1 Corintios 13:1 - Xochapa Mixteco

¹ Tá tu xíni ni i kaꞌan i kuaꞌa ni nuu tuꞌun ya káꞌan na ñuu ivi yóꞌó, án xíni ni i kaꞌan i nda tuꞌun ya káꞌan na tatun Ndioxi, sundi tá köo ya kúꞌvi ini vaxi nuu Ndioxi íyo nima i, ya kuꞌvi ini i kuni i inka naꞌa, ta tá káa kàà ya ndee ni káxan va saa káa i, án tá káa iin kàà ya ndee ni ndáꞌi va, saa káa i.

1 Corintios 13:1 Mawu Ofanana

San Mateo 25:45

Saa ndi̱kuiin i kaꞌan i xiꞌin na: “Ya ndaa káꞌan i xiꞌin ndo, ndiꞌi saa kivi ya köo ndi̱chindee ndo naꞌa, na ndíkun yeꞌe, vani ndaꞌvi ni na, ta yeꞌe ku i köo ndi̱chindee ndo”, kachi i xiꞌin na väꞌa ikán.

San Marcos 16:17

Ta ya yóꞌó ku seña yatuꞌun taxi i koo xiꞌin na kándixa yeꞌe: Kuniñuꞌu na ndee i xiꞌin kivi i ya tava na tachi nduvaꞌa, ta saa kaꞌan na inka nuu tuꞌun xa̱á ya köo ndi̱sikuaꞌa na.

ROMANOS 14:15

Saa chi tá xaꞌa ñaꞌa ya xíxi ndo kua síndiko koo ndo ini na xaꞌa ya kándixa na Jesús, ta kúni kachi ya köo kúꞌvi ini ndo xíni ndo na. Täxi ndo ndiꞌi xaꞌa naꞌa xaꞌa ñaꞌa xíxi ndo, saa chi Cristo ku ra ndi̱xiꞌi xaꞌa na.

1 Corintios 12:10

Sava tuku na níꞌi ndee vaꞌa ni nuu Tachi I̱í Ndioxi ya ikan na yatuꞌun Ndioxi. Sava tuku na níꞌi ndee vaꞌa ni ya kaꞌan ndoso na tuꞌun yuꞌu Ndioxi. Sava tuku na níꞌi ndee vaꞌa ni ya ndíkuni na tá káꞌan Tachi I̱í Ndioxi, ta ndíkuni tu na tá káꞌan tachi nduvaꞌa, ya nǎꞌa. Sava tuku na níꞌi ndee vaꞌa ni ya káꞌan na kuaꞌa ni nuu tuꞌun. Sava tuku na níꞌi ndee vaꞌa ni ya síndiko koo na tuꞌun ya káꞌan inka naꞌa.

1 Corintios 12:16

Tá ná kaꞌan soꞌo yo xiꞌin nduchi nuu yo: “Köo ndíkun ndaa i ikin kuñu, saa chi süvi nduchi nuu ku i”, ná kachi ya. Ni saa va, ta xa ikin kuñu yo ndíkun ndaa va ya.

1 Corintios 12:8

Saa chi táxi Tachi I̱í Ndioxi ya vaꞌa ndaꞌa sava na, ya kúchiñu na kúndaa ini na xiꞌin tuꞌun ya ndee ni ndíchi, ta sava tuku na ndee ni íyo ya xínituni na, ndíchi ka vi íyo ya káꞌan na.

1 Corintios 13:8

Chi ya kúꞌvi ini táxi Ndioxi ndaꞌa yo kuꞌvi ini yo kuni yo inka naꞌa, ta ndiꞌi saa tiempo koo ya. Sundi naꞌa, na káꞌan tuꞌun yuꞌu Ndioxi ta vaxi tiempo küchiñu ka na kaꞌan na tuꞌun yuꞌu ra. Ni na káꞌan ndá ka nuu tuꞌun ya köo xíni na ta köo ka na kaꞌan ya, ni ya ndíchi ni kundaa ini yo xaꞌa ya ndi̱xiyo sěꞌe, ta ndiꞌi xaꞌa ya.

1 Corintios 14:2

Saa chi ndiꞌi naꞌa, na káꞌan tuꞌun ya köo kúndaa ini na xiꞌin, ta köo káꞌan na xiꞌin na ivi yóꞌó, xiꞌin Ndioxi va káꞌan na, chi nda iin naꞌa kündaa ini xiꞌin tuꞌun ya káꞌan na. Tuꞌun ya íyo sěꞌe ku ya táxi Tachi I̱í Ndioxi ndaꞌa na kaꞌan na.

1 Corintios 14:4

Ta na ivi, na táxi Ndioxi kaꞌan tuꞌun vaꞌa ikán ya köo kúndaa ini na xiꞌin ya ke̱e nuu ndivi, tá káꞌan na tuꞌun ikán ta xáꞌa ni ya ndee xiꞌin mií na. Sundi naꞌa, na káꞌan ndoso tuꞌun yuꞌu Ndioxi, tá káꞌan ndoso na tuꞌun ra ta xáꞌa ni na ikán ndee xiꞌin ndiꞌi na veꞌe ñuꞌu ya ná kuaꞌnu ka na xiꞌin tuꞌun Ndioxi.

