1 Corintios 1:5 - Xochapa Mixteco

⁵ Saa chi tixin Jesucristo kua ta̱xi ni Ndioxi ya vaꞌa ndaꞌa ndo ya kuchiñu ndo ndituꞌun ndo ya vaꞌa xiꞌin na ivi, saa ta̱xi ra ya ndíchi ni ndaꞌa ndo.

1 Corintios 1:5 Mawu Ofanana

Los Hechos 2:4

Ta Tachi I̱í Ndioxi kua xa̱a sata iin iin na, ñaa xa̱á iin iin na káꞌan na inka nuu tuꞌun ya káꞌan na inka ñuu. Tá íyo ya ta̱xi Tachi I̱í Ndioxi ndaꞌa na kaꞌan na, saa íyo ya xa̱á na káꞌan na.

ROMANOS 11:12

Kuachi na judío kua köo ndi̱xiin na kuni soꞌo na ya ndi̱kaꞌan Ndioxi xiꞌin na. Yakan vitin ta ndiꞌi ni kúu na ñuu ivi ndi̱niꞌi ya vaꞌa i̱kan Ndioxi, nda na köo kúu judío vaꞌa ni ke̱e. Sundi tá ná kuni soꞌo na judío ya káꞌan Ndioxi xiꞌin na, ta vaꞌa ni ka kee na.

ROMANOS 15:14

Ñani yo xiꞌin kuꞌva yo, xíni i ya ndee ni vaꞌa ini ndo, ta xa xíni ni ndo ya ndaa, yakan vaꞌa ni táxi ndo nuu taꞌan ndo.

ROMANOS 15:4

Ndiꞌi tuꞌun Ndioxi ya ta̱a na xinaꞌa xaꞌa ya sinaꞌa ya yoo kua ta̱a na ya. Chi tuꞌun Ndioxi ta chíndee ya yóo, xáꞌa ya ndee xiꞌin yo tá ndóꞌni yo nuu tindoꞌo, saa chíndee ya yóo táxi ya ndee ndaꞌa yo ya kuekuee kundatun yo ya sixinu Ndioxi ya ndi̱kaꞌan ra taxi ra ndaꞌa yo.

1 Corintios 12:10

Sava tuku na níꞌi ndee vaꞌa ni nuu Tachi I̱í Ndioxi ya ikan na yatuꞌun Ndioxi. Sava tuku na níꞌi ndee vaꞌa ni ya kaꞌan ndoso na tuꞌun yuꞌu Ndioxi. Sava tuku na níꞌi ndee vaꞌa ni ya ndíkuni na tá káꞌan Tachi I̱í Ndioxi, ta ndíkuni tu na tá káꞌan tachi nduvaꞌa, ya nǎꞌa. Sava tuku na níꞌi ndee vaꞌa ni ya káꞌan na kuaꞌa ni nuu tuꞌun. Sava tuku na níꞌi ndee vaꞌa ni ya síndiko koo na tuꞌun ya káꞌan inka naꞌa.

1 Corintios 12:8

Saa chi táxi Tachi I̱í Ndioxi ya vaꞌa ndaꞌa sava na, ya kúchiñu na kúndaa ini na xiꞌin tuꞌun ya ndee ni ndíchi, ta sava tuku na ndee ni íyo ya xínituni na, ndíchi ka vi íyo ya káꞌan na.

1 Corintios 13:2

Tá tu vaꞌa ni káꞌan i tuꞌun yuꞌu Ndioxi, ni vaꞌa ni kúndaa tu ini i xiꞌin ndiꞌi ni kúu ya íyo sěꞌe, ni ndíchi ni káa i, ni kándixa ni i Ndioxi ya kuni soꞌo ra kaꞌan i xiꞌin ra ndinama ra iku kuꞌun ya inka ñaꞌñu, sundi tá tu köo ya kúꞌvi ini táxi Ndioxi íyo nima i, ya kuꞌvi ini i kuni i inka naꞌa, ta ni köo ndáa yaꞌvi mií vi i.

