1 Corintios 14:3 - Xochapa Mixteco

³ Sundi naꞌa, na káꞌan ndoso tuꞌun yuꞌu Ndioxi ta káꞌan na saa xiꞌin taꞌan na ya táxi na ndee ndaꞌa taꞌan na ya ná kuaꞌnu ka na xiꞌin tuꞌun Ndioxi, saa síndiko na ini taꞌan na.

1 Corintios 14:3 Mawu Ofanana

San Lucas 3:18

Xiꞌin tuꞌun yóꞌó tin inka ka nuu tuꞌun ndi̱kaꞌan ra xiꞌin na ñuu, kuaꞌa ni ya ndi̱kaꞌan ra xiꞌin na ndíkani ra tuꞌun vaꞌa nuu na, ya ná ndiko koo na ichí Ndioxi.

Los Hechos 13:15

Ta ikán ndóo nda tá ka̱ꞌvi na ley Ndioxi ya ta̱a ra Moisés xiꞌin ya ta̱a nda ndi̱kaꞌan ndoso tuꞌun yuꞌu Ndioxi. Tá ndi̱ꞌi ka̱ꞌvi na ya ikán, saa ti̱ꞌvi nda naꞌnu veꞌe ñuꞌu sinagoga ikán tuꞌun kuaꞌan nuu ra Pablo xiꞌin nda taꞌan ra, káchi nda saa: ―Ñani yo, tá tu íyo tuꞌun ndikani ndo nuu na ndóo yóꞌó nuu taxi ndo ndee ndaꞌa na, ta vaꞌa kaꞌan ndo xiꞌin na, che ―káchi nda xiꞌin ra Pablo.

Los Hechos 14:22

Tá ndi̱xaa nda iin iin ñuu ikán saa ta̱xi ka nda ndee ndaꞌa na ndíkun Jesús ya ná kundaa ni ka ini na kuni na ra. Ta saa ndi̱kaꞌan ka ra Pablo xiꞌin na, káchi ra saa: ―Xíniñuꞌu yo ndoꞌo ni yo saa kuchiñu yo kiꞌvi yo koo yo xiꞌin Ndioxi nuu xáꞌnda chiñu ra ―káchi ra xiꞌin na.

Los Hechos 15:32

Ta ra Judas xiꞌin ra Silas ku nda káꞌan tuꞌun yuꞌu Ndioxi, yakan vaꞌa ndi̱kaꞌan nda xiꞌin na si̱ndiko nda ini na, ta vaꞌa ka vi ku̱ni na xiꞌin tuꞌun ya ndi̱kaꞌan nda, kúsini ka vi na.

Los Hechos 4:36

Saa i̱kan tu iin ra kúu seꞌe sikua ra Leví, ra náni José va. Ta ra José ikán ke̱e ra ñuꞌu íchi ya ndikaa maꞌñu nduta ñûꞌu, ya náni Chipre. José náni ra ñuu ra, sundi nda apóstol ta chi̱nuu nda kivi ra náni ra Bernabé chi tuꞌun Bernabé kúni kachi ya taa ra síndiko ini naꞌa.

Los Hechos 9:31

Sindiꞌi ikán ta köo ka na ndi̱xaa nduvaꞌa xiꞌin na ndíkun ichí Jesús, na ndóo Judea tin na ndóo Galilea xiꞌin na ndóo Samaria. Vaꞌa ni xi̱ndoo na. Káñuꞌu ni na Ndioxi. Ta mií Tachi I̱í Ndioxi chíndee na, ñaa ndúndee ka na kándixa na Jesús. Ta saa ndúkuaꞌa tu na ndíkundikun ichí va ra.

