1 Corintios 15:3 - Xochapa Mixteco

³ Ta vaꞌa chi tuꞌun ya núnu̱ú xa si̱naꞌa i ndóꞌo̱ kua si̱naꞌa mií Tata yo Jesucristo yeꞌe, ta ndee ni ndáa yaꞌvi ya káꞌan i xiꞌin ndo, chi xaꞌa kuachi yoo kua ndi̱xiꞌi Tata yo Jesucristo, tá kuꞌva káꞌan mií tuꞌun Ndioxi ya ta̱a na xinaꞌa.

1 Corintios 15:3 Mawu Ofanana

San Mateo 26:24

Yeꞌe kuu Taa, ra xa̱a ñuu ivi yóꞌó, ta ndixa kua xíniñuꞌu kuvi i, tá kuꞌva káꞌan tuꞌun Ndioxi ya ta̱a nda profeta xaꞌa i xinaꞌa. Sundi ¡ndaꞌvi ni taa ra ndixiko vata yeꞌe nuu na sáa ini xíni yeꞌe! Vaꞌa ni ka kua tá ná käku va ra, ndikuu ―káchi Jesús xiꞌin nda.

San Mateo 26:28

Chi nduta yóꞌó ku nií i rá kuita xaꞌa na ñuu ivi. Ta xiꞌin rá kuita yóꞌó ku rá kindoo Ndioxi iin trato xa̱á xiꞌin kuaꞌa ni naꞌa, nuu xáa kaꞌnu ini ra xaꞌa kuachi na.

San Lucas 24:25

Saa ndi̱kaꞌan ra xiꞌin nda, káchi ra saa: ―¿Ndachu kíꞌvi ni ndo, ta uꞌvi ni kúndaa ini ndo xiꞌin ndiꞌi ya ta̱a nda ndi̱kaꞌan ndoso tuꞌun yuꞌu Ndioxi xinaꞌa!

San Juan 1:29

Ta ndi̱tuvi inka kivi saa xi̱ni ra Juan Jesús vaxi ra nuu ra, saa ndi̱kaꞌan ra xiꞌin naꞌa, káchi ra saa: ―¡Koto ndo vii! Ra káa ku ra síniꞌi Ndioxi kuvi ra xaꞌa kuachi yo ñuu ivi. Tá íyo levo síniꞌi naꞌa nuu Ndioxi ya síndiꞌi xaꞌa ra kuachi na, ta saa íyo ra káa.

Los Hechos 17:2

Ta saa ti̱ndaa kivi ya ndíkundee na judío, ta ke̱e ra Pablo kuaꞌan ra veꞌe ñuꞌu sínaꞌa ra na tuꞌun Ndioxi chi saa ini ra. Uni ichí kivi i̱í tá ndíkundee na kua i̱kan ra saa.

Los Hechos 3:18

Sundi Ndioxi ta xa̱a nduvi ndiꞌi ra ya íyo nuu tuꞌun ra, ya ta̱a ndiꞌi nda ndi̱kaꞌan ndoso tuꞌun yuꞌu ra xinaꞌa, chi ya ikán káchi ya saa: “Xíniñuꞌu ndoꞌo ni Cristo, ra tiꞌvi Ndioxi kixi sikaku yoo ñuu ivi yóꞌó”, káchi ya ta̱a nda ―káchi ra Pedro xiꞌin na.

Los Hechos 8:32

Saa nda̱a ra. Ta tuꞌun Ndioxi ya káꞌvi ra kuaꞌan ra, káchi ya saa: Tá ndóꞌo iin kiti levo loꞌo ndáka xitoꞌo ri kuaꞌan ri kuvi ri, saa ndo̱ꞌo ra. Ni köo ndi̱kaꞌan ra tá kuaꞌan ra xiꞌin na kuvi ra. Tá íkan levo loꞌo ni köo ndáꞌi ri iin yayaa ndíchi ri xáꞌnda na kachi sata ri, saa i̱kan ra. Yayaa xi̱ndichi ra nuu na, ni köo ndi̱xuna ra yuꞌu ra ya kaꞌan ra xiꞌin na.

ROMANOS 3:25

Si̱niꞌi Ndioxi Jesucristo ya ndi̱soko ra mií ra xaꞌa kuachi ndiꞌi ni kúu yo. Ndiꞌi naꞌa na kándixa ya ndi̱xita nií ra ndaꞌa cruzin xaꞌa kuachi na, ta xáa kaꞌnu ini ra xaꞌa kuachi na. Ta ya vaꞌa i̱kan Ndioxi xiꞌin na kua sínaꞌa na ya kúu ra iin taa ra ndaa ni ini. Ta köo ndi̱sitixuꞌvi kama ra na xaꞌa ya väꞌa i̱kan na xinaꞌa, ya kaꞌnu ni ini Ndioxi yakan ku̱ndee ini ra xiꞌin ya väꞌa i̱kan yo.

