1 Corintios 13:4 - Xochapa Mixteco

⁴ Naꞌa, na íyo ya kúꞌvi ini táxi Ndioxi nima na, ta kaꞌnu ni va ini na, vií ni ini na, köo uní ini na, köo kútai ni ini na, ni köo xáa kaꞌnu na mií na,

1 Corintios 13:4 Mawu Ofanana

San Mateo 27:18

Saa ndi̱kaꞌan ra xiꞌin na, xaꞌa ya xa xíni ra ya kûní ini na chiñu xíni na Jesús, yakan ndi̱taxi ñaꞌa na ndaꞌa ra.

Los Hechos 7:9

’Ta sava nda seꞌe ra Jacob xii sikua yo, kûni ini nda xini nda ñani nda ra José. Yakan ndi̱xiko nda ra kuaꞌan ra ñuu Egipto. Sundi Ndioxi ta ndi̱xiyo ra xiꞌin ra,

ROMANOS 1:29

Ta íyo ni ndiꞌi nuu ya väꞌa ini na. Nda taa kuakiꞌvi nda xiꞌin ná ñaꞌa, ta süvi ná síꞌi nda ku ná, saa ná ñaꞌa kuakiꞌvi ná xiꞌin taa, ta süvi ií ná ku nda. Kini ni íkan na xiꞌin mií na. Ni köo xáa ini na xiꞌin ya kuika kúu mií na, nina ya väꞌa kútoo na ikan na, uní ni ini na, na xáꞌni ndìì ku na. Kútoo ni na kani taꞌan na xiꞌin taꞌan na, síndaꞌvi na naꞌa, ikú ni na.

ROMANOS 13:13

Vívií ná koo yo, tá kuꞌva íin naꞌa, na xíka nduvi teꞌe, saa ná koo yo. Ta ná küꞌun yo nuu viko nuu xíxi náꞌna naꞌa, ta xíꞌi ni na, ni nuu kini ni káa, nuu ñúꞌu taa xiꞌin ná síꞌi. Nda iin ñaꞌñu yóꞌó köo xíniñuꞌu yo kuꞌun yo. Ná käni taꞌan yo xiꞌin nda iin naꞌa, ni ná küu uni ini yo kuni yo inka naꞌa.

1 Corintios 3:3

Saa chi nina ya kúni mií ndo íkan ndo. Yakan kua kǔní ini ndo xíni taꞌan ndo, ta káni taꞌan ndo xiꞌin taꞌan ndo, saa nda taꞌvi taꞌan ndo xiꞌin taꞌan ndo. Ya yóꞌó ku ya káꞌan xaꞌa ndo ya täꞌan kuaꞌnu ndo xiꞌin tuꞌun Ndioxi, chi íkan ndo tá íkan naꞌa, na ñuu ivi na köo xíni tuꞌun Ndioxi.

1 Corintios 4:18

Ta sava tu ndo kútai ni ini, chi ndíkani ini ndo nda iin ichí ndïko koo ka i xaa i nuu ndo koto i ndóꞌo̱, káꞌan ndo.

1 Corintios 4:6

Ñani yo, soꞌva íyo ya ndítuꞌun i xiꞌin ndo xaꞌa ra Apolos ñani yo, xiꞌin yeꞌe. Ndítuꞌun i xiꞌin ndo chi kúni i ná sikuaꞌa vaꞌa ndo, yakan koto vaꞌa ndo ndá kuꞌva íkan nde xiꞌin ndo, ta saa ikan ndo, tá kuꞌva káꞌan tuꞌun Ndioxi, ya ta̱a na xinaꞌa káchi ya saa: “Vaꞌa ikan ndo ndisaa ya káꞌan tuꞌun Ndioxi, ta chïnuu ka ndo ya káꞌan ya”, ya ná käꞌan tái ni ndo xaꞌa iin nde, ta kundasi nuu ndo kuni ndo inka nde.

