1 Corintios 15:2 - Xochapa Mixteco

² Tuꞌun ya ndi̱kaꞌan i xiꞌin ndo ku ya síkaku ndóꞌo̱, tá tu ndinuꞌu ni ini ndo kándixa ndo ya xa ndi̱kaꞌan i xiꞌin ndo, tá tu köo ndi̱chikaa uvi ini ndo xiꞌin ya xa xi̱ni soꞌo ndo ndi̱kaꞌan i.

1 Corintios 15:2 Mawu Ofanana

San Lucas 8:13

Ta siꞌva ri ndi̱koyo nuu yu̱ú ku na xíni soꞌo tuꞌun Ndioxi, ta ndíkiꞌin vaꞌa na ya, kúsini ni na xiꞌin ya, sundi täꞌan tiin vaꞌa ya nima na. Ta saa vaxi ya xíto ndoso ñaꞌa, vaxi ya tíxuꞌvi na, ta síndikoo na ichí Ndioxi.

Los Hechos 2:47

Xáa toꞌo ka vi na Ndioxi. Ta ínuu vaꞌa ka vi tuꞌun na nuu inka naꞌa. Ta vitin taan íyo ka na ndíko koo ini xaꞌa kuachi na, ñaa xáa na ndíkundikun na Jesús ta síkaku Ndioxi na.

Los Hechos 8:13

Nda ra Simón, ra tási, ka̱ndixa tuꞌun ya ndi̱kaꞌan ra Felipe. Ta ndi̱xaꞌan ra chi̱chi ra xiꞌin na, saa xa̱á ra xíka ra xiꞌin ra Felipe. Ta ndíkanda ni ini ra xaꞌa yatuꞌun Ndioxi íkan ra Felipe.

ROMANOS 1:16

Kúni i ná kundaa ini ndo, chi yeꞌe ta köo kúkaꞌan nuu i ya kándixa i tuꞌun vaꞌa xaꞌa Jesucristo, chi tuꞌun yóꞌó kúu mií ya ndee Ndioxi ya sikaku ya ndiꞌi naꞌa, na kándixa ya káꞌan ya. Xiꞌna ni ka na judío ku na xi̱ni soꞌo tuꞌun vaꞌa xaꞌa Jesucristo, saa xi̱ni soꞌo tu naꞌa, na köo kúu judío va ya.

ROMANOS 11:22

Koto ndó, vaꞌa ni Ndioxi kúndaꞌvi ni ini ra xíni ra yoo, sundi köo sísiki ra xiꞌin naꞌa, na köo xíin kandixa ñaꞌa, ta kúndaꞌvi ni ini ra xíni ra ndóꞌo̱. Yakan kua kandixa ni ndo ra, tuun ni kandixa ndo ya kúndaꞌvi ni ini ra xíni ra ndóꞌo̱. Tá tu köo íkan ndo saa, ta ìyo xaa xíka ra ndóꞌo̱, tá kuꞌva kúxika ndaꞌa itun tá táꞌnda nu.

1 Corintios 1:18

Tá ndíkani i tuꞌun xaꞌa Cristo ya ndi̱xiꞌi ra nuu cruzin, ta tá káa tuꞌun kíꞌvi saa káa ya káꞌan i nuu naꞌa, na ku̱aꞌan ichí nuu ndiꞌi xaꞌa na. Sundi mií yo síkaku Ndioxi, ta xíni yo tuꞌun yóꞌó ta ndee ni ndee kúu mií ya xaꞌa ya kúu ya tuꞌun Ndioxi.

1 Corintios 1:21

Xaꞌa ya ndíchi ni xi̱ní mií na ñuu ivi yóꞌó túvi na, yakan kua köo ndi̱xiin na kandixa na Ndioxi. Xaꞌa ya ikán kua vaꞌa ka si̱kaku Ndioxi naꞌa, na kándixa tuꞌun ya ndi̱tuꞌun nde xaꞌa Jesucristo xiꞌin na. Vani kuaꞌa ni naꞌa ndíkani ini xaꞌa tuꞌun ya ndi̱kaꞌan nde xiꞌin na, tuꞌun kíꞌvi va kua túvi na.

1 Corintios 11:2

Ñani yo tin kuꞌva yo, chínuu vaꞌa ni i tuꞌun ndo, saa chi ndíkaꞌán ni ini ndo xaꞌa i. Ta köo síndoo ndo ichí ya si̱naꞌa i ndóꞌo̱.

1 Corintios 15:14

Tá tu köo ndítaku Tata yo Jesucristo, ndikuu, ta ni tuꞌun ya káꞌan ndoso ndeꞌe xiꞌin ndo, ta ni köo ndáa yaꞌvi mií ya ndíkuu, ta ni ya kándixa ndo ra ta köo ndáa yaꞌvi ya, ndíkuu.

2 Corintios 2:15

Ta ndeꞌe, tá íin xiko ya támi ni xáꞌan sóko mií Cristo kuandaa kuaꞌan nuu Ndioxi, saa íin nde. Ta xiko támi ni xáꞌan xíta ya kuaꞌan ya nuu ndiꞌi naꞌa, na síkaku Ndioxi, ta saa kuaꞌan tu ya nuu naꞌa, na kuaꞌan ichí nuu ndiꞌi xaꞌa va na.

2 Corintios 6:1

Ndóꞌo̱ xiꞌin ndeꞌe, ta iin káchi xáa chiñu yo nuu Ndioxi, yakan xíkan ni nde ya mani nuu ndo ya ná kundàà vií ni ndo ya vaꞌa ndi̱niꞌi ndo nuu Tata yo.

