Kolose 3:5 - Kaa n Kəzə̀ n fəghə mə

⁵ Sey, ghaa khə ni teeli tuu maʼa ghəə a bəbə ghən gow uwû ləghənə, tə a loʼ; ilaŋŋə, ghəə a dzəə ghə, ni mbuŋŋə ni nyəŋi ghi wù, moʼlə tə bəbə tə, nsə mə̂ wə, n təŋkey, mə̂ u loʼ ighələ tə̀ wù nə̀ ngɔɔmənə muʼu mə.

Kolose 3:5 Mawu Ofanana

Matyo 15:19

N təŋkey, à loʼ n fə̀ŋ zə moʼlə tə bəbə tə shiə kɔʼɔ bənə ni ghəŋə aghəə tə̀ a loʼ, ni wey wù, ni taa zaʼ wey wə nkee num wə, ni ghəŋə ghəə a laŋŋə ghə, ni tsɔŋ, ni bad aghəə, nsə ni tsayyə wù.

Roma 1:26

À wən loʼ ghəə zey i ghəŋənə nə̀ Zə̀ kə zəghə maʼa ndow ghə nə̀ ghə i ghəŋŋə ndow dzəə dzəə tə aghəə tey fə̀ŋ tə ghə tə ləghənə. Gheyzən a ghə a nyəŋi n wû i ghə, loʼ sey nə̀ i mə khə way ni doʼo sey.

Roma 1:29

À n fə̀ŋ tə ghə luu doʼo tən kə lii tə aghəə tey tə kpiilə way n sə K-a-zə̀, tə aloʼ ghəə a bəbə, umə̂, mwam u bəbə wə. Ghəə ghey a kpiilə way tə aloʼ kəghoʼ, ni wey wù, ni tsowwə ghɔɔmə, ni nəbə ghə̂ ghə, khə fənyiʼi n kow ghə̂ ghə, khəə kaabə soʼo təfəghəm.

Roma 6:13

Kə ghaa nə̂ bəghəmnə nə̀ bad kə uwû kə ghaa kə loʼ kə ghəŋŋə nə̀ ghaa i ghəŋŋə ghəə ghey a kpiilə way. Ghaa fəd khə ni fuu nyi may ndow wû i ghaa tə̀ Zə̀ kə tə a loʼ ghə̂ ghey tə bəghəshi bənə ghə nə̀ ivə, fuu ghə n muu i fəghə zə. Ghaa fuu may ndow soʼo wû i ghaa tə Zə̀ kə tə̀ tə loʼ ni ghəŋə nə̀ ghaa i fwaʼa ndow ghəə ghey a loʼnə tsətsəghə n sə kə wi.

Roma 6:6

Saa khənu nə̀ muu i wey zey saa â bùʼ khə tsənə mâ kpuu nuu ghi Yeso n zat kə fəkaʼ, sey nə̀, Zə̀ kə loʼ ni sow maʼa ghəə a bəbə ghən a fwaʼanə n kow saa. Zə̀ kə sow maʼa ghəə a bəbə ghən sey nə̀ kə saa nə kəm doʼlənə kɔd wə tə̀ ghəə a bəbə ghə.

Roma 7:23

A kee loʼ nə̀ n bə keeli shi kɔʼ nə̀ laŋ kə nuu kə loʼ n kow mə kə zuulə ballənə ghi laŋ kən n gaʼnə fə̀ŋ zuŋ tii. Laŋ kə tii kə ghəŋŋə nə̀ n doʼo kəkɔd tə bəb zən i fwaʼanə n kow mə.

Roma 7:5

I loʼ sey n təŋkey, nəŋə zey saa â nam muunə n jìi zey vən fə uwû i saa i ləghənə, saa â ngii khə zày ni ghəŋŋə ghəə a bəbə ghə, laŋ kə n baa chimmə may ndow saa ni ghəŋŋə ghəə a bəbə a tii ghə. Ghəə ghey saa ghəŋŋənə adzəm, a ney bə ivə.