1 Corintios 5:2

¡Ta ndóꞌo̱, ta ndo kútai ini va ku ndo xaꞌa ya väꞌa íkan ra ñaa nuu ndo! ¡Ndóꞌo̱ kuchiꞌña ini vi ku ndo, ndikuu, ta köo íkan ndo saa! Ta ra íkan saa, ta vaꞌa tava ndo ra, ná keta ra veꞌe ñuꞌu, täxi ka ndo ndikaa ra xiꞌin ndo.

1 Corintios 8:1

Ta vitin káꞌan i xiꞌin ndo xaꞌa ñaꞌa ya ndi̱ndakan tuꞌun ndo yeꞌe xaꞌa, án vaꞌa kuxi ndo ya, án küvi kuxi ndo ñaꞌa ya sóko naꞌa nuu naꞌna ndioxi ya ndíi. Ta vaꞌa ná kaꞌan i xiꞌin ndo ya ndixa kua xíni ni ndiꞌi yo. Sundi tá ndíkani ini yo ya ndee ni xíni yo nuu inka naꞌa kua ndúu yo naꞌa, na kútaa ni ini. Ta ya ndixa ni ka ndáa yaꞌvi ku ya kúꞌvi ni ini yo xíni yo inka naꞌa, chi xiꞌin ya kúꞌvi ini yo xíni yo na, ta táxi yo ndee ndaꞌa na ya kundikun ni ka na ichí Ndioxi.

2 Corintios 12:20

Ta yeꞌe, ta ndíꞌi ni va ini i tá ná xaa i koto i ndóꞌo̱, chi sana ndïtaꞌan i ndóꞌo̱ tá kuꞌva ndíkani ini i nditaꞌan i ndóꞌo̱, án sana ndïtaꞌan tu ndóꞌo̱ va yeꞌe tá kuꞌva ndíkani ini ndo nditaꞌan ndo yeꞌe. Saa ndíꞌi ni ini i xiꞌin ndo chi sava ndo ta án sana kánitaꞌan va ndo, ta sava tu ndo án sana kûní tu ini ndo xíni taꞌan va ndo, ta sava tu ndo án sana sáa ini ndo xíni taꞌan va ndo, ta sava tu ndo án sana ta̱ꞌvi taꞌan va ndo, saa tu sava ndo án káꞌan kini ndo xiꞌin taꞌan va ndo, sava tu ndo án sana kánaꞌa ndo xaꞌa taꞌan va ndo, ta sava tu ndo án ndee ni kútai ini ndo nuu taꞌan va ndo, saa tu sava ndo án sana ndu̱u iku ni ini va ndo xiꞌin taꞌan ndo.

2 Corintios 6:6

Xaꞌa ya vaꞌa ni íyo nde nuu naꞌa kua sínaꞌa nde mií nde nuu na ya kúu nde taa, nda xáa chiñu nuu Ndioxi, chi íyo ni ya xínituni nde xaꞌa ya xíni nde ya ndaa, ta xáꞌa ndee ni ini nde nuu ndiꞌi ya, ni köo ndíko koo ini nde, vaꞌa ni ini nde xiꞌin naꞌa. Íkan nde saa xaꞌa ya íyo Tachi I̱í Ndioxi xiꞌin nde, ta ndinuꞌu ni ini nde kúꞌvi ini nde xíni nde na,

Gálatas 5:26

Ta saa ná küu yo naꞌa, na ndee ni kútai ini, ni ná sïsaa yo ini taꞌan yo ya kani taꞌan na xiꞌin taꞌan na, saa ná chïkaa yo ya uni xiꞌin taꞌan yo.

Efesios 4:2

Ta ndiꞌi saa kivi koo ndo naꞌa, na ni̱nu̱ ini, na vaꞌa ini, na kaꞌnu ni ini, na xáꞌa ndee ini xiꞌin taꞌan xaꞌa ya kúꞌvi ni ini ndo xíni taꞌan ndo.

