Hibru 4:12 - Kaa n Kəzə̀ n fəghə mə

¹² Ghɔɔmə i Kəzə̀ i loʼ utaw, khə soʼo kədaʼa. I tɔb tsəghə təkɔb tədzəm. I khə kədaʼa ni nyi ndow n fə̀ŋ ə wù, n zay kə wù, zuŋ u wû u wù nsə n ghəb u wù. I loʼ ni saʼ moʼlə tə aghə̂ nsə ghə i ghaa zə wù dza i ghəŋŋə.

Hibru 4:12 Mawu Ofanana

Lukas 8:11

À wən lòʼ ghəə zey ghɔɔmə i fənkəfən zən dii nə̀, ndzoʼ tey lòʼ ghɔɔmə i Kəzə̀.

Tùm i dzuŋu zə kuum Yeso Klisto tə Jɔn â tɔɔnə 12:48

Wù loʼnu tə i saʼanə ghə̂ ghey ghə tuu maʼanə mə, tuu soʼo ni ney naŋa ghɔɔmə zuŋ, n təŋkey, a i loʼ ghɔɔmə zən i shi bənə n dzuu zuŋ, zə i saʼanə ghə n tsuʼ fey mbi i maynə tii.

Tùm i dzuŋu zə kuum Yeso Klisto tə Jɔn â tɔɔnə 6:51

N loʼ baa key kə fuunə muu zə, kə key kə shi tsu bənə idəŋ. Wù wey tə zə̂nə baa kə tii kə î keeli muu zə itsali. Baa kən n fuunə loʼ wû wuŋ. N fuu ni kùmshi tow u ghə̂ a mbi nə̀ ghə keeli muu zə itsali.”

Kəfwaʼ 2:37

Ambə ghə zow tsunə ghəə ghən, ghəə a tii ghə n ngii mɔm ghə n fə̀ŋ, ghə n bəb tə Pita nsə ngəd tə loʼ tey nə̀, “Waazə ghə, ghey i nya jiə tsu ngee?”

Kəfwaʼ 4:31

Ambə ghə gɔŋŋə may tsunə, luʼu tə n noʼlə tsu n luʼu key ghə â təmdzəŋi doʼonə tii. Zay kə Zow kə n nyi bə n kow ghə, ghə n zey ni naʼlə tûm Kəzə̀ nə ghə tsəŋə way.

Kəfwaʼ 5:33

Ambə ghə̂ a ndaw tsə ghey zow tsunə sey, fə̀ŋ tə n fə nay ndow ghə tii, ghə n ləghə ni wey ngəd tə Yeso.

Kəfwaʼ 7:38

À loʼ wi tə â loʼnə ghi ghə̂ ghə Izree ghə n nəŋə zey ghə â zuŋŋə doʼonə n mbvən ə ntsaŋ. Tə â loʼ fu, ghə bày bày a saa ghə n loʼ fu, tsəndəghə zey zə â ghɔɔmənə tə wi n kaʼ u Sinay n loʼ soʼo fu. Â loʼ fu n Kaʼ u Sinay tə â ney kɔʼnə ghɔɔmə i Kəzə̀ zən i ghəŋŋə nə̀ ghə̂ a keeli muu zə itsali ni fuu bə tə saa.

Roma 1:16

N dədlə way n tow kə ni naʼa tûm i dzuŋu zə, n təŋkey, tûm i dzuŋu zən loʼ daʼa K-a-zə̀ kən kə bəghəshiənə ghə̂ ghey adzəm ghə bəghəmnə tə Klisto. Tûm tii zey tsu dzə n kow ghə̂ a Təjuu ghə tə̀ ghii zə ni ndow tə̀ ghə̂ ghən ghə way ghə̂ a Təjuu ghə.

1 Kɔrint 1:24

A kee bə tə̀ ghə̂ ghən Zə̀ kə tɔŋɔnə nə̀ ghə keeli ibəghəshi, nə̀ à loʼ kə ghə̂ a Təjuu nkee ghə̂ ghən ghə way ghə̂ a Təjuu ghə, tûm tii loʼ nə̀, Zə̀ kə dii bə daʼa kə wi nsə tɔb u wi wə n bam i Yeso Klisto.

