1 Corintios 1:18 - Xochapa Mixteco

¹⁸ Tá ndíkani i tuꞌun xaꞌa Cristo ya ndi̱xiꞌi ra nuu cruzin, ta tá káa tuꞌun kíꞌvi saa káa ya káꞌan i nuu naꞌa, na ku̱aꞌan ichí nuu ndiꞌi xaꞌa na. Sundi mií yo síkaku Ndioxi, ta xíni yo tuꞌun yóꞌó ta ndee ni ndee kúu mií ya xaꞌa ya kúu ya tuꞌun Ndioxi.

1 Corintios 1:18 Mawu Ofanana

Los Hechos 13:41

Kuni soꞌo ndóꞌo̱ kúndasi nuu xíni yeꞌe, ta vaꞌa ndi̱kanda ka ini ndo kundoo ndo, ta saa ndiꞌi xaꞌa ndo. Chi vaxi kivi ikan i iin ya chee nuu ndo ta küaꞌa ndo kandixa ndo ya. Ni inka naꞌa ná kaꞌan xiꞌin ndo, ta küaꞌa ndo kandixa ndo na káchi ya ta̱a nda xinaꞌa ―káchi ra Pablo xiꞌin na.

Los Hechos 17:18

Ta sava nda xíka ikán ku nda ndíchi ni chi si̱kuaꞌa nda xiꞌin na náni epicúreos, ta sava nda si̱kuaꞌa xiꞌin na náni estoicos xa̱á nda káꞌan nda xaꞌa ra, káchi nda saa: ―¿Unkua káꞌan ví ra? ra síndaꞌvi naꞌa va ku ra ―káchi nda. Ta inka na káꞌan: ―Ra xíka káꞌan ndoso xaꞌa inka ndioxi va ku ra ―káchi nda. Saa káchi nda chi xi̱ni soꞌo nda káꞌan ra tuꞌun vaꞌa xaꞌa Jesús ta káꞌan ra xiꞌin na ya ndi̱taku ra.

Los Hechos 17:32

Saa tá xi̱ni soꞌo na ya ndi̱kaꞌan ra ya ndítaku na ndíi, ta saa xa̱á sava na kúsiki ndaa na ra, ta inka na káchi saa: ―Vaꞌa kuáꞌan, nda inka kixi un saa kuni soꞌo ka nde ya káꞌan un ―káchi na xiꞌin ra.

Los Hechos 2:47

Xáa toꞌo ka vi na Ndioxi. Ta ínuu vaꞌa ka vi tuꞌun na nuu inka naꞌa. Ta vitin taan íyo ka na ndíko koo ini xaꞌa kuachi na, ñaa xáa na ndíkundikun na Jesús ta síkaku Ndioxi na.

ROMANOS 1:16

Kúni i ná kundaa ini ndo, chi yeꞌe ta köo kúkaꞌan nuu i ya kándixa i tuꞌun vaꞌa xaꞌa Jesucristo, chi tuꞌun yóꞌó kúu mií ya ndee Ndioxi ya sikaku ya ndiꞌi naꞌa, na kándixa ya káꞌan ya. Xiꞌna ni ka na judío ku na xi̱ni soꞌo tuꞌun vaꞌa xaꞌa Jesucristo, saa xi̱ni soꞌo tu naꞌa, na köo kúu judío va ya.

1 Corintios 1:21

Xaꞌa ya ndíchi ni xi̱ní mií na ñuu ivi yóꞌó túvi na, yakan kua köo ndi̱xiin na kandixa na Ndioxi. Xaꞌa ya ikán kua vaꞌa ka si̱kaku Ndioxi naꞌa, na kándixa tuꞌun ya ndi̱tuꞌun nde xaꞌa Jesucristo xiꞌin na. Vani kuaꞌa ni naꞌa ndíkani ini xaꞌa tuꞌun ya ndi̱kaꞌan nde xiꞌin na, tuꞌun kíꞌvi va kua túvi na.

1 Corintios 15:2

Tuꞌun ya ndi̱kaꞌan i xiꞌin ndo ku ya síkaku ndóꞌo̱, tá tu ndinuꞌu ni ini ndo kándixa ndo ya xa ndi̱kaꞌan i xiꞌin ndo, tá tu köo ndi̱chikaa uvi ini ndo xiꞌin ya xa xi̱ni soꞌo ndo ndi̱kaꞌan i.

1 Corintios 2:14

Ta naꞌa, na köo íyo Tachi I̱í Ndioxi xiꞌin ta köo kúchiñu na kundaa ini na xaꞌa ya vaꞌa ke̱e nuu ndivi, chi tá káa tuꞌun ya kíꞌvi va saa káa ya nuu na. Köo kúchiñu na kundaa ini na xaꞌa ya, saa chi ndisaa naꞌa, na kúu mií Tachi I̱í Ndioxi ku na kúchiñu kúndaa ini xiꞌin ya.