Efesios 4:32

Ta vitin xíniñuꞌu ndo koo ndo naꞌa, na vaꞌa ini. Kundaꞌvi ini ndo kuni taꞌan ndo. Xaa kaꞌnu ini ndo xaꞌa taꞌan ndo, tá kuꞌva xa̱a kaꞌnu ini Ndioxi xaꞌa ndo tixin Tata yo Jesucristo.

Filipenses 1:15

Sundi sava na ta káꞌan ndoso na xaꞌa ra xiꞌin ya uní ini, chi kúni na keꞌe taꞌan na xiꞌin i ya sikáku na kuachi xiꞌin i. Sundi sava na ta ndinuꞌu ni va ini na káꞌan ndoso na xaꞌa tuꞌun ra.

Colosenses 1:11

Ta ná taxi ni ra ndee chee ni ya kúu mií ra ndaꞌa ndo ya ná kuchiñu ndo xaꞌa ndee ni ini ndo xiꞌin ndiꞌi ya uꞌvi ni vaxi nuu ndo.

Colosenses 2:18

Ta täxi ndo sindaꞌvi naꞌa ndóꞌo̱, na káꞌan ya ndee ni vaꞌa xáa toꞌo na Ndioxi, káchi na. Saa chínuu vaꞌa ni na tuꞌun na, ta ndása ni̱nu̱ na mií na nuu naꞌa, ta xáa kaꞌnu ni na tatun Ndioxi. Saa káꞌan na ya sítuvi Ndioxi nuu na ta kúni na ná ikan ndo tá kuꞌva íkan mií na, ta ya ndáku ini mií va na kua káꞌan na saa. Sundi ndóꞌo̱, ta küni soꞌo ndo ya káꞌan na xiꞌin ndo, täxi ndo sindaꞌvi na ndóꞌo̱, chi ni süvi ya ndaa loꞌo kua káꞌan na xiꞌin ndo. Ndisaa kuiti ya kána koo xi̱ní mií na kua káꞌan na xiꞌin ndo.

Colosenses 3:12

Chi mií Ndioxi ku ra ndi̱kaxin ndóꞌo̱ xaꞌa ya kúꞌvi ni ini ra xíni ra ndóꞌo̱ ya nduu ndo na ñuu ra, na i̱í. Xaꞌa ya ñaa kua xíniñuꞌu ndo koo vií ndo xiꞌin taꞌan ndo, kundaꞌvi ini ndo kuni ndo naꞌa, saa ikan ndo ya vaꞌa xiꞌin na, xaa toꞌo taꞌan ndo, xaꞌa ndee ini ndo xiꞌin taꞌan ndo.

1 Tesalonicenses 5:14

Ta saa káꞌan tu nde xiꞌin ndo xaꞌa naꞌa, na köo xíin xaa chiñu, ndaꞌi ndo xiꞌin na ná xaa chiñu na, ta sindiko ndo ini tá kúu naꞌa, na ndíkava ni ini, saa chindee ndo na vita ini. Ta kaꞌnu koo ini ndo xiꞌin ndiꞌi naꞌa.

1 Timoteo 6:4

Chi nda maestro ikán ta ndee ni kútai ini nda xiꞌin mií nda. Ta nda loꞌo köo xíni nda. Xaꞌa ya nina kútoo nda kaꞌan kuachi nda xiꞌin naꞌa unkua káꞌan iin iin nuu tuꞌun xaꞌa ya ikán kua xáa nda táva nda kuachi xiꞌin na veꞌe ñuꞌu, xáa na kûní ini na xíni taꞌan na, síkani taꞌan nda na, káꞌan kini na xiꞌin taꞌan na, ndíkani väꞌa ini na xíni taꞌan na,

2 Timoteo 2:25

Ta vaꞌa vií ndikani un nuu naꞌa, na köo xíin kandixa tuꞌun Ndioxi, án sana niꞌi na ya vaꞌa nuu Ndioxi ta ndisama nima na, ya ná kundaa ini na xaꞌa ya ndaa.