ROMANOS 4:25

Saa chi mií ra ku ra ta̱xi Jesucristo ya ndi̱xiꞌi ra xaꞌa kuachi yo, ta xaꞌa ya ndi̱taku ra yakan ku̱chiñu ra si̱kitaꞌan ra yoo xiꞌin Ndioxi, saa ku̱chiñu yo ndu̱u yo tá íin naꞌa na vaꞌa, na köo ka kuachi kúu mií nuu ra.

1 Corintios 11:2

Ñani yo tin kuꞌva yo, chínuu vaꞌa ni i tuꞌun ndo, saa chi ndíkaꞌán ni ini ndo xaꞌa i. Ta köo síndoo ndo ichí ya si̱naꞌa i ndóꞌo̱.

1 Corintios 11:23

Ta ya sínaꞌa i ndóꞌo̱ vitin ta mií Tata yo Jesucristo ku ra si̱naꞌa yeꞌe, ta saa íkan i xiꞌin ndo. Mí ñûu tá ndi̱xiko vata ñaꞌa ra Judas Tata yo Jesús, saa ti̱in ra xita vaꞌa,

2 Corintios 5:21

Nda iin kuachi köo ndi̱kan Jesucristo, ta xaꞌa kuachi yoo kua si̱kuiso Ndioxi kuachi sata ra, ya ná kuchiñu yoo nduu yo tá íin naꞌa, na köo ka kuachi kúu mií nuu Ndioxi, xaꞌa ya ndi̱kitaꞌan yo xiꞌin Jesucristo.

Gálatas 1:12

Chi süvi na ivi yóꞌó ku na ndi̱taxi ya ndaꞌa i, ta ni süvi na ivi yóꞌó ku na ndi̱sinaꞌa ya yeꞌe. Mií Tata yo Jesucristo ku ra ta̱xi ya ndaꞌa i tá ndi̱tuvi ra nuu i.

Gálatas 1:4

Chi Tata yo Jesucristo ta ndi̱taxi ra mií ra ndi̱xiꞌi ra xaꞌa kuachi yo, xaꞌa ya saa chi̱tuni mií Iva yo Ndioxi, ya kuchiñu yo kaku yo nuu ya väꞌa, ya xáꞌnda chiñu ñuu ivi yóꞌó, nuu ndóo yo tiempo vitin.

Gálatas 3:13

Chi Cristo ku ra cha̱ꞌvi xaꞌa yo nuu chiꞌña ya ta̱xi ley ya ta̱a Moisés ndaꞌa yo, chi köo ndi̱kuchiñu yo sixinu yo ya káꞌan ley ikán. Xaꞌa ya ikán kua cha̱ꞌvi Jesucristo xaꞌa yo chi ndi̱xaꞌa ndee ini ra si̱kuiso ra chiꞌña xiꞌin mií ra, saa ku̱chiñu ra ki̱ndaa ra chiꞌña sata yo. Chi saa káꞌan mií tuꞌun Ndioxi, káchi ya saa: “Ndiꞌi naꞌa, na tíkaa ikin kuñu nuu itun cruzin, ta na ndíso chiꞌña ku na”, káchi ya.

Efesios 1:7

Ta ya kuchiñu ra sikaku ra yoo kua cha̱ꞌvi Jesucristo xaꞌa kuachi yo xiꞌin nií ra nduta ndi̱xita nuu cruzin tá ndi̱xiꞌi ra. Saa ku̱u nuu ndi̱saña yo ki̱ndoo ndíka yo nuu ya väꞌa, ya xa̱ꞌnda chiñu nuu yo. Xaꞌa ya kaꞌnu ni ini Ndioxi kua i̱kan ra saa xiꞌin yo.

Efesios 5:2

Tá kuꞌva íkan Cristo xiꞌin yo, kúꞌvi ni ini ra xíni ra yoo, ta saa xíniñuꞌu ndóꞌo̱ kuꞌvi ni ini ndo kuni taꞌan ndo. Chi xaꞌa ya kúꞌvi ni ini ra xíni ra yoo kua ndi̱soko ra mií ra xaꞌa yo. Tá kuꞌva íkan naꞌa, sóko na kiti levo loꞌo nuu Ndioxi ya xíxi ri nuu ra, saa kuandaa xiko ya támi ni xáꞌan nuu ra. Ta saa i̱kan Cristo xiꞌin yo tá ndi̱xiꞌi ra, ta nda̱a xiko tami ni xaꞌan nuu Ndioxi.