Roma 8:13

N dza sey n təŋkey, abə ghaa muunə nghee tə̀ gow uwû ləghənə, ghaa i kpuunu. Nə̀ ghaa kee muu nghee tə̀ Zay kə Zow kə ləghənə, ghaa i wey maʼa ghəə a bəbə ghey a loʼnə n kow ghaa, ghaa i keeli imuu.

1 Kɔrint 5:1

Nya, ghə̂ a ndzəmə dza kaabənu nə̀ ghaa ghəŋŋə ghəə a laŋŋə ghə n fəŋŋə kə ghaa. Ghə dzanu nə̀ ghaa ghəŋŋə ndzoʼo ghəə a laŋŋə ghey abə a buʼ loʼ kə ghə̂ ghey ghə ka bəghəm tə Zə̀ kə, ghə way ni ghəŋə dzə. Ghə dzanu nə̀ wù loʼ loʼnu n fəŋŋə kə ghaa tə nyəŋinə ghi wey bày wi.

1 Kɔrint 6:11

À wən bɔɔmə loʼ ndzoʼo ghəə ghey ghaa a loʼ ghə â buʼu ghəŋŋə tsənə. Mûkəbii Yeso Klisto nsə Zay kə Zow kə n kee sow maʼa tsu ghaa n ghəə a ghaa a bəbə ghə, ghəŋə nə̀ ghaa i zow n sə K-a-zə̀, ghəŋə soʼo nə̀ ghaa i loʼ tsətsəghə n sə̂ K-a-zə̀.

1 Kɔrint 6:13

Ghə̂ a loʼ ghə a dza soʼo nə̀, “Ghə â ghəŋə ufəzəə tə̀ nəghə wə, ghəŋə soʼo unəghə tə̀ fəzəə wə.” Ow a loʼ isəŋə! A kee loʼ nə̀, Zə̀ kə î ləŋi maʼanu fə̂ u tii wə udzəm. Ghaa khə way ni ney wû i ghaa, ghaa i ghəŋŋə ghəə a laŋŋə ghə tii, ghaa khə ni fəd ney wû i ghaa, ghaa i kɔʼlə Mûkəbii tii. A loʼ Mûkəbii tə fuunə fə key wû u ləghənə.

1 Kɔrint 6:18

Zəghə maʼa na ghəə a laŋŋə ghə. Bəb i loʼ i way dzə wù ghəŋŋənə i mɔmnə gow uwû, wù wey tə ghəŋŋə ghəə a laŋŋə ghə kee ghəŋŋə ibəb n wû u wi.

2 Kɔrint 12:21

N tsəŋə nə̀ abə mə i kəm bənə, tow kə i ngii dəd mə n sə kə Zə̀ kuŋ bòʼ ghaa. Mə i kaʼ ni mow bòʼ ndəmə ghə̂ ghey ghə â ghəŋənə bəb zə, ghə a nam loʼ nə̀ ghə ka kam kweyyə nuu bə fə̀ŋ tə ghə tə n ghəə a ghə a dzəə ghə, ghəə a laŋŋə ghə nsə moʼlə tə dzəə tey ghə â khənə.

Galeshia 5:24

Ghə̂ ghən ghə loʼnə nə kəfə kəmɔʼ ghi Yeso Klisto, ghə n tuu maʼa ghəə ghən gow uwû ləghənə, baa naŋa kɔʼ n zat kə fəkaʼ.

Efesus 4:19

Ghə kəm khə way tow kə dədlə kə, ghə n wû i ghə fuu may nyi ndow ni ghəŋŋə ghəə a dzəə ghə, tɔʼ ngii khə zay n ghəə a tii ghə.

Kolose 2:11

Nghee tə ghaa loʼnə nə kəfə kəmɔʼ ghi Klisto, ghaa nya loʼ tə ghə n səghə tyi u ghaa wə. À kee loʼ nə̀ ghə ka tyi u ghaa u səghə dzə nghee ghə ndzəmə səghənə tyi u ghə wə a tii. Klisto â səghə tyi u ghaa nghee tə â ney nuu shi bənə ghaa n daʼa wən u ghəŋŋənə ghaa nə ghaa i ghəŋŋə ghəə a bəbə ghə.

