu ndiꞌi na kua ki̱ndoo un ya xaa súvi un tuꞌun ra ya kándixa un.

2 Timoteo 2:1

Ñani yo Timoteo, yóꞌo̱, ta nda tá íyo seꞌe mií i saa íyo un, yakan káꞌan i xiꞌin un chikaa ni un ndee chi kúꞌvi ni ini Ndioxi xíni ra yóꞌo̱ xaꞌa ya kúu un kuenta Tata yo Jesucristo.

2 Timoteo 4:5

Sundi yóꞌo̱, ta kaxin teꞌe ni koo ini un, saa xaꞌa ndee ndiꞌi ini un xiꞌin ya tíxuꞌvi ni un xaꞌa Tata yo Jesucristo, ta ku ïꞌvi un kaꞌan ndoso un tuꞌun vaꞌa xaꞌa ra, saa vívií xaa súvi un chiñu ya ta̱xi Iva yo Ndioxi ndaꞌa un.

2 Timoteo 4:7

Tá káa iin ra lapa, ra ndee ni vaꞌa xíka nuu kuachi, saa íyo i. Ta íyo tu i tá káa iin taa, ra ndee ni vaꞌa xínu va, chi ndee ni chi̱kaa ini i xa̱a súvi ni i chiñu nuu Tata yo Jesucristo, ta vitin xa si̱xinu ndiꞌi i chiñu i̱kan i nuu ra. Ta köo ndi̱sindoo i ichí ra, ndee ni ndáa ini i xíni i ra.

1 Pedro 4:7

Ta vaꞌa ná kundaa ini ndo chi xa yati ni va ndiꞌi xaꞌa ñuu ivi yóꞌó, yakan ndóꞌo̱ ta káxin teꞌe koo ini ndo, ta ndinuꞌu ni ini ndo kaꞌan ni ndo xiꞌin Ndioxi ndiꞌi saa kivi.

1 Pedro 5:8

Ta káxin teꞌe koo ini ndo, küsun ndo, kundito ndo, saa chi kiti nǎꞌa, ri kánitaꞌan xiꞌin ndo ta ndá yokan ndíkun ri xíka ri sata ndo. Tá kuꞌva íkan kiti lion, ri ndee ni ndíkun xíka ndúku tiin kiti kaxi ri, kuꞌva saa íkan kiti nǎꞌa xiꞌin ndo.

El Apocalipsis 16:15

Xaꞌa ya ikán kua xíniñuꞌu ndi̱kaꞌán ini ndo xaꞌa tuꞌun ya ndi̱kaꞌan Tata yo Jesucristo xiꞌin na ndíkun sata ra, káchi ra saa: ―¡Koto ndo vii! Tá íkan iin ra kuiꞌna, kivi köo ndátun ndo ra. Saa koo kivi ndiko koo i ñuu ivi. Ta naꞌa na ndíto koo tuꞌva na ndikiꞌin na yeꞌe, ta taxi Ndioxi ya ndixa kusini na ikán. Ta naꞌa na ndíto, xíniñuꞌu koo tuꞌva tikoto na ya kundixi na, ya ná kükaꞌan nuu na íyo chála na kivi ndiko koo i ―káchi Tata yo Jesucristo ndi̱kaꞌan ra.