Taytus 1:9 - Kaa n Kəzə̀ n fəghə mə

⁹ Tə khə ni loʼ wù tə ndzəm bəghəmnə naŋanə tûm i dzuŋu zə bòʼ Yeso Klisto ighələ tə̀ tə â zoʼlə neynə, sey nə̀, tə i loʼ ni kuu nduŋŋə ndow fə̀ŋ tə ghə̂ a loʼ ghə nə̀ isəŋə i tii zə, tə i loʼ soʼo ni faalə tiilə ndow aghəə tə̀ ghə̂ ghey ghə tuu maʼanə tûm i dzuŋu i tii zə.

Taytus 1:9 Mawu Ofanana

Kəfwaʼ 18:28

Tə n təmə zəə tsə ghə̂ a Təjuu n sə kə aghə̂ nə ighɔɔmə nghee tə â ney shiə kɔʼɔnə ghəə ghə n màʼlə K-a-zə̀ dii ndow tə ghə nə Yeso loʼ wù wey Zə̀ kə â dza naŋa nə̀ i tûm bənu.

1 Kɔrint 14:24

Ney kɔʼ na nya nə̀, wù kənunu nkee ghə̂ ghey ghə ka kam bəghəm tə̀ Klisto kee nyi bə n dzəŋi kə ghaa nə̀ ghaa adzəm ghaa naʼlə tûm Kəzə̀, ghəə ghey ghaa dzanə, zə i mɔmnu fə̀ŋ tə ghə tə, ghə i koʼ nə̀ ngoʼo Kəzə̀ ləmmə ghə.

1 Tesalonika 5:21

Ghaa i tɔʼɔ laalə tsuu ghəə ghə adzəm, ghəŋŋə ndow a ghey a dzɔbənə.

2 Tesalonika 2:15

Sey waazə ghə ghaa təmi taw tsu n bəghəm i fə̀ŋ i ghaa. Ghaa tɔʼ kwu keeli dzɔb tsu ghɔɔmə i səŋi zən ghey fuunə nə tə ghaa, nə̀ a loʼ kə n ghəə ghən ghey naʼlənə nkee n maʼlə wən ghey tɔ̀ɔ bənə tə̀ ghaa.

1 Timoti 1:10

Laŋ kə loʼ tə ghə̂ ghən ghə laŋŋənə, gheynum ghən ghə nyəŋinə n wû i ghə, ghə̂ ghən ghə kwɔɔ fìilənə ghə̂ ghə tə a loʼ ukɔd, ghə̂ ghən ghə badla ghəə ghə nsə ghə̂ ghən ghə kàanə zəd i Kəzə̀ zə nə kənunu nsə ghə̂ ghən ghə ghəŋŋənə ghəə ghən a kpiilə way ghi ghəə a Kəzə̀ ghə.

1 Timoti 1:15

Ghɔɔmə zən nə̀, “Yeso Klisto â bə fa n mbi ni bə bəghəshi ghə̂ a bəbə ghə.” Loʼ isəŋə, saa khə ni ndzəm ney ghɔɔmə i tii zə, saa bəghəm soʼo. Mə â ney kəsə n ghə̂ ghən adzəm ghə ghəŋŋənə ghəə a bəbə ghə.

1 Timoti 1:19

Tɔʼɔ təmi taw tsu kə n bəghəm i fə̀ŋ zey wə khənə n kow Klisto, wə i khə soʼo fə̀ŋ i zow zə. Ghə̂ a loʼnu nə̀ ghə n ndzəm tuu ni keeli fə̀ŋ tə zow tə, sey, ghə a bəəbə maʼa kɔʼ bəghəm i fə̀ŋ i ghə zə.

1 Timoti 4:9

À wən loʼ ghɔɔmə zən i loʼnə isəŋə, zə u ndzəm kpii soʼonə tə ghə̂ ghə adzəm ni bəghəm fuu.

1 Timoti 6:3

Abə wù loʼ diinə ghəə a nuu ghə, nə̀ a bəghəm dzəŋi way ghi tûm i dzuŋu zən bòʼ Mûkəbii Yeso Klisto, nə̀ a bəghəm dzəŋi soʼo way ghi muu i dzûmə tə Klisto tə,

2 Timoti 1:13

Tɔʼɔ kwu keeli dzɔb tsu ghəə ghən adzəm mə â dii bənə tə wɔ, tə a loʼ jìi zey i kpiinə tə wɔ ni dzûmə. Nghee wə bəghəmnə tə Klisto, khə soʼo iləghə n kow ghə̂ ghə, wə i loʼnu ni dzûmə jii zən n təŋkey wə loʼ nə kəfə kəmɔʼ ghi Yeso Klisto.