ROMANOS 12:8

Ta sava tuku yo ndi̱niꞌi taꞌvi xaꞌa yo ndee xiꞌin naꞌa, ta kuꞌva saa ná ikan yo xiꞌin na. Tá sava tuku yo ndi̱niꞌi taꞌvi ya siniꞌi yo ñaꞌa nuu inka na, ta kuꞌva saa ná ikan yo xiꞌin na, ná ikan yo ya xiꞌin ndinuꞌu nima yo. Tá sava tu yo ndi̱niꞌi taꞌvi ya kunuu yo nuu naꞌa, ta kuꞌva saa ná ikan yo xiꞌin na, ndinuꞌu ini yo ná ikan yo saa. Tá sava tuku yo ndi̱niꞌi taꞌvi ya kundaꞌvi ni ini yo kuni yo naꞌa, ta kuꞌva saa ná kundaꞌvi ni ini yo ikan yo saa xiꞌin na ta ná kusini ni yo.

ROMANOS 14:19

Xaꞌa ya ñaa kua ná xaꞌa ni yo ndee ya koo vií yo xiꞌin taꞌan yo, na kándixa Jesucristo. Kuꞌva saa ná ikan yo ya chindee taꞌan yo xiꞌin na taꞌan yo ya ná kuaꞌnu ka na xaꞌa ya ndíkun na Jesucristo.

ROMANOS 15:2

Saa xíniñuꞌu iin iin yo ikan yo xiꞌin na taꞌan yo, ná ndikani ini yo unkua vaꞌa ikan yo xiꞌin na ya koo vaꞌa ini na. Tá íkan yo saa xiꞌin na, ta chíndee taꞌan yo xiꞌin na xáꞌnu ka na xiꞌin tuꞌun Ndioxi, ta ndúndee ka ya ini na, ndáa ni ini na xíni na Jesucristo.

1 Corintios 10:23

Ya ndaa kua saa káꞌan sava ndo: Ya vaꞌa ni ikan yo ku ndiꞌi va ya, káchi ndo, ta süvi ndiꞌi ya ku ya vaꞌa ikan yo. Ya ndaa kua íyo ndíka yo ikan yo ndiꞌi ya kúni mií yo, sundi süvi ndiꞌi ya kúchiñu chíndee taꞌan xiꞌin na taꞌan yo kuaꞌnu na xiꞌin tuꞌun Ndioxi.

1 Corintios 14:12

Ta saa tu ndóꞌo va, chi ndúku ni ndo kuꞌva ya niꞌi ndo ya vaꞌa ke̱e nuu ndivi. Ta vaꞌa nduku ni ndo taꞌan ya vaꞌa ya chíndee taꞌan ni xiꞌin na veꞌe ñuꞌu ya ná kuaꞌnu ka na xiꞌin tuꞌun Ndioxi.

1 Corintios 14:17

Saa chi ndóꞌo̱, ni vaꞌa ni va táxi ndo tixaꞌvi ndaꞌa Ndioxi sundi naꞌa, na köo kúndaa ini xiꞌin tuꞌun ya káꞌan ndo, ta köo chíndee taꞌan ya xiꞌin na.

1 Corintios 14:26

Ñani yo, ná koto ndo unkua vaꞌa xíniñuꞌu ndo ikan ndo tá ndíkitaꞌan ndo veꞌe ñuꞌu: Ta vaꞌa kata sava ndo yaa nuu Ndioxi, ta sava ndo sinaꞌa, ta sava ndo kaꞌan xaꞌa tuꞌun ya sítuvi Ndioxi nuu ndo, ta vaꞌa kaꞌan sava ndo tuꞌun ya ke̱e nuu ndivi, ya köo xíni ndo, ta ná koo naꞌa sindiko niꞌi tuꞌun ya káꞌan ndo. Saa ikan ndo ya vaꞌa chindee taꞌan ndo xiꞌin na veꞌe ñuꞌu ya taxi ndo ndee ndaꞌa na.

1 Corintios 14:31

Saa chi vaꞌa kaꞌan ndoso ndiꞌi va ndo tuꞌun yuꞌu Ndioxi, tá iin, tá iin ndo vaꞌa kaꞌan, saa kua vaꞌa sikuaꞌa ndiꞌi ndo xaꞌa ya xíni soꞌo ndo, ta saa niꞌi ndiꞌi ndo ndee.