2 Timoteo 3:10

Ta yóꞌo̱ ñani yo, ta xa xíni vaꞌa un yeꞌe, ndá kuꞌva sínaꞌa i, ta ndá kuꞌva íyo i, ta xíni un unkua ndíkani ini i xaa súvi i, saa xíni un ya ndáa ni i ini i xíni Ndioxi, ta kúꞌvi ni ini i xíni i naꞌa, saa xíni un ya kaꞌnu ni ini i.

2 Timoteo 4:2

ya ná chikaa ni un ndee ya kaꞌan ndoso un tuꞌun ra xiꞌin naꞌa ndiꞌi saa kivi. Koo ndúvi un kaꞌan un xiꞌin na tá kivi vaꞌa ni kúni un án tá väꞌa kúni un. Ta teꞌe kaꞌan un xiꞌin na, sinaꞌa un na ya ná kundaa ini na xaꞌa ya väꞌa kéꞌe na, ta kaꞌan xiꞌin na ná sindoo na ya, saa xaꞌa ni un ndee xiꞌin na ya ná kundikun vaꞌa na ichí Tata yo Jesucristo. Ta toꞌo kaꞌan un xiꞌin na sinaꞌa un na, kaꞌnu koo ini un xiꞌin na.

Tito 3:3

Chi saa ndi̱xiyo yo yachi tá täꞌan ndikundikun yo ichí Tata yo Jesucristo: kíꞌvi ni ndi̱xiyo ini yo, ikú ni ndi̱xiyo yo, tá íin yo nda̱ñuꞌu saa ndi̱xiyo yo nuu Ndioxi, ta xi̱nuꞌni yo ndaꞌa ndiꞌi kuachi ya ku̱too ni ikin kuñu yo ikan ya, kuaꞌa ni nuu ya väꞌa i̱kan yo, saa kûni ni ini yo xi̱ni yo naꞌa. Ta ndiꞌi naꞌa ndi̱saa ini xi̱ni yoo, ta saa tu yoo va, ndi̱saa ni ini yo xi̱ni yo na.

Santiago 4:5

Ta xaꞌa ya yóꞌó kua káꞌan tuꞌun Ndioxi, ya ta̱a na xinaꞌa, káchi ya saa: “Tachi I̱í Iva yo Ndioxi ya ta̱xi ra íyo nima ndiꞌi yo kándixa ñaꞌa, ta sâa va ya xiꞌin yo xaꞌa ya kúni yo ikan yo ya väꞌa”, káchi ya.

1 Pedro 2:1

Xaꞌa ya ñaa kua sindikoo ndo ya väꞌa íkan ndo, sïndaꞌvi taꞌan ka ndo, köo ka ndo na uvi ini, ta ni kûni ini ndo kuni taꞌan ndo, ni käꞌan vata ka ndo xaꞌa taꞌan ndo.

1 Pedro 3:8

Vitin káꞌan i xiꞌin ndo, vívií koo ndo xiꞌin taꞌan ndo, iin yuꞌu koo ndo. Vívií kutaꞌan ndo. Kuꞌvi ini ndo kuni taꞌan ndo, kundaꞌvi ini ndo kuni taꞌan ndo, xaa ni̱nu̱ ndo mií ndo.

1 Pedro 4:8

Chi ya ndee ni ndee nuu ndiꞌi ya kua kuꞌvi ni ini ndo kuni taꞌan ndo, chi saa kua kuchiñu ndo xaa kaꞌnu ini ndo xaꞌa kuachi na taꞌan ndo, ta xaꞌa ya kúꞌvi ni ini ndo xíni ndo na kua kuchiñu ndo xaa kaꞌnu ini ndo xaꞌa kuachi na, ni ndee ni ndee káa ya.

2 Pedro 1:7

Ta xíniñuꞌu ndo kuꞌvi ni ini ndo kuni ndo na taꞌan yo, na ndíkun Tata yo Jesucristo xiꞌin ndiꞌi ka naꞌa.

1 Juan 4:11

Ñani yo, tá tu soꞌva kúꞌvi ini Ndioxi xíni ra mií yo, ta saa tu yoo va xíniñuꞌu yo kuꞌvi ni ini yo kuni taꞌan yo.