1 Corintios 1:6 - Xochapa Mixteco

⁶ Ta ya yóꞌó ku ya vaꞌa ni káꞌan xaꞌa ndo, chi ndee ni vaꞌa ku̱ndaa teꞌe ini ndo xiꞌin tuꞌun ya ndi̱kaꞌan nde xiꞌin ndo xaꞌa Tata yo Jesucristo.

1 Corintios 1:6 Mawu Ofanana

San Marcos 16:20

Saa ka̱na koo nda xi̱taꞌan xiꞌin Jesús xa̱á nda káꞌan ndoso nda tuꞌun vaꞌa ndá kuꞌva sikaku Ndioxi naꞌa. Ndiꞌi ni kúu ñaꞌñu xíka nda káꞌan ndoso nda tuꞌun ra. Ta íyo Tata yo chíndee ra nda, táxi ra íkan nda yatuꞌun nuu naꞌa. Tixin ya yóꞌó sínaꞌa Ndioxi naꞌa ya ndixa ku tuꞌun ra ya ndíkani nda. Saa ná koo.

Los Hechos 11:17

Tá i̱kan Ndioxi xiꞌin yoo, saa i̱kan tu ra xiꞌin na ikán va. Ta̱xi ra Tachi ra ndaꞌa na kándixa Tata yo Jesucristo. ¿Ta unku vi yeꞌe ya ndikasi i nuu Ndioxi täxi ra Tachi ra ndaꞌa na? ―káchi ra Pedro xiꞌin na.

Los Hechos 11:21

Ta Ndioxi ta̱xi ra ndee ra ndaꞌa na káꞌan ndoso tuꞌun ra. Ta kuaꞌa ni naꞌa xi̱ni soꞌo tuꞌun ya ndi̱kaꞌan ndoso na ikán, si̱ndoo ichí ya kándixa na, ta ndi̱kundikun na ichí Tata yo.

Los Hechos 18:5

Saa tá ndi̱xaa ra Silas xiꞌin ra Timoteo ñuu macedonia ta chiñu nuu ra Pablo kua xíka ra káꞌan ndoso ra tuꞌun Ndioxi. Vitin taan káꞌan ra xiꞌin na judío xaꞌa Jesús ya kúu ra Cristo.

Los Hechos 20:21

Ndi̱kaꞌan ndoso i tuꞌun ra xiꞌin na kúu judío tin na köo kúu judío, ya xíniñuꞌu na ndiko koo ini na xaꞌa kuachi na nuu Ndioxi, saa xáa na kundaa ni ini na kuni na Tata yo Jesucristo.

Los Hechos 20:24

Ta nda iin ñaꞌa küvi kasi nuu i xaꞌa chiñu ya íkan i, ni köo ndíꞌi ini i, tá tu kuvi i xaꞌa ra, ta vaꞌa kuvi va i xaꞌa ra. Chi ya ndee ni ndíꞌi ini i xaꞌa kua sixinu i chiñu nuu ra ya ta̱xi ra ndaꞌa i xaa súvi i nuu ra ya ndikuiin i kaꞌan ndoso i tuꞌun vaꞌa xaꞌa ra xiꞌin naꞌa ya ná kundaa ini na ndá kuꞌva kúꞌvi ni ini Ndioxi xíni ra na.

Los Hechos 22:18

xi̱ni i Tata yo Jesús káꞌan ra xiꞌin i, káchi ra saa: “Kama ni koo un kee un ñuu Jerusalén yóꞌó, chi küaꞌa na ñuu yóꞌó kandixa na ya káꞌan un xaꞌa i xiꞌin na”, káchi ra xiꞌin i.

Los Hechos 23:11

Saa tá ku̱ñuu ta ndi̱tuvi Tata yo Jesús nuu ra Pablo, káꞌan ra xiꞌin ra, káchi ra saa: ―Xaꞌa un ndee yóꞌo̱ Pablo, ku ïꞌvi un saa chi tá kuꞌva ndíkuiin un káꞌan un xaꞌa i ñuu Jerusalén yóꞌo̱, saa ndikuiin tu un kaꞌan un xaꞌa i ñuu Roma va ―káchi Tata yo Jesús xiꞌin ra.

