1 Corintios 12:13 - Xochapa Mixteco

¹³ Saa chi tixin iin mií Tachi I̱í ra kua chi̱chi ndiꞌi yo yakan iin ndu̱u ndiꞌi yo xiꞌin ra. Án yo judío ku yo, án süvi yo judío ku yo, án yo sa̱ta na xáa chiñu xiꞌin ya nduxa ku yo, án yo íyo ndika ku yo, ta iin káchi ndi̱kuiso ra ndiꞌi yo. Ta tá íin nduta xíꞌi yo saa káa Tachi ra ya ndi̱niꞌi yo nuu ra, íyo ya xiꞌin yo.

1 Corintios 12:13 Mawu Ofanana

San Mateo 3:11

Yeꞌe, ta síkuchi i ndóꞌo̱ xiꞌin tikuii, ya sínaꞌa ndo mií ndo nuu naꞌa ya ndi̱nama ndo kuꞌva íyo ndo. Sundi íyo inka ra vaxi sindiꞌi, ta ndee ni ra ikán nuu yeꞌe. Ra ikán ku ra sikuchi ndóꞌo̱ xiꞌin Tachi I̱í Ndioxi xiꞌin ñu̱ꞌu̱ ya xíxi. Xaꞌa ya ndee ni ra ta nda nduxan ra küvi loꞌo kundiso i.

San Lucas 3:16

Ta saa ndi̱kaꞌan ra xiꞌin na, káchi ra saa: ―Süvi yeꞌe ku i. Ya ndaa kua síkuchi i ndóꞌo̱ xiꞌin tikuii, sundi süvi yeꞌe ku i sikaku ndóꞌo̱. Vaxi iin ra, ta ra ikán ku ra chee ni nuu i, ta nda sata nduxa ra küvi kuyati i ndaxin i chi yáꞌa ni chee ra nuu i. Ra ikán ku ra sikuchi ndóꞌo̱ xiꞌin Tachi I̱í Ndioxi xiꞌin ñu̱ꞌu̱ xíxi.

San Juan 1:16

Ta xaꞌa ya chútu ni ya vaꞌa ini ra ikán, ta nda yoo ndi̱niꞌi ya vaꞌa xiꞌin ra. Ndakua ndíkun taꞌan ya táxi ra ndaꞌa yo.

San Juan 1:33

Ta yeꞌe täꞌan kundaa ini i unku ra, sundi ra ti̱ꞌvi yeꞌe vaxi i sikuchi i naꞌa xiꞌin tikuii, ku ra ndi̱kaꞌan xiꞌin i káchi ra saa: “Tá xi̱ni un vaxi nùù Tachi i íyo ya xiꞌin iin ra, ta ra ñaa ku ra síkuchi naꞌa xiꞌin Tachi I̱í i”, káchi Ndioxi xiꞌin i.

San Juan 3:5

Saa ndi̱kuiin Jesús káꞌan ra, káchi ra saa: ―Ya ndaa ni káꞌan i xiꞌin un, ndiꞌi na täꞌan kaku xiꞌin tikuii ni xiꞌin Tachi I̱í Ndioxi ta küchiñu na kiꞌvi na koo na nuu xáꞌnda chiñu Ndioxi.

San Juan 4:10

Saa ndi̱kuiin Jesús káꞌan ra: ―Tá tu xíni un unku ya vaꞌa kúni Ndioxi taxi ra ndaꞌa un ta kundaa ini un unku yeꞌe, ndíkuu. Ta saa nduku un tikuii nuu i, ta taxi i rá ndaꞌa un, ta tikuii rá taxi i ndaꞌa un kúu mií rá ndee taxi rá kutaku na ivi ―káchi ra xiꞌin yá.

San Juan 4:14

Sundi na koꞌo tikuii nduta táxi i ndaꞌa na ta nda iin kivi ïchi ka na. Saa chi tikuii rá táxi i koꞌo na ta nduu rá tá káa iin ita chee ini na, ta nda iin kivi ïchi rá ini na. Ta na koꞌo tikuii rá taxi i ta küvi na, chi kúu mií rá ndee ya taxi rá kutaku na, ta nda iin kivi ya vaxi ndïꞌi xaꞌa na ―káchi Jesús xiꞌin yá.

San Juan 6:63

Saa ndi̱kaꞌan ka ra xiꞌin na, káchi ra saa: ―Iindaa Tachi Ndioxi ku ya kúu mií ndee táxi ya kutaku naꞌa, ta nda iin na ñuu ivi köo kúu mií ndee ya taxi na kutaku naꞌa. Ta ndiꞌi tuꞌun ya ndi̱kaꞌan i xiꞌin ndo, ku tuꞌun Tachi Ndioxi ta kúu mií ya ndee táxi ya táku ndo.

Los Hechos 1:5

Saa chi ya ndaa kua si̱kuchi ra Juan naꞌa xiꞌin tikuii, sundi ndóꞌo̱ ta soo uvi ndaá kivi kua kuchi ndo ikán Tachi I̱í Ndioxi ―káchi Jesús xiꞌin nda.

ROMANOS 3:22

Ta ya yóꞌó kua sínaꞌa Ndioxi nuu yo vitin: xaꞌa ya kándixa yo Jesucristo kua, ndúu yo naꞌa, na vaꞌa na köo ka kuachi kúu mií nuu ra, án yo judío ku yo, án süvi yo judío ku yo.

ROMANOS 3:29

¿Án Ndioxi, ra chee nuu ndisaa na judío ku ra káꞌán ndo? ¿Án köo xíni ndo, Ndioxi ta kúu tu ra Ndioxi na köo kúu judío va? Ya ndaa kua saa íyo ya, Ndioxi ku ra chee ni nuu ndiꞌi na ñuu ivi yóꞌó.