2 Kɔrint 2:17

Ghey way dzə tə̀ a loʼ ndəmə ghə̂ a loʼ ghə, ghə ney kɔʼnə ghɔɔmə i Kəzə̀ zə ni kəŋ ukhəə tii. Ghey naʼlə ghɔɔmə i Kəzə̀ n fə̀ŋ tə zow tə tə̀ a loʼ ghə̂ a kəfwaʼ a Klisto, Zə̀ kə tûm bənə.

2 Kɔrint 4:2

Ghey n tuu maʼa ghəə a dədlə a kətow ghey ghə̂ a ghəŋnənə nə kələm. Ghey ghəŋŋə way ghəə a tsìi ghə, ghey fwɔdlɔ soʼo way ghɔɔmə i Kəzə̀ zə. Ghey kee ghɔɔmə bə isəŋə n mgbaŋ nə̀ ghə̂ adzəm ghə i khə n fə̀ŋ tə ghə nə̀ ghəə ghey ghey ghəŋŋə, a kpiinu n sə K-a-zə̀.

Efesus 5:13

Abə ghaa naŋa bənə ghəə ghən adzəm nə utsə̀, ghə̂ ghə i tɔʼ koʼ tsu ghəə a tii ghə, n təŋkey, tsə u baŋa bə tii.

Efesus 5:26

Tə â ghəŋə ghə i zən ni ghəŋə nə̀ ghə̂ a ndaw Kəzə̀ ghə i zow n sə̂ kə wi. Tə n sow maʼa tsu bəb i ghə n ghɔɔmə i Kəzə̀ tə̀ tə nə sownə nə mmuu.

Efesus 6:17

Dzəŋə keeli kɔʼ na bəghəshi i ghaa zə nə kətow tə̀ a loʼ kətaŋŋə ni kə̀ŋ naŋa tow kə ghaa. Ghaa ney kɔʼ ghɔɔmə i Kəzə̀ tə̀ a loʼ kɔb zən Zay kə Zow kə fuunə tə̀ ghaa.

1 Tesalonika 2:13

À wey loʼ ghə i tii zə ghey fuu zeelinə zɔŋŋə kə tə̀ Zə̀ kə n təŋkey ghɔɔmə i wi zən ghaa â zownə n wɔ̂ ghey, ghaa n bəghəm kɔʼ, ghaa â bəghəm naŋa koʼ nə̀ a loʼ ghɔɔmə i Kəzə̀, a way dzə ghɔɔmə i wù sɔŋtsuʼ. À ndzəm loʼ ghɔɔmə i Kəzə̀ n tənkey, ghɔɔmə i tii i fwaʼa n fə̀ŋ tə ghaa ghəŋŋə nə̀ bəghəm i fə̀ŋ i ghaa zə nyîmmə.

1 Tesalonika 5:23

Ghey gɔŋŋə nə̀ Zə̀ kən kə ghəŋŋənə nə̀ fə̀ŋ tə ghaa tə i loʼ nə ibuulə, n wû u wi kə bə ghəŋə nə̀ ghaa i zow n muu i ghaa. Ghey gɔŋŋə nə̀ ghəə adzəm ghaa ghəŋŋənə, ghəə ghey ghaa ləghənə nsə ghəə ghey ghaa moʼlənə i khə way bwu i loʼ zə abə Mûkəbii saa Yeso Klisto i bə dzəŋŋənə.

Hibru 13:7

Kə ghaa nə neyzəənə ghə̂ ghey ghə â diinə ghaa n jìi, tɔŋŋə ghə̂ ghən ghə a khəənə ghəə a Kəzə̀ ghə tə̀ ghaa. Moʼlə tsuu n na jìi zey ghə â muunə tii, ghaa dzûmə ndow ghow kə ibwey kə ghə n bəghəm i fə̀ŋ zey ghə â khənə n kow Zə̀ kə.