1 Corintios 13:8

Chi ya kúꞌvi ini táxi Ndioxi ndaꞌa yo kuꞌvi ini yo kuni yo inka naꞌa, ta ndiꞌi saa tiempo koo ya. Sundi naꞌa, na káꞌan tuꞌun yuꞌu Ndioxi ta vaxi tiempo küchiñu ka na kaꞌan na tuꞌun yuꞌu ra. Ni na káꞌan ndá ka nuu tuꞌun ya köo xíni na ta köo ka na kaꞌan ya, ni ya ndíchi ni kundaa ini yo xaꞌa ya ndi̱xiyo sěꞌe, ta ndiꞌi xaꞌa ya.

1 Corintios 14:26

Ñani yo, ná koto ndo unkua vaꞌa xíniñuꞌu ndo ikan ndo tá ndíkitaꞌan ndo veꞌe ñuꞌu: Ta vaꞌa kata sava ndo yaa nuu Ndioxi, ta sava ndo sinaꞌa, ta sava ndo kaꞌan xaꞌa tuꞌun ya sítuvi Ndioxi nuu ndo, ta vaꞌa kaꞌan sava ndo tuꞌun ya ke̱e nuu ndivi, ya köo xíni ndo, ta ná koo naꞌa sindiko niꞌi tuꞌun ya káꞌan ndo. Saa ikan ndo ya vaꞌa chindee taꞌan ndo xiꞌin na veꞌe ñuꞌu ya taxi ndo ndee ndaꞌa na.

1 Corintios 8:11

Ta ìyo ni ndiꞌi xaꞌa ra xaꞌa kuachi ndóꞌo̱, chi ndóꞌo̱, ta xa xíni vaꞌa ndo ya köo kuachi xaꞌa ya ikán. Sundi ìyo ni ndiꞌi xaꞌa iin taa ra ndi̱xiꞌi Tata yo Jesucristo xaꞌa.

2 Corintios 4:6

Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

2 Corintios 6:10

Tá íin nde kúsuchi ni ini saa íin nde túvi na, ta süvi ya ndaa kua chi ndiꞌi saa va ichí kúsini ni nde. Tá íin ndeꞌe ndáꞌvi ni saa íin nde túvi na, ta süvi ya ndaa kua, chi ndiꞌi saa va ichí táxi nde ya kuika, ya vaꞌa vaxi nuu ndivi ndaꞌa kuaꞌa ni naꞌa. Tá íin ndeꞌe köo nda loꞌo ñaꞌa nuu, saa íin nde túvi na, ta süvi saa íyo ya chi íyo ndiꞌi va ñaꞌa táxi Ndioxi ndaꞌa nde.

2 Corintios 8:7

Saa chi ndóꞌo̱, ta vaꞌa ni va íkan ndo: Ndee ni vaꞌa ndáa ini ndo xíni ndo Ndioxi, ta saa vaꞌa ni tu vií ndítuꞌun ndo tuꞌun ra xiꞌin naꞌa, ta xíni vaꞌa ndo ya ndaa xaꞌa Ndioxi. Saa íyo ndúvi ni ndo ya chindee taꞌan ndo xiꞌin na taꞌan yo xaꞌa ya kúꞌvi ini ndo xíni ndo na, chi saa si̱kuaꞌa ndo nuu nde. Yakan xíkan ni nde ya mani nuu ndo ya ná chindee taꞌan loꞌo ndo xiꞌin xuꞌun na ñani yo, na ndóo ñuu Jerusalén.

2 Corintios 9:11

Ta Ndioxi ku ra ndasa kuika ni ndóꞌo̱ xiꞌin ndiꞌi nuu ñaꞌa ya vaꞌa ni ya ná kuchiñu ndo chindee ni ndo naꞌa. Ta xuꞌun ya tíꞌvi ndo kuꞌun xiꞌin nde ndaꞌa na taꞌan yo, ta vaꞌa ni kuni na xiꞌin ya, saa taxi ni na tixaꞌvi ndaꞌa Ndioxi.

