1 Corintios 15:10 - Xochapa Mixteco

¹⁰ Ta xaꞌa ya vaꞌa ni Ndioxi xiꞌin i kua kúu i apóstol tá kuꞌva íyo i vitin, saa ni xaꞌa ya vaꞌa ni ra xiꞌin i kua chíndee ra yeꞌe vaꞌa xáa súvi i chiñu nuu ra. Ta yeꞌe, ndee ni ka xáa chiñu i nuu tá kúu ndiꞌi nda taꞌan i, nda xáa chiñu nuu ra. Ta süvi xiꞌin ndee mií i kua xáa chiñu i, chi mií Ndioxi va ku ra chíndee taꞌan xiꞌin i xáa súvi i ya xaꞌa ya kúndaꞌvi ni ini ra xíni ra yeꞌe.

1 Corintios 15:10 Mawu Ofanana

San Mateo 10:20

Süvi tuꞌun vaxi xiní mií ndo kua kaꞌan ndo xiꞌin na, chi tuꞌun Tachi I̱í mií Iva yo Ndioxi kua kaꞌan ndo xiꞌin na.

San Mateo 25:16

Taa ra ndi̱kuiso uꞌun xuꞌun talento, ta xa̱a chiñu ra xiꞌin ya, saa ndi̱niꞌi ra inka tuku uꞌun siki ya.

ROMANOS 11:1

Xaꞌa ya ñaa kua ndákan tuꞌun tuku i mií i, káchi i: ¿Án sana xa ku̱ndasi nuu va Ndioxi na ñuu ra, na Israel? káꞌán i. Ta süvi ya ndaa ku ya, saa chi ni mií i ta ra Israel ku tu yeꞌe va. Chi yeꞌe ta ka̱ku i tixin seꞌe ñani sikua ra Abraham, ta na veꞌe ra Benjamin ku i.

ROMANOS 12:3

Xaꞌa ya vaꞌa ni Ndioxi ta si̱niꞌi uun ra nuu i káꞌan i xiꞌin ndo, yakan xíkan ni i ya mani nuu ndo ndïkani ini ndo ya vaꞌa ni ka mií ndo nuu inka naꞌa. Vaꞌa ka kiꞌin ni ndo kuenta ndá kuꞌva ndíkani ini ndo xaꞌa mií ndo. Ta ndáꞌvi, ndáꞌvi ndikani ini ndo, ikan ndo tá kuꞌva íyo ya vaꞌa ta̱xi Ndioxi ndaꞌa iin iin ndo ya kándixa ndo ra.

1 Corintios 15:11

Ta saa ni, án yeꞌe ku i káꞌan ndoso xiꞌin ndo, án nda taꞌan i xáa chiñu nuu Tata yo ku nda káꞌan ndoso xiꞌin ndo, ta vaꞌa chi iin káchi káꞌan ndoso ndiꞌi vaꞌa nde xaꞌa tuꞌun vaꞌa ya síkaku naꞌa, ta ya yóꞌó kua ndíkundikun ndiꞌi va ndo.

1 Corintios 15:2

Tuꞌun ya ndi̱kaꞌan i xiꞌin ndo ku ya síkaku ndóꞌo̱, tá tu ndinuꞌu ni ini ndo kándixa ndo ya xa ndi̱kaꞌan i xiꞌin ndo, tá tu köo ndi̱chikaa uvi ini ndo xiꞌin ya xa xi̱ni soꞌo ndo ndi̱kaꞌan i.

1 Corintios 3:10

Ta yeꞌe, Ndioxi ku ra i̱kan ya mani xiꞌin i ta̱xi ra ichí ndaꞌa i ya koo i tá káa iin ra xíni, ra ndíso chiñu síkuaꞌa veꞌe, saa káa i, táva i yu̱ú xaꞌa ya, ta inka ku nda síkuaꞌa ya. Ta nda síkuaꞌa veꞌe nuu ta̱va i yu̱ú xaꞌa, ta ndee ni xíniñuꞌu nda kiꞌin vaꞌa nda kuenta ndá kuꞌva síkuaꞌa nda ya.