1 Corintios 8:1

Ta vitin káꞌan i xiꞌin ndo xaꞌa ñaꞌa ya ndi̱ndakan tuꞌun ndo yeꞌe xaꞌa, án vaꞌa kuxi ndo ya, án küvi kuxi ndo ñaꞌa ya sóko naꞌa nuu naꞌna ndioxi ya ndíi. Ta vaꞌa ná kaꞌan i xiꞌin ndo ya ndixa kua xíni ni ndiꞌi yo. Sundi tá ndíkani ini yo ya ndee ni xíni yo nuu inka naꞌa kua ndúu yo naꞌa, na kútaa ni ini. Ta ya ndixa ni ka ndáa yaꞌvi ku ya kúꞌvi ni ini yo xíni yo inka naꞌa, chi xiꞌin ya kúꞌvi ini yo xíni yo na, ta táxi yo ndee ndaꞌa na ya kundikun ni ka na ichí Ndioxi.

2 Corintios 1:4

Chi mií ra ku ra síndiko ini yo xiꞌin ndiꞌi ni kúu tindoꞌo ya ndóꞌó yo, ta saa kuchiñu yo chindee taꞌan yo xiꞌin inka naꞌa, sindiko yo ini na, tá kuꞌva síndiko mií ra ini yo.

2 Corintios 2:7

Ta vitin xíniñuꞌu ndo xaa kaꞌnu ini ndo xaꞌa ra ya ná chindee taꞌan ndo xiꞌin ra nduvaꞌa ini ra, ya ná küsuchi ni ka ini ra.

Efesios 4:29

Nda iin tuꞌun väꞌa ná käna koo ka yuꞌu ndo kaꞌan ndo, ndisaa tuꞌun vaꞌa ya chíndee taꞌan ndo xiꞌin inka naꞌa, ya táxi ndo ndee ndaꞌa na xíni soꞌo ya káꞌan ndo, ndisaa ya ikán vaꞌa kaꞌan ndo.

Efesios 6:22

Tíꞌvi i ra ñani yo ñaa xaa ra nuu ndo, chi kúni i ndituꞌun ra xiꞌin ndo ya kundaa ini ndo ndá kuꞌva íyo i, ta saa xaꞌa ni ra ndee xiꞌin ndo.

Colosenses 4:8

Tíꞌvi i ra xaa ra nuu ndo ya ndituꞌun ra xiꞌin ndo, kundaa ini ndo ndá kuꞌva íyo nde, saa xaꞌa ni ra ndee xiꞌin ndo.

1 Tesalonicenses 2:11

Tá íkan iin taa, ra vaꞌa ni ini xiꞌin seꞌe ra, saa i̱kan nde xiꞌin ndo, chi ndi̱kaꞌan ni nde xiꞌin ndo ya koo vií ndo xiꞌin taꞌan ndo, ta saa si̱ndiko nde ini ndo.

1 Tesalonicenses 2:3

Saa chi süvi ya sána ini nde ku ya ndi̱kaꞌan ndoso nde xiꞌin ndo, ta ni köo ndi̱xika kiꞌvi ini nde xiꞌin ndo, ni köo ndi̱sindaꞌvi nde nda iin ndo.

1 Tesalonicenses 3:2

ta ti̱ꞌvi nde ra Timoteo, ñani yo, xaa ra nuu ndo koto ra ndóꞌo̱. Ta ra ñaa iin káchi vaꞌa ni xáa chiñu ra nuu Ndioxi xiꞌin nde, káꞌan ndoso ra tuꞌun vaꞌa xaꞌa Tata yo Jesucristo. Ta ti̱ꞌvi nde ra xaa ra nuu ndo koto ra ndóꞌo̱, ya chindee ra ndóꞌo̱ kandixa ni ka ndo tuꞌun xaꞌa Tata yo Jesucristo, saa xaꞌa ni ra ndee xiꞌin ndo,