Hibru 6:5

Aghə̂ nə̀ ghə mâ zow ghɔɔmə i Kəzə̀ zə, keeli tsu nə̀ i dzɔbənu. Ghə n mɔm zow soʼo ndzoʼo daʼa wey u loʼnə n mbi zən i bəghənə.

Jems 1:18

 tsəm kɔʼ Kəzə̀ nə saa doʼo bə waa a wi n bam i ghɔɔmə i wi zən i loʼnə isəŋə, sey nə̀, saa loʼ ni doʼo ghə̂ ghey ghə tsəghəshinə fə wən tə bɔmnə fa n mbi udzəm.

1 Pita 1:23

N dza sey n təŋkey n bam i ghɔɔmə i Kəzə̀ zən i fuunə muu zə, i loʼ soʼonə nəŋə tədzəm, ghə n ji kuulə ghaa tə a loʼ waa a wù wey tə kpuu way, nə̀ à way dzə tə a loʼ waa a wù sɔŋtsuʼ wey tə loʼ nə̀ tə kpuunu.

Chi dii 1:16

Tə n khə nsəghəbələ nsəghəmbəghə n wɔɔ kə wi kə zəə kə. Kɔb nə̀ i tɔbə badla təbəghə, zə n shi bə n dzuu i wi. Tum-usə̂ u wi wə n nyiəllə tə aloʼ mgbala kə tsə.

Chi dii 19:15

Kɔb i tɔbə zə n shi bə n dzuu i wi. A loʼ n kɔb ə tii, tə i təmə zəənə naʼa tə. Tə i saʼa ghə n wɔɔ a taw ghə, tə i dəʼlə soʼo ghə n nəghə u fəə u Zə̀ kən kə khənə daʼa wə udzəm tə ghə nə dəʼlənə lami tə n nyùʼ key ghə kammənə nlə n təlami mə tii.

Chi dii 19:21

A ghey ghə â doʼo səənə, ghə n wey n maʼa ghə n kɔb zey zə a shiə bə n dzuu i wù wən tə â nyəŋənə khinyam key. Nnən ndzəm mə bə fə nuu kɔʼ nyam tə ghə tə ghə loʼ ni fə.

Chi dii 2:16

Ghaa khə ni kweyyə nuu bə fə̀ŋ tə ghaa n ghəə a bəbə ghən ghaa ghəŋŋənə. Nə a way sey, mə i maŋa bəghə n fəŋŋə kə ghaa, n zuu ballə ghi ghaa n kɔb zən i loʼnə n dzuu zuŋ.

Chi dii 2:23

Mə i wey maʼa tsu soʼo ghə̂ ghey adzəm ghə neynə ghow kə ibwey kə wi kə. Dzəŋi u dzûmə tə Klisto udzəm i keeli tsu nə̀ à loʼ mə n khənə fə̀ŋ tə aghə̂ nsə moʼlə tə aghə̂ tə tədzəm. Ghə i keeli soʼo nə̀ mə i tsəə dzəŋŋə kə kay wù ghə n fə key kə kpiilənə ghi ghəə a wi a ghəŋŋə ghə.

Chi dii 20:4

Mə n koʼ ndow kuu wə udəŋ nə ghə̂ ghey ghə â doʼonə tii, ghə n fuu ghə n daʼa kə ni saʼ. Mə n koʼ ndow soʼo zay u ghə̂ ghən ghə â gboo tôw u ghə wə boʼnə ghə â tiilə dza aghəə bòʼ Yeso tiilə dza soʼo aghəə bòʼ ghɔɔmə i Kəzə̀. Mə n koʼ ndow soʼo ghə̂ ghey ghə â ka ngɔɔmə faalə kə nyam mbvən key, muʼu fey fə fiilənə wi, ka ney tsə̀ə faalə kə nyam mbvən key n kaʼ usə u ghə nkee n wɔɔ kə ghə. Ghə n doʼo bə utaw, saʼ soʼo tə a loʼ udəŋ ghi Klisto nə tənum kam.