1 Corintios 3:6

Yeꞌe ra, tá íkan iin ra chíꞌi, saa i̱kan i xiꞌin ndo, chi̱ꞌi i tuꞌun Ndioxi nima ndo. Ta ra Apolos ku ra káa, tá káa ra kóso tuꞌun Ndioxi nima ndo. Sundi mií Ndioxi ku ra táxi xáꞌnu ya.

1 Corintios 4:7

Ta ¿ndachu ndíkani ini ndo, vaꞌa ni ka mií ndo nuu inka naꞌa, túvi ndo? Ndiꞌi ñaꞌa ya kúu mií ndo ta Ndioxi ku ra ta̱xi ya ndaꞌa ndo. Süvi mií ndo ndínduku ya yakan kütai ni ini ndo xiꞌin ya.

2 Corintios 12:11

Tá kuꞌva káꞌan iin ra kiꞌvi va saa káꞌan i, chi mií ndo ku ndo i̱kan saa xiꞌin i, ya káꞌan i saa xiꞌin ndo. Chi ndóꞌo̱ ku ndo xíniñuꞌu kaꞌan vaꞌa xaꞌa i, ndikuu. Sundi ndóꞌo̱, ta ni köo ndáa yaꞌvi vi i nuu ndo. Ta saa ni köo ni̱nu̱ kúni vi i nuu nda chínuu vaꞌa ni tuꞌun ñaa, ya ndee ni naꞌnu ka nda ñaa nuu yeꞌe, túvi ndo.

2 Corintios 3:5

Ta köo kúni kaꞌan nde xaꞌa ya ndíchi ni kúu mií nde, yakan vaꞌa ni íkan nde saa chi süvi saa íyo ya. Ndiꞌi ya íkan nde ta nuu mií Ndioxi kua vaxi ndiꞌi ndee ndaꞌa nde ya íkan nde saa.

2 Corintios 6:1

Ndóꞌo̱ xiꞌin ndeꞌe, ta iin káchi xáa chiñu yo nuu Ndioxi, yakan xíkan ni nde ya mani nuu ndo ya ná kundàà vií ni ndo ya vaꞌa ndi̱niꞌi ndo nuu Tata yo.

Gálatas 2:8

Ta suvi mií Ndioxi ku ra ta̱xi chiñu ndaꞌa ra Pedro ya xaa chiñu ra xaꞌa ya kúu ra apóstol nuu na judío. Ta saa i̱kan tu ra xiꞌin yeꞌe va, ta̱xi ra chiñu ndaꞌa i xaa chiñu i xiꞌin ndisaa na köo kúu judío.

Filipenses 2:13

Saa chi Ndioxi ku ra chíkaa ya vaꞌa ini ndo ya kuni ndo ikan ndo ya vaꞌa, ta suvi ra chíndee ndóꞌo̱ ya xaa súvi ndo ya kúni mií ra.

Filipenses 4:13

Ta kúchiñu i xáꞌa ndee ini i xiꞌi ndiꞌi ni kúu va ya, chi Cristo ku ra táxi ndee ndaꞌa i yáꞌa i nuu iin iin ya.

1 Tesalonicenses 5:12

Ñani yo xiꞌin kuꞌva yo, xíkan ni nde ya mani nuu ndo ya kañuꞌu ni ndo na taꞌan yo, na chee nuu ndo, saa chi na ñaa ku na sínaꞌa ndóꞌo̱ ta ndíkani na tuꞌun Tata yo nuu ndo.

1 Timoteo 4:10

Xaꞌa ya yóꞌó kua ndíkundee ni yo xáa chiñu yo, saa tíxuꞌvi ni yo ta kánaꞌa ni na xaꞌa yo. Chi saa íkan yo kándixa ni yo Ndioxi ra táku, chi mií ra ku ra síkaku ndiꞌi na ñuu ivi yóꞌó, sundi ndisaa na kándixa ni ñaꞌa ku na káku íkan ra.