Taytus 2:2 - Kaa n Kəzə̀ n fəghə mə

² I dii ndow nyim tə agheynun tə nə̀ ghə keeli tsu fə̀ŋ tə dzuŋu tə, ghəŋŋə ndow aghəə n jìi zey ghə̂ ghə i fuunə ghə n ngɔɔmə zə, kwɔɔ tsu soʼo wû i ghə. Ghə khə ni tɔʼɔ taw n bəghəm i fə̀ŋ i ghə, khə iləghə n wû i ghə, kow tsu soʼo təfə̀ŋ n bəghəm i fə̀ŋ zey ghə khənə n kow Klisto abə a tsəmə shiə kə ghə i ghaa zə.

Taytus 2:2 Mawu Ofanana

Malakus 5:15

Ambə ghə bə koʼ bənə Yeso ghi wù wey nɔɔ kə zay u bwu wey â loʼnə n kow wi, tə n doʼ fu nə̀ tə n dzəŋə keeli ndzə tə dzuŋu tə, loʼ soʼo n tɔb u wi, ghə n kaʼ ni tsəŋ.

Lukas 8:35

Ambə ghə̂ a bənə ni bə kòʼ ghə zey i shinə, ghə n bə kòʼ bə Yeso nsə wù wey Yeso â dzùm shinə zay u bwu wey n kow wi tə doʼnə fuu ghi Yeso nə tə n ndzə tə dzəŋŋə lòʼ dzɔb n tɔ̀b u wi wə̀. Tsəŋ zə n kwu ghə.

Kəfwaʼ 24:25

Ambə Pɔl tɔʼ tiilə dza ndow tə ghə nghee ghə̂ a khə ni loʼ tsətsəghə tii, zuŋu uwû, nsə nghee Zə̀ kə nə saʼanə ghə̂ ghə tii. Tsəŋ zə n kwu Feliks, tə n dza nə̀, “Khəə ndow nya, abə mə i ndzɔʼ keeli tsu nəŋə zə, Mə i kəm tɔŋɔ bə wɔ.”

Roma 12:3

Nghee tə̀ Zə̀ kə diinə mə n ndzuŋ ni fuu mə n daʼa kə, n dza bə tə ghaa adzəm nə̀, kə ghaa nə kɔʼlə naŋŋənə wû i ghaa zə tsəghəshiə nghee ghaa khə ni kɔʼlə tii, ghaa khə ni fəd ney ighə̂mə n ghəə ghey ghaa sàynə ni ghəŋə. Kay wù khə ni ghəŋŋə ndow ghəə ghə tə̀ Zə̀ kə fuunə wi n bəghəm i fə̀ŋ zə.

1 Kɔrint 15:34

Fən nyi dzəŋŋə bə n na n tɔb n ghaa, ghaa buu naŋa ghəə a bəbə ghən ghaa ghəŋŋənə. Tə̀ mə, a ngii loʼ tow kə dədlə kə nə̀ ghə̂ a loʼ a loʼ n fəŋŋə kə ghaa nə ghə khə way Zə̀ kə.

1 Kɔrint 9:25

I loʼ soʼo nə̀ ghə̂ ghey ghə nyəŋə baalənə ghə maʼlə tsu iwû ni naŋa kɔʼ ndow laŋ wey u laalənə ghəə â nyəŋə ghə. Ghə ghəŋŋə sey ni keeli kənaamə nə kə i doʼo tsuŋŋə way. Abə ghey, ghey kee nyəŋə ni keeli naamə key kə doʼlə tənə nə.

2 Kɔrint 5:13

Abə i kpaʼi loʼ nə̀ ghey zəghənu tə̀ ghaa moʼlənə, à loʼ bòʼ ghəə a Kəzə̀. Abə a loʼ nə̀ ghey zəghə way, à loʼ bòʼ ghaa.

Galeshia 5:23

ni bɔɔmə ghəŋŋə ghəə ghə nsə zuŋ kə umwam kə. Laŋ kə loʼ kə way dzə kə tuunə nə wə ka ghəŋə ghəə ghən.