2 Timoti 2:2

Ney kɔʼ ghəə ghən wə â zownə mə n diinə n sə kə ndəmə aghə̂, wə fuu naŋa tsu ghəə a tii ghə n wɔ ghə̂ ghən ghə loʼ nə wə loʼ ni gaʼ fə̀ŋ zə n kow ghə, sey nə̀, ghə i loʼ ni dii nduŋŋə ndow tə ghə̂ ghə.

2 Timoti 2:25

Tə khə ni dii ndow ghə̂ ghey ghə zuulə baalənə wi nyaŋi fənyaŋi, n nəŋə i loʼ zə Zə̀ kə loʼnu ni ghəŋə nə̀ ghə kweyyə nuu bə fə̀ŋ tə ghə n ghəə a bəbə ghə, ghə zowkeeli soʼo isəŋə.

2 Timoti 3:14

A kee bə wɔ, təmi taw tsu kə nə isəŋə zey wə zoʼlə kɔʼ bənə nsə n ghəə zey wə bəghəmnə tii n təŋkey, wə khənu fə key ndzoʼo ghə̂ ghey wə koʼ neynə ghəə ghən n wɔ ghə loʼnə ghii kə.

2 Timoti 4:3

N dza sey n təŋkey nəŋə zə i bəghənu ghə̂ ghə i ləghə way ni zəllə ghɔɔmə i Kəzə̀ zən i loʼnə isəŋə, ghə i fədlə dzûmə ndow ghəə ghən fə̀ŋ tə ghə tə ləghənə. Ghə i tɔŋɔ zuŋŋə bə n səə ghə, ghə̂ a dii ghey ghə diinə ghəə ghey tuŋŋə u ghə u ləghənə ni zow.

Taytus 1:11

Wə khə ni ghəŋə nə̀ ghə buu naŋa ghɔɔmə i ghə i tii zə, n təŋkey ghə fwɔdlɔ maʼa kaabə təndaw tədzəm nghee ghə diinə ghə n ghəə ghey ghə khə way daʼa kə ni dii. Ghə ghəə a badla ghən dii kaabə n təŋkey ghə ləghə nə̀ ghə̂ ghə i fuu bə ghə n khəə wə.

Taytus 2:1

A kee bə wɔ a Taytus, wə khə ni teeli dii ndow kə dzûmə tə Klisto tə n ghəə ghey a bəghəm dzəŋi kɔʼnə ghi ghəə a Kəzə̀ ghə.

Màʼlə kə Jud tə̀ ghə̂ a Kəzə̀ ghə 1:3

Fə ghuŋ a dzuŋu ghə, nghee mə â tsəm ngii khə kənə zày ni tɔ̀ɔ bə tə ghaa nghee Zə̀ kə i dzəŋi bəghəshiənə saa adzəm tii, mə n koʼ tsu nə̀, i dzɔbənu tə mə ni tɔ̀ɔ bə tə ghaa, n dza bə tə̀ ghaa nə̀ ghaa təmi taw tsu n bəghəm i fə̀ŋ zən Zə̀ kə â fuu naŋanə tə ghə̂ a wi a zow ghə adzəm, ney nuu kəwɔɔ.

Chi dii 2:25

N kee ləghə kə nə̀ ghaa bɔɔmə təmi taw tsu n bəghəm i fə̀ŋ i ghaa ni ndow kuum n nəŋə zey mə i bəghənə tii.

Chi dii 3:11

Mə i kuʼlə bəghənu. Tɔʼɔ kwu keeli dzɔb tsu fə̂ key wə khənə, kə wù loʼ i bəkeeli naamə kə.

Chi dii 3:3

Moʼlə tsu ghəə zey ghə â diinə ghaa tii nsə ghəə ghey ghaa â zownə. Ghaa i dzûmə ndow ghəə a tii ghə, ghaa kweyyə nuu bə soʼo fə̀ŋ tə ghaa n ghəə a bəbə ghey ghaa ghəŋŋənə. Abə ghaa ka zhəm nuu kɔʼ, mə i bə n kow ghaa tə a loʼ wù tsɔŋɔ, ghaa i keeli soʼo way nəŋə zey mə i bəghənə tii.