Los Hechos 28:23

Ñaa ki̱ndoo na kivi ndá kivi kua ndi̱kaya na kuni soꞌo na kaꞌan ra. Ta kuaꞌa ka vi na ndi̱xaa nuu ra kivi ya ki̱ndoo na. Ñaa xa̱á ra ndítuꞌun ra xiꞌin na nuu ndíkuiin ra xaꞌa ichí ya xáꞌnda chiñu Ndioxi. Nda xitaan xa̱á ra káꞌan ra iin saa nda xikuaa. Síxinu ra ini na ya kundaa ini na xaꞌa Jesús, chi suvi xaꞌa ra kua ta̱a ra Moisés tin ya ta̱a nda ndi̱kaꞌan ndoso tuꞌun yuꞌu Ndioxi xinaꞌa.

ROMANOS 15:19

Ndixaꞌvi ni mií Ndioxi xaꞌa Tachi I̱í ra, saa chi chíndee ya yeꞌe íkan i yatuꞌun nuu na xiꞌin ya vaꞌa ni, ta soꞌva kua síxinu i tuꞌun vaꞌa xaꞌa Jesucristo. Nda ñuu Jerusalén kua xa̱á i káꞌan ndoso i tuꞌun vaꞌa xaꞌa ra, iin saa ndi̱xaa i nda ñuu Ilírico, ndi̱xika ndiꞌi i ndi̱kaꞌan i xiꞌin na xaꞌa tuꞌun vaꞌa ya síkaku mií na.

2 Corintios 12:12

Xiꞌin ndiꞌi ni kúu ya vaꞌa xiꞌin yatuꞌun ya i̱kan i xi̱ni ndo ya ñaa kua káꞌan xaꞌa i ya kúu i iin ra apóstol, ra xíka chiñu nuu Tata yo Jesucristo. Saa chi kaꞌnu ni ndi̱xiyo ini i xiꞌin ndo.

Gálatas 3:5

Ta ¿án xaꞌa ya xáa súvi ndo ley Ndioxi kua ta̱xi ra Tachi I̱í ra ndaꞌa ndo, túvi ndo? Saa tu ya íkan Ndioxi yatuꞌun xiꞌin va ndo ta ¿án xaꞌa ya xáa súvi ndo ley Ndioxi kua, túvi ndo? Süvi saa íyo ya. Xaꞌa ya xi̱ni soꞌo ndo tuꞌun vaꞌa xaꞌa Tata yo Jesucristo, ta ka̱ndixa ndo ya sikaku ra ndóꞌo̱. Xaꞌa ya ikán kua ta̱xi ra Tachi I̱í ra ndaꞌa ndo, saa tu ya íkan ra yatuꞌun xiꞌin va ndo.

2 Tesalonicenses 1:10

Ta ya yóꞌó kua kuu tá kivi ná ndiko koo Tata yo Jesucristo. Sundi mií ndóꞌo̱, na ñuu ra, na i̱í ku ndo xaa kaꞌnu ni ñaꞌa. Saa ndikanda ni ini ndo kuni ndo ra. Ta kivi ikán kua koo vaꞌa ni ini ndo, chi ndi̱kiꞌin vaꞌa ndo tuꞌun ra ya ndi̱kaꞌan nde xiꞌin ndo, saa ka̱ndixa ni ndo ya.

1 Timoteo 2:6

Saa ta̱xi ra mií ra ndi̱xiꞌi ra xaꞌa kuachi ndiꞌi yo. Ta xaꞌa ya i̱kan ra saa kua cha̱ꞌvi ra xaꞌa yo, ya vaꞌa ku̱chiñu yo ndi̱saña ndika yo nuu kuachi yo. Ta ya yóꞌó ku tuꞌun vaꞌa ya ta̱xi Iva yo Ndioxi ndaꞌa na ñuu ivi yóꞌó, tá kivi chi̱tuni mií ra.

2 Timoteo 1:8

Xaꞌa ya ñaa kua kükaꞌán nuu un ndikuiin un kaꞌan un xaꞌa Tata yo Jesucristo. Ni xaꞌa yeꞌe kükaꞌán nuu un xaꞌa ya ndíkaa i veꞌe kàà yóꞌó xaꞌa ra. Ya ndee ni ka xíniñuꞌu un ikan un kua xaꞌa ndee ni ini un ndoꞌo un xiꞌin i xaꞌa tuꞌun vaꞌa xaꞌa ra. Ta mií ra taxi ndee ndaꞌa yo ya kuchiñu yo nuu ndiꞌi tindoꞌo vaxi nuu yo.