Filipi 4:8

Ni guŋ kɔʼ ghɔɔmə zən a waazə ghə, ghaa khə ni naŋa tsu moʼlə tə ghaa n ghəə ghey a loʼnə isəŋə, ghəə ghey a khənə ngɔɔmə zə, ghəə ghey a loʼnə tsətsəghə, ghəə ghey a zownə, ghəə ghey a dzɔbənə, ghəə ghey a khənə kɔʼləmə, ghəə ghey ghə̂ ghə î ləghənə ni zow nsə ghəə ghey ghə î duʼlənə ni koʼ.

1 Tesalonika 5:6

Sey kə̂ saa nə̂ bweeli tə̀ a loʼ ghə̂ a loʼ ghə. Saa khə ni loʼ n sə̂ a zow ghə, saa i khə zuŋ kə umwam.

1 Tesalonika 5:8

Saa ghən saa loʼnə ghə̂ ghey ghə loʼnə nə kədaa fəd khə ni khə zuŋ kə umwam. Saa khə ni khə bəghəm i fə̀ŋ nsə ləghə zə tə a loʼ dzə̀ tə tsam kəŋ naŋa muu i saa. Saa khə ni khə tən moʼlə zey nə̀ Zə̀ kə i bəghəshiənu saa tə a loʼ taŋŋə kə tsam ni tsəd tow u ghey.

1 Timoti 1:10

Laŋ kə loʼ tə ghə̂ ghən ghə laŋŋənə, gheynum ghən ghə nyəŋinə n wû i ghə, ghə̂ ghən ghə kwɔɔ fìilənə ghə̂ ghə tə a loʼ ukɔd, ghə̂ ghən ghə badla ghəə ghə nsə ghə̂ ghən ghə kàanə zəd i Kəzə̀ zə nə kənunu nsə ghə̂ ghən ghə ghəŋŋənə ghəə ghən a kpiilə way ghi ghəə a Kəzə̀ ghə.

1 Timoti 1:14

Mûkəbii ə saa n dii bə ndzuŋ ə wi tə mə naʼ idzəm. Tə n ghəŋə soʼo nə̀ n keeli bəghəm i fə̀ŋ nsə ləghə zən i loʼnə i saa zə abə saa loʼnə nə kəfə kəmɔʼ ghi Yeso Klisto.

1 Timoti 1:2

N màʼlə kən tɔ̀ɔ bə tə wɔ a Timoti, wə ndzəm loʼnə tə a loʼ waa wuŋ n təŋkey saa dzəŋi bəghəm tə Klisto. N gɔŋŋə nə̀ Zə̀ kə, tə loʼnə Bày saa nsə Yeso Klisto tə loʼnə mûkəbii saa, dii wɔ n ndzuŋ, tə dii wɔ n sî i kwɔɔlə zə, tə ghəŋə soʼo nə̀ wə i muu nə ibuulə.

1 Timoti 1:5

Zuŋ key wə khənə ni fuu ghə n laŋ kən lo nə̀, dzûmə tə Klisto tədzəm tə i ləghə wû i ghə zə. Ghə i ndzəm khə ləghə zən i nuu bənə n fə̀ŋ tə ghə tə dzuŋu tə, i nuu bənə n moʼlə tə dzuŋu tə, i nuu bə soʼo n ndzəm ndzəm kə bəghəm n kow Klisto.

1 Timoti 3:11

Weyzən wən tə loʼnə wù wən tə gaamənə n dzəŋi kə dzûmə tə Klisto, teeli khə soʼo ni khə bəghəm i fə̀ŋ zə, khə mwam u dzuŋu wə. Tə khə way ni ghɔɔmə ghəə a bəbə ghə bòʼ aghə̂, tə khə soʼo way ni ngii ləghə lə mə.

1 Timoti 3:2

Wù wey tə loʼnə tow kə tə dzûmə tə Klisto tə, khə ni loʼ wù wey tə khə way bwu i loʼ zə n doʼo i wi. Tə khə ni loʼ wù wey tə gaʼnə fə̀ŋ n kow wey wi. Tə khə way ni mbadla fəələ n fə̀ŋ. Tə khə ni nyoʼlə ghəŋŋənə ghəə ghə. Tə khə ni loʼ wù wey ghə̂ a fuunə wi n ngɔɔmə zə. Tə khə ni loʼ wù wey tə loʼ ni kpiney ghə̂ ghey ghə bwey bəghənə n ndaw wi. Tə khə ni loʼ soʼo wù wey tə loʼ ni dii nduŋŋə ndow ghə̂ ghən ghə bəghəmnə tə Zə̀ kə.