ROMANOS 4:11

Ta sindiꞌi vi ndi̱kunuu tuni Ndioxi ra chi xa yachi ka vi ka̱ndixa ni ra Ndioxi. Ta xaꞌa ya ka̱ndixa ni ra yakan ndu̱u ra, ra vaꞌa nuu Ndioxi. Ta saa ndu̱u ra Abraham tá káa iva ndiꞌi ni kúu naꞌa, na ndinuꞌu ni kándixa Ndioxi, vani köo tuni Ndioxi kúu mií sava na. Ta xaꞌa ya kándixa na tá kuꞌva ka̱ndixa ra Abraham Ndioxi, xaꞌa ya ikán kua ndu̱u na, na vaꞌa, na köo ka kuachi kúu mií nuu ra.

1 Corintios 10:2

Tá ndo̱ꞌo na saa, ndi̱xika na tixin viko tin ndi̱yaꞌa na maꞌñu nduta ñûꞌu, nduta Kuáꞌa̱. Ta nda tá íin na chi̱chi saa ndi̱xiyo na, xaꞌa ya ikán kua vaꞌa ndi̱kitaꞌan na xiꞌin ra Moisés, ndi̱kundikun na ra.

Gálatas 3:23

Yachi tá täꞌan kixi Jesucristo, tá ndi̱xiyo yo ndaꞌa ley, ta tá íin na ñúꞌu veꞌe kàà saa ndi̱xiyo yo ndaꞌa ya, chi köo ndi̱kuvi saña yo nda kivi tá ka̱ndixa yo Jesucristo, saa kua ndi̱saña ndika yo ndaꞌa ley ikán.

Gálatas 3:28

Iin nuu ndu̱u ndiꞌi yo xiꞌin Jesucristo, iin káchi ndáa yaꞌvi ndiꞌi yo, án yo judío ku yo, án süvi yo judío ku yo, án yo sa̱ta naꞌa xáa chiñu nuu na ku yo, án süvi yo ndi̱sata na ku yo, án taa ku yo án ná ñaꞌa ku ná, ta iin káchi ndáa yaꞌvi ndiꞌi yo nuu Ndioxi.

Efesios 3:6

Ta ya yóꞌó ku ya chi̱tuni Ndioxi ndi̱xiyo sěꞌe: Iin káchi niꞌi naꞌa, na köo kúu judío xiꞌin na judío. Niꞌi na ñaꞌa ya ki̱ndoo Ndioxi taxi ra ndaꞌa naꞌa, na ndixa kúu seꞌe ra. Nda na köo kúu judío niꞌi ya yóꞌó xaꞌa ya kándixa na Jesucristo ya sikaku ra na.

Efesios 4:5

Ta iindaa va ku Tata yo Jesucristo, iindaa ku ya ndaa kándixa yo, iindaa ku tu ya chi̱chi va yo.

Efesios 5:26

I̱kan ra saa xiꞌin yo ya kuchiñu ra ndasa i̱í ra yoo. Ta xaꞌa ya xi̱ni soꞌo yo tuꞌun vaꞌa xaꞌa ra kua ndu̱u yo naꞌa, na i̱í nuu ra, saa chi̱chi yo xiꞌin tikuii xaꞌa ya kándixa yo ra.

Efesios 6:8

Ta vaꞌa ná kundaa ini ndo chi vaxi kivi ta chaꞌvi mií Tata yo Jesucristo iin iin yo xaꞌa chiñu vaꞌa i̱kan yo, án yo xáa chiñu xiꞌin ya nduxa ku yo, án yo íyo ndíka ku yo, ta iin káchi chaꞌvi ra ndiꞌi yo.

Colosenses 1:27

Ta saa kua i̱kan Iva yo Ndioxi, saa chi ku̱ni ra ya ná kundaa ini na kúu kuenta mií ra xaꞌa ñaꞌa ya ndi̱xiyo sěꞌe xinaꞌa. Ta tuꞌun ra ya ndaa, ya chee ni, ya luvi ni, ta ya kuni soꞌo ndiꞌi ni kúu naꞌa kua. Ta ya káꞌan tuꞌun Iva yo xaꞌa ya ndixiyo sěꞌe yóꞌó kua: íyo Tata yo Jesucristo nima ndóꞌo̱ köo kúu judío vitin, ta kúndaa teꞌe ini ndo ya koo ndo xiꞌin ra nuu ndivi.

Colosenses 3:11

Ta xaꞌa ya xa ndu̱u ndo na xa̱á vitin ta köo ndáa yaꞌvi ka ya án ndo judío ku ndo án süvi ndo judío ku ndo, án ndo kúu mií tuni Ndioxi ku ndo, án ndo köo tuni Ndioxi ku ndo, án ndo ka̱ꞌvi ni ku ndo án ndo köo ndi̱kaꞌvi ku ndo, án ndo ke̱e inka ñuu kani ni ku ndo, án ndo xáa chiñu xiꞌin ya nduxa ku ndo, án ndo íyo ndika ku ndo, nda iin ya yóꞌó köo ndáa yaꞌvi ni, ya ndee ni ndáa yaꞌvi kua íyo Cristo xiꞌin ndo vitin.

1 Pedro 3:21

Taꞌan tikuií ikán ku tikuií rá síkuchi naꞌa ndóꞌo̱ vitin, rá síkaku ndóꞌo̱. Ta tikuií ikán ta köo ndíkata rá ya väꞌa íyo ikin kuñu yo, sundi ndása vaꞌa rá ya xínituni yo, saa síkaku rá yoo xaꞌa ya ndi̱taku Tata yo Jesucristo tañu na ndíi.