El Apocalipsis 1:2

Ta vitin ndítuꞌun i xiꞌin ndo tuꞌun ya ndaa ya ndíkuíin xaꞌa ndiꞌi ya si̱naꞌa tatun Ndioxi nuu i, ta tuꞌun yóꞌó ku tuꞌun Ndioxi ya ndi̱tuꞌun Tata yo Jesucristo xiꞌin i.

El Apocalipsis 1:9

Yeꞌe Juan ñani ndo ku i, saa chi iin káchi kándixa yo Tata yo Jesucristo, ta ndóꞌo̱ xiꞌin yeꞌe ndíkun yo ichí nuu xáꞌnda chiñu Ndioxi. Xaꞌa ya iin ku yo xiꞌin taꞌan yo, ta iin káchi tíxuꞌvi ndiꞌi yo xiꞌin taꞌan yo, saa táxi Ndioxi ndee ra ndaꞌa yo, ya kúndee ini yo xiꞌin ya tíxuꞌvi yo. Xaꞌa ya ndi̱kaꞌan ndoso i tuꞌun Ndioxi ya si̱naꞌa Tata yo Jesucristo yeꞌe, yakan ti̱in na chiñu yeꞌe ndi̱xaꞌan na ndi̱ndaka na yeꞌe iku loꞌo ya Patmos, ya ndíkaa maꞌñu nduta ñûꞌu xaꞌa ya síndoꞌo ni na ini i.

El Apocalipsis 12:11

Sundi vitin ta xa ku̱chiñu na nuu ri. Saa chi kiti Levo loꞌo ikán ndi̱taxi ri mií ri xaꞌa na ta nií ri ikán ku rá ta̱xi ndee ndaꞌa na. Ta saa tu tuꞌun ya ndaa, ya ndíkuiin na xaꞌa Tata yo Jesucristo, ta̱xi ya ndee ndaꞌa na. Xaꞌa uvi ndee yóꞌó kua ku̱chiñu na ku̱ndee na nuu kiti nǎꞌa. Ta nda loꞌo köo ndi̱ndiꞌvi na kuvi na, ta̱xi ndiꞌi na mií na ya kuvi na xaꞌa ya kándixa na Ndioxi.

El Apocalipsis 12:17

Saa ndi̱saa ni ini kiti ko̱ó nǎꞌa ikán xiꞌin yá, ta ndi̱kiꞌin ri kuaꞌan ri kani taꞌan ri xiꞌin tá kúu ndiꞌi seꞌe yá. Ta na seꞌe yá ikán ku na xáa súvi ya xáꞌnda chiñu Ndioxi, ta ndee ni ndíkuiin na, köo síndoo na ya ndítuꞌun na tuꞌun ya ndaa xaꞌa Tata yo Jesucristo, kándixa ni na ra.

El Apocalipsis 19:10

Saa si̱kusiti i nuu tatun ikán ya xaa toꞌo ñaꞌa i, ta ndi̱kaꞌan ya xiꞌin i, káchi ya saa: ―Ïkan un saa, küsiti un nuu i, chi tá kuꞌva íyo mií un xáa chiñu un xiꞌin na ñani un na ndíkun Tata yo Jesucristo saa íyo tu yeꞌe va. Chi yo xáa chiñu nuu Ndioxi ku ndiꞌi yo, saa kándixa yo tuꞌun ya ndaa ya ndi̱kaꞌan Tata yo Jesucristo, ta ná sïndoo yo ya kándixa yo tuꞌun ra. Yakan küsiti un nuu i, iin mií Ndioxi ná xaa kaꞌnu ni yo. Chi tuꞌun ya si̱naꞌa Tata yo Jesucristo, ta iin káchi ku ya xiꞌin tuꞌun ya ndi̱kaꞌan nda ndi̱kaꞌan ndoso tuꞌun yuꞌu Ndioxi xinaꞌa, chi mií Tachi I̱í Ndioxi ta̱xi ya ndaꞌa nda ikán ndi̱kaꞌan nda ―káchi tatun ikán xiꞌin i.

El Apocalipsis 6:9

Saa tá xa̱ꞌnda tuku Levo loꞌo ikán inka sello ya uꞌun. Ta xi̱ni i ndíchi nama i̱í nuu ndivi nuu ndóso ñaꞌa ya sóko na nuu Ndioxi, ta tixin nama i̱í ikán xi̱ni i ndóo ya vaꞌa naꞌa, na ndi̱xiꞌi xaꞌa ya ndi̱kaꞌan ndoso na tuꞌun Ndioxi, ta köo ndi̱sindikoo na ichí ra, ndee ni tuun xi̱ndikun na ya.