1 Tesalonicenses 4:1

Ñani yo xiꞌin kuꞌva yo, xíkan ni nde ya mani nuu ndo, káꞌan ni nde xiꞌin ndo xaꞌa ya xa si̱naꞌa nde ndóꞌo̱ ndá kuꞌva koo ndo tá kuꞌva kúni mií Ndioxi. Saa xíkan ni nde ya mani nuu ndo tixin ichí mií Tata yo Jesucristo káꞌan nde xiꞌin ndo ya ná xaꞌa ni ka ndo ndee koo vaꞌa ni ndo.

1 Tesalonicenses 4:18

Xiꞌin tuꞌun ya káꞌan i xiꞌin ndo yóꞌó kua kaꞌan ndo xiꞌin na taꞌan ndo, xaꞌa ndo ndee xiꞌin na.

2 Tesalonicenses 3:12

Ta na íkan saa, ta káꞌan nde xiꞌin na tixin ndee ta̱xi mií Tata yo Jesucristo ndaꞌa nde ya ná ïkan ka na saa, vaꞌa ka ná xaa chiñu na saa kuxi na.

1 Timoteo 1:4

Ta kaꞌan un xiꞌin na, ná ndïtuꞌun na kuento yata ya köo ndáa yaꞌvi, ni ná ndïtuꞌun na xaꞌa xií síkua na ndá na veꞌe ku xií na, chi yakan ta ndee ni kǎni kuaꞌan ya, takua síkani taꞌan ya na, ta köo chíndee taꞌan ya xiꞌin na ya kundaa ini na xaꞌa chiñu kúni Iva yo Ndioxi. Chi ndisaa ya ndáa ni ini yo xíni yo Tata yo Jesucristo va kua ndee ni ndáa yaꞌvi.

1 Timoteo 4:13

Ta ya yóꞌó kua xíniñuꞌu un ikan un xiꞌin na ñani yo tin kuꞌva yo nda kivi ná xaa i: Vaꞌa kaꞌvi un tuꞌun Ndioxi xiꞌin na, ta xaꞌa ni un ndee xiꞌin na sixinu un ini na, saa sinaꞌa un na.

1 Timoteo 6:2

Saa na xáa chiñu nuu xitoꞌo na, ra kándixa Tata yo Jesucristo, xíniñuꞌu na xaa toꞌo ni na xitoꞌo na, xaꞌa ya kúu ra ñani yo, ra kándixa Tata yo Jesucristo. Ta ndee ni ka vaꞌa xíniñuꞌu na chikaa ni na ndee ya xaa chiñu vií ni na nuu ra, chi ñani yo ra kúꞌvi ni ini yo xíni yo ku ra, ta ra ikán ku ra níꞌi ni ya vaꞌa xaꞌa chiñu ya íkan na nuu ra. Ñani yo Timoteo ya yóꞌó kua xíniñuꞌu un sinaꞌa un na veꞌe ñuꞌu, saa kaꞌan un xiꞌin na, xaꞌa un ndee xiꞌin na.

2 Timoteo 4:2

ya ná chikaa ni un ndee ya kaꞌan ndoso un tuꞌun ra xiꞌin naꞌa ndiꞌi saa kivi. Koo ndúvi un kaꞌan un xiꞌin na tá kivi vaꞌa ni kúni un án tá väꞌa kúni un. Ta teꞌe kaꞌan un xiꞌin na, sinaꞌa un na ya ná kundaa ini na xaꞌa ya väꞌa kéꞌe na, ta kaꞌan xiꞌin na ná sindoo na ya, saa xaꞌa ni un ndee xiꞌin na ya ná kundikun vaꞌa na ichí Tata yo Jesucristo. Ta toꞌo kaꞌan un xiꞌin na sinaꞌa un na, kaꞌnu koo ini un xiꞌin na.