1 Corintios 2:2

Saa tá ndi̱xiyo i xiꞌin ndo, ta chi̱kaa ini i kaꞌan i xiꞌin ndo ndisaa xaꞌa Cristo, ta köo ndi̱xiin i kaꞌan i xiꞌin ndo ndá ka ñaꞌa, ndisaa xaꞌa ya ndi̱xiꞌi ra nuu cruzin kua ndi̱kaꞌan i xiꞌin ndo.

1 Corintios 3:19

Saa chi ñaꞌa ya ndee ni ndíchi nuu na ñuu ivi yóꞌó, tá káa iin ya kíꞌvi saa káa ya nuu Ndioxi. Saa káꞌan tuꞌun Ndioxi ya ta̱a na xinaꞌa, káchi ya soꞌva: “Na ndíchi ni túvi na, ta xiꞌin ya ndíchi kúu mií na kua koyo na ikán Ndioxi”, káchi ya.

1 Corintios 4:10

Xaꞌa ya ndíkun nde Jesucristo, ta ni köo ndáa yaꞌvi nde nuu naꞌa, tá íin nde kíꞌvi va, saa íin nde nuu na. Ta ndóꞌo̱, ta xaꞌa ya ndíkun ndo Jesucristo ta tá íin naꞌa, na ndíchi ni va saa ndu̱u ndo. Ta ndeꞌe, ta vita ni va kúni nde ta mií ka va ndo ku ndo ndu̱ndee ni ka nuu nde, túvi ndo. Vaꞌa ni va káꞌan naꞌa xaꞌa ndo, xáa toꞌo ni na ndóꞌo̱, ta ndeꞌe, ta kúndasi nuu va na xíni na ndeꞌe.

2 Corintios 10:4

Saa chi ndeꞌe, ta köo xíniñuꞌu nde taꞌan ndaꞌa chiñu ya xíniñuꞌu na ñuu ivi yóꞌó tá kánitaꞌan na, chi ndeꞌe, ta ndee Ndioxi va ku ya xíniñuꞌu nde ya kuchiñu sindiꞌi xaꞌa nde ndiꞌi ndee ya väꞌa, ya ndíkuita kánitaꞌan xiꞌin nde.

2 Corintios 4:3

Ta sava naꞌa köo kúndaa ini na xiꞌin tuꞌun Ndioxi ya káꞌan ndoso nde nuu na, chi íyo ñaꞌa ndási ini na, ta na ikán ku naꞌa, na ndíkun kuaꞌan ichí nuu ndiꞌi xaꞌa na.

1 Tesalonicenses 1:5

Chi tá kivi ndi̱kaꞌan ndoso nde tuꞌun vaꞌa xaꞌa ra xiꞌin ndo, ta köo ndi̱kaꞌan nde tuꞌun mií nde xiꞌin ndo. Sundi xiꞌin ndee Tachi I̱í Ndioxi kua ndi̱kaꞌan nde xiꞌin ndo, saa ndinuꞌu ni ini nde kándixa nde ya ndaa kua ndi̱kaꞌan nde xiꞌin ndo. Ta xi̱ni mií ndo ndá kuꞌva ndi̱xiyo nde tá kivi xi̱ndoo nde xiꞌin ndo xaꞌa ya kúꞌvi ni ini nde xíni nde ndóꞌo̱.

2 Tesalonicenses 2:10

Ta saa nduku ni ra kuꞌva ya kuchiñu ra sindaꞌvi ra naꞌa, na kuaꞌan ichí nuu ndiꞌi xaꞌa na. Chi köo ndi̱xiin na ndikiꞌin na ya ndaa ya kúꞌvi ni ini Ndioxi xíni ra na, ya kuchiñu na kaku na.

HEBREOS 12:2

Ta iindaa mituꞌun xaꞌa Tata yo Jesucristo kua ná kundiꞌi ni ini yo, saa chi mií ra ku ra sínaꞌa yoo ndá kuꞌva kua kundaa ni ini yo kuni yo Ndioxi, saa tu iindaa mituꞌun mií ra ku ra chíndee yoo, ndása vaꞌa ra kuꞌva ndáa ni ini yo xíni yo Ndioxi. Ta saa ndi̱xaꞌa ndee ndiꞌi ini ra ndoꞌo ni ra nuu cruzin, ta köo ndi̱kiꞌin ra kuenta xaꞌa ya kúkaꞌan nuu ra, chi kúndaa ini ra tá si̱ndiꞌi ndo̱ꞌo ra saa ta kusini ni ra. Ta vitin ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

HEBREOS 4:12

Saa chi tuꞌun Ndioxi, ta ya táku ku ya ta ndee ni kúnu kuakiꞌvi ya xáꞌnda ya. Ndee ni ka ndee tuꞌun ra nuu iin i̱chi̱ ya xi̱ín ni uvi saa yuꞌu. Chi tuꞌun ra, ta kuakiꞌvi ya xáꞌnda ya nima naꞌa, iin saa nda nuu vaꞌa na, xiꞌin tivavi na, xiꞌin mbeke ya ñúꞌu ini leke na, ta vaꞌa xíto ndoso ya ndiꞌi ya xínituni na xiꞌin ya ndíkani ini na, ya íyo nima na.