1 Corintios 13:12 - Xochapa Mixteco

¹² Kuꞌva saa íyo ya ndóꞌo yo vitin, tá ndóꞌo naꞌa, na xíto nuu yu̱ú tatan, ya kuaꞌan kúxana nuu va, saa íyo ya ndóꞌo yo. Sundi vaxi kivi ta saa kua kundaa teꞌe ini yo xaꞌa ndiꞌi ya, chi saa kua kuni xiꞌin nuu yo Ndioxi. Loꞌo ni va kúndaa ini yo xaꞌa ra vitin, ta vaxi kivi saa kua kundaa teꞌe ini yo xaꞌa ndiꞌi kúu ñaꞌa. Ta saa kua kuni vaꞌa yo Ndioxi tá kuꞌva káa ra, tá kuꞌva xíni ra yoo.

1 Corintios 13:12 Mawu Ofanana

San Mateo 18:10

Saa ndi̱tuꞌun tuku ra iin tuꞌun ndíchi xiꞌin na sínaꞌa ra na, káchi ra saa: ―Koto ndo ndïkani ini ndo ya köo ndáa yaꞌvi na vali yóꞌó. Saa chi na tatun ndáa na vali yóꞌó, ta ndiꞌi saa kivi íyo na xiꞌin Iva i Ndioxi nuu ndivi.

San Mateo 5:8

’Vaꞌa ni kée ndo tá tu ndinuꞌu ni ini ndo kúu ndo naꞌa, na kúu mií nima vaꞌa nuu Ndioxi, chi vaxi iin kivi ta kuni ndo Ndioxi.

San Juan 10:15

Tá kuꞌva xíni Iva i yeꞌe, saa xíni vaꞌa tu mií va i ra ta íyo tuꞌva i kuvi i xaꞌa levo sana i.

ROMANOS 8:18

Ya ndaa ni káꞌan i xiꞌin ndo, ndiꞌi ya ndóꞌo yo ñuu ivi yóꞌó tíxuꞌvi ni yo vitin, ta ni süvi ya ndee ku ya nuu ya taxi Ndioxi ndaꞌa yo. Ndee ni ka koo ya niꞌi yo nuu ra kivi vaxi.

1 Corintios 13:11

Ta vaꞌa kundaa ini ndo, chi tá ndi̱xiyo loꞌo i ta ndi̱kaꞌan i tá kuꞌva káꞌan na vali, ndi̱kani ini i tá kuꞌva ndíkani ini na vali, ki̱ꞌin xi̱ní i tá kuꞌva kíꞌin xi̱ní na vali. Sundi tá ndi̱xinu i ndu̱u i taa, ta saa si̱ndikoo i ya íkan i tá kuꞌva íkan na vali.

1 Corintios 8:3

Sundi ndá naꞌa kúꞌvi ni ini xíni Ndioxi, ta saa tu mií va ra xíni vaꞌa ra ini na.

2 Corintios 3:18

Yakan kua tá kúu ndiꞌi yo kándixa Tata yo Jesucristo, ta köo ndási ka nuu yo, vaꞌa xíto teꞌe yo, yakan kua tá íin yu̱ú tatan saa íin yo chi sínaꞌa teꞌe yo ya luvi ni íkan ra xiꞌin ya ndee ni luvi kúu mií ra. Ta saa kua ndúu yo tá kuꞌva káa mií Tata yo Jesucristo. Ta ya ndínama yo iin iin kivi ta mií Tata yo Jesucristo ra kúu Tachi ku ra íkan saa xiꞌin yo.

2 Corintios 5:7

Ta vitin táku yo ta ndáa ni ini yo xíni yo ra, ta süvi xaꞌa ya xa xi̱ni xiꞌin nuu yo ra kua ndáa ini yo xíni yo ra.

Filipenses 3:12

Ta ya káꞌan i soꞌva, ta köo kúni i kaꞌan i ya xa i̱kan ndiꞌi i ya yóꞌó, ta ni täꞌan xinu koo i nduu i ra vaꞌa ni. Sundi ya íkan i kua yóꞌó, ndíkundee ni i kuaꞌan ka i chí nuu iin iin kivi ya kuchiñu xinu koo i nduu i tá kuꞌva káa mií Jesucristo, chi xaꞌa ya ikán kua ka̱na ra yeꞌe ya kundikun i ra.

Santiago 1:23

Chi ndiꞌi naꞌa, na xíni soꞌo tuꞌun Ndioxi ta köo xáa súvi na ya káꞌan ya, tá íin naꞌa, na xíto ndaa nuu yu̱ú tátan va saa íin na.

1 Juan 3:2

Ñani mani, vitin ta xa seꞌe Ndioxi kúu yoo, ta köo xíni yo ndá kuꞌva nduu yo kivi ná ndiko koo tuku Tata yo Jesucristo ñuu ivi yóꞌó. Sundi yoo ta kúndaa ini yo, kivi ná ndiko koo ra ta nduu yo tá kuꞌva káa mií ra, saa chi kivi ikán ta kuni xiꞌin nuu yo ra tá kuꞌva káa ra.

El Apocalipsis 22:4

Saa kuni xiꞌin nuu ndiꞌi na Ndioxi, ta saa ndikunuu kivi ra taan na.