1 Tesalonika 4:3

Zə̀ kə ləghə nə̀ ghaa i zow n muu i ghaa, ghaa tuu maʼa tən ghəə a laŋŋə ghə.

1 Tesalonika 4:5

Kə ghaa nə̂ muunə ni zhwɔdlɔ kaabə tsə tə̀ a loʼ nghee ghə̂ ghey ghə ka bəghəm tə̀ Zə̀ kə a ghəŋənə.

1 Timoti 6:10

I loʼ sey n təŋkey, ləghə zə ukhəə, i ney bə ghəə a bəbə ghə adzəm. Ghə̂ ghey ghə ngii shiə ndownə n sə̂ zə n ghəə ghə ukhəə n nyəŋ laʼ n bəghəm i fə̀ŋ i ghə. Fə̀ŋ tə nya fəmmə ghə bòʼ chɔd mən ghə keeli kaabənə.

Hibru 12:16

Kə wù ghaa u loʼ u nə ghəŋŋə ghəə a laŋŋə ghə, kə wù ghaa u loʼ u doʼlə nə̀ tə khə way Zə̀ kə tə a loʼ Isaw wən tə â fìinə daʼa wey tə â shi bə n ghii wə tə̀ a loʼ waa u sə isə wə n nəŋə i zəə zə imɔʼ.

Hibru 13:4

Tɔʼɔ kwu keeli n na ney zə iwû zə. Kə wù loʼ n ghə̂ ghey ghə ney dzənə wû zə nə shiə nyəŋinə ghi wù nuu a bii n təŋkey, Zə̀ kə i chɔdlɔnu ghə̂ ghey ghə shiə nyəŋinə ghi ghə̂ ghə a bii nsə ghə̂ ghey adzəm ghə ghəŋŋənə ghəə a laŋŋə ghə.

Hibru 13:5

Kə ghaa nə ləghənə ghəə ghə ukhəə ghə n muu i ghaa, ghaa i duʼlə n fə key ghaa khənə, n təŋkey Zə̀ kə dza nə̀, “Mə i bwuulə maʼa koʼ way ghaa, Mə i tûmmə naŋa koʼ soʼo way ghaa.”

Jems 4:1

À loʼ kee ghaa bwɔdlənə ngəd wə, zuulə ballə soʼo n wû i ghaa a? À loʼ ləghə zən ghaa khənə n fə̂ u mbi u fəmənə ghaa n fə̀ŋ tə ghaa.

1 Pita 2:11

Fə ghuŋ a dzuŋu ghə, n buʼu bə kəwɔɔ tə̀ ghaa nə̀, tə a loʼ ghə̂ ghey ghə bwey nyi bənə fa n mbi nsə ghə̂ ghən ghə tyi nyì doʼonə, kə ghaa nə ghəŋŋənə ghəə ghey gow uwû ghaa ləghənə, n təŋkey, u zuulə baalə fə̀ŋ tə ghaa.

Chi dii 21:8

A kee bə ghə̂ ghən ghə tsəŋənə, khə way bəghəm i fə̀ŋ zə, ghə nəb ityim, ghə̂ ghey ghə weynə ghə̂ ghə, ghə̂ a laŋŋə ghə, ghə̂ a fənnə ghə, ghə̂ ghən ghə ngɔɔmə muʼu mə nsə ghə̂ ghey ghə badlanə ghəə ghə, luʼu kə ghə kə loʼ n nyî zə uvələ zey sɔlfɔ bəʼlənə fu. À wən loʼ və zən i dzûmə ndow i sə̂ isə zə.”

Chi dii 22:15

Ghə̂ ghey ghə i kee nyi way fu inaʼ, loʼ ghə̂ ghey ghə ghəŋŋə ghəə a dzəə ghə nsə ghə̂ ghən ghə ghəŋŋə ghəə a fənnə ghə, ghə̂ ghey ghə ghəŋŋə ghə a laŋŋə ghə nsə ghə̂ ghey ghə weynə ghə̂ ghə, ghə̂ ghey ghə ngɔɔmə muʼu mə nsə ghə̂ ghey adzəm ghə ləghənə ni badla ghəə ghə n ghɔɔmə i ghə nsə n ghəə ghey ghə ghəŋŋənə.