HEBREOS 5:1

Ta vaꞌa ná ndikani i nuu ndo ya kuchiñu kundaa ini ndo xaꞌa sutu ra chee. Chi mií Ndioxi ku ra ndíkaxin iin iin taa ya ndúu nda sutu chee nuu ra. Ta ra sutu ikán ku ra sóko ñaꞌa na ñuu nuu Ndioxi, saa xáꞌni ra kiti sana na nuu Ndioxi xaꞌa kuachi na.

HEBREOS 5:3

Xaꞌa ya kúu ra, ra ivi taꞌan mií yo yóꞌó, ta ìyo ni ndikava ra nuu kuachi, yakan kua xíniñuꞌu tu mií va ra xáꞌni ra kiti xaꞌa kuachi ra, saa xáꞌni ra kiti xaꞌa kuachi na ñuu ra nuu Ndioxi.

1 Pedro 1:11

Ta Tachi ya kúu mií Cristo, ra ndi̱kaxin Ndioxi kixi ndoꞌo ni xaꞌa yo kua ta̱xi xiní ndaꞌa nda ndi̱kaꞌan tuꞌun yuꞌu Ndioxi, ya kundaa ini nda xaꞌa ñaꞌa ya chee ni kuu mií ra kixi kivi vaxi, ta ndu̱ku ni tu nda kuꞌva kundaa ini nda xaꞌa ra ndá taa kuu ra, ta saa ndu̱ku tu nda kundaa ini nda ndá kivi kua kixi ra.

1 Pedro 2:24

Tá ndi̱xiꞌi Cristo nuu itun cruzin ta nuu nu ikán kua ndi̱kundiso ndiꞌi ra kuachi yo to̱so ra ya sata ikin kuñu ra kuaꞌan ya xiꞌin ra. I̱kan ra saa xiꞌin yo ya ná köo ka ndee kuu mií kuachi yo ya kaꞌnda chiñu ka ya nuu yo, saa kutaku yo ikan yo ya vaꞌa. Xaꞌa ya ndo̱ꞌo ni ra yakan si̱ndaꞌa ra yoo.

1 Pedro 3:18

Saa chi saa kua ndo̱ꞌo tu mií va Tata yo Jesucristo xaꞌa yo, ndi̱xiꞌi ra xaꞌa kuachi yo, ta iindaa ichí ndo̱ꞌo ra ndi̱xiꞌi ra, ta küvi ka ra. Ra vaꞌa ni ndi̱xiyo ra, ta ndi̱xiꞌi ra xaꞌa ndiꞌi yo ivi kuachi ya kuchiñu kundaka ra yoo kuꞌun yo nuu Ndioxi. Tá ndi̱xiꞌi ra ta ndi̱ꞌi xaꞌa ikin kuñu ra, saa tá ndi̱taku ra xiꞌin ikin kuñu ra ya xa̱á küvi kuni yo.

1 Juan 2:2

Chi Jesucristo ku ra ndi̱soko mií, ndi̱xiꞌi ra xaꞌa kuachi ndiꞌi yo yakan vaꞌa xa̱a kaꞌnu ini Ndioxi xaꞌa yo. Ta süvi iindaa xaꞌa kuachi yoo ndi̱xiꞌi ra. Ndi̱xiꞌi ra xaꞌa kuachi ndiꞌi ni kúu na ñuu ivi.

El Apocalipsis 1:5

Saa ná ikan tu Tata yo Jesucristo ya vaꞌa xiꞌin ndo, saa chi ndaa ni ini ra, ta ndinuꞌu ini ra ndíkuiin ra xaꞌa tuꞌun ndaa ni káꞌan ra. Ta ra ikán ku ra núnuu ndi̱taku tañu ndiꞌi na ndíi, yakan kúu mií ra ichí kaꞌnda chiñu ra nuu nda rey ñuu ivi yóꞌó. Ta kúꞌvi ni ini ra xíni ra yoo, ta köo ka kuachi ndíso yo nuu Ndioxi, saa chi ndi̱xiꞌi Jesucristo xaꞌa kuachi yo, ta xiꞌin nií ra nduta ndi̱xita ndi̱kata ra kuachi yo, nda̱sa vaꞌa ra yoo nuu Ndioxi.