1 Timoti 3:4

À khə ni loʼ wù wey tə khənə ni kwu keeli dzɔb ndaw wi, waa a wi a zownə tə wi, fuu soʼo wi n ngɔɔmə zə.

1 Timoti 3:8

Ghə̂ ghən ghə gaamənə nə̀ kəfwaʼ n dzəŋi kə dzûmə tə Klisto khə ni teeli khə mwam u dzuŋu wə, ghɔɔmə soʼo n jìi zey i loʼnə tsətsəghə. Ghə khə way ni ngii ləghə lə mə, ngii shiə soʼo way n sə̂ zə nə ukhəə.

1 Timoti 5:1

I kə wə nə tɔɔbə ghɔɔmənə tə nyim kə wù kə, i fədlə nyoʼlə ghɔɔmə ndow tə wi n dzə̂ i buulə zə tə wə ghɔɔmə tə tə̀lə̀. Wə i ghɔɔmə tə waa a fəghaŋ a num ghə tə wə ghɔɔmənə tə waazu.

Taytus 1:13

Ghəə ghən wù tûm Kəzə̀ wən â dzanə bòʼ ghə̂ a Krit loʼ isəŋə. À wey loʼ ghə i tii zə wə khə ni kpaa tənə tsu ghə n sə kə ghə, sey nə̀ ghə loʼ ni təmi taw tsu n bəghəm i fə̀ŋ i ghə.

Taytus 1:8

Tə fəd khə ni loʼ wù wey tə kpiney dzɔbənə ghə̂ ghə, ləghə kə ghəə zey i dzɔbənə. Tə khə ni loʼ wù wey tə loʼ ni kwu keeli wû u wi, loʼ tsətsəghə, zow, khə soʼo nghee tə teyyənə ghow kə ibwey kə wi kə a tii.

Taytus 2:7

Wɔ n wû wə wə̀ a Taytus, wə khə ni ghəŋŋə ghəə ghey a dzɔbənə nəŋə tədzəm sey nə̀ ghə loʼ ni koʼ ney kɔʼ mwam u dzuŋu wey wə khənə. Ghəə ghey wə diinə khə ni loʼ isəŋə, kə wə nə səə soʼonə.

Filemun 1:9

Nghee n sə ləghənə wɔ, a wey loʼ i ghii n buʼu bənə wɔ n wɔɔ kə. N tsəmə ney dzə way n taŋ nə̀ mə Pɔl, n loʼ nyim kə wù, loʼ soʼo n ndaw tsaʼ bòʼ Klisto.

1 Pita 1:13

Sey ghaa khə ni bayyə naŋa tsu fə̀ŋ tə ghaa ni fwaʼ. Ghaa teyyə kɔʼ kətow idəŋ, naŋŋə tsu soʼo ghow kə ibwey kə ghaa ni fwaʼ fwaʼ key Zə̀ kə ləghənə. Ghaa i ləmmə tənə ndzuŋ zey ghaa i keelinə abə Klisto i dzəŋŋə bənə.

1 Pita 4:7

Nəŋə zə n kuʼlə tə̀ fə wə udzəm ni bə may. Sey ghaa khə ni kwu keeli tsu wû i ghaa, ghaa təmi kɔʼ n fuu zə, sey nə̀, ghaa i loʼ ni tɔʼ gɔŋŋə.

1 Pita 5:8

Ney kɔʼ na ghə̂mə zə, ghaa təmi kɔʼ nə ifuu! Wù təngəmə ghaa tɔŋŋə də̀ŋ kə avəətsəə kə ghaalə kaabə tsənu tə̀ dəmow nə nəmmənə, i kəŋənə wù ni kwu fə.

2 Pita 1:6

N ghəə a Kəzə̀ ghey ghaa khənə, ghaa khə soʼo ni kwu keeli wû i ghaa. Nghee ghaa khə ni kwu keeli wû i ghaa, ghaa khə soʼo ni kow fə̀ŋ tə n nəŋə zə uchɔd. Nghee ghaa khə ni kow fə̀ŋ tə n nəŋə zə uchɔd, ghaa khə soʼo ni ghəŋŋə ndow kə ghəə ghey Zə̀ kə ləghənə.