Efesios 1:17

Xáku ndaꞌvi i nuu Ndioxi ra chee ni, ra kúu Iva Tata yo Jesucristo ya ná taxi ra ya xínituni ndaꞌa ndo, ta saa ná xinu ndo kundaa vaꞌa ini ndo xaꞌa ra ta nda kuni taꞌan vaꞌa ka ndo xiꞌin ra,

Efesios 2:7

I̱kan Ndioxi saa xiꞌin yo chi kúni ni ra ya kundaa ini yo xaꞌa ra kivi vaxi ya ndee ni vaꞌa ini ra xiꞌin yo, ta saa kúꞌvi ni ini ra xíni ra yoo tixin seꞌe ra Jesucristo.

Efesios 3:8

Vani köo ndáa yaꞌvi ni va i nuu ndiꞌi na ñani yo, na kúu ñuu Ndioxi, ta ta̱xi ra ichí ndaꞌa i ya kaꞌan ndoso i tuꞌun vaꞌa xaꞌa ra xiꞌin naꞌa, na köo kúu judío. Ta tuꞌun vaꞌa ni ikán, ta tá káa ya kuika ni saa káa ya, chi köo ndíꞌi xaꞌa ya.

Efesios 6:19

Saa kaꞌan ni ndo xaꞌa i xiꞌin Ndioxi ya ná taxi ra ndee ndaꞌa i tá káꞌan ndoso i tuꞌun vaꞌa xaꞌa ra xiꞌin naꞌa, ya ná kuchiñu na kundaa ini na xaꞌa ñaꞌa ya chi̱tuni Ndioxi ndi̱xiyo sěꞌe, ya kúu tuꞌun vaꞌa xaꞌa ra.

Filipenses 1:9

Káꞌan ni i xaꞌa ndo xiꞌin Ndioxi ya ná kuꞌvi ni ka ini ndo kuni ndo Ndioxi iin iin kivi. Ta saa ná kuꞌvi ni tu ini ndo kuni ndo inka naꞌa va. Ta saa ná niꞌi ni ka ndo ya ndíchi nuu ra ya kuchiñu ndo kundaa ni ka ini ndo.

Colosenses 2:3

Saa chi ndiꞌi ya kuika xiꞌin ya ndíchi ni kúu mií Ndioxi tin ya ndee ni xínituni ta ndaꞌa mií Cristo íyo ndiꞌi ya.

Colosenses 3:10

Chi vitin ta xa ndu̱u ndo naꞌa, na xa̱á, na íin tá kuꞌva káa mií Ndioxi ra si̱kuaꞌa ndóꞌo̱ ku ra íkan saa xiꞌin ndo iin iin kivi nda ná xinu koo ndo kuni taꞌan vaꞌa ndo xiꞌin ra tá kuꞌva káa mií ra.

Santiago 3:13

Ñani yo, tá íyo sava ndo ndíchi ni, saa íyo ni ya vaꞌa ndo, xínituni ni ndo xaꞌa ichí Iva yo Ndioxi, ta vaꞌa sinaꞌa ndo ya xiꞌin chiñu vaꞌa, ya toꞌo, saa kua sinaꞌa ndo mií ndo ya kúu ndo naꞌa, na ndee ni táku ini, na ndaꞌvi ni ini.

2 Pedro 3:18

Ta ndóꞌo̱ xíniñuꞌu ndo kunitaꞌan vaꞌa ka ndo xiꞌin Tata yo Jesucristo, ra síkaku yoo, ra kúꞌvi ni ini xíni yoo. Ta ná xaa kaꞌnu ni yo ra ndiꞌi saa kivi xiꞌin ndiꞌi kivi ya vaxi. Saa ná koo.