1 Corintios 14:5

Chi yeꞌe, ta kúni ni i ya ná kaꞌan ndiꞌi ndo inka nuu tuꞌun ya köo kúndaa ini ndo xiꞌin ya ke̱e nuu ndivi. Sundi ya kúni ni ka i kua ná kuchiñu ndiꞌi ndo kaꞌan ndoso ndo tuꞌun yuꞌu Ndioxi. Saa chi naꞌa, na káꞌan ndoso ta ndee ni ka ndáa yaꞌvi ya íkan na ikán nuu naꞌa, na káꞌan tuꞌun ya köo xíni na. Vaꞌa va kaꞌan na tá tu íyo inka naꞌa, na síndiko koo tuꞌun ya káꞌan na, tá tu ná ikan na saa, ta saa kua vaꞌa xaꞌa ni na ndee xiꞌin na veꞌe ñuꞌu.

1 Corintios 8:1

Ta vitin káꞌan i xiꞌin ndo xaꞌa ñaꞌa ya ndi̱ndakan tuꞌun ndo yeꞌe xaꞌa, án vaꞌa kuxi ndo ya, án küvi kuxi ndo ñaꞌa ya sóko naꞌa nuu naꞌna ndioxi ya ndíi. Ta vaꞌa ná kaꞌan i xiꞌin ndo ya ndixa kua xíni ni ndiꞌi yo. Sundi tá ndíkani ini yo ya ndee ni xíni yo nuu inka naꞌa kua ndúu yo naꞌa, na kútaa ni ini. Ta ya ndixa ni ka ndáa yaꞌvi ku ya kúꞌvi ni ini yo xíni yo inka naꞌa, chi xiꞌin ya kúꞌvi ini yo xíni yo na, ta táxi yo ndee ndaꞌa na ya kundikun ni ka na ichí Ndioxi.

2 Corintios 12:4

Chi ndi̱xaꞌan i nuu ndivi mí nuu índuꞌu Ndioxi, ta ikán kua xi̱ni soꞌo i tuꞌun ya íyo sěꞌe, ta nda iin naꞌa köo ichí ndaꞌa ya kuchiñu na kaꞌan na tuꞌun ikán.

Gálatas 5:22

Ta süvi saa íkan Tachi I̱í Ndioxi xiꞌin yo, chi ya chíndee taꞌan ka va kua xiꞌin yo kuꞌvi ini yo kuni yo na taꞌan yo, saa táxi ya kusini ni yo, ta táxi ya íyo vaꞌa ini yo xiꞌin taꞌan yo, saa táxi ya ndúu yo na kaꞌnu ini, ta táxi ya ndúu yo na toꞌo ni ini, saa táxi tu ya ndúu yo naꞌa, na tái ni ini, ta táxi tu ya ndúu yo naꞌa na ndáa ni ini naꞌa xíni na án Ndioxi ta ndáa ini ra xíni ra yoo,

Gálatas 5:6

Chi tá kándixa yo Jesucristo ta köo ndáa yaꞌvi ka ya án kúu mií yo tuni Ndioxi án köo ya kúu mií yo, chi ya ndee ni ndáa yaꞌvi nuu ra kua ndáa ni ini yo xíni yo ra xaꞌa ya kúꞌvi ni ini ra xíni ra yoo.

1 Timoteo 1:5

Yakan káꞌan i xiꞌin un ya kaꞌan un xiꞌin na ñani yo ya ná kuꞌvi ni ini na kuni taꞌan na xiꞌin ndinuꞌu nima na, ta ni ya xínituni na ta täxi ya kuachi xaꞌa na nuu ra, chi ndinuꞌu ni ini na ndáa ini na xíni na ra.

1 Pedro 4:8

Chi ya ndee ni ndee nuu ndiꞌi ya kua kuꞌvi ni ini ndo kuni taꞌan ndo, chi saa kua kuchiñu ndo xaa kaꞌnu ini ndo xaꞌa kuachi na taꞌan ndo, ta xaꞌa ya kúꞌvi ni ini ndo xíni ndo na kua kuchiñu ndo xaa kaꞌnu ini ndo xaꞌa kuachi na, ni ndee ni ndee káa ya.

2 Pedro 2:18

Chi nda ikán ta ndee ni chínuu vaꞌa nda tuꞌun káꞌan nda xiꞌin naꞌa ya sáka nda xi̱ní na, síxinu nda i̱ni na xiꞌin tuꞌun ya káꞌan nda xiꞌin na ndisaa xaꞌa ya kútoo ni mií ikin kuñu nda kua káꞌan nda xaꞌa. Ta na íkan nda saa xiꞌin ku naꞌa, na xa si̱ndoo ya väꞌa i̱kan na, na xa ka̱na koo tañu na väꞌa ku na íkan nda saa xiꞌin.

El Apocalipsis 14:2

Sindiꞌi saa xi̱ni soꞌo i ya ndee ni níꞌi, tá kuꞌva ndee ni níꞌi kóyo kuaꞌa ni tikuii nuu sukun ni, saa kúu. Án tá kuꞌva ndáꞌi savi saa kúu. Saa síso ni, tá kuꞌva síso kuaꞌa ni naꞌa, na síkaꞌa itun arpa saa kúu.