Tito 1:9

Xíniñuꞌu nda kuu nda taa, nda ndee ni kándixa tuꞌun ya ndaa ni si̱naꞌa nde. Saa kua vaꞌa xaꞌa nda ndee xiꞌin nda ñani yo tin kuꞌva yo, ta saa sixinu nda ini na köo xíin kandixa vaꞌa.

Tito 2:15

Ta ya yóꞌó kua xíniñuꞌu un sinaꞌa un na ñani yo. Ta xa íyo ichí ta̱xi Tata yo Jesucristo ndaꞌa un ya xaꞌa un ndee xiꞌin na, saa ndaꞌi un xiꞌin na tá väꞌa íkan na. Ta nda iin na ná kündasi nuu kuni yóꞌo̱.

Tito 2:6

Ta saa kaꞌan tu un xiꞌin nda ñani yo, nda kuâán vali ya xiꞌna ná ndikani vaꞌa ini nda unkua vaꞌa xíniñuꞌu nda ikan nda.

Tito 2:9

Saa sinaꞌa un na ñani yo, na sa̱ta xitoꞌo na xáa chiñu xiꞌin na xiꞌin ya uꞌvi, vívií ná xaa súvi na chiñu ya xáꞌnda xitoꞌo na nuu na. Toꞌo ná ikan na chiñu na, ta ná ndïkuiin kueꞌe na yuꞌu xitoꞌo na.

HEBREOS 10:25

Xíniñuꞌu yo ndikitaꞌan yo xiꞌin na ñani yo tin kuꞌva yo ya xaa kaꞌnu yo Ndioxi. Ta ná ïkan yo tá íkan sava na taꞌan yo, köo xíin ka na ndikitaꞌan na ya xaa kaꞌnu na Ndioxi. Ná xaꞌa ka yo ndee xiꞌin taꞌan yo, saa chi vitin ka kua ndee ni, chi xa kuaꞌan kúyati ni kivi ya ndiko koo tuku Tata yo Jesucristo kixi ra ñuu ivi yóꞌó.

HEBREOS 13:22

Na taꞌan yo, xíkan ni i ya mani nuu ndo, kaꞌnu ni koo ini ndo xaꞌa ya loꞌo ni kua táa i nuu tutu yóꞌó xaa ndaꞌa ndo. Ta taa ni soꞌo ndo ya káꞌan i xiꞌin ndo, ya xáꞌa ni i ndee xiꞌin ndo.

HEBREOS 3:13

Xaꞌa ya ikán kua, xaꞌa ni ndo ndee xiꞌin taꞌan ndo. Sixinu ndo ini taꞌan ndo iin iin kivi, vitin ka tá íyo tiempo. Ikan ndo saa xiꞌin taꞌan ndo ya ná ndïkava ndo nuu kuachi ya väꞌa, ta sindaꞌvi ya ndóꞌo̱, ya vaꞌa kua íkan ndo kaꞌán ndo, ta saa ndasa tuun ndo nima ndo nuu Ndioxi.

1 Pedro 5:12

Ra Silvano ñani yo ku ra ndee ni tuun ndíkun Tata yo Jesucristo, ta ra yóꞌó ku ra kuniꞌi tutu yóꞌó xaa ya ndaꞌa ndo, ta̱a i uvi ndaa tuꞌun xaa ya nuu ndo ya xáꞌa ni i ndee xiꞌin ndo káꞌan i xiꞌin ndo xaꞌa tindoꞌo ya ndee ni ndóꞌo ndo vitin, ta ya ñaa kua káꞌan ya ndee ni kúꞌvi ini Ndioxi xíni ra ndóꞌo̱.

Judas 1:20

Sundi ndóꞌo̱ ñani yo, ta iin tuun saa ná chindee taꞌan ni ndo xiꞌin taꞌan ndo ya ndinuni kundikun ndo tuꞌun i̱í ya kándixa ndo, ta kaꞌan ni ndo xiꞌin Ndioxi tá kuꞌva kúni mií Tachi I̱í Ndioxi.