Gálatas 3:4

Ta ¿án si̱ndikoo ndaꞌa va ndo Jesucristo, ta ndi̱kundikun tuku ndo ley Ndioxi ya ta̱a ra Moisés kua? Tá tu saa ra, köo ndáa yaꞌvi vi ya ti̱xuꞌvi ni ndo tá sikan ndi̱kundikun ndo Jesucristo. ¡Ta ya mani uun va kua ndo̱ꞌo ni ndo tá tu saa!

Efesios 2:8

Xaꞌa ya vaꞌa ni Ndioxi xiꞌin ndo kua ta̱xi ra ndi̱kaku ndo. Ta köo ndi̱kuchiñu ndo sikaku ndo mií ndo, xaꞌa ya vaꞌa ni ra xiꞌin ndo kua si̱niꞌi ra ya vaꞌa nuu ndo, si̱kaku ra ndóꞌo̱ chi ndáa ni ini ndo xíni ñaꞌa ndo.

Colosenses 1:23

Saa nduu ndo tá tu tuun ni kándixa ndo tuꞌun vaꞌa xaꞌa Tata yo Jesucristo tá tu ná sïndikoo ndo tuꞌun ra ya ndee ni teꞌe xi̱ni soꞌo ndo. Ta xa ndiꞌi ni kúu xaꞌa ñuu ivi xi̱ni soꞌo na xaꞌa tuꞌun ra, taꞌan ya ikán kua káꞌan ndoso yeꞌe Pablo.

2 Tesalonicenses 2:15

Yakan káꞌan nde xiꞌin ndo ñani yo tin kuꞌva yo, tuun ni kundikun ndo ya si̱naꞌa nde ndóꞌo̱ kándixa ndo, xiꞌin ya ndi̱kaꞌan nde xiꞌin ndo, tin ya xi̱ni soꞌo ndo xaꞌa nde xiꞌin ya ta̱a nde nuu tutu ti̱ꞌvi nde xaa ndaꞌa ndo.

2 Timoteo 1:9

Mií Ndioxi ku ra si̱kaku yoo, saa ka̱na ra yoo ya nduu yo na ñuu ra, na i̱í. Ta süvi xaꞌa ya vaꞌa íkan yo kua i̱kan ra saa xiꞌin yo, xaꞌa ya kúni mií va ra kua. Chi xaꞌa ya vaꞌa ni mií Tata yo Jesucristo kua i̱kan ra saa xiꞌin yo, tá täꞌan ka xa̱á ñuu ivi yóꞌó vi kua i̱kan ra saa xiꞌin yo.

HEBREOS 10:23

Ta vitin tuun ni ná kundikun yo ra xaꞌa ya ndáa ni ini yo xiní yo ra, ta ná käka uvi ini yo nuu naꞌa xaꞌa ya ndíkun yo ra, saa chi Ndioxi ta síxinu ndiꞌi ra ya xa ki̱ndoo ra xiꞌin yo.

HEBREOS 2:1

Xaꞌa ya yóꞌó kua xíniñuꞌu yo chikaa ni soꞌo yo xaꞌa tuꞌun Ndioxi ya xi̱ni soꞌo yo ya ná sïndoo yo ichí ra, ta ná kandixa ni ka yo ra.

HEBREOS 3:14

Ta ya ndixa kua táxi Cristo ndiꞌi ya kúu mií ra ndaꞌa yo, tá tu köo síndoo yo ya tuun ni ndíkun yo ra, tá tu ndáa ni ini yo xíni yo ra tá kuꞌva ndi̱xiyo yo xiꞌin ra nda tá xaꞌa, tá sikan xa̱á yo ndikun yo ra.

HEBREOS 3:6

Sundi Jesucristo, xaꞌa ya kúu ra Seꞌe Ndioxi ta xáa súvi ni ra chiñu ya ta̱xi Ndioxi ndaꞌa ra, yakan xáꞌnda chiñu ra veꞌe ra. Saa yoo, ta na veꞌe Ndioxi ku yo, yoo ku yo xáꞌnda chiñu ra nuu, tá tu ndinuꞌu ni ini yo ndáa ni ini yo xíni yo Ndioxi, saa kúsini ni yo ndátun yo niꞌi yo ya taxi Ndioxi ndaꞌa yo.

HEBREOS 4:14

Jesús, ra kúu Seꞌe Ndioxi ku iin sutu ra ndee ni chee, ra ndee ni kaꞌnu nuu yo. Ta ra ikán ku ra nda̱a nuu ndivi, yakan tuun ni ná kandixa yo ra, ta ná xïkuiin yo ya ndáa ini yo ra.

Santiago 2:14

Ñani mani, ¿ni köo ndáa yaꞌvi vi ya káꞌan sava ndo ya ndáa ni ini ndo xíni ndo Ndioxi, tá tu köo xáa súvi ndo nda iin loꞌo chiñu ya xáꞌnda chiñu ra nuu ndo? ¿Án kuchiñu kaku ndo ndisaa xaꞌa ya ndáa ini ndo xíni ndo ra, túvi ndo, ta köo xáa súvi ndo ya xáꞌnda chiñu ra?

Santiago 2:17

Ta saa íyo ya káꞌan ndo ndáa ni ini ndo xíni ndo Ndioxi, tá tu ndisaa ndáa ini ndo ra, ta köo xáa súvi ndo chiñu vaꞌa nuu ra, ta ya káꞌan ndo ta ya mani uun va ku ya.

Santiago 2:26

Saa yoo, tá káꞌan yo ndáa ni ini yo xíni yo Ndioxi ta köo xáa súvi yo chiñu ya xáꞌnda chiñu ra nuu yo, ta ndúu yo tá íyo ikin kuñu naꞌa, na xa ndu̱ndii va.